1, 2. a) Yezu ka suu laban na dugukolo kan, a ye baro kɛ n’a ka kalandenw ye mun lo koo la? (Jaa lajɛ, barokun daminɛ na.) b) Mun na a kɔrɔtanin lo an k’a to an hakili la kuun min kama an be waajuli kɛ? c) An bena mun lo lajɛ barokun nin na?

YEZU ka suu laban na dugukolo kan, a kumana wagatijan n’a ka cidenw ye. A y’u hakili sigi ko ale b’u kanu sɔbɛ la. A ye ntalen dɔ la fana ɛrɛzɛnforo koo la, i ko an y’a ye barokun tɛmɛnin na cogo min na. A tun b’a ka kalandenw jijara le walisa u ka den caaman, o kɔrɔ, u k’u jija ka “baara caaman kɛ” Masaya waajuli baara la.—Zan 15:8.

² Yezu m’a fɔ a ka kalandenw ye dɔrɔn u ka ɲi ka baara min kɛ. Nka, a y’a fɔ u ye fana fɛɛn min kama u ka ɲi k’o kɛ. A y’a fɔ u ye kuun min kama u ka ɲi ka to ka waajuli kɛ. O kama, a kɔrɔtanin lo an fana k’a to an hakili la kuun min kama an ka ɲi ka to ka waajuli kɛ. N’an be to ka miiri o la, o bena an lasun an k’an jija ka to ka seereya kɛ “diɲɛ yɔrɔ bɛɛ la.” (Mat. 24:13, 14). Kuun minw kama an be waajuli kɛ, an bena u naani lajɛ barokun nin na. An bena basigi Bibulu kan k’o kɛ. Ka fara o kan, an bena kuma nilifɛn naani koo la. Jehova y’o nilifɛnw  di an ma walisa k’an dɛmɛ an ka to ka waajuli kɛ.

3. a) Ka kɛɲɛ ni Zan 15:8 ye, kuun fɔlɔ juman lo kama an be waajuli kɛ? b) Yezu ka ntalen kɔnɔ, ɛrɛzɛnw ye mun lo tagamasiɲɛ ye ani mun na o bɛnnin lo?

³ Kuun fɔlɔ min kama an be waajuli kɛ, o ye ko an b’a fɛ ka nɔɔrɔ la Jehova kan ani k’a tɔgɔ saniya (Zan 15:1, 8 kalan). Tuma min na Yezu ye ntalen la ɛrɛzɛnforo koo la, a y’a fɔ ko Jehova lo y’o forotigi ye. Ale Yezu lo ye ɛrɛzɛnsun ye ani a ka kalandenw ye ɛrɛzɛnsun bolow ye (Zan 15:5). O la, o ntalen kɔnɔ, Yezu ka kalandenw ka ɲi ka deen min kɛ, o ye waajuli baara lo ye. Ɛrɛzɛn y’o lo tagamasiɲɛ ye. Yezu y’a fɔ a ka cidenw ye ko: “Ni aw ye baara caaman kɛ, o le ben’a to n Faa be boɲa sɔrɔ.” Ni ɛrɛzɛnsun be ɛrɛzɛn ɲumanw di, o be bonya la sɛnɛkɛla kan. O cogo kelen na, n’an b’an seko kɛ ka Masaya kibaro diiman fɔ mɔgɔw ye, an be bonya ni nɔɔrɔ la Jehova kan.—Mat. 25:20-23.

4. a) An be Ala tɔgɔ saniya cogo di? b) Nɛɛma min dira i ma ka Ala tɔgɔ saniya, i b’o jati cogo di?

