1-2. Gwɛlɛya jumanw lo be Jehova Seere caaman kan?

CIDEN POL ye Timote jija ko a k’a seko bɛɛ kɛ waajuli la (2 Tim. 4:5). An fana be tugu o ladili kɔ. Nka, koow man nɔgɔ. An balima caaman ka ɲi k’u jaa gwɛlɛya kosɔbɛ le ka se ka waajuli kɛ (2 Tim. 4:2). Misali la, miiri an balimaw koo la minw be yɔrɔ minw na faamanw ye bali sigi an ka baara kan wala a faan dɔw kan. U be waajuli kɛ hali n’u b’a lɔn ko u be se k’u don kaso la!

² Gwɛlɛya caaman be Jehova Seerew kan minw be se k’u fari faga. Misali la, u caaman ka ɲi ka baara kɛ lɛri caaman kɔnɔ walisa k’u ka denbaya makoya jɔnjɔnw dɔrɔn wasa. A tun bena diya u ye ka caaman kɛ waajuli la. Nka wikɛniw na, u sɛgɛnninba lo. Dɔw tɛ se ka bɛrɛ kɛ Jehova ka baara la sabu bana jugu dɔ b’u la wala u kɔrɔla. U dɔw yɛrɛ tɛ se ka bɔ u ka soo. Dɔ wɛrɛw b’a jati ko nafa t’u la Jehova ɲɛɛ kɔrɔ. Balimamuso Mari * ko: “N’ ka ɲi ka jijalibaw lo kɛ walisa ka see sɔrɔ n’ ka miiriya juguw kan. O be n’ barika bɛɛ ban. N’ be n’ yɛrɛ jalaki sabu o b’a to n’ tɛ se ka bɛrɛ kɛ waajuli la.”

3. An bena mun lo lajɛ barokun nin na?

³ An ka gwɛlɛyaw mana kɛ min o min ye, Jehova be se ka barika don an na walisa an ka to k’an seko bɛɛ kɛ a ka baara la. An k’a filɛ a ye Pol ni Timote dɛmɛ cogo min na u tora ka waajuli kɛ gwɛlɛyaw bɛɛ n’a ta. O kɔ, an bena a ye Jehova be se k’an fana dɛmɛ cogo min na.

4. Gwɛlɛya jumanw lo tun be Pol kan?

⁴ Pol ye gwɛlɛya caaman sɔrɔ. Tuma min na u y’a bugɔ, k’a bon ni kabakuruw ye ani k’a don kaso la, a mako gwɛlɛ tun be Jehova ka dɛmɛ na (2 Kor. 11:23-25). Pol ma maloya k’a fɔ ko tuma dɔw la, ale tun be jijalibaw lo kɛ walisa ka see sɔrɔ farifaga kan (Ɔrɔm. 7:18, 19, 24). Bana dɔ fana tun b’a la min tun be komi ŋɔni a farikolo la ani a tun b’a fɛ sɔbɛ la Ala k’o bɔ a ye.—2 Kor. 12:7, 8.

5. Pol ka gwɛlɛyaw bɛɛ n’a ta, a sera ka mun lo kɛ?

⁵ Jehova ye Pol barika bonya walisa a ka to ka waajuli kɛ gwɛlɛyaw bɛɛ n’a ta. A kɔrɔsi Pol sera ka min kɛ. Misali la, k’a to kaso la boon dɔ kɔnɔ Ɔrɔmu, a ye mɔgɔ caaman waaju ni kisɛya ye hali faamanw yɛrɛ (Kɛw. 28:17; Filip. 4:21,22). A ye Ɔrɔmu masacɛ ka garadi caaman waaju ani mɔgɔ minw bɛɛ tun be na bɔ a ye (Kɛw. 28:30, 31; Filip. 1:13). O wagati kelen na, Pol ye batakiw sɛbɛ hakili senu barika la. O batakiw ye kerecɛn sɔbɛw dɛmɛ galen ani a b’u dɛmɛna hali sisan yɛrɛ. Pol ka ɲɛyirali ye Ɔrɔmu kafodenw jija fana. O y’a to o balimaw ye “jagwɛlɛya sɔrɔ . . . ka Ala ka kuma fɔ ni siranya t’o la.” (Filip. 1:14). Tiɲɛn lo ko tuma dɔw la, Pol tun tɛ se ka caaman kɛ i ko a tun b’a fɛ cogo min na. Nka, a y’a seko bɛɛ kɛ ani “o kɛra sababu ye kibaro diiman tagara ɲa.”—Filip. 1:12.

