1. Ni Jehova sagokɛla dɔ kɔsegira a ma, o be mun lo kɛ a la?

BAROKUN tɛmɛnin na, an y’a ye ko Jehova y’a yɛrɛ suma ni sagadɛndɛla ɲuman ye min b’a janto kosɔbɛ a ka sagaw kelen kelen bɛɛ la. Minw tununa, a b’olu yɔrɔ ɲini. Israɛlden minw tun bɔra Jehova kɔ, a y’a fɔ olu ye ko: “Aw ye kɔsegi ne ma, ne bena sɔn aw ma.” An b’a lɔn ko a bele be koow kɛ o cogo la sabu a ko: “Ne cogo te yɛlɛma.” (Mal. 3:6, 7). Jehova sagokɛla minw y’u yɔrɔ janya a la, Yezu ko hali n’u kelen lo kɔsegira, Jehova ni mɛlɛkɛw ninsɔn be diya kosɔbɛ!—Luka 15:10, 32.

2. An bena mun lo lajɛ barokun nin na?

² Minw y’u yɔrɔ janya Jehova la, Yezu ye ntalen dɔw la walisa k’a yira ko a kɔrɔtanin lo an k’u dɛmɛ. An k’o ntalen saba lajɛ. An mako be jogo tigitigi minw na walisa k’o mɔgɔw dɛmɛ, an bena kuma u dɔw koo la. An bena a ye fana ko kuun b’a la an ka jijaliw kɛ walisa k’u dɛmɛ.

3-4. Muso min kofɔra Luka 15:8-10 kɔnɔ, mun na a y’a ka warigwɛ tununin ɲini koɲuman?

³ Minw b’a fɛ ka kɔsegi Jehova ma, an ka ɲi k’an jija kosɔbɛ k’u yɔrɔ ɲini. Luka ka Evanzili kɔnɔ, Yezu ye ntalen dɔ la walisa k’a yira muso dɔ y’a ka warigwɛ tununin ɲini cogo min na. O warigwɛ nafa tun ka bon kosɔbɛ. Muso y’o warigwɛ ɲini cogo min na, ntalen sinsinna o lo kan.—Luka 15:8-10 kalan.

⁴ Yezu y’a fɔ o muso ninsɔn diyara cogo min na tuma min na a y’o warigwɛ ye. Yezu ka wagati la, a be komi Yahutu sunguru dɔw furulon na, u bamusow tun be warigwɛ den tan di u ma. N’a sɔrɔ o warigwɛw dɔ lo tun tununa. Muso y’a miiri ko a benna duguma. O kama, a  ye fitinɛ mɛnɛ k’a yaala, nka a m’a ye. N’a sɔrɔ fitinɛ yeelen tun man bon ani warigwɛ tun ka dɔgɔ, o lo y’a to a m’a ye. A laban, a ye boon yɔrɔ bɛɛ filan ka ɲɛ ani a y’o warigwɛ manamanatɔ ye fitinɛ yeelen na, gwangwan kɔnɔ. A dusu diyara kosɔbɛ ani a y’a teriw n’a sigiɲɔgɔnw weele k’o kibaro diiman fɔ u ye.

5. Minw y’u yɔrɔ janya kafo la, mun na an ka ɲi ka jijalibaw kɛ ka sɔrɔ k’u ye?

⁵ I ko an y’a ye Yezu ka ntalen na cogo min na, ni fɛɛn dɔ tununa, an ka ɲi ka jijalibaw lo kɛ ka sɔrɔ k’a ye. O cogo kelen na, minw y’u yɔrɔ janya kafo la, n’a sɔrɔ an ka ɲi ka jijalibaw lo kɛ ka sɔrɔ k’u ye. N’a sɔrɔ u tɛ jɛnna ni kafo ye tugun a saan caaman ye nin ye. N’a sɔrɔ u yɛrɛ yɛlɛmana yɔrɔ min na, balimaw t’u lɔn. Minw sumana Alako ta fan fɛ, i be taga a sɔrɔ u dɔw b’a fɛ ka kɔsegi Jehova ma. U b’a fɛ ka jɛn n’an ye ka Jehova bato, nka u tɛ se k’o kɛ n’an m’u dɛmɛ.