⁴ Ala tɔgɔ saniyanin lo ka ban. An tɛ se ka foyi kɛ walisa a ka saniya ka tɛmɛ o kan. O la, an ka waajuli baara be Ala tɔgɔ saniya cogo di? A kɔrɔsi ko kira Ezayi y’a fɔ ko: “Aw k’a lɔn ko Masaba, Setigi ka senu.” (Ezayi 8:13). An be Jehova tɔgɔ saniya n’an b’a jati k’o tɔgɔ ka bon ka tɛmɛ tɔgɔw bɛɛ kan ani n’an be tɔɔw dɛmɛ k’a faamu k’o tɔgɔ ka senu (Mat. 6:9). Ɲɛyirali fɛ, an ka tiɲɛn fɔ mɔgɔw ye Jehova ka jogo kabakomanw koo la. Jehova sagonata ye min ye adamadenw koo la, an ka ɲi k’o fɔ tɔɔw ye fana. O la, an be tɔɔw dɛmɛ k’a faamu ko Sutana ye koo jugu minw bɛɛ fɔ Jehova koo la, o ye ngalon lo ye (Zɛnɛzi 3:1-5). An be Jehova tɔgɔ saniya fana n’an be mɔgɔw dɛmɛ u k’a lɔn ko ale lo “ka kan ni boɲa ni tanuli” ani “sebagaya” ye (Yir. 4:11). Rune ye piyɔniye ye kabi saan 16. A ko: “K’a lɔn ko nɛɛma dira n’ ma ka seereya kɛ duniɲa kuru bɛɛ Danbaga koo la, o be n’ ninsɔn diya kosɔbɛ. O kama, n’ b’a fɛ ka to ka waajuli kɛ.”

5. a) Ka kɛɲɛ ni Zan 15:9, 10 ye, kuun juman lo kama an be waajuli kɛ? b) Yezu y’a ka kalandenw dɛmɛ cogo di k’a faamu k’u mako be muɲuli la?

⁵ Zan 15:9, 10 kalan. Kuun jɔnjɔn min kama an be Masaya kibaro diiman fɔ mɔgɔw ye, o ye ko an be Jehova ni Yezu kanu n’an dusu bɛɛ ye (Mariki 12:30; Zan 14:15). Yezu m’a fɔ a ka kalandenw ye k’u k’ale kanu dɔrɔn, nka a ko u ka “to [ale] ka kanuya la.” Mun na do? Sabu Yezu tun b’a lɔn ko a ka kalandenw mako bena kɛ muɲuli la walisa ka to k’ale ka cifɔlenw labato tuma o tuma. Zan 15:4-10 kɔnɔ, Yezu y’a fɔ a ka kalandenw ye siɲɛ caaman k’u ka ɲi ka “to.” A y’o fɔ walisa k’u dɛmɛ u k’a faamu k’u mako be muɲuli la.

6. An b’a yira cogo di ko an b’a fɛ ka to Krista ka kanuya la?

⁶ An b’a yira cogo di ko an b’a fɛ ka to Krista ka kanuya la ani ka to k’a dusu diya? An b’o yira n’an be mɛnni kɛ a fɛ. Yezu yɛrɛ ye min kɛ, a ko an k’o lo kɛ. A ko: “Ne be n Faa ka ciiw bato [ani] ka to a ka kanuya la.” (Zan 15:10). Yezu kɛra ɲɛyirali ye an fɛ.—Zan 13:15.

7. Kanuya ni kanminɛli be taga ɲɔgɔn fɛ cogo di?

⁷ Yezu y’a yira ka gwɛ ko kanuya ni kanminɛli be taga ɲɔgɔn fɛ. A ko: “Mɔgɔ  min ye ne ka kuma mɛn k’a bato, o tigi le be ne kanu.” (Zan 14:21). Yezu ka cikanw bɔra a Faa lo yɔrɔ. O kama, Yezu ye cikan min di ko an ka waajuli kɛ, n’an b’o labato, an b’a yira ko an be Jehova kanu (Mat. 17:5; Zan 8:28). N’an y’a yira ko an be Jehova ni Yezu kanu, olu fana b’an mara u ka kanuya la.

8, 9. a) An be waajuli kɛ kuun wɛrɛ juman lo kama? b) Jehova ye min fɔ Ezekiyɛli 3:18, 19 ani 18:23 kɔnɔ, o b’an lasun cogo di ka to ka waajuli kɛ?

⁸ Kuun sabanan min kama an be waajuli kɛ, o ye ko an b’a fɛ ka mɔgɔw lasɔmi Jehova ka loon nata koo la. Bibulu b’a fɔ ko Nuhun tun be “tilenninyako fɔ.” (2 Piyɛri 2:5 kalan). Siga t’a la, Nuhun tun be min fɔ mɔgɔw ye ka kɔn sanjiba ɲɛ, o tun ye ka mɔgɔw lasɔmi fana ko Jehova bena mɔgɔjuguw halaki. An b’o fɔ sabu Yezu y’a fɔ ko: “Bari sanni jiba ka na, mɔgɔw tun be dumunibabaw kɛ ka minni kɛ, ani ka furu fɔɔ ka taga se Nuhun donlon ma kurunba kɔnɔ. O tun te miiri foyi la [o kɔrɔ, ‘u m’u janto foyi la,’ NW ], fɔɔ jiba nana u halaki. Mɔgɔ Dencɛ ka nako bena kɛ ten fana.” (Mat. 24:38, 39). Cii min tun kalifara Nuhun ma ko a ka mɔgɔw lasɔmi, a y’o dafa ni kantigiya ye hali k’a sɔrɔ mɔgɔw tun tɛ mɛnni kɛra a fɛ.

