1. Ka kɛɲɛ ni Matiyo 28:18-20 ka fɔta ye, Yezu ye cikan juman lo di a ka kalandenw ma?

YEZU suu kununin kɔ, a y’a yɛrɛ yira a ka kalandenw na. O kalandenw tun lajɛnnin lo Galile. Koo kɔrɔtanin dɔ tun b’a fɛ k’a fɔ u ye. O tun ye mun lo ye? A ye min fɔ, o be sɔrɔ Matiyo 28:18-20 kɔnɔ.—A kalan.

2. An bena ɲiningali jumanw lo lajɛ?

² Yezu ye cii min di a ka kalandenw ma ko u ka mɔgɔw kɛ ale ka kalandenw ye, o ɲɛsinna fana Ala sagokɛla kelen kelen bɛɛ ma bi. O la, an ka ɲiningali saba lajɛ ka ɲɛsin o cii ma. A fɔlɔ, Yezu ye cii min di ko an ka kalanden kuraw kalan Ala ka cikanw na, an ka ɲi ka mun lo kɛ ka fara o kan? A filanan, kafodenw bɛɛ be se ka Bibulu kalandenw dɛmɛ cogo di u ka ɲɛtaga kɛ Alako ta fan fɛ? A sabanan, an balima minw ye waajuli dabila, an be se k’olu dɛmɛ cogo di u k’a daminɛ tugun ka mɔgɔw kɛ Krista ka kalandenw ye?

3. Yezu ye mun lo fɔ tigitigi a ka cikan kɔnɔ?

³ Yezu ka cikanw gwɛnin lo. An ka ɲi ka mɔgɔw kalan a ka cikanw na. Nka, an man ɲi ka ɲinɛ koo kɔrɔtanin dɔ kɔ. Yezu m’a fɔ dɔrɔn ko: “Aw ye mɔgɔw kalan ne ka kuma na.” Nka a ko: Aw ye “u kalan, waasa u ka ne ka kuma bato.” Walisa ka Yezu ka cikan labato, an ka ɲi k’a yira an ka Bibulu kalanden na a ka ɲi ka min kɛ. An ka ɲi k’a yira a la  fana a ka ɲi k’o kɛ cogo min na (Kɛw. 8:31). Mun na an ka ɲi k’o kɛ?

4. Ka cikan dɔ bato, o kɔrɔ ko di? Ɲɛyirali dɔ fɔ.

⁴ Ka cikan dɔ “bato,” o kɔrɔ ko k’a sira tagama. An ka ɲɛyirali dɔ lajɛ walisa k’a yira an be se ka mɔgɔ dɔ dɛmɛ cogo min na a ka Krista ka kuma bato wala k’a sira tagama. Min be mɔgɔ degi mobiliboli la, ale be mɔgɔ kalan cogo di a ka sira sariyaw labato? A be se k’a daminɛ k’a tigi kalan sira sariyaw la klasi kɔnɔ. Nka, walisa ka kalanden dɛmɛ a k’o sariyaw labato, a ka ɲi ka koo wɛrɛ kɛ. Ale ni kalanden ka ɲi ka bɔ ni mobili ye. Mobili bolitɔ, ni kalanden b’a ɲinina ka sira sariyaw labato, a ka ɲi ka ladiliw di a ma. An be kalan juman lo sɔrɔ o koo la?

5. a) Ka kɛɲɛ ni Zan 14:15 ani 1 Zan 2:3 ye, an ka ɲi k’an ka Bibulu kalandenw kalan u ka mun lo kɛ? b) Ɲɛyirali dɔw fɔ k’a yira an be se k’an ka Bibulu kalandenw dɛmɛ cogo min na.

⁵ N’an be bibulukalan kɛ ni mɔgɔw ye, an b’u kalan Ala ka sariyaw la. Nka, an man ɲi ka dan o ma. U ye min faamu, an ka ɲi k’u kalan fana u k’o sira tagama loon loon (Zan 14:15; 1 Zan 2:3 kalan). Ɲɛyirali fɛ, an be se k’a yira an ka Bibulu kalandenw na u be se ka Bibulu ka sariyakolo jɔnjɔnw sira tagama cogo min na lakɔliso, baarakɛyɔrɔ wala ɲɛnagwɛkow la. An be se k’an ka koo dɔ lakali u ye walisa k’a yira u la cogo min na an kɛtɔ ka Bibulu ka sariyakolow sira tagama, o y’an latanga farati dɔ ma wala cogo min na o y’an dɛmɛ ka desizɔn ɲuman dɔ ta. An be se ka Jehova deli n’u ye k’a ɲini a fɛ a k’u ɲɛminɛ n’a ka hakili senu ye.—Zan 16:13.

