1. Yezu ye Samarikacɛ min kɛnɛya, ale y’a ka waleɲumanlɔn yira cogo di?

CƐƐ tan dɔw jigi tigɛnin lo sabu kuna bana b’u la ani a be juguyara ka taga. Loon dɔ, u ye Karamɔgɔba Yezu ye yɔrɔjan. U tun y’a mɛn ko a be banabagatɔ sifa bɛɛ kɛnɛya ani u lanin b’a la ko a be se k’olu fana kɛnɛya. O kama, u kulera ko: “Karamɔgɔ Yezu, makari an na.” Yezu ye cɛɛ tan nunu bɛɛ kɛnɛya pewu! Siga t’a la, u bɛɛ tun be Yezu waleɲuman lɔn a ka ɲumanya kosɔn. U la kelen tun ye Samarika ye. Ale ma Yezu waleɲuman lɔn * a kɔnɔ dɔrɔn, nka a y’o yira ka gwɛ. A kɛnɛyara minkɛ, “a tora ka Ala tanu kosɔbɛ.”—Luka 17:12-19.

2-3. a) Mun na tuma dɔw la an t’an ka waleɲumanlɔn yira? b) An bena mun lo lajɛ barokun nin na?

² Ni mɔgɔ dɔ ye ɲumanya kɛ an ye, an ka ɲi k’a yira o tigi la ko an b’a waleɲuman lɔn i ko Samarikacɛ y’a kɛ cogo min na. Nka tuma dɔw la, an be se ka ɲinɛ k’a fɔ i ni ce wala k’a fɔ tɔɔw ye an be min miiri u ka ɲumanya koo la.

³ Barokun nin na, an bena a ye fɛɛn min kama a kɔrɔtanin lo an k’an ka waleɲumanlɔn yira. Bibulu be mɔgɔ dɔw kofɔ minw y’u ka waleɲumanlɔn yira ani a be dɔ wɛrɛw kofɔ minw m’o kɛ. An bena u ka koow lajɛ. O kɔ, an bena a ye an be se k’an ka waleɲumanlɔn yira cogo tigitigi minw na.

4-5. Mun na an ka ɲi k’an ka waleɲumanlɔn yira?

⁴ Jehova ye ɲɛyirali ɲuman ye an fɛ. A b’a ka waleɲumanlɔn yira cogo caaman na. Ɲɛyirali fɛ, a b’a sagokɛlaw duga (2 Sam. 22:21; Zab. 13:6; Mat. 10:40, 41). Bibulu b’an jija an ka ‘Ala ladege, bari an y’a deenw ye minw koo ka d’a ye.’ (Efɛz. 5:1). O la, kuun jɔnjɔn min kama an b’an ka waleɲumanlɔn yira, o ye ko an b’a fɛ ka Jehova ladegi.

⁵ An k’a lajɛ kuun wɛrɛ min kama an b’a yira tɔɔw la ko an b’u waleɲuman lɔn. Waleɲumanlɔn be komi dumuni diiman. N’an b’a dumu ni tɔɔw ye, o yɛrɛ lo ka di ka tɛmɛ. O cogo kelen na, ni mɔgɔw b’an waleɲuman lɔn, an ninsɔn be diya. N’an fana b’a yira tɔɔw la ko an b’u waleɲuman lɔn, u ninsɔn be diya. N’an ye mɔgɔ dɔ waleɲuman lɔn, o tigi b’a ye ko a ye fɛɛn min kɛ an ye, o y’an nafa tiɲɛn na. O b’a to an n’o tigi ka teriya be sabati.

