1-2. Angelito ka koo b’an dɛmɛ ka mun lo faamu?

YALA i wolobagaw ye Jehova Seerew ye wa? N’o lo, i k’a to i hakili la ko i tɛ Jehova teri ye sabu i bangebagaw y’a teriw ye. An bangebagaw ye Jehova sagokɛlaw ye wo, u t’a ye wo, an kelen kelen bɛɛ lo ka ɲi k’a ɲini ka jɛnɲɔgɔnya teriman kɛ ni Jehova ye.

² An ka balimacɛ dɔ ka koo lajɛ min tɔgɔ ko Angelito. A somɔgɔw bɛɛ tun ye Jehova Seerew ye. Nka a kanbele tuma na, a tun t’a jati ko a magwɛrɛnin lo kosɔbɛ Ala la. A ko: “Ne tun be Jehova batora dɔrɔn sabu n’ somɔgɔw tun be min kɛra, n’ tun b’a fɛ k’o lo kɛ.” Nka, Angelito y’a latigɛ ka Bibulu kalan ani ka miiri a kan wagati caaman kɔnɔ. A y’a daminɛ fana ka Jehova deli tuma o tuma. Mun lo sɔrɔla o la do? A ko: “N’ y’a faamu ko fɛɛrɛ kelenpe min fɛ n’ be se ka n’ magwɛrɛ n’ Faa kanulen Jehova la, o ye k’a ɲini k’a lɔn n’ yɛrɛ ma.” Angelito ka koo b’an lasun ka miiri ɲiningali jɔnjɔn dɔw la: Ka fɛɛn damanin lɔn Jehova koo la ani k’a lɔn koɲuman, faranfasi juman b’o koo fila cɛ? An be se ka Jehova lɔn koɲuman cogo di?

3. Ka fɛɛn damanin lɔn Jehova koo la ani k’a lɔn koɲuman, faranfasi juman b’o koo fila cɛ?

³ An be se k’a miiri ko an be Jehova lɔn sabu an b’a tɔgɔ, a ka fɔtaw n’a ka kɛta dɔw lɔn. Nka, walisa ka Jehova lɔn koɲuman, an ka ɲi ka  koo wɛrɛw kɛ. An ka ɲi ka wagati ta k’a ɲini ka Jehova n’a ka jogo kabakomanw lɔn. O dɔrɔn lo sen fɛ, an bena a faamu fɛɛn min kama a ye kuma dɔw fɔ wala ka koo dɔw kɛ. O bena an dɛmɛ k’a lɔn n’an miiricogo, an ka desizɔnw ani an ka kokɛcogow ka di Jehova ye. N’an y’a faamu Jehova be min ɲini an fɛ, an ka ɲi k’o kɛ.

4. N’an ye dɔw ka ɲɛyirali lajɛ Bibulu kɔnɔ, o bena an dɛmɛ cogo di?

⁴ Mɔgɔ dɔw be se k’an lɔgɔbɔ sabu an b’a fɛ ka Jehova sago kɛ. U yɛrɛ be se k’an kɛlɛ n’an y’a daminɛ ka taga lajɛnw na. Nka, n’an y’an jigi la Jehova kan, a tɛna an to yen abada! An bena a daminɛ ka teriya sɔbɛ kɛ n’a ye, o min bena mɛɛn an sii bɛɛ la. An be se ka Jehova lɔn koɲuman tiɲɛn na wa? Ɔnhɔn, an be se! Cɛɛ dafabali dɔw i n’a fɔ Musa ani masacɛ Dawuda ka koo b’o lo yira. U ka koo lajɛtɔ, an bena ɲiningali fila nunu jaabi: U sera ka Jehova lɔn cogo di? U ka koo b’an dɛmɛ ka mun lo faamu?