6. An ka ɲi ka koo wɛrɛ juman lo kɛ n’an be mɔgɔw kalanna u ka Yezu ka cikanw labato?

⁶ An ka ɲi ka koo wɛrɛ juman lo kɛ n’an be mɔgɔw kalanna u ka Yezu ka cikanw labato? An ka ɲi k’an ka Bibulu kalandenw dɛmɛ u k’a ɲini ka mɔgɔw kɛ Krista ka kalandenw ye. Bibulu kalanden dɔw be siran ka waajuli kɛ. O kama, an ka ɲi ka muɲu k’u dɛmɛ walisa u ka Bibulu ka kalanw faamu koɲuman. O la, u ka limaniya barika bena bonya, o kalanw bena u dusukun sɔrɔ ani o bena u lasun ka waajuli kɛ. An be se ka Bibulu kalandenw dɛmɛ cogo di walisa u k’a ɲini ka kibaro diiman fɔ tɔɔw ye?

7. An be se ka Bibulu kalanden dɛmɛ cogo di a k’a ɲini ka kibaro diiman fɔ tɔɔw ye?

⁷ An be se k’an ka Bibulu kalanden ɲininga ko: “I kɛtɔ ka sɔn Masaya kibaro diiman ma, o y’i ka ɲɛnamaya kɛcogo fisaya cogo di? Ele fɛ, yala mɔgɔ wɛrɛw mako b’a la k’o kibaro diiman mɛn wa? I be se k’u dɛmɛ cogo di?” (Talenw 3:27; Mat. 9:37, 38). Sɛbɛnin minw ye an ka kalankɛminan dɔw ye, olu yira a la. A to a k’a sugandi minw bena diya a somɔgɔw, a teriw wala a baarakɛɲɔgɔnw ye. O sɛbɛninw hakɛ dɔ di kalanden ma. Ɲɛyirali dɔ kɛ n’a ye walisa a k’a faamu a be se k’o sɛbɛnin dɔ di mɔgɔ ma cogo min na nɛmɛnɛmɛ. N’an ka Bibulu kalanden nana kɛ weleweledala ye min ma batize fɔlɔ, an ka ɲi ka waajuli kɛ n’a ye walisa k’a dɛmɛ.—Waaj. 4:9, 10; Luka 6:40.

8. Mun na a kɔrɔtanin lo an ka Bibulu kalandenw ka Ala n’u mɔgɔɲɔgɔn kanu kosɔbɛ? (Koorilen nin fana lajɛ: “ An be se k’an ka Bibulu kalandenw dɛmɛ cogo di u ka Ala kanu kosɔbɛ?”)

⁸ An k’a to an hakili la ko Yezu ye cii di an ma ko an ka mɔgɔw kalan u k’ale ka “kuma bato.” O kuma dɔw ye cikan kɔrɔtaninba fila nunu ye: Ka Ala kanu ani  k’an mɔgɔɲɔgɔn kanu. Ka waajuli kɛ ani ka mɔgɔw kɛ Krista ka kalandenw ye, o ni o cikan fila be taga ɲɔgɔn fɛ (Mat. 22:37-39). Jɛɛn juman lo b’u ni ɲɔgɔn cɛ? Koo jɔnjɔn minw b’an lasun ka waajuli kɛ, u dɔ ye ko an be Ala n’an mɔgɔɲɔgɔn kanu. Bibulu kalanden dɔw be siran ka waajuli kɛ ani o be faamu. Nka, an be se k’u hakili sigi ko Jehova ka dɛmɛ barika la, dɔɔni dɔɔni, u bena see sɔrɔ adamaden ɲɛsiran kan (Zab. 18:2-4; Talenw 29:25). Koorilen min be barokun nin na, ale b’a ɲɛfɔ an be se ka koo minw kɛ walisa k’an ka Bibulu kalanden dɛmɛ a ka Ala kanu kosɔbɛ. Kafodenw fana be se ka kalanden kuraw dɛmɛ cogo di u ka dɔ fara u ka kanuya barika kan?