⁹ Bi fana, an be Masaya kibaro diiman fɔ mɔgɔw ye walisa ka sababu di u ma u k’a lɔn Ala sago ye min ye adamadenw koo la. I ko Jehova, an b’a fɛ sɔbɛ la mɔgɔw ka sɔn kibaro diiman ma ani “ka to nii na.” (Ezek. 18:23). N’an be waajuli kɛ soo ni soo ani forobayɔrɔw la, an be mɔgɔ caamanba lasɔmi ko Ala ka Masaya bena duniɲa juguman nin halaki.—Ezek. 3:18, 19; Dan. 2:44; Yir. 14:6, 7.

10. a) Ka kɛɲɛ ni Matiyo 22:39 ye, an be waajuli kɛ kuun juman lo kama? b) A lakali cogo min na Pol ni Silasi ye kasobon kɔrɔsibaga dɔ dɛmɛ Filipi dugu la.

¹⁰ Kuun naaninan min kama an be to ka waajuli kɛ, o ye ko an b’an mɔgɔɲɔgɔnw kanu (Mat. 22:39). O kanuya lo b’an lasun ka to ka waajuli kɛ sabu an b’a lɔn ko mɔgɔw ka koow jaticogo be se ka yɛlɛma n’u ka koow cogoya yɛlɛmana. Ɲɛyirali fɛ, kerecɛnw kɛlɛbagaw ye ciden Pol ni Silasi don kaso la Filipi dugu la. Dugutilama, dugukoloyɛrɛyɛrɛ dɔ kɛra ani kasobon daaw yɛlɛla. Kasobon kɔrɔsibaga siranna ko kasodenw bolila. O kama, a tun b’a fɛ k’a yɛrɛ faga. Nka ciden Pol “pɛrɛnna ko a kana foyi kɛ a yɛrɛ la.” O cɛɛ ye ɲiningali kɛ ko: “Ne ka kan ka mun kɛ janko ka kisi?” U y’a jaabi ko: “E ka la Matigi Yezu la, e n’i ka somɔgɔw bɛɛ bena kisi.”—Kɛw. 16:25-34.

11, 12. a) Kasobon kɔrɔsibaga ka koo ɲɛsinna an ka waajuli baara ma cogo di? b) Mun na an b’a fɛ ka to ka waajuli kɛ?

¹¹ An be kalan juman lo sɔrɔ kasobon kɔrɔsibaga ka koo la ka ɲɛsin an ka waajuli baara ma? A kɔrɔsi ko dugukoloyɛrɛyɛrɛ kɔ le, kasobon kɔrɔsibaga ka koow filɛcogo yɛlɛmana  ani a ye dɛmɛ ɲini. O cogo kelen na, mɔgɔ minw t’a fɛ ka Ala ka kuma lamɛn, u dɔw ka koow filɛcogo be se ka yɛlɛma ani u be dɛmɛ ɲini ni balawo dɔ cunna u kan. Ɲɛyirali fɛ, a be se ka kɛ ko an ka kiinmɔgɔ dɔw ka baara tiɲɛna wala u ka furu sara ani u dusu tiɲɛnin lo o kosɔn. Dɔ wɛrɛw fana dusu tiɲɛnin lo kosɔbɛ sabu bana jugu dɔ b’u la wala u ka mɔgɔ kanulen dɔ sara. N’o koo ɲɔgɔn y’u sɔrɔ, u hakili be ɲagami kosɔbɛ! U dɔw be se k’a daminɛ ka ɲiningali dɔw kɛ ɲɛnamaya koo la, u tun ma deli k’u yɛrɛ ɲininga minw na. N’a sɔrɔ u b’u yɛrɛ ɲininga ko: “Ne ka ɲi ka mun lo kɛ walisa ka kisi?” N’an y’o ɲɔgɔnna mɔgɔw kunbɛn waajuli la, n’a sɔrɔ a bena kɛ u siɲɛ fɔlɔ ye ka sɔn ka kibaro diiman lamɛn.