6. An be kuma minw fɔ ka tɔɔw waleɲuman lɔn, o ni yiriden sanulaman bɔnin be ɲɔgɔn fɛ cogo di?

⁶ An be kuma minw fɔ walisa k’a yira tɔɔw la ko an b’u waleɲuman lɔn, o nafa ka bon kosɔbɛ. Bibulu b’a fɔ ko: “Kuma bɛnnen min fɔra a waati la, o bɛ i ko jiriden bisigi min dilara ni sanu ye k’a bila warijɛ minan kɔnɔ.” (Talenw 25:11, Bible senuma). Ni yiriden dɔ dilanna ni sanu ye ka bila warigwɛ minan kɔnɔ, o cɛ ka ɲi dɛ! Miiri k’a filɛ o nafa ka bon cogo min na! N’u y’o ɲɔgɔn d’i ma, o bena mun lo kɛ i la do? I be kuma minw fɔ walisa k’a yira tɔɔw la ko i b’u waleɲuman lɔn, o nafa ka bon o cogo la. A to i hakili la fana ko yiriden min dilanna ni sanu ye, o be se ka mɛɛn. O cogo kelen na, i be min fɔ walisa ka mɔgɔ  dɔ waleɲuman lɔn, o ka di o tigi ye ani a hakili be se ka to o la a sii tɔɔ bɛɛ la.

7. Ka kɛɲɛ ni Zaburuw 69:31 ye, Dawuda y’a ka waleɲumanlɔn yira cogo di? Zaburu sɛbɛbaga wɛrɛw y’o ɲɔgɔn kɛ cogo di?

⁷ Galen, Ala sagokɛla caaman y’u ka waleɲumanlɔn yira. U la dɔ ye Dawuda ye (Zaburuw 69:31 kalan). Tiɲɛn batoli koo tun ka gwɛlɛ a ma kosɔbɛ ani a y’o yira a ka kɛwalew fɛ. A y’a ka nafolofɛn caaman di Alabatosoba lɔli kama. Azafu bɔnsɔnw fana y’u ka waleɲumanlɔn yira. U ye zaburuw wala tandoli dɔnkili dɔw sɛbɛ. U ka dɔnkili dɔ la, u ye Ala fo ani u y’a ka “kɛta kabakomanw koo fɔ.” (Zab. 75:2). A gwɛnin lo ko Dawuda ni Azafu bɔnsɔnw tun b’a fɛ k’a yira Jehova la k’u b’a waleɲuman lɔn kosɔbɛ a ka dugaw bɛɛ kosɔn. Ele fɛ, an be se k’o zaburu sɛbɛbagaw ladegi cogo di?

8-9. Ciden Pol y’a yira cogo di ko a b’a balimaw waleɲuman lɔn? Nafa juman lo sɔrɔla o la?

⁸ Ciden Pol tun b’a balimaw kanu ani a y’o yira a ka kumaw fɛ. A tun be to ka barika la Ala ye u kosɔn a ka deliliw la. A ka lɛtɛrɛw sababu fɛ fana, a tun b’a to a balimaw k’a lɔn k’u koo ka gwɛlɛ a ma. Ɔrɔmukaw 16:1-15 kɔnɔ, a y’a kerecɛnɲɔgɔn 27 weele u tɔgɔ la. Ɲɛyirali fɛ, a ko Pirisili ni Akilasi “y’u yɛrɛ nii di” ale kosɔn. A y’a fɔ fana ko Febe ye “mɔgɔ caaman dɛmɛ kosɔbɛ,” hali ale Pol yɛrɛ. A y’o balima kanulenw tando u ka baaraba kosɔn.

⁹ Pol tun b’a lɔn ko a balimaw ye mɔgɔ dafabaliw ye. Nka a ye lɛtɛrɛ min sɛbɛ Ɔrɔmukaw ma, o kuncɛtɔ, a sinsinna a balimaw ka jogo ɲumanw lo kan. Tuma min na, u tun be Pol ka lɛtɛrɛ kalanna kafodenw ɲɛɛ na, miiri k’a filɛ o tandoli kumaw y’o balimaw jija cogo min na! Siga t’a la, o ye Pol n’o balimaw ka teriya sabati. I ka kafomɔgɔw be ɲuman min kɛ wala u be kuma ɲuman minw fɔ, yala i ka teli k’u waleɲuman lɔn o kosɔn wa?