9. An kumana kalanden min koo la min be mobiliboli degira, ale be se ka kalan nafamanw sɔrɔ cogo di?

⁹ Kalanden min be mobiliboli degira, an k’ale ka koo lajɛ tugun. K’a to mobiliboli la n’a kalanfa ye a gɛrɛfɛ, a be se ka koo caaman faamu cogo di? A be se ka koo caaman faamu a kɛtɔ k’a kalanfa lamɛn ani ka bolibaga ɲuman tɔɔw kɔrɔsi. Ɲɛyirali fɛ, kalanfa be se ka mobili bolibaga wɛrɛ yira kalanden na min be ɲumanya kɛ bolibaga wɛrɛ ye a kɛtɔ ka sira to a ye. Wala bolibaga wɛrɛ b’a ka yeelenw jigi walisa a kana bolibaga tɔɔw bali ka yeli kɛ. Kalanfa be se k’o yira kalanden na ani k’a jija a k’o ɲɔgɔn kɛ. O ɲɛyiraliw be kalanden dɛmɛ ka koo nafamanw faamu, a be se ka minw ɲɔgɔn kɛ n’a be mobili bolila.

10. Mun lo bena Bibulu kalanden dɛmɛ a ka ɲɛtaga kɛ Alako ta fan fɛ?

¹⁰ Bibulu kalanden min b’a daminɛ ka Jehova sago kɛ, ale be kalan sɔrɔ a ka kalanfa fɛ. Nka o dɔrɔn tɛ, Jehova sagokɛla tɔɔw fana ka ɲɛyirali ɲuman b’a dɛmɛ. Nka, mun lo bena Bibulu kalanden dɛmɛ bɛrɛbɛrɛ ka ɲɛtaga kɛ? Min bena a dɛmɛ, o ye kafo ka lajɛnw ye. A bena kalan minw sɔrɔ kafo ka lajɛnw na, o bena dɔ fara a ka lɔnniya kan, k’a ka limaniya sabati ani k’a dɛmɛ ka Ala kanu kosɔbɛ (Kɛw. 15:30-32). Lajɛnw na, kalanfa be se ka kalanden yira fana balima dɔw la ale ni minw ka koo caaman bɔnin be ɲɔgɔn ma. Kafo kɔnɔ, kalanden bena a ye ko balimaw be ɲɔgɔn kanu kosɔbɛ. An ka ɲɛyirali dɔw lajɛ.

11. Kalanden be se ka mun lo kɔrɔsi kafo kɔnɔ ani o be se ka nɔɔ juman lo to a kan?

¹¹ Bibulu kalanden min b’a deenw lamɔna a kelen, ale be se ka balimamuso dɔ kɔrɔsi min n’ale ka koow ye kelen ye. Balimamuso be jijali minw kɛ ka na n’a denfitininw ye Masaya Boon kɔnɔ, o be kalanden dusukun sɔrɔ. Kalanden min be bondori kɛra walisa ka sigarɛtimin dabila, ale ni balimacɛ dɔ ye ɲɔgɔn lɔn min ye see sɔrɔ o gwɛlɛya kan. O balimacɛ y’a ɲɛfɔ kalanden ye cogo min na ale kɛtɔ ka Jehova kanu kosɔbɛ, o y’a dɛmɛ k’a ka sariyaw labato (2 Kor. 7:1; Filip. 4:13). Balimacɛ y’a fɔ kalanden ye cogo min na ale sera ka sigarɛtimin dabila. O kɔ, a ko: “Ele fana be se k’a dabila.” O kuma ye kalanden jaa gwɛlɛya ani k’a to a lara a la ko ale fana be se k’o kɛ. Sunguru dɔ min be bibulukalan kɛra, ale ye balimamuso sunguru dɔ kɔrɔsi min dusu ka di ka kɛ Jehova Seere ye. O Bibulu kalanden y’a ye cogo min na o balimamuso ninsɔn diyanin lo tuma bɛɛ. O y’a lasun k’a ɲini k’a lɔn fɛɛn min kama a ninsɔn diyanin lo.

