1. Ka kuma ni mɔgɔw ye waajuli la, dɔw be mun lo miiri o koo la? (jaa lajɛ fana).

 AN YE Jehova sagokɛlaw ye minkɛ, an be mɔgɔw waaju sabu an be an sankolola Faa kanu ani an b’a fɛ k’an mɔgɔɲɔgɔnw dɛmɛ u k’a lɔn. Waajuli ka di kosɔbɛ weleweledala caaman ye. Nka a man nɔgɔ dɔw fɛ ka ninsɔndiya sɔrɔ a la. Mun na do? Sabu kuma man di dɔw ye ani u lanin t’u yɛrɛ la. Dɔw be maloya ka taga bɔ mɔgɔw ye u ka soo k’a sɔrɔ u ma u weele. Dɔw be siran ko tɔɔw bena ban k’u lamɛn. A fɔra dɔw ye ko u kana don mɔgɔw gasi la. Hali k’a sɔrɔ o balimaw be Jehova kanu kosɔbɛ, a ka gwɛlɛ u ma ka taga bɔ mɔgɔw ye u tɛ minw lɔn walisa ka kibaro diiman fɔ u ye. Nka, u b’a lɔn ko waajuli baara kɔrɔtanin lo kosɔbɛ ani u be to k’o kɛ tuma o tuma. Siga t’a la, Jehova dusu ka di u kɔrɔ yɛrɛ le!

2. N’a ka gwɛlɛ i ma ka ninsɔndiya sɔrɔ waajuli la, mun na i man ɲi k’i fari faga?

² Yala o miiriyaw b’a to a ka gwɛlɛ i ma tuma dɔw la ka ninsɔndiya sɔrɔ waajuli la wa? N’o lo, kana i fari faga. N’i lanin t’i yɛrɛ la, n’a sɔrɔ o b’a yira ko i majiginin lo ani ko i t’a fɛ ka mɔgɔw ɲɛɛ sama i yɛrɛ kan. O be se k’a yira fana ko i t’a fɛ ka sɔsɔli kɛ ni mɔgɔw ye. Ka fara o kan, mɔgɔ si t’a fɛ u ka ban k’a lamɛn sanko n’a b’a ɲinina ka koo ɲuman kɛ tɔɔw ye. I sankolola Faa b’a lɔn kosɔbɛ gwɛlɛya  minw b’i kan ani i mako be dɛmɛ min na, a b’a fɛ k’o lase i ma (Ezayi 41:13). Koo minw b’an bali ka ninsɔndiya sɔrɔ waajuli baara la, an be se ka see sɔrɔ o kan cogo di ani ka ninsɔndiya sɔrɔ o baara la? Barokun nin na, an bena ladili duuru lajɛ minw be se k’an dɛmɛ o la.

A TO ALA KA KUMA K’I BARIKA BONYA

3. Mun lo ye kira Zeremi dɛmɛ a ye tɔɔw waaju?

³ Tuma o tuma, cii gwɛlɛ tun mana kalifa Ala sagokɛlaw ma, a ka Kuma ye u barika bonya. An ka kira Zeremi ka koo lajɛ. Tuma min na Jehova ko a ka waajuli kɛ, a siranna. A ko: “Ne ye denmisɛn ye dɛ! Ne te se kuma na.” (Zer. 1:6). A ye jagwɛlɛya sɔrɔ cogo di? Ala ka Kuma lo y’a barika bonya. A ko: “A be i ko tasuma be ne kɔnɔ, n’a te se ka bɔ. Ne b’a muɲu ka dɛsɛ, ne te se.” (Zer. 20:8, 9). Zeremi tun ka ɲi ka waajuli kɛ kiin min na, o tun man nɔgɔ. Nka a tun ka ɲi ka kibaro min lase mɔgɔw ma, o y’a barika bonya.

4. N’an be Ala ka Kuma kalan ani ka miiri a kan, mun lo be kɛ do? (Kɔlɔsikaw 1:9, 10).

⁴ Ala ka Kuma be kerecɛnw barika bonya. Ciden Pol ye bataki min ci Kɔlɔsi kafodenw ma, a y’u jija ko u k’a ɲini ka lɔnniya sɔbɛ sɔrɔ Ala koo la. O bena u lasun “ka baaraɲuman sifa bɛɛ kɛ” walisa u “taamacogo ka se ka bɛn ni Matigi sago ye.” (Kɔlɔsikaw 1:9, 10 kalan). O baara ɲuman dɔ ye ka kibaro diiman fɔ mɔgɔw ye. O la, n’an be Ala ka Kuma kalan ani ka miiri a kan, o b’an ka limaniya sabati Jehova koo la. An b’a faamu fana ko a kɔrɔtanin lo an ka Masaya kibaro diiman fɔ mɔgɔw ye.

