1. Sanni i k’a daminɛ ka bibulukalan kɛ, i ka ɲɛnamaya tun be cogo di?

 SANNI i k’a daminɛ ka bibulukalan kɛ ni Jehova Seerew ye, i ka ɲɛnamaya tun be cogo di? An caaman t’a fɛ ka miiri o la yɛrɛ. Duniɲa mɔgɔw be min jati ɲuman ni juguman ye, n’a sɔrɔ o tun ye nɔɔ to an ka miiriya n’an sɔɔn kan. O la, ‘jigi layɔrɔ tun t’an fɛ, an tun te Ala lɔn fana.’ (Efɛz. 2:12). Nka, o bɛɛ yɛlɛmana bibulukalan sababu fɛ!

2. Bibulukalan ye i dɛmɛ ka mun ni mun lo faamu?

² Bibulukalan ye i dɛmɛ k’a lɔn ko sankolola Faa b’i fɛ min b’i kanu kosɔbɛ. I y’a faamu ko n’i b’a fɛ k’i koo diya Jehova ye ani ka kɛ a sagokɛla dɔ ye, fɔɔ i k’i ka ɲɛnamaya kɛcogo ani i miiricogo yɛlɛma sɔbɛ la. I ka ɲi fana k’a ɲini k’a ka sariya tilenninw labato.— Efɛz. 5:3-5.

3. Ka kɛɲɛ ni Kɔlɔsikaw 3:9, 10 ye, Jehova b’a fɛ an ka mun lo kɛ? An bena mun lo lajɛ barokun nin na?

³ Jehova ye an Danbaga ani an sankolola Faa ye. O kama, joo b’a fɛ k’a latigɛ a ka denbayamɔgɔw ka ɲi ka koow kɛ cogo min na. A b’a ɲini an fɛ ko ka kɔn an ka batɛmu ɲɛ, an ka ‘an jogokɔrɔ bɛɛ dabila.’ * (Kɔlɔsikaw 3:9, 10 kalan). Minw b’a fɛ ka batize, barokun nin bena u dɛmɛ ka ɲiningali saba nunu jaabili sɔrɔ: 1) N’u ko “jogokɔrɔ,” o ye mun ye? 2) Mun na Jehova b’a ɲini an fɛ ko an k’an jogo kɔrɔw dabila? 3) An be se k’o kɛ cogo di? An minw batizera ka ban, barokun nin bena an dɛmɛ walisa an ye kɛcogo kɔrɔ ani miiricogo minw dabila, an kana segi k’u ta tugun.

4. “Jogokɔrɔ” be mɔgɔ min na, o tigi be koow kɛ cogo di?

⁴ “Jogokɔrɔ” be mɔgɔ min na, o tigi ka teli ka miiri ani ka koow kɛ ka kɛɲɛ ni farisogo sago ye. N’a sɔrɔ o tigi be miiri a yɛrɛ nafa dɔrɔn lo la, a be dimi joona, ɲumanlɔnbali ani kuncɛba lo. N’a sɔrɔ a ka di a ye ka porno filɛ ani ka filimuw filɛ kakalayakow wala fariyakow be minw na. Siga t’a la, a be ni jogo ɲuman dɔw ye ani a be koo jugu minw fɔ wala k’u kɛ, n’a sɔrɔ a b’a yɛrɛ jalaki u kosɔn. Nka, a jijanin tɛ sɔbɛ la k’a miiricogo n’a ka kɛwalew yɛlɛma.—Gal. 5:19-21; 2 Tim. 3:2-5.

5. Yala an be se k’an jogo kɔrɔw bɛɛ dabila pewu wa? A ɲɛfɔ. (Kɛwaliw 3:19).

⁵ An ye mɔgɔ dafabaliw ye. O kama, an si tɛ se k’an ka miiriya juguw n’an ka nege juguw bɛɛ bɔ pewu an hakili n’an dusukun na. Tuma dɔw la, an be koo dɔw kɛ wala ka kuma dɔw fɔ an be nimisa minw na kɔfɛ (Zer. 17:9; Zaki 3:2). Nka, n’an b’an jogo kɔrɔw dabila, an tɛ farisogo negelakow ani kɛwale juguw kɛ tugun. An sɔɔn be yɛlɛma.—Ezayi 55:7; Kɛwaliw 3:19 kalan.

6. Mun na Jehova b’a ɲini an fɛ an k’an ka miiriya juguw n’an ka kɛwalew juguw dabila, o minw ye an ka jogo kɔrɔ faan dɔw ye?

⁶ Jehova b’an kanu kosɔbɛ ani a b’a fɛ an ka ɲɛnamaya diyabɔ. O kama, a b’a ɲini an fɛ an k’an ka miiriya juguw n’an ka kɛwale juguw dabila (Ezayi 48:17, 18). A b’a lɔn ko minw tɛ u ka nege juguw kɛlɛ, olu be koo jugu kɛ u yɛrɛ ani tɔɔw la. N’an be koo jugu kɛ an yɛrɛ ani tɔɔw la, o be Jehova dusu tiɲɛ.