6. Ka kɛɲɛ ni 2 Korɛntikaw 12:9, 10 ye, mun lo ye Pol dɛmɛ a sera k’a ka cidenya baara dafa?

⁶ Pol y’a faamu ko ale sera ka min bɛɛ kɛ Jehova ka baara la, a m’o kɛ ale yɛrɛ ka setigiya barika la. A ko Ala lo ye barika don ale la. A tun b’a lɔn ko Ala b’a ka “sebagaya yira . . . dɛsɛwaati la.” (2 Korɛntikaw 12:9, 10 kalan). U ye Pol tɔɔrɔ, k’a don kaso la ani a ye gwɛlɛya wɛrɛw sɔrɔ. O bɛɛ n’a ta, Pol sera k’a ka cidenya baara dafa bɛrɛbɛrɛ sabu Jehova ye barika don a la hakili senu sababu la.

7. Mun lo tun be se k’a to a be gwɛlɛya Timote ma k’a ka cidenya baara dafa?

⁷ Pol baarakɛɲɔgɔnw cɛma, Timote lo tun ye kanbele ye. Ale fana tun ka ɲi k’a jigi la Ala kan walisa k’a ka cidenya  baara dafa. A ye Pol bila sira voyazijanw na misɔndenya baara la. Pol y’a ci fana a ka taga bɔ kafow ye walisa ka balimaw jija (1 Kor. 4:17). I be taga a sɔrɔ Timote tun b’a jati ko ale tɛ se k’o kɛ. N’a sɔrɔ o lo kama Pol y’a fɔ a ye ko: “Kan’a to mɔgɔ si k’i dɔgɔya i ka denmisɛnya kama.” (1 Tim. 4:12). O wagati kelen na fana, Timote ka “banamisɛnw” tun ye gwɛlɛya wɛrɛ ye a kan (1 Tim. 5:23). Nka, a tun b’a lɔn ko Jehova bena a dɛmɛ a ka hakili senu barikaman sababu la. O la, a tun bena se ka kibaro diiman fɔ ani k’a balimaw dɛmɛ.—2 Tim. 1:7.

8. Bi, Jehova b’a sagokɛlaw barika bonya cogo di?

⁸ Bi, Jehova be “sebagaya kabakoman” di a sagokɛlaw ma walisa u ka to k’a sago kɛ kantigiya la (2 Kor. 4:7). Jehova be tɛmɛ delili, Bibulu, an kerecɛnɲɔgɔnw ani waajuli baara fɛ k’an barika bonya ani k’an dɛmɛ an ka to kantigiya la. An k’o fɛɛrɛ naani lajɛ.