12. Mun na an be se k’a fɔ ko kafoden kelen kelen bɛɛ ka kunkanbaara lo ka Bibulu kalandenw dɛmɛ?

¹² Bibulu kalandenw kɛtɔ ka balima  kantigi caaman lɔn, u be kalan sɔrɔ u fɛ. O balimaw ka ɲɛyirali b’a yira u la u be se ka Krista ka cikan nin sira tagama cogo min na: Ka Ala n’u mɔgɔɲɔgɔn kanu (Zan 13:35; 1 Tim. 4:12). Ka fara o kan, i ko an y’a ye ka tɛmɛ cogo min na, balima minw ka koo bɔnin be Bibulu kalanden ta ma, a be se kalan sɔrɔ u fɛ. O be kalanden dɛmɛ k’a faamu ko a ka ɲi ka yɛlɛmani minw kɛ walisa ka kɛ Krista ka kalanden ye, a be se k’o kɛ (Deter. 30:11). Kafoden kelen kelen bɛɛ be se ka kalandenw dɛmɛ cogo caaman na, u ka ɲɛtaga kɛ (Mat. 5:16). Bibulu kalanden minw be na lajɛnw na, e be mun lo kɛ k’u jija?

13-14. Yezu y’a ka cidenw minɛ cogo di tuma min na u fari fagara?

¹³ Yezu ye cii min di ko an ka mɔgɔw kɛ ale ka kalandenw ye, minw ye waajuli dabila, an b’a fɛ k’olu dɛmɛ u k’a daminɛ tugun k’o cii dafa. Tuma min na Yezu ka cidenw fari fagara, a y’u minɛ cogo min na, o b’a yira an ka ɲi ka min kɛ bi.

¹⁴ Dɔɔni ka kɔn Yezu faga tuma ɲɛ, a ka “kalandenw bɛɛ bolila k’a to.” (Mariki 14:50; Zan 16:32). Yezu y’a ka cidenw minɛ cogo di tuma min na u fari fagara? Dɔɔni Yezu suu kununin kɔ, a y’a fɔ a ka kalanden dɔw ye ko: “Aw kana siran, aw ye taga fɔ n balimaw ye [ko n’ suu kununa].” (Mat. 28:10a). Yezu m’a ka cidenw to yen. Hali k’a sɔrɔ u tun bolila k’a to yen, a bele tun b’u weelela ko: “N balimaw.” I ko Jehova, Yezu tun be makari ani a tun be yafa tɔɔw ma.—2 Mas. 13:23.

15. Minw ye waajuli dabila, an be mun lo miiri u koo la?

¹⁵ An be Yezu ladegi. O kama minw ye waajuli dabila, u koo b’an dusu la kosɔbɛ. An balimaw lo ani u koo ka di an ye! O balimaw ye baaraba min kɛ Jehova ye, an tɛ ɲinɛ o kɔ. U dɔw ye baara kɛ a ye saan caaman kɔnɔ (Eburuw 6:10). U ɲɛnafin b’an na yɛrɛ le! (Luka 15:4-7). I ko Yezu, an be se k’a yira cogo jumanw na ko an b’an janto u la?

16. Minw ye waajuli dabila, an be se k’a yira cogo di ko an b’an janto u la?

¹⁶ U weele ni kanuya ye ka na lajɛnw na. Tuma min na Yezu ka cidenw fari fagara, a y’u jija cogo minw na, u dɔ ye k’u weele ka na lajɛn dɔ la (Mat. 28:10b; 1 Kor. 15:6). O cogo kelen na bi, minw sumana Alako ta fan fɛ, an be se k’u weele ka na kafo ka lajɛnw na. N’a sɔrɔ an ka ɲi k’u weele siɲɛ caaman u be sɔrɔ ka sɔn ka na. Siga t’a la, a diyara Yezu ye kosɔbɛ k’a ye ko a ka kalandenw sɔnna a ka welekan ma.—Matiyo 28:16 ani Luka 15:6 lajɛ.