5. Musa y’a latigɛ ka mun lo kɛ?

⁵ Musa y’a latigɛ ka Ala sago kɛ. A saan 40 ɲɔgɔn, a y’a latigɛ ka jɛn ni Israɛldenw ye sanni k’a to u k’a weele ko “Ezipiti masacɛ denmuso ka deen.” (Eburuw 11:24). Musa tun be ni lɔyɔrɔba ye Ezipiti, nka a y’o to yen. Israɛldenw tun ye jɔɔnw ye Ezipiti. Musa kɛtɔ k’u dɛmɛ, a tun b’a lɔn k’o tun bena Farahuna dusu gwan kosɔbɛ. Farahuna do tun ye masacɛba ye ani Ezipitikaw tun b’a jati ala ye. Musa ye min kɛ, o b’a yira ko a tun be ni limaniya barikaman ye! A y’a jigi la Jehova kan. O le y’a to a ye teriya sɔbɛ kɛ ni Jehova ye a sii bɛɛ la.​—Talenw 3:5.

6. An be kalan juman lo sɔrɔ Musa fɛ?

⁶ An be kalan juman lo sɔrɔ Musa fɛ? I ko Musa, an kelen kelen bɛɛ ka ɲi ka desizɔn dɔ ta: Yala an bena a latigɛ ka Ala sago kɛ ani ka jɛn n’a ka mɔgɔw ye wa? Walisa k’o kɛ, n’a sɔrɔ an ka ɲi ka fɛɛn dɔw saraka ani minw tɛ Jehova lɔn, n’a sɔrɔ olu bena an kɛlɛ. Nka, n’an y’an jigi la an sankolola Faa kan, an ka la a la ko a bena an dɛmɛ!

7-8. Musa tora k’a ɲini ka mun lo lɔn?

⁷ Musa tora k’a ɲini ka Jehova jogow lɔn ani k’a sago kɛ. Ɲɛyirali fɛ, Jehova y’a ɲini Musa fɛ ko a ka Israɛldenw ɲɛminɛ ka bɔ n’u ye Ezipiti. Musa tun lanin t’a yɛrɛ la ani a tora k’a fɔ Jehova ye ko ale tɛna se k’o kɛ. Ala ye Musa jaabi cogo min na, o b’a yira ko a be makari. O kama, a ye Musa dɛmɛ (Ɛkiz. 4:10-16). O lo y’a to Musa sera ka Ala ka kiti kuma barikamanw lase Farahuna ma. Jehova ye Israɛldenw kisi. Nka, a ye Farahuna n’a ka kɛlɛdenw bɛɛ halaki Kɔgɔji Wulen na. Fanga min be Jehova la, a tɛmɛna o fɛ cogo min na k’o koow bɛɛ kɛ, Musa y’o ye.​—Ɛkiz. 14:26-31; Zab. 136:15, Biblu Ala ta Kuma.

⁸ Musa ye Israɛldenw ɲɛminɛ ka bɔ Ezipiti. O kɔ, u tora ka ŋunuŋunu. O sen fɛ, Musa y’a ye ko Jehova muɲunin lo kosɔbɛ. A y’o kɔrɔsi Jehova ka kokɛcogow fɛ ni Israɛldenw ye, a y’olu minw hɔɔrɔnya ka bɔ jɔnya la (Zab. 78:40-43). Wagati dɔ la, Musa ye Jehova deli ko a kana Israɛldenw halaki ani Jehova sɔnna o ma. O y’a to Musa y’a faamu fana ko Jehova majiginin lo yɛrɛ le!​—Ɛkiz. 32:9-14.

9. Ka kɛɲɛ ni Eburuw 11:27 ye, jɛnɲɔgɔnya juman lo tun be Musa ni Jehova cɛ?

⁹ Musa bɔnnin kɔ ni Israɛldenw ye jɔnya la, ale ni Jehova ka teriya sabatira kosɔbɛ.  A yɛrɛ kɛra komi a ɲɛɛ tun b’a sankolola Faa la (Eburuw 11:27 kalan). Jɛnɲɔgɔnya teriman min tun be Musa ni Jehova cɛ, Bibulu b’a fɔ o koo la ko: “Masaba tun be kuma ni Musa ye daa ni daa i n’a fɔ mɔgɔ be kuma n’a teri ye cogo min na.”​—Ɛkiz. 33:11.

