Sankolo la, Yezu ye jogo ɲumanw degi minw y’a to a kɛra baarakɛɲɔgɔn ɲuman ye tuma min na a nana dugukolo kan. Yezu ka ɲɛyirali be se k’an nafa cogo di? N’an y’a ka koo lajɛ koɲuman, an be sariyakolo saba sɔrɔ o la minw be se k’an dɛmɛ ka kɛ baarakɛɲɔgɔn ɲumanw ye. O sariyakolow bena an dɛmɛ k’an ka kelenya sabati ani ka jɛn ka baara kɛ koɲuman n’an balimaw ye.

Baarakɛɲɔgɔn ɲuman majiginin lo. A b’a jati ko nafa b’a baarakɛɲɔgɔn tɔɔw la ani a t’a yɛrɛ yira. Yezu y’o majigilenya degi a Faa fɛ. Jehova kelenpe lo ka kan ka weele ko Danbaga. Nka, a tun b’a fɛ tɔɔw k’a lɔn a Dencɛ ye baaraba min kɛ. A ka kuma nunu b’o lo yira: “An ka mɔgɔ dan an yɛrɛ jaa la.” (Zɛnɛzi 1:26). O kumaw fɛ, Yezu y’a faamu ko Jehova majiginin lo yɛrɛ le!—Zab. 18:36.

Tuma min na Yezu tun be dugukolo kan, a y’a yira fana ko a majiginin lo. Mɔgɔw tun mana a tando a ka kɛtaw kosɔn, a tun be barika la Ala ye (Mariki 10:17, 18; Zan 7:15, 16).Yezu y’a jija walisa hɛɛrɛ ka to ale n’a ka kalandenw cɛ. A tun tɛ u jati a ka jɔɔnw ye, nka a teriw (Zan 15:15). A yɛrɛ y’u seenw ko walisa k’u kalan majigilenya koo la (Zan 13:5, 12-14). I ko Yezu, an fana ka ɲi ka bonya la an baarakɛɲɔgɔnw kan sanni k’an  yɛrɛ nafa ɲini. N’an b’an baarakɛɲɔgɔnw ‘jati k’u ka fisa n’an ye’ ani n’an t’a ɲini ka tandoli sɔrɔ tuma bɛɛ, o be se k’a to baara caaman be kɛ.—Ɔrɔm. 12:10.

Mɔgɔ majiginin be sɔn a ma fana ko “koo be ɲa ladilikɛbaga caaman sababu la.” (Talenw 15:22). An ka lɔnniya n’an ka setigiya mana kɛ min o min ye, an ka ɲi k’a to an hakili la ko mɔgɔ si tɛ yen min be fɛɛn bɛɛ lɔn. Hali Yezu yɛrɛ sɔnna a ma ko ale tɛ fɛɛn bɛɛ lɔn (Mat. 24:36). Ani, a ka kalanden dafabaliw tun be min lɔn wala u tun be min miiri, Yezu tun b’a ɲini k’o lɔn (Mat. 16:13-16). A tɛ bari an na k’a ye ko a tun ka di a baarakɛɲɔgɔnw ye ka kɛ n’a ye! O cogo kelen na, an ka sɔn a ma ni majigilenya ye ko an tɛ koo bɛɛ lɔn ani an ka tɔɔw lamɛn. O cogo la, hɛɛrɛ bena kɛ an ni ɲɔgɔn cɛ ani an ka baara bena ɲɛ an bolo.

A kɔrɔtanin lo diinan mɔgɔkɔrɔw yɛrɛ lo ka Yezu ka majigilenya ladegi n’u be baara kɛra ɲɔgɔn fɛ. U ka ɲi k’a to u hakili la ko u ka lajɛn tuma na, hakili senu be se k’u kelen kelen bɛɛ lasun a ka miiriya dɔ fɔ min bena a to u be desizɔn ɲuman ta. U ka ɲi k’a to diinan mɔgɔkɔrɔ kelen kelen bɛɛ k’a ka miiriya fɔ. O la, u bena jɛn ka desizɔnw ta minw bena kafodenw bɛɛ nafa.

Baarakɛɲɔgɔn ɲuman sabarinin lo n’a be baara kɛra ni tɔɔw ye. A tɛ ja kelen kan ani a be sɔn tɔɔw ta ma. Siga t’a la, Yezu ye sababu ɲuman caaman sɔrɔ k’a ye ko a Faa sabarinin lo. Misali la, Jehova y’a ci ka na adamadenw kisi ka bɔ saya la, hali k’a sɔrɔ u tun ka kan ni saya ye.—Zan 3:16.

Yezu tun be sɔn tɔɔw ta ma, n’o tun bɛnnin lo. I hakili b’a la a ye Fenisi muso dɔ dɛmɛ cogo min na wa? A y’o kɛ hali k’a sɔrɔ a tun cira Israɛl siya lo ma (Mat. 15:22-28). Yezu tun be koow kɛ k’a dama kɛɲɛ fana n’a ka kalandenw ye. A tun t’a ɲini u fɛ u ka koo dɔ kɛ, u tɛ se ka min kɛ. Yezu teri sɔbɛ Piyɛri y’a fɔ jama cɛma ko ale t’a lɔn. O bɛɛ n’a ta, Yezu tun labɛnnin lo ka yafa a ma. Kɔfɛ, a ye kunkanbaarabaw kalifa Piyɛri ma (Luka 22:32; Zan 21:17; Kɛw. 2:14; 8:14-17; 10:44, 45). Yezu ka koo b’a yira ka gwɛ ko n’an be sɔn tɔɔw ta ma, u bena a ye ko an ye “mɔgɔsabalininw ye.”—Filip. 4:5.

