1-2. Ka kɛɲɛ ni 1 Timote 6:20 ye, mun lo tun kalifara Timote ma?

AN KA teli k’an ka fɛɛn sɔngɔ gwɛlɛw kalifa mɔgɔ wɛrɛw ma. Ɲɛyirali fɛ, n’a sɔrɔ an ka teli k’an ka wari bila banki la ani an jigi b’a la ko u bena a mara ka ɲɛ, a tɛna tunu wala mɔgɔ tɛna a soɲɛ. O la, an b’a faamu a kɔrɔ ye min ye k’an ka fɛɛn nafamanbaw kalifa mɔgɔ wɛrɛ ma.

² Vɛrise nin kalan: 1 Timote 6:20. Ciden Pol ye Timote hakili jigi ko nafolofɛn dɔ kalifara a ma. O ye lɔnniya tigitigi ye Ala sagonata koo la ka ɲɛsin adamadenw ma. Nɛɛma tun dira Timote ma fana ka “Ala ta Kuma waajuri kɛ” ani ka kɛ “kibaro diman fɔbagasɔbɛ ye.” (2 Tim. 4:2, 5, Biblu Ala ta Kuma). Min tun kalifara Timote ma, Pol y’a jija ko a k’o minɛ ka ɲɛ. I ko Timote, fɛɛn nafamanba dɔw kalifara an fana ma. O ye mun ni mun lo ye? Jehova y’o nafolofɛn minw kalifa an ma, mun na an ka kan k’u minɛ ka ɲɛ?

3-4. Mun na Bibulu ka tiɲɛnkalanw ye nafolofɛnw ye?

³ Jehova ye nɛɛma dɔ kɛ an ye: A y’an dɛmɛ ka lɔnniya tigitigi sɔrɔ tiɲɛn koo la, o min be sɔrɔ a ka Kuma kɔnɔ. Bibulu ka tiɲɛnkalanw nafa ka bon kosɔbɛ sabu u b’an dɛmɛ ka jɛnɲɔgɔnya ɲuman kɛ ni Jehova ye. U b’an dɛmɛ fana k’a lɔn an be se ka hɛɛrɛ sɔbɛ sɔrɔ cogo min na. N’an sɔnna o tiɲɛnkalanw ma ani n’an b’u sira tagama, o b’an hɔɔrɔnya ka bɔ ngalon kalanw ani kakalayakow la.—1 Kor. 6:9-11.

⁴ Bibulu ka tiɲɛnkalanw nafa ka bon kosɔbɛ fɛɛn wɛrɛ kama. Mɔgɔ minw majiginin lo ani u “labɛnnin lo ka sɔn ɲɛnamaya banbali ma,” Jehova b’olu dɔrɔn lo dɛmɛ k’o  tiɲɛnkalanw faamu (Kɛw. 13:48, NW ). O ɲɔgɔnna mɔgɔw be sɔn a ma ko Jehova be tɛmɛ jɔncɛ kantigiman hakiliman lo fɛ ka mɔgɔw kalan tiɲɛn koo la bi (Mat. 11:25; 24:45). An tɛ se k’o kalanw faamu an yɛrɛ ma ani fɛɛn si nafa man bon ka se u ma.—Talenw 3:13, 15.

5. Jehova ye fɛɛn wɛrɛ juman lo kalifa an ma?

⁵ Jehova ye nɛɛma di an ma fana walisa an ka mɔgɔw dɛmɛ u ka tiɲɛn lɔn ale n’a sagonata koo la (Mat. 24:14). An be kibaro diiman min fɔra mɔgɔw ye, a nafa ka bon kosɔbɛ sabu a be mɔgɔw dɛmɛ u ka kɛ Jehova ka denbayamɔgɔ dɔw ye. A b’u dɛmɛ fana ka kɛ ni ɲɛnamaya banbali jigiya ye (1 Tim. 4:16). An be min kɛra waajuli la, o ka ca wo, o man ca wo, an be dɛmɛ donna baara min na, o nafa ka bon ni baara tɔɔw bɛɛ ye bi bi nin na (1 Tim. 2:3, 4). Nɛɛmaba lo an fɛ ka kɛ Ala ka baarakɛɲɔgɔnw ye!—1 Kor. 3:9.