¹² O kama, an ka to ka waajuli kɛ ni kantigiya ye. O la, mɔgɔ minw labɛnnin lo ka mɛnni kɛ ani ka dususalo sɔrɔ, an bena se k’olu dɛmɛ (Ezayi 61:1). Charlotte ye piyɔniye ye kabi saan 38. A y’a fɔ ko: “Mɔgɔw t’a lɔn u bena min kɛ bi. An ka ɲi ka sababu di u ma walisa u ka kibaro diiman mɛn.” Ejvor ye piyɔniye ye kabi saan 34 ani a ko: “Bi ka tɛmɛ sanga ni wagati bɛɛ kan, mɔgɔ caaman dusu tiɲɛnin lo. Ne b’a fɛ k’u dɛmɛ sɔbɛ la. O lo be ne lasun ka waajuli kɛ.” Tiɲɛn na, an be to ka waajuli kɛ sabu an b’an mɔgɔɲɔgɔnw kanu.

13, 14. a) Nilifɛn juman lo kofɔra Zan 15:11 kɔnɔ? b) An be se ka Yezu ka ninsɔndiya ɲɔgɔn sɔrɔ cogo di? c) Ninsɔndiya b’an dɛmɛ cogo di an ka waajuli baara la?

¹³ Yezu ka suu laban na dugukolo kan, a ye nilifɛn caaman kofɔ fana minw tun bena a ka cidenw dɛmɛ u ka to ka den waajuli la. O ye nilifɛn jumanw lo ye ani u be se k’an dɛmɛ cogo di?

¹⁴ Ninsɔndiya. Yala doni lo an fɛ ka waajuli kɛ wa? Ayi! Yezu ye ntalen la ɛrɛzɛnforo koo la ani o kɔ a y’a fɔ ko n’an be waajuli kɛ, an bena ale ka ninsɔndiya ɲɔgɔn sɔrɔ (Zan 15:11 kalan). O be se ka kɛ cogo di? I ko an y’a fɔ cogo min na ka tɛmɛ, Yezu y’a yɛrɛ suma ni ɛrɛzɛnsun ye ani a ko a ka kalandenw ye ɛrɛzɛnsun bolow ye. Ɛrɛzɛnsun bolow be jii n’u makoɲɛfɛn tɔɔw sɔrɔ n’u nɔrɔnin tora ɛrɛzɛnsun na. O cogo kelen na, n’an b’a fɛ ka ninsɔndiya sɔrɔ i ko Yezu, fɔɔ an ka to n’a ye ani ka tugu a sennɔ kɔ koɲuman. O la, Yezu ye ninsɔndiya min sɔrɔ a Faa sago kɛli la, an bena o ɲɔgɔn sɔrɔ (Zan 4:34; 17:13; 1 Piyɛri 2:21). Hanne ye piyɔniye ye kabi saan 40 ni kɔ. A ko: “N’ be ninsɔndiya min sɔrɔ tuma o tuma waajuli baara kɛnin kɔ, o lo be n’ jija n’ ka to ka baara kɛ Jehova ye.” Hali ni mɔgɔw fanba t’an lamɛn, ninsɔndiya lo bena an barika bonya walisa an ka to ka waajuli kɛ.—Mat. 5:10-12.

15. a) Nilifɛn juman lo kofɔra Zan 14:27 kɔnɔ? b) Hɛɛrɛ b’an dɛmɛ cogo di an ka to ka waajuli kɛ?

¹⁵ Hɛɛrɛ (Zan 14:27 kalan). Yezu ka suu laban na dugukolo kan, a tun kɔnna k’a fɔ ko: “Hɛrɛ min be bɔ ne fɛ, ne be o le di aw ma.” Yezu ka hɛɛrɛ be se k’an dɛmɛ cogo di walisa an ka to ka waajuli kɛ? N’an be to ka waajuli kɛ, an be to hɛɛrɛ la sabu an b’a lɔn ko Jehova ni Yezu dusu ka di an kɔrɔ (Zab. 149:4; Ɔrɔm. 5:3, 4; Kɔlɔs. 3:15). Ulf be kudayi cidenya baara la kabi saan 45. A ko: “Waajuli baara be ne sɛgɛn. Nka a be n’ ninsɔndiya ani ka kuun di n’ ka ɲɛnamaya ma.” Ninsɔndiya lo an fɛ k’o hɛɛrɛ banbali ɲɔgɔn sɔrɔ!