6. Minw sumana Alako ta fan fɛ, an bɛɛ be se k’u yɔrɔ ɲini cogo di?

⁶ Minw sumana Alako ta fan fɛ, jɔn lo be se k’u yɔrɔ ɲini? An bɛɛ be se k’u yɔrɔ ɲini: u somɔgɔw, diinan mɔgɔkɔrɔw, piyɔniyew ani weleweledala tɔɔw. Yala i teri wala i somɔgɔ dɔ sumana Alako ta fan fɛ wa? Soo ni soo waajuli baara la wala waajuli kɛtɔ jamayɔrɔ la, yala i ye mɔgɔ dɔ kunbɛn min sumana Alako ta fan fɛ wa? A ɲɛfɔ a ye ko nʼa bʼa fɛ dɔ ka na bɔ a ye, a bena diya i ye kʼa ka ladɛrɛsi wala a ka telefɔni nimɔrɔ di i ka kafo ka diinan mɔgɔkɔrɔw ma.

7. Diinan mɔgɔkɔrɔ dɔ ka koo b’i dɛmɛ ka mun lo faamu?

⁷ Minw b’a fɛ ka kɔsegi Jehova ma, diinan mɔgɔkɔrɔw be se ka koo tigitigi jumanw lo kɛ walisa k’u yɔrɔ ɲini? Diinan mɔgɔkɔrɔ dɔ tɔgɔ ko Thomas * ani a be Ɛsipaɲi. A ye balima 40 ni kɔ dɛmɛ u kɔsegira kafo kɔnɔ. A ko: “N’ be kɔn ka balima caaman ɲininga n’u b’u dɔw yɔrɔ lɔn. Wala n’ be weleweledalaw ɲininga n’u hakili be balima dɔ la min tɛ na lajɛnw na tugun. A ka di balimaw fanba ye ka n’ dɛmɛ k’o mɔgɔw yɔrɔ ɲini sabu u b’a jati k’u niin b’o baara la. O kɔ, ni n’ tagara bɔ balima dɔ ye min sumana Alako ta fan fɛ, n’ b’a ɲininga a deenw n’a somɔgɔ tɔɔw koo la. U dɔw tun be to ka na n’u deenw ye lajɛnw na. N’a sɔrɔ o deenw yɛrɛ tun ye weleweledalaw ye wagati dɔ la. An be se k’olu fana dɛmɛ u ka kɔsegi Jehova ma.”

8. Yezu ye ntalen min la deen tununin koo la Luka 15:17-24 kɔnɔ, facɛman y’a dencɛ minɛ cogo di?

⁸ Minw b’a fɛ ka kɔsegi Jehova ma, n’an b’a fɛ k’u dɛmɛ, an ka ɲi ka kɛ ni jogo jumanw lo ye? Yezu ye ntalen min la deen tununin koo la, a filɛ an be se ka kalan minw sɔrɔ o la (Luka 15:17-24 kalan). Yezu y’a ɲɛfɔ o deen nimisara cogo min na ani a ye hakili sɔrɔ ka kɔsegi soo. Facɛman bolila ka taga a dencɛ kunbɛn. A melekera a la walisa k’a yira a la ko a b’a kanu. Dencɛman y’a dusukunnakow fɔ ani a makari y’a facɛ minɛ. Facɛman ye koo tigitigi dɔw kɛ walisa k’a dencɛ hakili sigi ko a nako diyara ale ye. A y’a yira a la ko ale t’a jati baaraden ye, nka a b’a jati a dencɛ kanulen ye. Walisa k’o yira, a ye ɲɛnagwɛ dɔ labɛn ani a ye fani cɛɲumanba di a dencɛ ma.

9. Mɔgɔ minw sumana Alako ta fan fɛ, an ka ɲi ka mun lo kɛ walisa k’u dɛmɛ u ka kɔsegi Jehova ma? (Koorilen nin lajɛ: “ Minw b’a fɛ ka kɔsegi Jehova ma, olu dɛmɛcogo.”)

 ⁹ Jehova be i ko facɛman min kofɔra Yezu ka ntalen kɔnɔ. An balima minw sumana Alako ta fan fɛ, u koo ka di a ye ani a b’a fɛ u ka kɔsegi ale ma. N’an be Jehova ladegi, an bena se k’u dɛmɛ u k’o kɛ. Walisa ka Jehova ladegi, an ka ɲi ka muɲu u kɔrɔ, ka makari u la ani k’u kanu. Mun na an ka ɲi ka kɛ n’o jogow ye ani an be se ka kɛ n’u ye cogo di?