5. N’an be Bibulu kalanna ani k’a sɛgɛsɛgɛ, an be se ka nafa sɔrɔ bɛrɛbɛrɛ a la cogo di?

⁵ N’an be Ala ka Kuma kalanna, k’a sɛgɛsɛgɛ ani ka miiri a kan, an kana kɔrɔtɔ. O la, an bena nafa sɔrɔ a la bɛrɛbɛrɛ. A kalantɔ n’i bɛnna ni vɛrise dɔ ye i tɛ min faamu, kana pan a kan. Nka baara kɛ n’an ka sɛgɛsɛgɛrikɛ minan nunu dɔ ye walisa ka ɲɛfɔli sɔrɔ o vɛrise koo la: Index des publications des Témoins de Jéhovah wala Guide de recherche pour les Témoins de Jéhovah. N’i be wagati ta ka sɛgɛsɛgɛri kɛ, i bena la a la kosɔbɛ ko Ala ka Kuma ye tiɲɛn ye (1 Tes. 5:21). O la i ye min faamu, a bena diya i ye kosɔbɛ k’o kofɔ tɔɔw ye.

 I YƐRƐ LABƐN KOƝUMAN WAAJULI KAMA

6. Mun na an ka ɲi k’an yɛrɛ labɛn koɲuman waajuli kama?

⁶ N’i b’i yɛrɛ labɛn koɲuman waajuli kama, i tɛna siran kojugu ka kuma mɔgɔw fɛ. Sanni Yezu k’a ka kalandenw ci waajuli la, a kɔnna k’u dɛmɛ u y’u yɛrɛ labɛn (Luka 10:1-11). U ye Yezu ka ladiliw sira tagama minkɛ, u sera ka koo ɲuman caaman kɛ ani u ye ninsɔndiyaba sɔrɔ o la.—Luka 10:17.

7. An be se k’an yɛrɛ labɛn cogo di waajuli kama? (jaa lajɛ fana).

⁷ An be se k’an yɛrɛ labɛn cogo di waajuli kama? An ka ɲi ka miiri k’a filɛ an bena min fɔ ani cogo min na an be se k’o fɔ an yɛrɛ kumacogo la. Mɔgɔw ka teli ka koo minw fɔ an ye, an be se ka miiri u la fila wala saba la ani k’a filɛ an bena u jaabi cogo min na. N’an b’a fɛ ka baro daminɛ ni mɔgɔ dɔ ye, an k’an hakili sigi, ka yɛlɛmisɛnw kɛ ani ka koow kɛ teriya la.

8. Ka kɛɲɛ ni ciden Pol ka fɔta ye, kɔrɔ juman na kerecɛnw be i ko bɔgɔdaga?

⁸ Ciden Pol y’a fɔ a balimaw ye ko: “O baara nafaman dira an ma, an minw fanga ka dɔgɔ i n’a fɔ bɔgɔdaga.” (2 Kor. 4:7). O baara nafaman ye mun lo ye? Masaya kibaro diiman waajuli baara lo, o min be mɔgɔ niin kisi (2 Kor. 4:1). Pol kaan be bɔgɔdaga min ma, o ye mun lo ye? O ɲɛsinna Ala sagokɛlaw lo ma, olu minw be kibaro diiman fɔ tɔɔw ye. Pol ka wagati la, jagokɛlaw tun be fɛɛn nafamanw lo don bɔgɔdagaw kɔnɔ i n’a fɔ dumuni, diwɛn ani wari. O cogo kelen na, Jehova ye fɛɛn nafamanba dɔ kalifa an ma, o min ye kibaro diiman ye. Walisa ka to k’o kibaro diiman fɔ, an mako be fanga min na, Jehova b’o di an ma.

JAGWƐLƐYA DELI JEHOVA FƐ

9. N’an be siranna mɔgɔw ɲɛ wala n’an b’a miiri ko u bena ban k’an lamɛn, an be se ka see sɔrɔ o kan cogo di? (jaa lajɛ fana).

⁹ Tuma dɔw la, an be siran mɔgɔw ɲɛ wala an b’a miiri ko u bena ban k’an lamɛn. An be se ka see sɔrɔ o siranya kan cogo di? Tuma min na u ko cidenw kana waajuli kɛ tugun, u ye delili min kɛ, an k’o lajɛ. Sanni u ka siran ka waajuli dabila, u ye Jehova deli ko a k’u dɛmɛ  walisa u ka to k’a ka “kuma fɔ mɔgɔw ye ni jagwɛlɛya ye.” Jehova sinna k’u ka delili jaabi (Kɛw. 4:18, 29, 31). N’an fana be siran mɔgɔw ɲɛ tuma dɔw la, an ka ɲi ka Jehova deli a k’an dɛmɛ. Jehova deli a k’i dɛmɛ i ka mɔgɔw kanu kosɔbɛ walisa i kana siran ka kibaro diiman fɔ u ye.