16. a) Nilifɛn juman lo kofɔra Zan 15:15 kɔnɔ? b) Cidenw tun ka ɲi ka mun lo kɛ walisa u ni Yezu ka to teriw ye?

 ¹⁶ Yezu ka teriya. Yezu y’a fɔ ko a b’a fɛ a ka cidenw ka “nisɔndiya kosɔbɛ.” A y’a ɲɛfɔ u ye fana fɛɛn min kama a kɔrɔtanin lo u ka kɛ ni kanuya ye min t’a yɛrɛ nafa ɲini (Zan 15:11-13). O kɔ, a y’a fɔ ko: “Ne b’aw wele n teriw.” Ka teriya kɛ ni Yezu ye, o ye koo nafamanba ye dɛ! Yezu ka cidenw tun ka ɲi ka mun lo kɛ walisa u ni Yezu ka to teriw ye? U tun ka ɲi ka to ka “taga baara caaman kɛ.” (Zan 15:14-16 kalan). Saan fila ɲɔgɔn ka kɔn o ɲɛ, Yezu tun ye cii di a ka cidenw ma ko: “N’aw tagara, aw ye waajuli kɛ ko sankolo masaya waati surunyana.” (Mat. 10:7). O kama, a y’u jija a ka suu laban na dugukolo kan ko u ye baara min daminɛ, u ka to k’o kɛ (Mat. 24:13; Mariki 3:14). A tun man nɔgɔ u fɛ k’o cii dafa, nka u tun be se k’o kɛ ani u ni Yezu tun bena to teriw ye. Cogo di do? Nilifɛn wɛrɛ lo y’u dɛmɛ k’o kɛ.

17, 18. a) Nilifɛn juman lo kofɔra Zan 15:16 kɔnɔ? b) O nilifɛn ye Yezu ka kalandenw dɛmɛ cogo di? c) Nilifɛn jumanw lo b’an barika bonya bi?

¹⁷ An be jaabili sɔrɔ an ka deliliw la. Yezu y’a fɔ ko: “Aw mana fɛɛn o fɛɛn daali n Faa fɛ ne tɔgɔ la, a [bena] o di aw ma.” (Zan 15:16). Siga t’a la, o kumaw ye Yezu ka cidenw jija kosɔbɛ! * Cidenw m’a faamu tiɲɛn na ko Yezu tun bena sa yanni dɔɔni. O kama a sanin kɔ, n’a sɔrɔ u tun b’a miiri k’u b’u kelen na. Nka, u tun tɛ u kelen na. Jehova tun labɛnnin lo k’u ka deliliw jaabi ani k’u dɛmɛ u ka waajuli baara la. Jehova y’o lo kɛ fana. Dɔɔni Yezu sanin kɔ, cidenw ye Jehova deli a k’u jaa gwɛlɛya ani Jehova y’u ka deliliw jaabi.—Kɛw. 4:29, 31.

¹⁸ O kelen lo bi fana. N’an b’an jija waajuli baara la, an ni Yezu bena to teriw ye. An be se ka gwɛlɛyaw sɔrɔ an ka waajuli baara la. Nka, n’an ye dɛmɛ ɲini Jehova fɛ deli la, an ka la a la ko a bena an jaabi (Filip. 4:13). An ninsɔn ka di kosɔbɛ sabu Jehova b’an ka deliliw jaabi ani an ye Yezu teriw ye! Jehova ye o nilifɛn minw di an ma, u be dɔ fara an ka ninsɔndiya kan walisa an ka to ka den waajuli baara la.—Zaki 1:17.

19. a) Mun na an ka ɲi ka to ka waajuli kɛ? b) Mun lo b’an dɛmɛ ka Ala ka baara kɛ ka dafa?

¹⁹ Barokun nin na, an ye kuun naani lajɛ minw b’an lasun ka to ka waajuli kɛ: An be nɔɔrɔ la Jehova kan ani k’a tɔgɔ saniya, an be Jehova n’a Dencɛ kanu, an be mɔgɔw lasɔmi ani an b’an mɔgɔɲɔgɔnw kanu. An kumana fana nilifɛn naani nunu koo la: ninsɔndiya, hɛɛrɛ, Yezu ka teriya ani an ka deliliw be jaabi. O nilifɛnw b’an barika bonya walisa an ka Ala ka baara kɛ ka dafa. N’an b’an jija ka to ka den, o kɔrɔ, ka to ka waajuli kɛ, o ka di Jehova ye kosɔbɛ!