6. Minw m’u janto u yɛrɛ la, mun lo y’u sɔrɔ?

⁶ Nɛɛma min dira kerecɛn ma ka kɛ Ala ka baarakɛɲɔgɔnw ye, dɔw m’o jati fɛɛnba ye Timote ka wagati la. Nɛɛma tun dira Demasi ma ka baara kɛ ni Pol ye, nka a bɔra a kɔ sabu duniɲa koo diyara a ye (2 Tim. 4:10). A be komi Fizɛli ni Ɛmozɛni y’u ka cidenya baara dabila sabu u tun be siranna ka Pol ka kɔrɔbɔli ɲɔgɔn sɔrɔ (2 Tim. 1:15). Imene, Alɛkisandiri ani Filɛtɔsi y’a daminɛ ka murutili kalanw kɛ ani u ye tiɲɛn sira bila (1 Tim. 1:19, 20; 2 Tim. 2:16-18). A be komi o cɛɛw bɛɛ ka limaniya barika tun ka bon a daminɛ na. Nka, fɛɛn minw tun kalifara u ma, u tun tɛ u jati fɛɛn nafamanbaw ye tugun.

7. Sutana be tɛmɛ fɛɛrɛ jumanw lo fɛ k’a ɲini k’an lafili?

⁷ Jehova ye nafolofɛn minw kalifa an ma, Sutana be mun lo kɛ walisa an kana u jati fɛɛnbaw ye tugun? An k’a ka fɛɛrɛ dɔw lajɛ. A be tɛmɛ ɲɛnagwɛkow, telewisɔn, ɛntɛrɛnɛti n’a ɲɔgɔnnaw fɛ k’an lasun ka koow jati, ka miiri ani ka koow kɛ cogo dɔ la. O la, a jigi b’a la ko an bena tiɲɛn sira bila. A b’a ɲini k’an lasiran fana walisa an ka waajuli dabila. Cogo di do? A be mɔgɔw lasun u k’an kɔrɔbɔ wala k’an niin degun. Ka fara o kan, kerecɛn murutininw be min “jati lɔnniya ye, k’a sɔrɔ lɔnniyasɔbɛ tɛ,” Sutana b’a ɲini k’an lasun k’o lamɛn walisa an ka tiɲɛn sira bila.—1 Tim. 6:20, 21.

8. An be kalan juman lo sɔrɔ balimacɛ Daniel ka koo la?

⁸ Ni an m’an janto an yɛrɛ la, an be  se ka tiɲɛn sira bila dɔɔni dɔɔni. An ka Daniel * ka koo lajɛ. Videwo tulon tun ka di a ye kosɔbɛ. A ko: “Kabi n’ be ni saan tan ɲɔgɔn ye, n’ y’a daminɛ ka videwo tulon kɛ. Farati tɛ videwo tulon minw na, n’ y’a daminɛ n’olu lo ye. Nka dɔɔni dɔɔni, fariyakow ni jinamoriyakow be tulon minw na, n’ y’a daminɛ k’olu kɛ.” A laban, a tun be videwo tulon kɛ fɔɔ lɛri 15 ɲɔgɔn loon bɛɛ. Daniel ko: “Tiɲɛn fɔ ka di, n’ tun b’a lɔn ko n’ tun be videwo tulon minw kɛra ani n’ tun be wagati min bɛɛ kɛra o tulonw na, u tun be n’ yɔrɔ janyana Jehova la. Nka, n’ dusu tun gwɛlɛyara minkɛ, n’ tun b’a miiri ko Bibulu ka sariyakolow ma ɲɛsin ne ma.” N’an m’an janto an yɛrɛ la, ɲɛnagwɛkow ka teli k’a to an be tiɲɛn sira bila. N’o do kɛra, Jehova ye fɛɛn nafaman minw kalifa an ma, an be se ka bɔnɛ u la.