10. Jehova b’an dɛmɛ cogo di walisa an ka seereya kɛ a koo la? (Ezayi 43:10-12).

¹⁰ Jehova ye an kɛ a Seerew ye ani a ye layidu ta ko a bena an dɛmɛ ka jagwɛlɛya sɔrɔ (Ezayi 43:10-12 kalan). A b’o kɛ cogo minw na, an k’u la naani lajɛ. A fɔlɔ, tuma o tuma n’an be kibaro diiman fɔra, Yezu be n’an ye (Mat. 28:18-20). A filanan, Jehova ye cii di mɛlɛkɛw ma ko u k’an dɛmɛ (Yir. 14:6). A sabanan, Jehova ye hakili senu di an ma walisa an ye min kalan, a k’an hakili jigi o la (Zan 14:25, 26). A naaninan, Jehova ye balimaw di an ma u minw b’o baara kɛ n’an ye. An mako be fɛɛn o fɛɛn na walisa ka sanga sɔrɔ o baara la, an b’o sɔrɔ Jehova n’an balima kanulenw ka dɛmɛ barika la.

I JANTO MƆGƆW MAKOYAW LA ANI KƐ NI MIIRIYA ƝUMAN YE

11. I be se ka mɔgɔ caaman sɔrɔ waajuli baara la cogo di? (jaa lajɛ fana).

¹¹ N’i tɛ mɔgɔ caaman sɔrɔla u ka soo, yala o b’i fari faga wa? I be se k’i yɛrɛ ɲininga ko: “N’ ka kiinmɔgɔw be sɔrɔ min wagati nin na?” (Kɛw. 16:13). “Yala u be baarakɛyɔrɔ wala lɔgɔfiyɛ la le?” N’o lo, n’a sɔrɔ i bena mɔgɔ caaman sɔrɔ n’i be waajuli kɛ siradaw la. Balimacɛ Joshua ko: “N’ munumunutɔ lɔgɔfiyɛ ani forobayɔrɔ wɛrɛw la, n’ ye sababuw sɔrɔ ka waajuli kɛ.” Ale n’a muso Bridget ye mɔgɔ caaman sɔrɔ u ka soo u kɛtɔ ka taga bɔ u ye wulafɛ ani dimansilon tilefɛ.—Efɛz. 5:15, 16.

12. An be se ka mɔgɔw ka lannakow n’u ka haminankow lɔn cogo di?

¹² N’i be kumana ni mɔgɔ dɔ ye ani a t’a mako donna, a ɲini k’a ka lannakow wala a haminankow lɔn. Ɲiningali min be sɔrɔ an ka sɛbɛninw ɲɛɛ fɔlɔ kan, Joshua ni Bridget be tɛmɛ o lo fɛ ka baro daminɛ ni mɔgɔw ye. Misali la, an ka sɛbɛnin dɔ kuun ye ko: Ele be Bibulu jati mun lo ye? U  be tɛmɛ o sɛbɛnin fɛ k’a fɔ ko: “Dɔw b’a jati ko Bibulu bɔra Ala lo yɔrɔ, nka dɔw t’a jati o cogo la. Ele ka miiriya ye mun lo ye?” Tuma caaman na, o b’a to u be baro kɛ ni mɔgɔw ye.

13. Hali ni mɔgɔw tɛ sɔn k’an lamɛn, mun na an be se k’a jati ko an be sanga sɔrɔla waajuli la? (Talenw 27:11).

¹³ Hali ni mɔgɔw tɛ sɔn k’an lamɛn, an be se k’a jati ko an be sanga sɔrɔla waajuli la. Mun na do? Sabu Jehova n’a Dencɛ y’a ɲini an fɛ ko an ka seereya kɛ ani an b’o lo kɛra (Kɛw. 10:42). Hali ni an ma mɔgɔ si sɔrɔ ka kuma n’a ye wala n’u be ban k’an lamɛn, an be se ka ninsɔn diya sabu an b’a lɔn ko an b’an sankolola Faa sago lo kɛra.—Talenw 27:11 kalan.