17. Minw sumana Alako ta fan fɛ, n’u dɔ nana lajɛn na, an ka ɲi ka mun lo kɛ?

¹⁷ U bisimila ni dusudiya ye. Yezu y’a to a ka kalandenw y’a lɔn ko u nako diyara a ye ani ale yɛrɛ lo gwɛrɛla u la ka kuma n’u ye (Mat. 28:18). Mɔgɔ minw sumana Alako ta fan fɛ, an bena mun lo kɛ n’u dɔ nana Masaya Boon na? An ka ɲi k’a bisimila ni dusudiya ye. A daminɛ na, n’a sɔrɔ an bena siran sabu an t’a lɔn an bena min fɔ. An be se k’a hakili sigi an kɛtɔ k’a fɔ a ye dɔrɔn ko a nako diyara an ye.

18. Balima minw sumana Alako ta fan fɛ, an be se k’olu jija cogo di?

¹⁸ I kɔnɔ gwɛ k’u jija. N’a sɔrɔ Yezu ka kalandenw tun b’a miiri ko olu tɛna se ka waajuli kɛ duniɲa kuru bɛɛ kɔnɔ. Yezu y’a ka kalandenw jija ko: “Ne kɔni bena to n’aw ye loon o loon.” (Mat. 28:20). Yala o kumaw y’a ka kalandenw jija wa?  Ɔnhɔn. Dɔɔni o kɔ, u tun jijanin lo “ka kibaru diman fɔ mɔgɔw ye.” (Kɛw. 5:42). Balima minw sumana Alako ta fan fɛ, olu fana mako b’a la an k’u jija. N’a sɔrɔ u be siran k’a daminɛ ka waajuli kɛ. An be se k’u hakili sigi an kɛtɔ k’a fɔ u ye ko u tɛna waajuli kɛ u kelen. N’u labɛnna tuma min na ka waajuli kɛ, an be se k’u bila sira. Tuma min na u bena a daminɛ ka waajuli kɛ tugun, n’an y’u dɛmɛ, siga t’a la o bena diya u ye kosɔbɛ. Minw sumana Alako ta fan fɛ, an ka to k’u jati an balimaw ye. O be se k’a to u b’a daminɛ ka baara kɛ Jehova ye tugun ani o bena kafodenw bɛɛ dusu diya.

19. An b’a fɛ k’an jija ka mun lo kɛ ani mun na?

¹⁹ An ka ɲi ka to ka mɔgɔw kɛ Yezu ka kalandenw ye fɔɔ tuma juman? Fɔɔ ka taga se duniɲa nin laban na (Mat. 28:20; yɔrɔ nin lajɛ La Bible. Traduction du Monde Nouveau kɔnɔ lexique yɔrɔ la: “Période finale du monde”). Yala an bena se ka Yezu ka cii dafa fɔɔ o wagati la wa? An cɛsirinin lo k’o kɛ! Minw “labɛnnin lo ka sɔn ɲɛnamaya banbali ma,” an ninsɔn ka di k’an ka wagati, an fanga ani an bololafɛnw kɛ k’olu yɔrɔ ɲini (Kɛw. 13:48, NW ). N’an b’o kɛ, an be Yezu lo ladegira. Ale ko: “Ka n cibaga sago kɛ, o le ye n ka dumuni ye. Ne ka kan k’a ka baara kɛ fɔɔ ka se a daan na.” (Zan 4:34; 17:4). An fana b’a fɛ k’an jija k’o lo kɛ. Baara min kalifara an ma, an b’a fɛ k’o laban (Zan 20:21). Minw sumana Alako ta fan fɛ, an b’a fɛ olu ni mɔgɔ wɛrɛw k’o baara kɛ n’an ye fɔɔ a laban na.—Mat. 24:13.

20. Ka kɛɲɛ ni Filipikaw 4:13 ye, Yezu ye baara min kalifa an ma, mun na an be se k’o dafa?

²⁰ Tiɲɛn lo, Yezu ye baara min kalifa an ma, a man nɔgɔ k’o kɛ. Nka, an t’o baara kɛra an kelen. Yezu ye layidu ta ko a bena kɛ n’an ye. An be mɔgɔw kɛ Krista ka kalandenw ye “Krista barika la” ani “an ni Ala ye baarakɛɲɔgɔnw ye.” (1 Kor. 3:9, Bible senuma; 2 Kor. 2:17). O la, an be se k’o baara kɛ. Nɛɛma lo ani ninsɔndiya koo lo an fɛ k’o baara kɛ ani ka mɔgɔ wɛrɛw dɛmɛ u k’a kɛ!—Filipikaw 4:13 kalan. *