9. Ka kɛɲɛ ni 1 Timote 1:18, 19 ye, Pol ye Timote suma ni jɔn lo ye?

⁹ Vɛrise nunu kalan: 1 Timote 1:18, 19. Pol ye Timote suma ni sɔrɔdasi ye ani a y’a jija ko a ka to ka “baaraɲuman [wala kɛlɛ ɲuman, NW ] kɛ.” A tun kaan tɛ kɛlɛ yɛrɛ yɛrɛ lo ma, nka a tun kaan be min ma, o tun ɲɛsinna Alakow lo ma. Cogo jumanw na kerecɛnw be i ko sɔrɔdasiw, minw be kɛlɛ la? An minw ye Krista ka sɔrɔdasiw ye, an ka ɲi ka kɛ ni jogo jumanw lo ye? An k’a filɛ an be kalan duuru minw sɔrɔ Pol ka ntalen kuma na. O kalanw bena an dɛmɛ an ka to tiɲɛn sira kan.

10. Ala ɲɛsiranya ye mun lo ye ani mun na an ka ɲi ka kɛ n’o jogo ye?

¹⁰ I jija ka kɛ ni Ala ɲɛsiranya ye. Sɔrɔdasi ɲuman ye mɔgɔ kantigi ye. Mɔgɔ minw koo ka di a ye ani a be fɛɛn minw jati fɛɛnba ye, a b’a sɔbɛ don kɛlɛ la k’u latanga. Pol ye Timote jija ko a ka kɛ ni Ala ɲɛsiran ye, o kɔrɔ, a k’a masiri Ala la koɲuman (1 Tim. 4:7). Ni dɔ tora ka fara an ka kanuya n’an ka Ala ɲɛsiran barika kan, a bena diya an ye kosɔbɛ ka to tiɲɛn sira kan.—1 Tim. 4:8-10; 6:6.

11. Mun na an ka ɲi k’an yɛrɛ kolo?

¹¹ I yɛrɛ kolo. Sɔrɔdasi ka kan k’a yɛrɛ kolo n’a b’a fɛ a labɛnnin ka to kɛlɛ kama. Timote tora ɲɛɛ na Alako ta fan fɛ sabu a ye Pol ka ladiliw sira tagama. Pol tun y’a fɔ a ye ko a k’a yɛrɛ kɔrɔsi nege juguw ma, a ka kɛ ni kerecɛn jogow ye ani a ka to ka jɛn n’a balimaw ye (2 Tim. 2:22). O tun tɛ ɲɛ yɛrɛkololi kɔ. Walisa ka se k’an ka nege juguw kɛlɛ, fɔɔ an k’an yɛrɛ kolo (Ɔrɔm. 7:21-25). An ka ɲi k’an yɛrɛ kolo fana walisa ka jogokɔrɔ bɔ an yɛrɛ la ani ka jogokura ta (Efɛz. 4:22, 24). Ani, n’an sɛgɛnninba lo tile bannin kɔ, an ka ɲi ka banba ka taga kafo ka lajɛn na.—Eburuw 10:24, 25.