14. Ni weleweleda dɔ ye makodonmɔgɔ dɔ sɔrɔ, mun na an be se ka ninsɔn diya?

¹⁴ An be se ka ninsɔn diya fana ni weleweleda dɔ ye makodonmɔgɔ dɔ sɔrɔ. Kɔrɔsili Sangaso ko waajuli baara be i ko deen dɔ tununa ani u b’a ɲinina. Mɔgɔ caaman lo b’o deen ɲini yɔrɔ bɛɛ. N’o deen yera, bɛɛ lo be ninsɔn diya. Mɔgɔ min y’a ye, ale dɔrɔn lo tɛ ninsɔn diya. O cogo kelen na, kafodenw bɛɛ lo be dɛmɛ don walisa ka mɔgɔ kɛ Krista ka kalanden ye. An mako be kafodenw bɛɛ la walisa ka waajuli kɛ kafo ka kiinw bɛɛ kɔnɔ. An bɛɛ lo be ninsɔn diya fana ni dɔ y’a daminɛ ka na lajɛnw na.

I BE NI KANUYA MIN YE JEHOVA N’I MƆGƆƝƆGƆN KOO LA, SINSIN O KAN

15. Min fɔra Matiyo 22:37-39 kɔnɔ, n’an b’o sira tagama, mun na o be se ka dɔ fara an ka ninsɔndiya kan waajuli baara la? (jaa lajɛ fana ).

¹⁵ An be ni kanuya min ye Jehova n’an mɔgɔɲɔgɔn koo la, n’an be sinsin o kan, o be se ka dɔ fara an ka ninsɔndiya kan waajuli baara la (Matiyo 22:37-39 kalan). N’an tora ka waajuli kɛ, miiri k’a filɛ o be Jehova ninsɔn diya cogo min na! Ni mɔgɔw ye bibulukalan daminɛ, miiri k’a filɛ olu fana ninsɔn be diya cogo min na! A to i hakili la fana ko minw be sɔn kibaro diiman na ani u b’a latigɛ ka Jehova sago kɛ, u bena ɲɛnamaya kɛ fɔɔ abada!—Zan 6:40; 1 Tim. 4:16.

16. N’an tɛ se ka bɔ an ka soo, an be se ka ninsɔndiya sɔrɔ cogo di waajuli la? Misali dɔw fɔ.

¹⁶ Yala i tɛ se ka bɔ i ka soo koo dɔw kosɔn wa? N’o lo, i be se ka min kɛ  k’a yira ko i be Jehova n’i mɔgɔɲɔgɔn kanu, sinsin o kan. COVID-19 fɔɲɔbana tuma na, Samuel ni Dania tun tɛ se ka bɔ u ka soo. O wagati gwɛlɛw na, u tora ka waajuli kɛ telefɔni ni lɛtɛrɛw sababu fɛ ani ka bibulukalanw kɛ Zoom kan. Kansɛri bana tun be Samuel la. U tun b’a furakɛra dɔgɔtɔrɔso min na, a tun be mɔgɔw waaju yen. A ko: “Gwɛlɛyaw be se k’an hakili ɲagami, k’an sɛgɛn ani k’an barika ban Alako ta fan fɛ. An mako b’a la ka ninsɔndiya sɔrɔ Jehova ka baara la.” Ka fara Samuel ka bana kan, Dania benna k’a yɛrɛ mandimi ani a tun tɛ se ka wuli ka bɔ a ka dilan kan kalo saba bɛɛ kɔnɔ. O kɔ, a ye kalo wɔɔrɔ kɛ muruku wotoro kɔnɔ. A ko: “N’ tun be se ka fɛɛn o fɛɛn kɛ, n’ tun be n’ jija k’o kɛ. N’ ye dɔgɔtɔrɔmuso dɔ waaju min tun nana bɔ n’ ye. Mɔgɔ minw tun be to ka na an ka sannifɛnw di an ma, n’ ye baro kɛ n’olu ye fana. N’ ye baro diimanw kɛ fana telefɔni na ni muso dɔ ye min be baara kɛ dɔgɔtɔrɔso dɔ la.” Samuel ni Dania ka koow cogoya kosɔn, u tun tɛ se ka bɛrɛ kɛ waajuli la. Nka, u y’u seko kɛ ani u ye ninsɔndiya sɔrɔ o la.

17. Ladili minw dira barokun nin na, i be se ka nafa sɔrɔ u la bɛrɛbɛrɛ cogo di?

¹⁷ Ladili minw dira barokun nin na, n’an be u bɛɛ sira tagama, o bena an nafa bɛrɛbɛrɛ. O ladili kelen kelen bɛɛ be i n’a fɔ nanfɛnw. U bɛɛ ɲagamini ɲɔgɔn na, o lo be naan diya. O cogo kelen na, n’an b’o ladiliw bɛɛ sira tagama, an bena see sɔrɔ miiriya juguw kan ani ka ninsɔndiya sɔrɔ bɛrɛbɛrɛ waajuli la.