10. Walisa ka Jehova lɔn koɲuman, an ka ɲi ka mun lo kɛ?

¹⁰ An be kalan juman lo sɔrɔ o koo la? Walisa ka Jehova lɔn koɲuman, an ka ɲi k’a jogow lɔn. Nka o dɔrɔn tɛ. An ka ɲi k’a sago kɛ fana. Jehova sago ye min ye bi, o ye ko mɔgɔ sifa “bɛɛ ka kisi ani ka se ka tiɲɛ lɔn.” (1 Tim. 2:3, 4). An be Jehova sago kɛ cogo minw na, u la dɔ ye ka mɔgɔw kalan a koo la.

11. N’an be mɔgɔw kalanna Jehova koo la, o b’an dɛmɛ cogo di k’a lɔn ka ɲɛ?

¹¹ Tuma caaman na, n’an be mɔgɔw kalanna Jehova koo la, o b’an yɛrɛ dɛmɛ k’a lɔn koɲuman. Ɲɛyirali fɛ, an b’a ye ko Jehova be makari mɔgɔw la, n’a y’an dɛmɛ ka mɔgɔw sɔrɔ minw b’a fɛ ka kɛ a teriw ye (Zan 6:44). An b’a ye ko fanga be Ala ka Kuma na sabu a b’an ka Bibulu kalandenw dɛmɛ ka delinanko juguw dabila. A b’u dɛmɛ fana ka jogo kuraw ta (Kɔlɔs. 3:9, 10). An b’a ye fana ko Ala muɲunin lo an ka kiinmɔgɔw kɔrɔ sabu a b’an ci ka taga bɔ u ye siɲɛ caaman. A b’o kɛ walisa k’u dɛmɛ u k’ale lɔn ani u ka kisi.​—Ɔrɔm. 10:13-15.

12. Ka kɛɲɛ ni Ɛkizɔdi 33:13 ye, Musa ye mun lo ɲini Jehova fɛ ani mun na?

¹² Musa tun be jɛnɲɔgɔnya min kɛra ni Jehova ye, o nafa tun ka bon a fɛ. A tun ye kabako koow kɛ Ala tɔgɔ la. O bɛɛ n’a ta, a y’a ɲini Jehova fɛ ni bonya ye a k’ale dɛmɛ k’a lɔn koɲuman (Ɛkizɔdi 33:13 kalan). O wagati la, Musa tun be ni saan 80 ni kɔ ye. Nka, a tun b’a lɔn ko a bele tun be se ka koo caaman lɔn a sankolola Faa kanutigi koo la.

13. An be jɛnɲɔgɔnya min kɛra ni Ala ye, an be se k’a yira cogo di k’o nafa ka bon?

¹³ An be kalan juman lo sɔrɔ Musa fɛ? An be Jehova batora a mɛɛnna wo, a ma mɛɛn wo, an be jɛnɲɔgɔnya min kɛra n’a ye, an ka ɲi k’o jati fɛɛn nafamanba ye. An be se k’o yira cogo ɲuman minw na, u la dɔ ye ka to k’a deli.

14. Walisa ka Jehova lɔn ka ɲɛ, mun na delili kɔrɔtanin lo kosɔbɛ?

¹⁴ Teri ɲuman tɛ sɔrɔ kumaɲɔgɔnya ɲuman kɔ. O la, walisa ka teriya ɲuman kɛ ni Ala ye, an ka ɲi ka to k’a deli tuma o tuma. An man ɲi ka siran k’an ka miiriyaw n’an dusukunnakow fɔ a ye (Efɛz. 6:18). An balimamuso dɔ tɔgɔ ko Krista ani a be bɔ Turki jamana na. A ko: “Ni n’ ye n’ ka miiriyaw fɔ Jehova ye delili la ani ni n’ y’a ye ko a be n’ dɛmɛ, o be dɔ fara n’ ka kanuya kan a koo la. O b’a to fana n’ be n’ jigi la a kan kosɔbɛ. K’a ye Jehova be n’ ka deliliw jaabi cogo min na, o ye n’ dɛmɛ k’a jati n’ Faa ani n’ Teri ye.”