 N’an sabarinin lo, o b’an lasun fana ka yɛlɛmani don an ka kokɛcogow la walisa ka baara kɛ hɛɛrɛ la ni mɔgɔ sifa bɛɛ ye. Yezu tun be tɔɔw minɛ ni ɲumanya ye. O kama, a jugu ɲangow y’a jalaki ko “lɛnpominɛlaw ni hakɛkɛlaw teri lo.” K’a sɔrɔ o mɔgɔw lo tun be mɛnni kɛ Yezu fɛ (Mat. 11:19). I ko Yezu, an fana ka baara kɛ ka ɲɛ ni tɔɔw ye. Balimacɛ Louis ye kafokulu kɔrɔsili baara ani Betɛli baara kɛ saan caaman kɔnɔ ni mɔgɔ sifa caaman ye. A ko: “N’ ye baara kɛ ni jɛnkulu minw ye, n’ tun be n’ jija k’u kelen kelen bɛɛ jati i ko kogo min lɔra ni birikiw ye minw bonya tɛ kelen ye. N’o birikiw kelen kelen bɛɛ bilara bilayɔrɔ ɲuman na, kogo be tilen. N’ ye n’ jija fana ka yɛlɛmaniw kɛ walisa ka baara kɛ hɛɛrɛ la ni tɔɔw ye, janko baara ka se ka taga ɲɛ.” O ye kokɛcogo ɲuman yɛrɛ lo ye!

Sababu jumanw lo b’an fɛ k’a yira an ka kafomɔgɔw la ko an sabarinin lo? An be sababu sɔrɔ k’o kɛ n’an be n’an ka waajulikɛ jɛnkulu ye. N’a sɔrɔ u be se k’an bila ni weleweledala dɔw ye an ni minw ka kunkanbaaraw tɛ kelen ye denbaya kɔnɔ wala an sanda tɛ kelen ye. An be se k’a yira ko an sabarinin lo, an kɛtɔ ka koow kɛ ka dama kɛɲɛ n’u ye wala k’an sen don waajuli kɛcogo dɔ la min ka di u ye. O la, u bena ninsɔndiya sɔrɔ kosɔbɛ waajuli la.

Baarakɛɲɔgɔn ɲuman be mɔgɔ “wɛrɛw dɛmɛ” (1 Tim. 6:18). Tuma min na Yezu tun be baara kɛra n’a Faa ye, siga t’a la, a y’a kɔrɔsi ko a Faa tɛ koow dogo a la. Jehova ye “sankolo yɛrɛkɛ tuma min na,” Yezu “tun be yen” ani a tun be se ka kalan sɔrɔ Jehova fɛ (Talenw 8:27). Yezu tun ye “fɛɛn min bɛɛ mɛn [a] Faa fɛ,” kɔfɛ, a ninsɔndiyara k’o kofɔ a ka kalandenw ye (Zan 15:15). An ye koo minw faamu, an fana be se ka Jehova ladegi, an kɛtɔ k’u kofɔ an balimaw ye. Siga t’a la, baarakɛɲɔgɔn ɲuman tɛna kunnafoni nafaman dɔw dogo walisa ka kuntigiya kɛ tɔɔw kan. A ye koo ɲuman minw faamu, a ninsɔn ka di k’u kofɔ tɔɔw ye.

An be se ka jijali kuma dɔw fɔ an baarakɛɲɔgɔnw ye fana. Ni mɔgɔ dɔ y’an ka baara ɲuman kɔrɔsi ani a y’an waleɲuman lɔn o kosɔn, yala o t’an dusu diya wa? Yezu tun be jogo ɲuman minw kɔrɔsi a baarakɛɲɔgɔnw na, a tun b’o fɔ u ye (Matiyo 25:19-23 lajɛ; Luka 10:17-20). A yɛrɛ y’a fɔ u ye ko u “bena koo dɔw kɛ minw ka bon” n’ale taw ye (Zan 14:12). A ka suu laban na dugukolo kan, a y’a ka ciden kantigiw tando ko: “Aw kɔni muɲuna ka to ne fɛ n ka sigɛnw waati la.” (Luka 22:28). Miiri k’a filɛ o kumaw ye a ka cidenw dusukun sɔrɔ cogo min na ani k’u lasun ka dɔ kɛ dɔ ye! N’an be wagati ta k’an baarakɛɲɔgɔnw tando, siga t’a la, u bena ninsɔndiya kosɔbɛ ani u bena kisɛya baara la.

Balimacɛ Kayode y’a fɔ ko: “Waajibi tɛ baarakɛɲɔgɔn ɲuman ka kɛ mɔgɔ dafanin ye. Nka, a b’a kɛ tɔɔw be baara kɛ ninsɔndiya la ani a be baara nɔgɔya u ma.” Yala i be koow kɛ o cogo la wa? I be baara kɛ ni balima minw ye, n’a sɔrɔ i be se k’u dɔw ɲininga nɛmɛnɛmɛ u k’a fɔ i ye i be i baarakɛɲɔgɔnw minɛ cogo min na. N’a sɔrɔ a ka di u ye ka baara kɛ n’i ye i ko a tun ka di Yezu ka kalandenw ye cogo min na ka baara kɛ n’a ye. N’o lo, i ko ciden Pol i be se k’a fɔ ko: “An b’a fɛ ka baara kɛ ni aw ye janko aw ye ɲagari.”—2 Kor. 1:24, Biblu Ala ta Kuma.