10. Yezu y’a ka kalandenw waleɲuman lɔn cogo min na, an be kalan juman lo sɔrɔ o la?

¹⁰ Yezu ye kuma dɔw lase kafo dɔw ma Azi mara la. O kumaw na, a y’a ka kalandenw waleɲuman lɔn u ka baara kosɔn. Ɲɛyirali fɛ, a ye kuma min lase Tiyatiri kafo ma, a y’o daminɛ ko: “Aw be min kɛra, ne b’o lɔn. Ne koo ka d’aw ye cogo min na, ani aw jigi be ne kan cogo min na, ne b’o lɔn, n’aw ka baara kɛcogo, ani aw ka muɲuli, ne b’o bɛɛ lɔn. Aw be baara min kɛ sisan, o ka ca ni fɔlɔta ye.” (Yir. 2:19). Yezu y’a yira ko Tiyatiri balimaw ye dɔ fara u ka waajuli baara kan. Jogo ɲuman minw y’u lasun k’o baara ɲuman kɛ, a y’u tando fana o kosɔn. Tiɲɛn lo ko Yezu ye Tiyatiri balima dɔw ladi. Nka, a y’a ka kumaw daminɛ ani a y’u laban ni jijali kumaw ye (Yir. 2:25-28). Miiri k’a filɛ Yezu be ni kuntigiya min ye kafow kun na: ale lo y’u bɛɛ Kuntigi ye! An be baara minw kɛ a ye, waajibi tɛ a k’an fo o kosɔn. O bɛɛ n’a ta, a b’a jati ko a kɔrɔtanin lo a k’an waleɲuman lɔn. O ye ɲɛyirali ɲuman ye diinan mɔgɔkɔrɔw fɛ dɛ!

11. Ka kɛɲɛ ni Eburuw 12:16 ye, Ezawu ye fɛɛn senumanw jati cogo di?

¹¹ A fɔ man di nka, Bibulu be mɔgɔ dɔw kofɔ minw ma kɛ ɲumanlɔnbagaw ye. Ɲɛyirali fɛ, Ezawu bangebagaw tun be Jehova kanu ani u tun be bonya la a kan. O bɛɛ n’a ta, Ezawu ma bonya la fɛɛn senumanw kan (Eburuw 12:16  kalan). * A y’a ka ɲumanlɔnbaliya yira cogo di? A kɔrɔtɔra k’a ka kɔrɔya feere a dɔgɔcɛ Yakuba ma. A y’a falen ni sɔsɔ tasa ye (Zɛnɛzi 25:30-34). Kɔfɛ, Ezawu nimisara o kosɔn. A m’a ka kɔrɔya jati fɛɛn nafamanba ye minkɛ, a tun ka ɲi ka duga minw sɔrɔ, a fɔnna u kɔ. Nka a ɲiniko tun lo.

12-13. Israɛldenw y’u ka ɲumanlɔnbaliya yira cogo di? O nɔfɛkow kɛra mun ye?

¹² Israɛldenw tun ka ɲi ka Jehova waleɲuman lɔn koo caaman kosɔn. Jehova ye tɔɔrɔ tan lase Ezipitikaw ma ani a ye Israɛldenw kisi ka bɔ jɔnya la. O kɔ, a y’u kisi a kɛtɔ ka Ezipitikaw ka kɛlɛbolo bɛɛ halaki Kɔgɔji Wulen na. O kama, u ye dɔnkili la ka Jehova tando walisa k’a waleɲuman lɔn. Nka, yala u tora ka Jehova waleɲuman lɔn tuma bɛɛ wa?

¹³ Jehova tun ye fɛɛn ɲuman caaman kɛ Israɛldenw ye. Nka u ye gwɛlɛya wɛrɛw sɔrɔ tuma min na, u sinna ka ɲinɛ o fɛɛnw bɛɛ kɔ. U y’a yira k’u ye ɲumanlɔnbaliw ye (Zab. 106:7). Cogo di do? “Jama bɛɛ tora ka ŋunuŋunu Musa ni Arɔn kama.” Nka tiɲɛn na, u tun be ŋunuŋununa Jehova lo kama (Ɛkiz. 16:2, 8). U ka ɲumanlɔnbaliya ma diya Jehova ye fewu! Kɔfɛ, a k’o jama bɛɛ bena sa kongokolon kɔnɔ, ka Zozuwe ni Kalɛbu niin bɔ a la (Nɔnb. 14:22-24; 26:65). Mun lo bena an dɛmɛ an k’an yɛrɛ tanga o ɲɛyirali juguw ma ani ka tugu ɲɛyirali ɲumanw kɔ? An k’o lajɛ.

14-15. a) Furuɲɔgɔnmaw be se k’a yira cogo di k’u be ɲɔgɔn waleɲuman lɔn? b) Bangebagaw be se k’u deenw degi cogo di u ka kɛ ɲumanlɔnbagaw ye?