9. Delili be se k’an dɛmɛ cogo di?

⁹ Delili b’an barika bonya. Efɛzikaw 6:18 kɔnɔ, Pol b’an jija ko an ka to ka Ala deli “tuma bɛɛ.” N’an y’o kɛ, Ala bena an jaabi a kɛtɔ ka barika don an na. Jonnie be Bolivi jamana na ani a y’a ye Jehova y’a dɛmɛ cogo min na tuma min na gwɛlɛya caaman tun b’a kan. A muso ani a bamuso n’a facɛ banana ka juguya wagati kelen na. Jonnie y’a jija kosɔbɛ k’a janto u saba bɛɛ la. A bamuso sara ani a muso n’a facɛ mɛɛnna bana na ka sɔrɔ ka kɛnɛya. Jonnie miirila o wagati gwɛlɛw na ani a ko: “Tuma o tuma ni n’ tun be hamina kojugu, n’ tun be n’ dusukunnakow fɔ Jehova ye. O tun be n’ dɛmɛ kosɔbɛ.” Jehova ye Jonnie barika bonya ani a sera ka muɲuli kɛ. Ronald fana be Bolivi ani diinan mɔgɔkɔrɔ lo. A y’a mɛn ko kansɛri bana b’a bamuso la. Kalo kelen o kɔ, a bamuso sara. Mun lo ye Ronald dɛmɛ k’o koo muɲu? A ko: “Ni n’ be Jehova delila, n’ be n’ dusukunnakow bɛɛ fɔ a ye. N’ b’a lɔn ko a be n’ faamu ka tɛmɛ bɛɛ kan, hali ka tɛmɛ ne yɛrɛ kan.” N’a sɔrɔ tuma dɔw la, an b’a jati ko an tɛ se k’an ka gwɛlɛyaw muɲu ani an t’a lɔn an bena min fɔ an ka deliliw la. Nka, Jehova b’a ɲini an fɛ an k’ale deli hali n’a ka gwɛlɛ an ma k’an ka miiriyaw n’an dusukunnakow fɔ.—Ɔrɔm. 8:26, 27.

10. Ka kɛɲɛ ni Eburuw 4:12 ye, mun na a kɔrɔtanin lo kosɔbɛ an ka Bibulu kalan ani ka miiri a kan?

¹⁰ Bibulu b’an barika bonya. Pol tun be Ala ka Kuma kalan walisa ka fanga ni jigitugu sɔrɔ. An fana ka ɲi k’o ɲɔgɔn lo kɛ (Ɔrɔm. 15:4). N’an be Ala ka Kuma kalan ani ka miiri a kan, Jehova be se ka tɛmɛ a ka hakili senu fɛ k’an dɛmɛ an k’a faamu Bibulu be se k’an nafa cogo min na (Eburuw 4:12 kalan). An kumana Ronald min koo la, ale ko: “N’ ninsɔn ka di sabu n’ be n’ jija ka Bibulu yɔrɔ dɔ kalan loon bɛɛ sufɛ. N’ be miiri kosɔbɛ Jehova ka jogow kan ani a b’a sagokɛlaw minɛ ni kanuya ye cogo min na. O be barika kura don n’ na.”

11. Bibulu ye balimamuso dusu kasinin dɔ barika bonya cogo di?

¹¹ N’an be Ala ka Kuma kalan ani ka miiri a kan, o b’an dɛmɛ ka kɛ ni miiriya ɲuman ye an ka gwɛlɛyaw koo la. A kɔrɔsi Bibulu ye firiyamuso dusu kasinin dɔ dɛmɛ cogo min na. Diinan mɔgɔkɔrɔ dɔ y’a fɔ a ye ko a be se  ka kalan nafamanw sɔrɔ n’a ye Zɔbu ka kitabu kalan. O kitabu kalantɔ, a daminɛ na, a tun be to ka Zɔbu jalaki a ka miiriya tilenbaliw kosɔn. A tora k’a miiri ko: “Zɔbu, kana to ka miiri i ka gwɛlɛyaw dɔrɔn koo la!” Nka o kɔ, a y’a kɔrɔsi ko ale yɛrɛ be koow jati i ko Zɔbu. O y’a dɛmɛ a y’a miiricogo yɛlɛma ani o y’a barika bonya. O la, a tora k’a cɛɛ saya dusukasi muɲu.