10. Mun na an ka ɲi ka muɲu n’an b’a fɛ ka mɔgɔ dɔ dɛmɛ a ka kɔsegi Jehova ma?

¹⁰ Walisa ka mɔgɔ dɛmɛ a ka kɔsegi Jehova ma, o be wagati ta. O kama, fɔɔ an ka muɲu. Minw tun sumana Alako ta fan fɛ, u caaman sɔnna a ma ko diinan mɔgɔkɔrɔw ni kafoden dɔw nana bɔ u ye siɲɛ caaman. O kɔ le, u sɔrɔla ka sɔn ka kɔsegi Jehova ma. Balimamuso dɔ tɔgɔ ko Nancy ani a be bɔ Azi worodugu ni kɔrɔn cɛ. A y’a sɛbɛ ko: “N’ teri sɔbɛ dɔ be kafo kɔnɔ ani a ye n’ dɛmɛ kosɔbɛ. A ye n’ kanu i ko a wolo kɔrɔmuso. An tun ye wagati diiman minw kɛ ɲɔgɔn fɛ, a ye n’ hakili jigi o la. Ni n’ tun be n’ dusukunnakow fɔra a ye, a tun be muɲu ka n’ lamɛn. A tun tɛ sigasiga ka n’ ladi fana. A y’a yira ko a ye n’ teri sɔbɛ ye ani a tun labilanin lo ka n’ dɛmɛ tuma bɛɛ.”

11. Mɔgɔ min diminin lo, n’an b’a fɛ k’a dɛmɛ, mun na an ka ɲi ka makari a la?

¹¹ Makari be komi fura min be se ka mɔgɔ ka dimi mala. Minw sumana Alako ta fan fɛ, u dɔw dimininba lo kafoden dɔw kɔrɔ kabi saan caaman. O kama, u  t’a fɛ ka kɔsegi Jehova ma. Dɔw be se k’a miiri ko balimaw ye tilenbaliyako lo kɛ u la. N’a sɔrɔ u mako b’a la mɔgɔ dɔ k’u lamɛn ani k’u dusukunnakow faamu (Zaki 1:19). Mariya tun sumana Alako ta fan fɛ. A ko: “N’ mako tun b’a la dɔ ka n’ lamɛn, ka n’ dusu saalo ani ka n’ ladi.”

12. Minw sumana Alako ta fan fɛ, Jehova b’u dɛmɛ ni kanuya ye cogo min na, basigi ɲɛyirali dɔ kan k’o yira.

¹² Jehova b’a sagokɛlaw kanu cogo min na, Bibulu b’o suma ni jurukisɛ ye. Mun na Ala ka kanuya be i ko jurukisɛ? An ka ɲɛyirali dɔ lajɛ: Miiri k’a filɛ ko i benna kɔgɔji kɔnɔ. Jii sumanin lo ani jikuruw fanga ka bon. I be jigira jii jukɔrɔ. O wagati la, dɔ nana ni kurun ye ani a ye fɛɛn dɔ fili ka d’i ma i be se ka min minɛ walisa ka to jii sanfɛ. I b’o tigi waleɲuman lɔn. Nka, i mako be dɛmɛ wɛrɛ la walisa ka bɔ kɔgɔji kɔnɔ ani ka kisi. Mɔgɔ min be kurun kɔnɔ, i mako b’a la a ka juru dɔ fili ka d’i ma ani a k’i sama ka don kurun kɔnɔ. Israɛlden minw tun bɔra Jehova kɔ, a y’a fɔ olu koo la ko: “Ne y’u dɛmɛdɛmɛ adamadenya la, kanuya juru barika la.” (Oze 11:4). Bi fana, minw bɔra Jehova kɔ ani gwɛlɛya caaman ni hamikojugu b’u kan, a bele b’u minɛ o cogo la. A b’a fɛ u k’a lɔn ko ale b’u kanu ani ko a b’a fɛ k’u dɛmɛ u ka kɔsegi ale ma. Jehova be se ka tɛmɛ ele fɛ walisa k’a ka kanuya yira u la.

13. Pablo ka koo b’a yira cogo di ko n’an be tɔɔw kanu, o be se k’u dɛmɛ u ka kɔsegi Jehova ma?

¹³ Minw sumana Alako ta fan fɛ, a kɔrɔtanin lo an k’u hakili sigi ko Jehova b’u kanu ani ko an fana b’u kanu. Pablo  min kofɔra barokun tɛmɛnin na, ale tun sumana Alako ta fan fɛ saan 30 ni kɔ kɔnɔ. A ko: “Loon dɔ sɔgɔma n’ bɔtɔ soo, n’ ye balima musokɔrɔba dɔ kunbɛn ani a kumana n’ fɛ ni kanuya ye. N’ y’a daminɛ ka kasi i n’a fɔ denmisɛn. N’ y’a fɔ a ye ko a be komi Jehova lo y’a ci walisa a ka kuma n’ fɛ. O wagati lo la n’ y’a latigɛ ka kɔsegi Jehova ma.”