¹⁴ Denbaya kɔnɔ. Ni denbayamɔgɔw kelen kelen bɛɛ be ɲɔgɔn waleɲuman lɔn, o b’u bɛɛ nafa. Ni furuɲɔgɔnw be ɲɔgɔn waleɲuman lɔn, u ka furu be sabati. A tɛ gwɛlɛya u ma fana ka yafa ɲɔgɔn ma. Ni cɛɛ b’a muso kanu, a muso be wale ɲuman minw kɛ ani a be kuma ɲuman minw fɔ, a b’o kɔrɔsi. Nka o dɔrɔn tɛ, a “b’a tanu” fana (Talenw 31:10, 28). Muso hakilitigi b’a to a cɛɛ k’a lɔn a ka kɛwale tigitigi minw ka di ale ye.

¹⁵ Bangebagaw, aw be se k’aw deenw degi cogo di u ka kɛ ɲumanlɔnbagaw ye?  Aw k’a to aw hakili la ko aw deenw bena aw ka kuma n’aw ka kɛwalew lo ladegi. O la, aw ka kɛ ɲɛyirali ɲumanw ye u fɛ. N’u ye fɛɛn dɔ kɛ aw ye, aw k’u fo o kosɔn. Aw k’a yira u la fana ko ni mɔgɔ ye fɛɛn dɔ di u ma, u ka ɲi k’a fɔ i ni ce. Aw k’u dɛmɛ u k’a faamu ko waleɲumanlɔn be bɔ mɔgɔ dusukun lo la ani ko n’u y’o yira u ka kumaw fɛ, o be tɔɔw nafa kosɔbɛ. Balimamuso dɔ tɔgɔ ko Clary, a ko: “N’ bamuso saan 32, a ye denmisɛn saba lamɔ a kelen sabu u tun ye n’ facɛ don kaso la. Tuma min na ne fana ye saan 32 sɔrɔ, n’ y’a faamu n’ bamuso ye gwɛlɛya minw sɔrɔ o wagati la. O la, n’ y’a fɔ a ye ko a ye jijaliba min kɛ ka ne ni n’ balimacɛw lamɔ, n’ b’a waleɲuman lɔn kosɔbɛ o kosɔn. A ma mɛɛn, n’ bamuso y’a fɔ n’ ye ko n’ ka kumaw diyara ale ye kosɔbɛ. A ko halibi n’ale miirila u la, u b’ale ninsɔn diya.”

16. Ɲɛyirali dɔ fɔ min b’a yira ko n’an b’an ka waleɲumanlɔn yira tɔɔw la, o b’u jija.

¹⁶ Kafo kɔnɔ. An b’an balimaw jija, n’an b’a yira ko an b’u waleɲuman lɔn. Jorge be ni saan 28 ye ani diinan mɔgɔkɔrɔ lo. A banana kosɔbɛ fɔɔ a ye kalo kelen kɛ a ma se ka taga lajɛnw na. Tuma min na a y’a daminɛ ka taga lajɛnw na, a tun tɛ se ka kalanw kɛ. A ko: “N’ tun b’a jati ko nafa foyi tɛ n’ na sabu n’ tun tɛ sera ka kunkanbaaraw dafa kafo kɔnɔ tugun. Nka lajɛn bannin kɔ loon dɔ, balimacɛ dɔ y’a fɔ n’ ye ko: ‘N’ b’a fɛ k’i fo sabu i ye ɲɛyirali ɲuman ye n’ ka denbayamɔgɔw fɛ. I ye kalan minw kɛ saan tɛmɛninw na, u y’an nafa cogo min na, a tɛ se ka fɔ. U y’an ka limaniya barika bonya.’ O kumaw ye n’ dusu sɔrɔ kosɔbɛ, fɔɔ n’ ɲɛji jigira. A ye min fɔ, n’ mako tun b’o yɛrɛ lo la tigitigi.”

