Bibulu b’a fɔ ka gwɛ ko Jehova be se ka sinikow fɔ (Ezayi 45:21). Nka a t’a fɔ an ye k’a pereperelatigɛ Jehova b’o kɛ cogo min na ani wagati min na. Koo minw bena kɛ sini ma, Bibulu t’a fɔ an ye fana Jehova b’a latigɛ k’u hakɛ min lɔn. O la, an tɛ se ka ja kelen kan o koow la. Nka Bibulu b’an dɛmɛ ka koo minw faamu, an k’u damanin lajɛ.

Jehova be se koo bɛɛ la, nka tuma dɔw la, a b’a latigɛ ko a tɛna koo dɔw kɛ. Daan tɛ a ka hakilitigiya la. N’a diyara a ye, a be se ka tɛmɛ o hakilitigiya fɛ ka sinikow bɛɛ fɔ (Ɔrɔm. 11:33). Nka komi a be se k’a yɛrɛ minɛ cogo dafanin na, koo minw bena kɛ sini ma, a be se k’a latigɛ ko a tɛna a ɲini k’u dɔ lɔn.—Ezayi 42:14 lajɛ.

Ni Jehova ye min latigɛ, a b’o kɛ. Setigiya min b’a fɛ ka sinikow fɔ, o koo b’an dɛmɛ cogo di k’o faamu? Ezayi 46:10 b’a fɔ ko: “Koo min bena kɛ, ne y’o koo fɔ kabini a daminɛ. Koo min ma kɛ fɔlɔ, ne y’o fɔ ka tɛmɛ kabini tumajan. Ne ko: N ye koo min latigɛ, o be kɛ le. Koo min bɛɛ ka di ne ye, n b’o kɛ.”

O la, kuun minw kama Jehova be se ka sinikow fɔ, u dɔ ye ko see b’a ye k’a kɛ koow ka kɛ. Sinikow tɛ i n’a fɔ filimu dɔ min anrezistrera ka bila ani Jehova b’a latigɛ k’a labanyɔrɔ filɛ walisa k’a lɔn min bena kɛ. Ayi, a mako t’a la k’o kɛ. Nka, Jehova be se k’a latigɛ ko koo dɔ bena kɛ wagati tigitigi dɔ la ani o kɔ a b’a kɛ o koo be kɛ n’o wagati sera.—Ɛkiz. 9:5, 6; Mat. 24:36; Kɛw. 17:31.

O lo kama Jehova ye min kɛ ka ɲɛsin sinikow ma, Bibulu b’o ɲɛfɔ ni kumaden dɔw ye i n’a fɔ “labɛn” ani “ne ye koo min ŋaniya.” (2 Mas. 19:25; Ezayi 46:11). Kumaden min bayɛlɛmana o cogo la, o ni kumaden wɛrɛ be taga ɲɔgɔn fɛ min kɔrɔ ko “dagadilanla” (Zer. 18:4). Dagadilanla ŋana be se ka bɔgɔmana yɛlɛma k’a kɛ daga ɲumanba dɔ ye. O cogo kelen na, Jehova be se ka koow yɛlɛma wala k’a kɛ u be kɛ cogo dɔ la walisa k’a sago dafa.—Efɛz. 1:11.

Jehova ye see min di an ma ka koow latigɛ an yɛrɛ ma, a b’a janto o la. A ma mɔgɔ si dan ni dankan ye ani a fana tɛ mɔgɔ si waajibiya a ka koo ɲuman wala koo jugu kɛ min bena a to a be halaki. A b’a to bɛɛ k’a latigɛ a bena min kɛ ani a b’an jija an k’a latigɛ ka koo tilennin kɛ.

An ka misali fila lajɛ. A fɔlɔ ɲɛsinna Ninivukaw ma. Jehova tun kɔnna k’a fɔ k’o dugu bena halaki o dugumɔgɔw ka koo juguw kosɔn. Nka, u nimisara minkɛ, Jehovah “tun ko a bena kojugu min kɛ u la, a makarila, a m’o kɛ tugu.” (Zonasi 3:1-10). Jehova tun ko a bena min kɛ Ninivukaw la, a m’o kɛ tugun. Mun na do? Sabu tuma min na u ye Jehova ka lasɔmini kumaw mɛn, u y’a latigɛ u yɛrɛ ma ka nimisa.

Misali filanan ye kiraya kuma dɔ lo ye min ɲɛsinna kɛlɛmasa dɔ ma min tɔgɔ ko Sirusi. Ale lo tun bena Yahutuw hɔɔrɔnya ka bɔ jɔnya la ani ka cii di ko u ka Jehova batosoba lɔ kokura (Ezayi 44:26–45:4). Pɛrɛsi masacɛ Sirusi lo y’o kiraya kuma dafa (Ezra 1:1-4). Nka, Sirusi tun tɛ tiɲɛn Ala batobaga dɔ ye. Jehova tɛmɛna a fɛ ka kiraya kuma dɔ dafa. Nka, a m’a waajibiya a k’ale bato.—Talenw 21:1.

An ye koo damanin dɔrɔn lo lajɛ, Jehova b’a janto minw na n’a be sinikow fɔra. Tiɲɛn na, adamaden si tɛ se ka Jehova ka miiriyaw n’a ka kokɛtaw faamu bɛrɛbɛrɛ (Ezayi 55:8, 9). Nka an be min lɔn Jehova koo la, o b’a to an be la a la kosɔbɛ ko a ka kokɛtaw bɛɛ tilennin lo hali n’a be sinikow fɔra.