12. Jehova be tɛmɛ an kerecɛnɲɔgɔnw fɛ cogo di k’an barika bonya?

¹² An kerecɛnɲɔgɔnw b’an barika bonya. Jehova be tɛmɛ an balimaw fana fɛ k’an barika bonya. Pol y’a sɛbɛ ko ale tun kɔrɔtɔnin lo a n’a balimaw “ka ɲɔgɔn jaa gwɛlɛya.” (Ɔrɔm. 1:11, 12). An kumana Mari min koo la, a ka di ale ye ka kɛ n’a balimaw ye. A ko: “Balima minw yɛrɛ tun tɛ n’ ka gwɛlɛyaw kala ma, Jehova tɛmɛna olu fɛ ka n’ dɛmɛ. U ye jijali kuma dɔ fɔ n’ ye wala ka fɛɛn dɔ sɛbɛ k’a ci n’ ma. N’ mako tun b’o yɛrɛ lo la jaatika. O ye n’ dɛmɛ ka n’ kɔnɔkow fɔ balimamuso dɔw ye ani ka kalan sɔrɔ u fɛ. N’ ka gwɛlɛyaw ɲɔgɔn tun b’o balimamusow kan. Ka fara o kan, tuma o tuma, diinan mɔgɔkɔrɔw b’a to n’ b’a ye ko n’ koo ka gwɛlɛ kafodenw ma.”

13. An be se ka ɲɔgɔn barika bonya cogo di lajɛnw na?

¹³ An be se ka ɲɔgɔn barika bonya yɔrɔ ɲuman minw na, u dɔ ye kafo ka lajɛnw lo ye. N’i tagara lajɛnw na, i be se k’i jija ka tɔɔw barika bonya, i kɛtɔ k’a fɔ u ye ko i b’u kanu ani ko i b’u waleɲuman lɔn u ka baara ɲuman kosɔn. Misali la, balimamuso dɔ cɛɛ tɛ Jehova Seere ye. Ka kɔn lajɛn dɔ ɲɛ, diinan mɔgɔkɔrɔ dɔ min tɔgɔ ko Peter, ale y’a fɔ a ye ko: “N’ mana i ye lajɛnw na, o be n’ jija yɛrɛ le! Tuma o tuma, i ka denmisɛn wɔɔrɔ ladonnin lo ka ɲɛ ani u labɛnnin lo ka lakalitaw kɛ.” Ɲɛji fara balimamuso ɲɛɛ na ani a ko: “N’ mako tun b’a la yɛrɛ le k’o kumaw mɛn bi!”

14. Waajuli baara b’an dɛmɛ cogo di?

¹⁴ Waajuli b’an barika bonya. Tɔɔw b’an lamɛn wo, u t’an lamɛn wo, n’an be Bibulu ka tiɲɛn kumaw fɔ u ye, o b’an barika bonya (Talenw 11:25). Balimamuso Stacy y’a ye waajuli be se ka mɔgɔ barika bonya cogo min na. Tuma min na, a somɔgɔ dɔ gwɛnna ka bɔ kafo kɔnɔ, o y’a dusu tiɲɛ yɛrɛ le! A tora k’a yɛrɛ ɲininga ko: “Yala n’ tun be se ka koo dɔ kɛ k’a dɛmɛ wa?” Min ye Stacy somɔgɔ sɔrɔ, a tun be to ka miiri o dɔrɔn lo la. Mun lo y’a dɛmɛ k’o koo muɲu? Waajuli baara lo! A tora ka waajuli kɛ minkɛ, kiinmɔgɔ minw mako b’a ka dɛmɛ na, a tora ka miiri olu koo la. A ko: “O wagati la, Jehova ye n’ dɛmɛ ka Bibulu kalanden dɔ sɔrɔ min ye ɲɛtaga kɛ joona joona. O ye n’ jija kosɔbɛ. Waajuli ye n’ dɛmɛ cogo min na, o tɛ se ka fɔ!”

