Kɔrɔsili Sangaso minw bɔra saan 2019, ɲiningali nunu jaabiliw be sɔrɔ u kɔnɔ. I b’o jaabiliw lɔn wa?

Jehova ka layidu nin kɔrɔ ko di: “Kɛlɛkɛminan fɛɛn o fɛɛn dilanna i kama, o si tena foyi ɲa”? (Ezayi 54:17).

An ka la a la ko Jehova bena an tanga “mɔgɔ farimanw dusu” ma (Ezayi 25:4, 5). An juguw tɛna se k’an mako sa pewu.​—w19.01, ɲɛɛ 6-7.

Ala ye Kanankaw ani Israɛlden murutininw minɛ cogo min na, o b’a k’a tilenninya yira cogo di?

Mɔgɔ minw tun be musow ni denmisɛnw tɔɔrɔ wala ka kakalayakow kɛ, Jehova ye kiti tigɛ olu kan. Nka, minw tun be mɛnni kɛ a fɛ ani ka tɔɔw minɛ ni tilenninya ye, a y’olu duga.​—w19.02, ɲɛɛ 22-23.

N’an be yen ani dannabali dɔ be delili kɛra, an ka ɲi ka mun lo kɛ do?

An be se k’an daa je ani ka koow kɛ ni bonya ye. Nka, an tɛna a fɔ “amiina” ani an tɛna tɔɔw bolo minɛ delili tuma na. An be se ka delili kɛ an daa jukɔrɔ.​—w19.03, ɲɛɛ 31.

Ka ben deen kan ka cɛnimusoko kɛ n’a ye, mun na o ye jurumuba ye?

Min b’o kɛ, o tigi be deen, kafo, faamanw ani Ala hakɛ ta. Jamana minw na sariya b’a ɲini o koo ka fɔ faamanw ye, diinan mɔgɔkɔrɔw b’o sariya labato.​—w19.05, ɲɛɛ 9-10.

Mun lo bena i dɛmɛ i k’i sɔɔn yɛlɛma pewu?

I ka ɲi ka koo jɔnjɔn minw kɛ: Jehova deli. Miiri a ka Kuma kan ani i yɛrɛ sɛgɛsɛgɛ. I teriw sugandi koɲuman.​—w19.06, ɲɛɛ 11.

I be se ka mun lo kɛ kabi sisan walisa k’i yɛrɛ labɛn kɔrɔbɔliw kama?

Jɛnɲɔgɔnya min be ele ni Jehova cɛ, i ka ɲi k’o sabati. La a la ko Jehova b’i kanu ani ko a tɛna i bila abada. Bibulu kalan loon o loon ani delili kɛ tuma o tuma. La a la ko Ala ka Masaya bena dugaw lase an ma tiɲɛn na. I diyanye vɛrisew ni Jehova tando dɔnkiliw to i hakili la.​—w19.07, ɲɛɛ 2-4.

An be se k’an somɔgɔw dɛmɛ cogo di walisa u ka kisi?

A kɔrɔtanin lo an ka makari u la, an k’a to an tagamacogo ka kɛ seereya ɲuman ye, an ka muɲu u kɔrɔ ani an ka koow kɛ nɛmɛnɛmɛ.​—w19.08, ɲɛɛ 15-17.

Yezu ye baara min kalifa an ma, mun na o b’an lafiya? (Mat. 11:28)

An ɲɛminɛbagaw b’an kanu, an teriw n’an ka baara ɲɔgɔn tɛ yen.​—w19.09, ɲɛɛ 23.

Ala be koo dɔ kɛli nege don an na ani k’a kɛ see di an ma cogo di? (Filip. 2:13).

N’an be Bibulu kalan ani ka miiri a kan, Ala be se ka barika don an na. A b’a sago kɛli nege don an na ani k’a kɛ see di an ma. Setigiya min b’an fɛ, a be se ka dɔ fara o barika kan hakili senu sababu fɛ.​—w19.10, ɲɛɛ 21.

An ka ɲi ka koo duuru jumanw lo kɛ ka sɔrɔ ka desizɔn jɔnjɔn dɔw ta?

O koo duuru ye nunu ye: Sɛgɛsɛgɛri kɛ koɲuman. Hakilitigiya deli Jehova fɛ. I ka ŋaniyaw sɛgɛsɛgɛ. Kɛ ni laɲinita tigitigiw ye. I seko daan lɔn.​—w19.11, ɲɛɛ 27-29.

Sutana ye min fɔ Awa ye, yala o la y’a to mɔgɔw b’a miiri ko niin tɛ sa wa?

Ayi. Sutana y’a fɔ Awa ye ko a tɛna sa, a m’a fɔ a ye ko a bena kɛ komi a sara le dɔrɔn. Sanjiba min benna Nuhun ka wagati la, o ye ngalon kalanw bɛɛ tunu. Babɛli sangaso lɔtuma na, Ala y’a kɛ mɔgɔw jɛnsɛnna. Ngalon kalan min ye ko niin tɛ sa, a be komi o daminɛna ka kɔn o wagati lo ɲɛ.​—w19.12, ɲɛɛ 15.