15. Jehova ye mun lo fɔ Dawuda koo la?

¹⁵ Tuma min na masacɛ Dawuda wolola, a wolobagaw n’a sigiɲɔgɔnw bɛɛ tun ye Jehova sagokɛlaw ye. Nka, o lo m’a to ale kɛra Jehova sagokɛla ye. A y’a ɲini a yɛrɛ ma ka jɛnɲɔgɔnya kɛ ni Jehova ye ani a koo diyara Jehova ye kosɔbɛ. Jehova yɛrɛ y’a fɔ a koo la ko: “Dawuda koo diyara ne ye.” (Kɛw. 13:22). Mun lo ye Dawuda dɛmɛ ka jɛnɲɔgɔnya ɲuman kɛ ni Jehova ye?

16. Danfɛnw lajɛtɔ, Dawuda ye mun lo faamu Jehova koo la?

 ¹⁶ Dawuda ye Jehova lɔn danfɛnw sababu fɛ. Dawuda denmisɛn tuma, a ye wagati caaman kɛ kongo kɔnɔ k’a facɛ ka sagaw dɛndɛ. N’a sɔrɔ o wagati lo la a y’a daminɛ ka miiri Jehova ka danfɛnw koo la. Ɲɛyirali fɛ, Dawuda tun mana sankolo filɛ sufɛ, a tun be lolo waa caaman ye. Nka, a tun tɛ dan o dɔrɔn ma. A tun be miiri o lolow Danbaga jogow fana na. O ye Dawuda lasun k’a sɛbɛ ko: “Sankolo be Ala ka sebagaya yira, sankolo be Ala bulonɔ yira.” (Zab. 19:2, 3). Tuma min na Dawuda miirila adamadenw dancogo koo la, a y’a faamu ko Jehova ka hakilitigiya ka bon kosɔbɛ (Zab. 139:14). Jehova ye fɛɛn minw dan, Dawuda miiritɔ olu koo la, a y’a faamu ko ale tɛ bɛrɛ ye.​—Zab. 139:6.

17. N’an be miiri danfɛnw koo la, o b’an dɛmɛ ka mun lo faamu?

¹⁷ An be kalan juman lo sɔrɔ Dawuda fɛ? I ko Dawuda, an k’an mako don danfɛnw na. Jehova ye duniɲa cɛɲumanba min dan, an ka wagati ta k’o lajɛ ani k’a to o k’an kabakoya! Danfɛn dɔw b’an gɛrɛfɛ i n’a fɔ yiriw, bɛgɛnw ani mɔgɔw. U be min yira an na Jehova koo la, an ka miiri o la loon o loon. O la, an bena koo caaman faamu an Faa kanutigi koo la loon o loon ani dɔ bena to ka fara an ka kanuya barika kan a koo la.​—Ɔrɔm. 1:20.

18. Ka kɛɲɛ ni Zaburuw 18nan ye, Dawuda sɔnna mun lo ma?

¹⁸ Dawuda sɔnna a ma ko Jehova lo tun b’ale dɛmɛna. Ɲɛyirali fɛ, Dawuda y’a facɛ ka sagaw kisi jara ni wara ma. A ko Jehova lo y’ale dɛmɛ k’o kongosogow faga. Dawuda y’a ye fana ko Jehova lo y’a dɛmɛ ka cɛɛ jamanjanba Goliyati faga (1 Sam. 17:37). Dawuda kisira masacɛ ɲango Sayuli bolo minkɛ, a ko Jehova lo y’ale kisi (Zab. 18:1). Ni Dawuda tun ye kuncɛba ye, a tun bena a miiri ko ale yɛrɛ lo sera k’o koow kɛ. Nka komi a tun majiginin lo, a sɔnna a ma ko Jehova lo tun b’ale dɛmɛna.​—Zab. 138:6.

