O vɛrisew be kerecɛn jogo kɔnɔntɔn kofɔ: “Kanuya, nisɔndiya, hɛrɛ, muɲuli, ɲumanya, hinɛ, tilenninya [limaniya, NW ], sabali [wala dususuman], ni yɛrɛminɛ.” Nka Ala ka hakili senu t’an dɛmɛ ka kɛ n’o jogo ɲumanw dɔrɔn lo ye.

Vɛrise tɛmɛninw na, ciden Pol ko: “Farisogo sago ye . . . ɲamɔgɔya, nɔgɔtɔya, ni kakalaya, josɔn, ni subagaya, ani juguya, kɛlɛ, ni keliya, dimi ni sɔsɔli, ani tilanni, ani ka faran ka kɛ jɛnkuluw ye, wasabaliya, dɔrɔtɔya, ni nugubatɔya, ani o ɲɔgɔnna koow.” (Gal. 5:19-21). Pol ko “ani o ɲɔgɔnna koow.” O kɔrɔ ko a tun be se ka “farisogo sago” wɛrɛw kofɔ i n’a fɔ minw be sɔrɔ Kɔlɔsikaw 3:5 kɔnɔ. O cogo kelen na, tuma min na a ye jogo ɲuman kɔnɔntɔn kofɔ, a ko: “Sariya t’o koo [ɲɔgɔnw, NW] kɛlɛ.” O b’a yira ko an be se ka kɛ ni jogo ɲuman minw ye hakili senu ka dɛmɛ barika la, Pol m’u bɛɛ lo kofɔ.

An b’o lo faamu n’an ye hakili senu deen faanw suma ni jogow ye Pol ye minw kofɔ Efɛzikaw ka bataki kɔnɔ. A ko: “Mɔgɔ minw kɔnɔ gwɛnin lo, olu ka kɛwaliw ye nin ye: ɲumanya, tilenninya, ani tiɲɛko.” (Efɛz. 5:8, 9). “Ɲumanya,” tilenninya ani tiɲɛnko ye mɔgɔ kɔnɔgwɛw ka jogow ye ani hakili senu deen faan dɔw lo.

O cogo kelen na, Pol ye Timote jija ko a k’a ɲini ka kɛ ni jogo wɔɔrɔ dɔw ye. A ko Timote ka to ka ‘tilenninyakow kɛ, ka siran Ala ɲa, k’a jigi la a kan [wala ka limaniya], k’a kanu, ka muɲuli kɛ, ani ka to ka ɲumanya kɛ mɔgɔw ye.’ (1 Tim. 6:11). Jogo naani lo kofɔra yan minw be hakili senu deen faanw cɛma fana: limaniya, kanuya, muɲuli ani ɲumanya. Timote mako tun bena kɛ hakili senu na fana walisa ka kɛ ni tilenninya ani Ala ɲɛsiran ye.—Kɔlɔsikaw 3:12 ani 2 Piyɛri 1:5-7 lajɛ.

O la, Galatikaw 5:22, 23 tɛ kerecɛn jogow bɛɛ lo kofɔ. Jogo kɔnɔntɔn minw kofɔra hakili senu deen faanw cɛma, hakili senu be se k’an dɛmɛ ka kɛ n’u ye. Nka, walisa ka kɛ kerecɛn kolɔnbagaw ye, an ka ɲi ka kɛ ni jogow wɛrɛw ye. An ka ɲi fana ka “jogokura ta, ka kɛ Ala jaa ye, ka kɛ mɔgɔtilenninw ni mɔgɔɲumanw ye, minw be sɔrɔ Ala ka tiɲɛ barika la.”—Efɛz. 4:24.