15. Mari ye min fɔ, i be kalan juman lo sɔrɔ o la?

¹⁵ Balima dɔw be se k’a miiri ko u tɛ se ka caaman kɛ waajuli la u ka koow cogoya kosɔn. N’i b’o lo miiri, a to i hakili la ko n’i b’i seko bɛɛ lo kɛra, o ka di Jehova ye. An ka Mari ka koo lajɛ tugun. Tuma min na a yɛlɛmana yɔrɔ min na kaan wɛrɛ be fɔ, a tun b’a jati ko nafa bɛrɛ tɛ ale la. A ko: “Tuma dɔw la, n’ tun be se ka min kɛ, o ye ka lakalita nɔgɔman dɔ kɛ, ka vɛrise kalan wala ka sɛbɛnin di dɔrɔn mɔgɔ ma waajuli la.” Mɔgɔ minw b’o kaan fɔ ka ɲɛ, Mari tun mana a yɛrɛ suma n’olu ye, a tun  b’a jati ko nafa bɛrɛ t’ale la. Nka, a y’a miiricogo yɛlɛma. A y’a daminɛ k’a miiri ko hali n’ale t’o kaan fɔ ka ɲɛ, Jehova be se ka tɛmɛ ale fɛ ka mɔgɔ dɔ dɛmɛ. A ko: “Bibulu be min fɔ, o ka nɔgɔ ani o be se ka mɔgɔ ka ɲɛnamaya kɛcogo yɛlɛma.”

16. Minw b’a fɛ ka waajuli kɛ, nka u tɛ se ka bɔ u ka soo, mun lo be se ka barika don olu la?

¹⁶ Jehova b’a lɔn ko an dɔw b’a fɛ ka waajuli kɛ, nka an tɛ se ka bɔ an ka soo. Mɔgɔ minw b’an ladon, Jehova be se ka sababu di an ma an k’olu ni dɔgɔtɔrɔw waaju. An be sera ka min kɛ sisan, n’an b’o suma ni wagati tɛmɛnin ta ye, o be se k’an fari faga. An k’a ɲini k’a faamu Jehova b’an dɛmɛna cogo min na sisan. O la, an bena fanga sɔrɔ ka gwɛlɛya sifa bɛɛ muɲu ni ninsɔndiya ye.

17. Ka kɛɲɛ ni Waajulikɛla 11:6 ye, hali n’an ma se ka mɔgɔ dɔ dɛmɛ a ye tiɲɛn lɔn, mun na an ka ɲi ka to ka waajuli kɛ?

¹⁷ An be tiɲɛn kisɛ minw dan, an t’a lɔn u minw bena falen ani ka bonya (Waajulikɛla 11:6 kalan). Misali la, balimamuso Barbara be ni saan 80 ni kɔ ye ani a be to ka waajuli kɛ telefɔni ani lɛtɛrɛ sababu fɛ. A ye saan 2014, marisikalo tile fɔlɔ ka Kɔrɔsili Sangaso don a ka lɛtɛrɛ dɔ kɔnɔ. O Kɔrɔsili Sangaso barokun tun ko: “Ce que Dieu a fait pour vous.” A tun m’a lɔn ko a y’o ci furuɲɔgɔn dɔw lo ma minw tun tɛ Jehova Seerew ye tugun. U y’o zurunali kalan siɲɛ caaman. Cɛman ko a kɛra komi Jehova yɛrɛ lo tun be kumana ale fɛ. O furuɲɔgɔnw y’a daminɛ ka taga lajɛnw na ani u kɛra Jehova Seerew ye kokura. U tun ye Jehova sago kɛli dabila a saan 27 ni kɔ ye nin ye. Nafa min sɔrɔla o lɛtɛrɛ kelen sababu la, miiri k’a filɛ o ye Barbara jija ani k’a barika bonya cogo min na!

18. N’an b’a fɛ Ala k’an barika bonya, an ka ɲi ka mun lo kɛ?

¹⁸ Walisa k’an barika bonya, Jehova be tɛmɛ fɛɛrɛ caaman fɛ. O fɛɛrɛ dɔw ye delili, Bibulu, an kerecɛnɲɔgɔnw ani waajuli baara ye. N’an be baara kɛ n’o fɛɛrɛw ye, an b’a yira ko an lanin b’a la ko Jehova be se k’an dɛmɛ ani ko a b’a fɛ k’o kɛ. O la, an k’an jigi la an sankolola Faa kan tuma bɛɛ. “A ka koo be mɔgɔ minw dusu la, a be barika don olu la.”—2 Til. Kib. 16:9.