17. Jehova tɛgɛ labilanin lo. Ka kɛɲɛ ni Kɔlɔsikaw 3:15 ye, an be se k’a waleɲuman lɔn cogo di o kosɔn?

¹⁷ An k’an ka waleɲumanlɔn yira Ala la, ale min tɛgɛ labilanin lo. Jehova be dumuni caaman d’an ma Alako ta fan fɛ. Ɲɛyirali fɛ, an be cikan nafamanw sɔrɔ an ka lajɛnw na, an ka gafew kɔnɔ ani an ka site web kan. N’a sɔrɔ i delila ka kalan dɔ lamɛn, ka barokun dɔ kalan wala ka fɛɛn dɔ filɛ JW Telewisɔn kan ani k’a fɔ ko: “N’ mako tun b’o lo la tigitigi.” An be se k’a yira Jehova la cogo di ko an b’a waleɲuman lɔn? (Kɔlɔsikaw 3:15 kalan). O kɛcogo dɔ ye k’a fo a ka nilifɛnw kosɔn tuma o tuma an ka deliliw la.—Zaki 1:17.

18. An be se k’an ka waleɲumanlɔn yira cogo di an ka Masaya Boon koo la?

 ¹⁸ An b’a yira fana ko an be Jehova waleɲuman lɔn, n’an b’an ka Masaya Boon saniya ani k’a ladon ka ɲɛ. An b’an niin don tuma o tuma a saniyako la. Minw be sono ni videwo koo ɲɛnabɔ, olu fana b’u jija k’o minanw ladon ka ɲɛ. N’an b’an ka Masaya Boon ladon ka ɲɛ, a bena mɛɛn ani an mako tɛna kɛ wariba la walisa k’a lalaga. O la, an ka kafo be wari min mara, o bena di ka Masaya Boon wɛrɛw lɔ wala k’u lakuraya duniɲa faan wɛrɛw la.

19. Kafokulu kɔrɔsibaga dɔ n’a muso ka koo be mun lo yira i la?

¹⁹ Minw be baaraba kɛ an ye. N’an b’an ka waleɲumanlɔn yira mɔgɔ la, o be se k’a tigi ka miiriya yɛlɛma a ka gwɛlɛyaw koo la. An ka kafokulu kɔrɔsibaga dɔ n’a muso ka koo lajɛ. Loon dɔ nɛnɛtuma na, u ye waajuli kɛ tile kuru bɛɛ la ani u sɛgɛnninba kɔsegira soo. Nɛnɛ tun be yen fɔɔ a muso lara n’a ka nɛnɛduloki gwiliman ye. O dugusagwɛ sɔgɔma, a y’a fɔ a cɛɛ ye ko ale tɛna se k’o baara kɛ tugun. O loon bɛɛ, u ye lɛtɛrɛ dɔ sɔrɔ. Betɛli lo tun y’o lɛtɛrɛ ci balimamuso ma. U y’a fo a ka waajuli baara n’a ka muɲuli kosɔn. U ko u b’a lɔn ko a man nɔgɔ ka to ka si yɔrɔ wɛrɛ lɔgɔkun o lɔgɔkun. A cɛɛ ko: “O tandoli kumaw y’a dusu sɔrɔ fɔɔ a m’a fɔ tugun ko a bena o baara dabila. Ni ne fari tun fagara ani n’ b’a fɛ k’o baara dabila, tuma caaman na, ale yɛrɛ lo tun be n’ jija n’ kana o kɛ.” O balimacɛ ye kafokulu kɔrɔsili baara kɛ n’a muso ye saan 40 ɲɔgɔn kɔnɔ.

20. Loon o loon, an ka ɲi k’an jija ka mun lo kɛ ani mun na?

²⁰ An k’an jija loon o loon k’an ka waleɲumanlɔn yira an ka kumaw n’an ka kɛwalew fɛ. Bi, mɔgɔw fanba ye ɲumanlɔnbaliw ye. O kama, n’an be tɔɔw waleɲuman lɔn, an bena u dɛmɛ u k’u ka gwɛlɛyaw muɲu. N’an b’an ka waleɲumanlɔn yira tɔɔw la, an bena teri sɔbɛw sɔrɔ ani an bena se ka teriya kɛ n’u ye fɔɔ abada! Min yɛrɛ kɔrɔtanin lo kosɔbɛ, o ye ko n’an be tɔɔw waleɲuman lɔn, an b’an Faa Jehova lo ladegira. Ale tɛgɛ labilanin lo ani a be tɔɔw waleɲuman lɔn.