12. An be baara kɛ cogo min na ni Bibulu ye, an be se k’o fisaya cogo di?

¹² Sɔrɔdasi ka ɲi k’a yɛrɛ degi ka ɲɛ kɛlɛkɛcogo la n’a ka kɛlɛkɛminanw ye. A ka ɲi k’o kɛ tuma bɛɛ walisa ka se kɛlɛkɛcogo la koɲuman. O cogo kelen na, an ka ɲi ka se baara kɛcogo la koɲuman ni Bibulu ye (2 Tim. 2:15). An be se k’o degi an ka lajɛnw na. Nka, n’an b’a fɛ tɔɔw ka la a la ko Bibulu ka tiɲɛnkalanw nafa ka bon, fɔɔ an ka Bibulu sɛgɛsɛgɛ tuma o tuma. An ka ɲi ka basigi Bibulu kan k’an ka limaniya barika bonya. O tɛ dan Bibulu kalangwɛ dɔrɔn ma. An ye min kalan, an ka ɲi ka miiri a kan ani ka sɛgɛsɛgɛri kɛ an ka gafew kɔnɔ. N’an y’o  kɛ, an bena se ka Bibulu faamu koɲuman ani k’a sira tagama (1 Tim. 4:13-15). O la, an bena se ka baara kɛ ni Bibulu ye ka tɔɔw kalan. O kɔrɔ tɛ ka bibulusen dɔ kalan dɔrɔn an lamɛnbaga ye. Nka, an ka ɲi k’a dɛmɛ k’o vɛrise faamu ani k’a lɔn cogo min na o ɲɛsinna a ma. N’an be banba ka Bibulu sɛgɛsɛgɛ tuma o tuma, an bena se ka baara kɛ n’a ye koɲuman ka mɔgɔw kalan.—2 Tim. 3:16, 17.

13. Ka kɛɲɛ ni Eburuw 5:14 ye, mun na an ka ɲi ka kɛ ni hakilitigiya ye?

¹³ I ka kɛ ni hakilitigiya ye. Sɔrɔdasi ka ɲi ka kɔn k’a filɛ farati min b’a sen kɔrɔ ani k’a yɛrɛ tanga o ma. An fana ka ɲi k’a filɛ koo minw be se ka kɛ farati ye an ma ani k’an yɛrɛ tanga u ma (Talenw 22:3; Eburuw 5:14 kalan). Ɲɛyirali fɛ, an ka ɲi k’an ka ɲɛnagwɛkow sugandi ni hakilitigiya ye. Kakalayakow ka teli ka yira telewisɔn ni filimuw na. O koow be Jehova dusu kasi ani siga t’a la, u be mɔgɔ mako sa. O kama, ɲɛnagwɛko minw b’an ka kanuya nagasi dɔɔni dɔɔni Ala koo la, an be ban olu la.—Efɛz. 5:5, 6.

14. Hakilitigiya ye Daniel dɛmɛ cogo di?

¹⁴ Daniel min kofɔra ka tɛmɛ, ale y’a daminɛ k’a faamu ko koo jugu lo ka videwo tulonw kɛ minw ɲɛsinna fariyakow ni jinamoriyakow ma. A ye sɛgɛsɛgɛri kɛ Watchtower Library kɔnɔ walisa ka dɛmɛ sɔrɔ o koo la. O y’a dɛmɛ cogo di? Videwo tulon minw bɛnnin tɛ, a y’u dabila. A tun ye abɔneman min kɛ ɛntɛrɛnɛti kan walisa k’o videwow sɔrɔ, a y’o lasa. A tun b’o tulon sifaw kɛ ni mɔgɔ minw ye, a faranna u la. A ko: “Sanni n’ ka to boon kɔnɔ ka to ka videwo tulonw kɛ, n’ y’a daminɛ ka koo wɛrɛw kɛ kɛnɛma wala ka jɛn ni n’ teriw ye minw be kafo kɔnɔ.” Sisan, Daniel ye piyɔniye ni diinan mɔgɔkɔrɔ ye.

15. Mun na farati b’a la ka ngalon kumaw lamɛn?

¹⁵ I ko Timote, an ka ɲi k’a faamu ko farati b’a la ka kerecɛn murutininw ka dalakumaw lamɛn (1 Tim. 4:1, 7; 2 Tim. 2:16). Ɲɛyirali fɛ, u be se ka ngalon kuma dɔw jɛnsɛn an balimaw koo la. U be se fana k’a kɛ an be sigasiga Jehova ka ɔriganisasiyɔn koo la. O ngalon kumaw be se k’an ka limaniya nagasi. An kana a to u k’an lafili n’u ka kumaw ye. Mun na do? Sabu minw b’o ngalon kumaw jɛnsɛn, “hakilitanw” lo, u “te tiɲɛ lɔn tugu.” U ka  laɲinita ye ka “sɔsɔli” kɛ ani ka “kuma samasama.” (1 Tim. 6:4, 5). U b’a fɛ an ka la u ka ngalon kumaw na ani an ka sigasiga an balimaw na.