14. Ntalen min be sɔrɔ Luka 15:4, 5 kɔnɔ, ka kɛɲɛ n’o ye, sagadɛndɛla ye mun lo kɛ tuma min na a y’a ka saga ye?

¹⁴ Minw sumana Alako ta fan fɛ, u mako b’a la an ka to k’u dɛmɛ ani k’u jija. N’a sɔrɔ u dusu kasinin lo kosɔbɛ i ko Yezu ye dencɛ tununin min kofɔ a ka ntalen na. N’a sɔrɔ koo minw y’u sɔrɔ Sutana ka duniɲa kɔnɔ, o y’a to u ka limaniya barika dɔgɔyara. An ka ɲi k’u dɛmɛ u k’u ka limaniya barika bonya Jehova koo la. Yezu ye ntalen dɔ la saga tununin dɔ koo la. A y’a fɔ o ntalen na ko sagadɛndɛla b’o saga ta k’a la a kaan na ani a be kɔsegi n’a ye sagakulu cɛma. Sagadɛndɛla ye jijalibaw kɛ ani a ye wagati caaman ta ka sɔrɔ k’o saga ye. Nka, a y’a faamu ko a ka ɲi k’a ta ka kɔsegi n’a ye sagakulu cɛma sabu fanga bɛrɛ t’o saga la k’o kɛ a yɛrɛ ma.—Luka 15:4, 5 kalan.

15. Minw sumana Alako ta fan fɛ ani u b’a fɛ ka kɔsegi Jehova ma, an be se k’olu dɛmɛ cogo di? (Koorilen nin lajɛ: “ Kitabunin nafamanba dɔ.”)

¹⁵ Minw sumana Alako ta fan fɛ, n’a sɔrɔ an ka ɲi ka wagati caaman ta ani ka jijalibaw kɛ walisa k’u dɛmɛ u ka see sɔrɔ gwɛlɛya dɔw kan. Nka, Jehova ka hakili senu, a ka Kuma ani an ka  gafew barika la, an be se k’u dɛmɛ u k’u ka jɛnɲɔgɔnya sabati ni Jehova ye (Ɔrɔm. 15:1). An be se k’o kɛ cogo di? Diinan mɔgɔkɔrɔ kolɔnbaga dɔ ko: “N’u y’a latigɛ ka kɔsegi Jehova ma sɔbɛ la, u fanba mako b’a la ka bibulukalan kɛ.” * N’a ɲinina i fɛ ko i ka bibulukalan kɛ n’u dɔ ye, i ka sɔn o ma ni ninsɔndiya ye. Diinan mɔgɔkɔrɔ min kofɔra, ale ko: “Balima min be bibulukalan kɛ n’u dɔ ye, a ka ɲi ka koow kɛ teriya la. A ka ɲi ka kɛ mɔgɔ dɔ ye, a tigi be se ka la min na.”

16. An b’a lɔn cogo di ko mɛlɛkɛw b’an dɛmɛ?

¹⁶ Minw b’a fɛ ka kɔsegi Jehova ma, ɲɛyirali caaman b’a yira ko mɛlɛkɛw b’an dɛmɛ k’u yɔrɔ ɲini (Yir. 14:6). Silvio be bɔ Ekuwatɛri. A ye Jehova deli n’a dusu bɛɛ ye a k’ale dɛmɛ ka kɔsegi kafo kɔnɔ. O delili kɛtɔ, a ye kɔkɔrikan mɛn. Diinan mɔgɔkɔrɔ fila lo tun b’a ka daa la. Silvio mako tun be dɛmɛ min na, o diinan mɔgɔkɔrɔw ninsɔn diyara k’a daminɛ k’o lase a ma.

17. Minw sumana Alako ta fan fɛ, n’an b’u dɛmɛ an be duga juman lo sɔrɔ o la?

¹⁷ Minw sumana Alako ta fan fɛ, n’an b’u dɛmɛ u ka kɔsegi Jehova ma, an bena ninsɔndiyaba sɔrɔ o la. Salvador ye piyɔniye ye ani a b’a mako don kosɔbɛ o mɔgɔw la. A ko: “Tuma dɔw la, n’ be kasi ninsɔndiya bolo. N’ dusu ka di kosɔbɛ k’a ye ko Jehova y’a sagokɛla dɔ kisi ka bɔ Sutana ka duniɲa kɔnɔ ani ko n’ ye nɛɛma sɔrɔ ka dɛmɛ don o baara la.”—Kɛw. 20:35.

18. N’i ye lajɛntaga ni waajuli dabila, i be se ka la mun lo la?

¹⁸ N’i ye lajɛntaga ni waajuli dabila, i ka la a la ko Jehova bele b’i kanu. A b’a fɛ i ka kɔsegi ale ma. O tɛ ɲɛ jijali kɔ. I ko facɛman min kofɔra Yezu ka ntalen na, Jehova kɔrɔtɔnin lo i ka kɔsegi ale ma ani a bena i bisimila ni dusudiya ye.