19. An be kalan juman lo sɔrɔ Dawuda fɛ?

¹⁹ An be kalan juman lo sɔrɔ Dawuda fɛ? An man ɲi k’a ɲini dɔrɔn Jehova k’an dɛmɛ. Jehova y’an dɛmɛ cogo min na ani tuma min na, an ka ɲi k’a ɲini k’o lɔn fana. An seko daan ye min ye, n’an b’an majigi ka sɔn o ma, an bena a faamu ko Jehova lo b’an dɛmɛ ka koo dɔw kɛ, an tɛ se minw na. Tuma o tuma n’an y’a ye ko Jehova y’an dɛmɛ, an be jɛnɲɔgɔnya min kɛra n’a ye, o bena to ka barika sɔrɔ. Balimacɛ Isaac y’a kɔrɔsi k’o ye tiɲɛn ye. A be bɔ Fizi jamana na ani a be Jehova sago kɛra kabi saan caaman. A ko: “N’ mana miiri saan tɛmɛninw na, n’ b’a ye ko Jehova ye n’ dɛmɛ kabi n’ ye bibulukalan daminɛ fɔɔ ka na se bi ma. O kama, n’ magwɛrɛnin lo a la kosɔbɛ.”

20. Jɛnɲɔgɔnya min tun be Dawuda ni Ala cɛ, an be kalan juman lo sɔrɔ o la?

²⁰ Dawuda ye Jehova ka jogow ladegi. Jehova y’an dan ka see d’an ma walisa an ka se k’a ka jogow ladegi (Zɛnɛzi 1:26). N’an y’an jija ka Jehova ka jogow lɔn ka ɲɛ, an bena se k’a ladegi bɛrɛbɛrɛ.  Dawuda sera k’a sankolola Faa lɔn ka ɲɛ. O lo kama a sera k’a ladegi koɲuman a ka kokɛcogow la ni tɔɔw ye. An ka ɲɛyirali kelen dɔrɔn lajɛ. Dawuda ye Jehova hakɛ ta tuma min na a ye ɲamɔgɔya kɛ ni Batiseba ye ani k’a kɛ u y’a cɛɛ faga (2 Sam. 11:1-4, 15). Nka, komi Dawuda tun be makari tɔɔw la, Jehova makarila ale fana na. Jɛnɲɔgɔnya ɲuman tun be Dawuda ni Jehova cɛ. O lo kama a koo tun ka di Israɛldenw ye kosɔbɛ ani Jehova tun b’a jati ko ɲɛyirali ɲuman lo Israɛl masacɛ tɔɔw fɛ.​—1 Mas. 15:11; 2 Mas. 14:1-3.

21. Ka kɛɲɛ ni Efɛzikaw 4:24 ani 5:1 ye, n’an be “Ala ladege,” an be nafa juman lo sɔrɔ o la?

²¹ An be kalan juman lo sɔrɔ Dawuda fɛ? An ka ɲi ka “Ala ladege.” O bena an nafa kosɔbɛ ani o bena an dɛmɛ ka Ala lɔn koɲuman. N’an be Ala jogow ladegi, an b’a yira ko an y’a deenw ye.​—Efɛzikaw 4:24; 5:1 kalan.

22-23. An be min lɔn Jehova koo la, n’an b’o sira tagama, an bena nafa jumanw lo sɔrɔ?

²² I ko an y’a ye cogo min na, an be se ka Jehova lɔn danfɛnw ani Bibulu sababu la. Ala sagokɛla kantigi caaman koo lakalila Bibulu kɔnɔ i n’a fɔ Musa ani Dawuda. An be se k’u ladegi. Jehova y’a ta kɛ. Anw fana ka ɲi k’an ta kɛ an kɛtɔ k’a ɲini k’a lɔn bɛrɛbɛrɛ.

²³ An bena to ka lɔnniya sɔrɔ Jehova koo la fɔɔ abada (Waaj. 3:11). An be Jehova lɔn fɔɔ ka se hakɛ min ma, o lo kɔrɔtanin tɛ. Nka, an be baara min kɛ n’o lɔnniya ye, o lo kɔrɔtanin lo. An be min lɔn an Faa kanutigi koo la, n’an b’o sira tagama ani n’an b’a ɲini k’a ladegi, a bena to k’a magwɛrɛ an na (Zaki 4:8). A b’an hakili sigi a ka Kuma kɔnɔ ko minw be to k’a ɲini k’ale lɔn ka ɲɛ, a tɛna olu to yen abada!