N’I B’A fɛ k’a lɔn lɛri min be yen, i be mun lo kɛ do? N’a sɔrɔ i bena mɔnturu filɛ. N’i teri dɔ y’i ɲininga lɛri la, i bena a jaabi cogo di do? Lɛri fɔcogo ka ca. An k’u dɔw lajɛ.

Lɛri fɔcogo tɛ kelen ye yɔrɔ bɛɛ. Ɲɛyirali fɛ, i be se k’a fɔ ko “1h tɛmɛna miniti 30” wala ko “13h tɛmɛna miniti 30.” Yɔrɔ dɔw yɛrɛ la, i be se k’a fɔ ko “a tora miniti bisaba 2h be se.”

Nka lɛri tun be fɔ cogo di Bibulu sɛbɛwagati la? Fɔcogo kelen tun tɛ yen. Heburukan sɛbɛninw na, lɛri fɔra cogo caaman na i n’a fɔ “sɔgɔma,” “tilefɛ,” “tilegwanfɛ” ani “wulafɛ” (Zɛnɛzi 8:11; 19:27; 43:16; Deter. 28:29; 1 Mas. 18:26). Nka tuma dɔw la, Bibulu be kumaden tigitigi dɔw fɔ ka ɲɛsin wagati koo ma.

Bibulu sɛbɛwagati la, kɔrɔsilikɛlaw tun be yen. Israɛldenw mako tun b’u la sanko sufɛ walisa ka yɔrɔ kɔrɔsi. Israɛldenw tun be suu tilan yɔrɔ saba. “Dugutilama” kofɔra Kiritigɛlaw 7:19 kɔnɔ. Yezu ka wagati la, Yahutuw tun ye suu tilan yɔrɔ naani i ko Grɛkiw ni Ɔrɔmukaw tun y’a kɛ cogo min na.

Evanziliw be kuma o suu tilanyɔrɔ naani koo la siɲɛ caaman. Ɲɛyirali fɛ, ka Yezu ka kalandenw to kurun kɔnɔ, a tagamana jii kan ka taga u fɛ tuma min na “dugu tun be ɲini ka gwɛ.” O kɔrɔ, suu tilanyɔrɔ naaninan wagati (Mat. 14:25). Yezu y’a fɔ ntalen dɔ la ko: “Tiɲɛ na, ne b’a fɔ aw ye ko, ni baaraden minw kuntigi kɔsegitɔ nana u sɔrɔ kɔnɔni na . . . N’u kuntigi kɔsegira dugutilama, walima dondo kasituma na ka n’u sɔrɔ kɔnɔni na, u bena nisɔndiya.”—Luka 12:37, 38.

Yezu kumana suu tilanyɔrɔ naani nunu koo la tuma min na a y’a fɔ a ka kalandenw ye ko: “O la, aw labɛnnin ka to, bari sotigi bena segi ka na waati min na, aw t’o lɔn. A bena kɛ wulafɛ, walima dugutilama, wala dondo kasituma na, walima sɔgɔma, aw t’o lɔn.” (Mariki 13:35). Suu tilanyɔrɔ fɔlɔ ye “wulafɛ” ye. O be daminɛ tileben tuma, fɔɔ ka taga se suu 9h wagati. “Dugutilama” ye suu tilanyɔrɔ filanan ye ani a be daminɛ suu 9h wagati ka taga se minuwi. Suu tilanyɔrɔ sabanan ye “dondo kasituma” ye. O be daminɛ minuwi, fɔɔ ka taga se 3h wagati fan fɛ. N’a sɔrɔ o wagati lo la dondon kasira loon min sufɛ u ye Yezu minɛ (Mariki 14:72). “Sɔgɔma” ye suu tilanyɔrɔ naaninan ye ani a be daminɛ 3h wagati, fɔɔ ka taga se tilebɔ tuma na.

O la, hali ni mɔnturu tun tɛ yen Bibulu sɛbɛwagati la, u fana tun be n’u ka lɛri fɔcogo ye.