Kɔrɔsili Sangaso minw bɔra ɲina, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Ezayi 63:9 b’a fɔ ko Jehova b’a sagokɛlaw “kanu” ani “a be makari u la.” Mun na o kumaw b’an hakili sigi?

Jehova be makari minkɛ, a labɛnnin lo ka yafa an ma. Ezayi 63:9 b’an hakili sigi ko Jehova b’an kanu. O b’a lasun k’an dɛmɛ. A ka ɲi an k’a ladegi.—w21.01, ɲɛɛ 21.

Mun na Jehova ye kuntigiya kalifa dɔw ma?

A y’o kɛ sabu a b’an kanu. O labɛn b’a to koow ka kɛ cogo bɛnnin na ani hɛɛrɛ la a ka denbaya kɔnɔ. Ni denbaya mɔgɔ kelen kelen bɛɛ be koow kɛ ka kɛɲɛ n’o labɛn ye, u b’a lɔn tigi min ka ɲi ka desizɔn laban ta ani k’a janto walisa o desizɔn ka labato.—w21.02, ɲɛɛ 3.

Mɔgɔ be tɛmɛ aplikasɔn minw fɛ ka mesaziw ci, mun na kerecɛn ka ɲi ka kɔrɔsili kɛ n’a be baara kɛra n’u ye?

Ni mɔgɔ dɔ y’a latigɛ ka taga rezo sosiyow kan, a ka ɲi k’a janto k’a teriw sugandi koɲuman. A man nɔgɔ k’o kɛ n’o y’a sɔrɔ ko jɛnkulu min sigira, o mɔgɔw ka ca (1 Tim. 5:13). Kuma minw tiɲɛntigiya ma lɔn, a ka ɲi k’a janto a kana u lamɛn wala k’u jɛnsɛn. A man ɲi fana k’a balimaw jati a ka kiliyanw ye.—w21.03, ɲɛɛ 31.

Mun na Ala y’a to Yezu tɔɔrɔla ani ka sa?

A fɔlɔ, Yezu tun ka ɲi ka gwengwe yiri kan walisa ka Yahutuw kisi ka bɔ danga dɔ ma (Gal. 3:10, 13). A filanan, Jehova tun b’a fɛ a ka fɔrɔmasɔn sɔrɔ a ka kunkanbaara nata kama, o min ye ka kɛ sarakalasebagaw Kuntigiba ye. A sabanan, Jehova y’a to Yezu tɔɔrɔla kosɔbɛ walisa k’a yira ko adamadenw be se ka to kantigiya la, hali ni kɔrɔbɔlibaw b’u kan (Zɔbu 1:9-11).—w21.04, ɲɛɛ 16-17.

Mɔgɔ minw sɔrɔ man di u ka soo, i be se k’olu sɔrɔ cogo di?

Mɔgɔw ka teli ka sɔrɔ soo wagati min na, taga bɔ u ye o tuma na. Waajuli kɛ yɔrɔ wɛrɛ la. Waajuli kɛ cogo wɛrɛ la fana, i n’a fɔ ka lɛtɛrɛ sɛbɛ.—w21.05, ɲɛɛ 15-16.

Ciden Pol tun b’a fɛ ka mun lo fɔ, tuma min na a ko: “Sariya faan fɛ ne sanin lo ale sariya yɛrɛ sababu la”? (Gal. 2:19).

Musa ka sariya y’a yira ka gwɛ ko mɔgɔ dafabaliw tɛ se ka sariya labato cogo dafanin na ani a ye mɔgɔw dɛmɛ u ka Krista lɔn (Gal. 3:19, 24). O kama, Pol sɔnna ani a limaniyara Krista la. O cogo la, a tun sanin lo “sariya yɛrɛ sababu la,” o kɔrɔ, sariya lo tun t’a ɲɛminɛna tugun.—w21.06, ɲɛɛ 31.

Jehova ye ɲɛyirali ɲuman to an ye cogo di muɲuli koo la?

Jehova be koo nunu muɲuna: U b’a tɔgɔ tiɲɛna, mɔgɔw banna a ka kuntigiya ma, a ka deen dɔw murutira a ma, Sutana be ngalonw la a kan, Jehova sagokɛla kanulenw be tɔɔrɔla, a teri minw sara, olu ɲɛnafin b’a la, mɔgɔ juguw be koo jugu kɛ tɔɔw la, adamadenw be Ala ka danfɛnw halakira.—w21.07, ɲɛɛ 9-12.

An be kalan juman lo sɔrɔ Yusufu fɛ muɲuli koo la?

Yusufu kɔrɔcɛw ye tilenbaliyako kɛ a la. O kɔ, Potifar muso ye ngalon tigɛ ka la a kan ani u y’a don kaso la saan caaman kɔnɔ.—w21.08, ɲɛɛ 12.

Aze 2:6-9, 20-22 kɔnna ka yuguyuguri baara juman lo kofɔ?

Siyaw banna Masaya kibaro diiman na, nka mɔgɔ caaman be sɔnna tiɲɛn batoli ma. Yanni dɔɔni, siyaw bena laban ka yuguyugu tuma min na u bena halaki.—w21.09, ɲɛɛ 15-19.

Mun na an man ɲi k’an ka cidenya baara dabila?

An b’an jija cogo min na o baara la, Jehova ɲɛɛ b’o la ani o ka di a ye. N’an m’an fari faga ani k’o baara dabila, an bena ɲɛnamaya banbali sɔrɔ.—w21.10, ɲɛɛ 25-26.

Levitiki sapitiri 19nan b’an dɛmɛ cogo di ka ladili nin sira tagama: “Aw ka kɛ senumaw ye aw taama cogo bɛɛ la”? (1 Piyɛri 1:15, Bible senuma).

A be komi o vɛrise basiginin be Levitiki 19:2 lo kan. Ɲɛyirali caaman kofɔra Levitiki sapitiri 19nan kɔnɔ minw b’a yira an be se ka 1 Piyɛri 1:15 sira tagama cogo min na an ka loon o loon ɲɛnamaya kɔnɔ.—w21.12, ɲɛɛ 3-4.