16. An man ɲi k’a to mun lo k’an bali ka Ala ka Masaya kɛ an ɲɛnako fɔlɔ ye?

¹⁶ I ɲɛɛ lɔnin to koo kelen kan. I ko “Yezu Krista ka sɔlidasiɲuman,” Timote tun ka ɲi k’a ka cidenya baara kɛ a ɲɛnako fɔlɔ ye. A tun man ɲi ka boliboli bololafɛnw wala fɛɛn wɛrɛw kɔ (2 Tim. 2:3, 4). I ko Timote, an kana to ka boli boli bololafɛnw kɔ ani k’a to o b’an bali ka Alakow kɛ an ɲɛnako fɔlɔ ye. “Nafolo lafilibanciya” be se k’a to an tɛ Jehova kanu tugun, a ka Kuma tɛ diya an ye tugun ani an t’a ɲini k’a kofɔ mɔgɔw ye (Mat. 13:22, Bible senuma). An ka ɲi k’an ɲɛɛ lɔnin to koo kelen kan ani k’an ka wagati n’an fanga kɛ ka “Ala ka masaya . . . ɲini fɔlɔ.”—Mat. 6:22-25, 33.

17-18. An be se ka mun lo kɛ walisa k’an yɛrɛ tanga farati ma Alako ta fan fɛ?

¹⁷ I yɛrɛ labɛn ka koow kɛ teliya la. Sɔrɔdasi be kɔn k’a filɛ a bena min kɛ k’a yɛrɛ latanga. Jehova ye nafolofɛn minw kalifa an ma, an ka ɲi ka teliya ka koow kɛ walisa k’u latanga n’an y’a ye ko farati b’an sen kɔrɔ. Mun lo bena an dɛmɛ o la? An ka ɲi ka kɔn k’a filɛ an bena min kɛ ni farati b’an sen kɔrɔ.

¹⁸ An ka ɲɛyirali dɔ lajɛ: A ɲinina mobilitigiw fɛ ko tasumafagalan ka sɔrɔ u ka mobili kɔnɔ. Mun na do? O la, ni mobili ye tasuma ta u be se k’a faga joona joona. O cogo kelen na, an ka ɲi ka kɔn k’a filɛ an bena min kɛ n’an be baara kɛra ni ɛntɛrɛnɛti ye wala an be telewisɔn wala filimu dɔ filɛra ani fɛɛn bɛnbali dɔ barila ka bɔ. A be se ka kɛ kakalayako, fariyako wala kerecɛn murutininw ka kalan ye. N’an kɔnna k’an yɛrɛ labɛn, an bena se k’an yɛrɛ latanga joona walisa an saniyanin ka to Jehova ɲɛɛ kɔrɔ.—Zab. 101:3; 1 Tim. 4:12.

19. Jehova ye nafolofɛn minw kalifa an ma, n’an y’u mara ka ɲɛ, an bena duga jumanw lo sɔrɔ?

¹⁹ Jehova ye nafolofɛn minw kalifa an ma, an ka kan k’u mara ka ɲɛ. O fɛɛnw ye Bibulu ka tiɲɛnkalan nafamanbaw ye ani nɛɛma min dira an ma ka mɔgɔw kalan u la. N’an y’o kɛ, an bena kɛ ni dusukun ɲuman ye, kuun bɛrɛ bena sɔrɔ an ka ɲɛnamaya la ani an bena ninsɔndiya ka mɔgɔw dɛmɛ u ka Jehova lɔn. Jehova ye nafolofɛn minw kalifa an ma, an bena se k’o mara ka ɲɛ a ka dɛmɛ sababu la.—1 Tim. 6:12, 19.