YOMARA n’a dɔgɔcɛw, Marcelo ni Hiver be dugu dennin dɔ la Gwatemala jamana na. Yomara lo y’a daminɛ ka bibulukalan kɛ ni Jehova Seerew ye ani o kɔ, a dɔgɔcɛw farala a kan. Nka gwɛlɛya dɔ tun be yen. U saba bɛɛ ye fiyentɔw ye ani u tun tɛ fiyentɔw ka sɛbɛriw kalancogo lɔn. O kama, u ka Bibulu kalanfa tun be dakunw ni vɛrisew kalan u ye kalan tuma na.

A tun ka gwɛlɛ u ma fana ka taga kafo ka lajɛnw na. Masaya Boon min tun ka surun u la, u tun ka ɲi ka miniti 40 lo kɛ ka sɔrɔ ka se yen. Nka, u tun tɛ se k’o kɛ u yɛrɛ ma. O kama, kafodenw ye labɛnw kɛ walisa k’u dɛmɛ ka taga lajɛnw bɛɛ la. Lakɔlidenw be kalan minw kɛ lajɛn na lɔgɔkun kɔnɔ, tuma min na u y’a daminɛ k’o kalanw kɛ, balimaw tun b’u dɛmɛ u k’u ka kalan bɛɛ degi u kunfɛ.

Saan 2019 mɛkalo la, balimaw y’a daminɛ ka lajɛnw kɛ Yomara nunu ka dugu la. Wagati dɔɔni ka kɔn o ɲɛ, balimacɛ dɔ n’a muso tun nana sigi o dugu la. Kudayi piyɔniyew tun lo. U y’a latigɛ ka Yomara n’a dɔgɔcɛw degi fiyentɔw ka sɛbɛrikɛcogo n’a kalancogo la k’a sɔrɔ olu yɛrɛ tun t’a lɔn o be kɛ cogo min na. O kama, u tagara gafe dɔw ɲini biblotɛki dɔ la fiyentɔw ka sɛbɛri kɛcogo n’a kalancogo koo la ani u be se ka mɔgɔ degi o la cogo min na.

Kalo damanin o kɔ, Yomara n’a dɔgɔcɛw tun be fiyentɔw ka sɛbɛriw kalan cogo nɔgɔman na. O ye u dɛmɛ ka ɲɛtaga kɛ tugun Alako ta fan fɛ. Sisan, Yomara, Marcelo ani Hiver ye kudayi piyɔniyew ye. Marcelo ye kɔrɔsigi ciden ye. Lɔgɔkun kuru bɛɛ kɔnɔ, u bolo degunnin lo Jehova ka baara la. U kisɛyanin lo cogo min na u ka baara la, o ye tɔɔw lasun ka kisɛya fana.

Kafodenw ye Yomara n’a dɔgɔcɛw dɛmɛ cogo min na ni kanuya ye, u be u waleɲuman lɔn o kosɔn. Yomara ko: “Kabi an siɲɛ fɔlɔ ka Jehova Seerew kunbɛn, u y’an minɛ ni kanuya sɔbɛ ye.” Marcelo y’a fara a kan ko: “An be ni teri sɔbɛw ye an ka kafo kɔnɔ ani an be denbaya dɔ kɔnɔ min mɔgɔw be duniɲa yɔrɔ bɛɛ la ani u be ɲɔgɔn kanu.” Yomara n’a dɔgɔcɛw kɔrɔtɔnin lo k’a ye Jehova bena dugukolo yɛlɛma k’a kɛ alijɛnɛ ye cogo min na.—Zab. 37:10, 11; Ezayi 35:5.