7. Ka kɛɲɛ ni Ɔrɔmukaw 12:1, 2 ye, an ka ɲi ka sugandili juman lo kɛ?

⁷ N’a sɔrɔ an teriw n’an somɔgɔ dɔw b’an lɔgɔbɔ sabu an b’a ɲinina k’an sɔɔn yɛlɛma (1 Piyɛri 4:3, 4). N’a sɔrɔ u b’a fɔ an ye ko min o min k’an diya, joo b’an fɛ k’o kɛ ani ko an man ɲi k’a to tɔɔw k’a fɔ an ye an ka ɲi ka min kɛ. Nka, mɔgɔ minw tɛ Jehova ka sariyaw labato, olu hɔɔrɔnyanin tɛ sɔbɛ la. Tiɲɛn na, olu b’a tora Sutana ka duniɲa ka nɔɔ to u kan (Ɔrɔmukaw 12:1, 2 kalan). Jurumu ani  Sutana ka duniɲa be nɔɔ to an jogow kan. O kama, an kelen kelen bɛɛ ka ɲi ka sugandili kɛ: Yala an bena an jogo kɔrɔw to an yɛrɛ la wa? Wala an bena a to Jehova k’an dɛmɛ an k’an sɔɔn yɛlɛma ka kɛ mɔgɔ ɲuman ye kabi sisan?—Ezayi 64:7.

8. Mun lo bena an dɛmɛ k’an ka miiriya juguw n’an ka kɛwale juguw dabila?

⁸ Jehova b’a lɔn ko walisa k’an ka miiriya juguw n’an ka kɛwale juguw dabila, o tɛ ɲɛ jijaliw kɔ ani o be wagati ta (Zab. 103:13, 14). Nka, an mako be hakilitigiya, fanga ani dɛmɛ min na walisa k’an sɔɔn yɛlɛma, Jehova b’o di an ma. A be tɛmɛ a ka Kuma, a ka hakili senu ani a ka ɔriganisasiyɔn fɛ k’o kɛ. N’a sɔrɔ a y’i dɛmɛ ka ban. Sisan, an k’a filɛ i be se ka koo tigitigi minw kɛ walisa ka yɛlɛmani wɛrɛw kɛ. O la, i bena se k’i jogo kɔrɔw dabila ani ka batɛmu saratiw dafa.

9. Ala ka Kuma be se k’i dɛmɛ cogo di?

⁹ Basigi Ala ka Kuma kan k’i yɛrɛ sɛgɛsɛgɛ koɲuman. Ala ka Kuma be i ko dugalen. A be se k’i dɛmɛ k’i miiricogo, i kumacogo ani i ka kɛwalew sɛgɛsɛgɛ (Zaki 1:22-25). I ka Bibulu kalanfa ani kerecɛn kolɔnbaga wɛrɛw be se ka ladiliw di i ma fana. Misali la, u be se ka basigi Bibulu kan k’i dɛmɛ k’i ka jogo ɲumanw n’i ka fiɲɛw lɔn. Kunnafoni minw basiginin lo Bibulu kan, o balimaw be se k’olu sɔrɔyɔrɔ yira i la. O kunnafoniw bena i dɛmɛ ka see sɔrɔ i ka delinanko juguw kan. Jehova labɛnnin lo k’i dɛmɛ tuma bɛɛ fana. Ale lo b’a lɔn koɲuman a be se k’i dɛmɛ cogo min na sabu a b’i kɔnɔnakow lɔn (Talenw 14:10; 15:11). O kama, to k’a deli tuma o tuma ani k’a ka Kuma sɛgɛsɛgɛ loon o loon.

10. I ye kalan juman lo sɔrɔ balimacɛ Elie ka koo la?

¹⁰ La a la ko Jehova ka sariyaw ɲɔgɔn tɛ yen. Jehova be koo o koo ɲini an fɛ, o b’an nafa. Minw be tagama ka kɛɲɛ n’a ka sariyaw ye, olu be kɛ ni miiriya ɲuman ye u yɛrɛ koo la, u be kuun sɔrɔ u ka ɲɛnamaya la ani ninsɔndiya sɔbɛ (Zab. 19:8-12). Nka minw tɛ Jehova ka sariyaw labato, olu be farisogo sago lo kɛ ani a nɔfɛkow tɛ taga k’u dan. Cɛɛ dɔ tɔgɔ ko Elie, a kɔrɔsi a ye min fɔ Ala ka sariyaw koo la. A bangebagaw be Jehova kanu. Nka a kanbele tuma, a ye jɛnɲɔgɔn juguw sugandi. A y’a daminɛ ka dɔrɔgi ta, ka kakalayakow ani soɲɛni kɛ. A ko ale dusu tun be bɔ kojugu ani fariyakow tun ka di a ye kosɔbɛ. A ko: “U tun ye n’ kalan ko kerecɛn man ɲi ka koo minw kɛ, n’ tun b’o bɛɛ kɛ.” Nka u tun ye Elie kalan koo minw na a denmisɛn tuma, a ma ɲinɛ o kɔ. A laban, a y’a daminɛ ka bibulukalan kɛ kokura. A y’a jija kosɔbɛ k’a ka kɛwale juguw dabila ani a batizera saan 2000. Elie kɛtɔ ka Jehova ka sariyaw labato, o y’a nafa cogo di? A ko: “Sisan, n’ hakili siginin lo ani n’ dusukun tɛ n’ kɛlɛ tugun.” * Elie ka koo b’an dɛmɛ k’a faamu ko minw be ban ka Jehova ka sariyaw labato, olu be tɔɔrɔ la u yɛrɛ kan. O bɛɛ n’a ta, Jehova labɛnnin lo k’u dɛmɛ ka yɛlɛmaniw kɛ.

11. Jehova be koo jumanw lo kɔniya?

¹¹ Jehova be koo minw kɔniya, i jija k’u  kɔniya (Zab. 97:10). Bibulu b’a yira ko Jehova be koo nunu kɔniya: “Yɛrɛboɲa ni galontigɛ [ani] mɔgɔ jalakibali fagali.” (Talenw 6:16, 17). ‘Mɔgɔfagala ni namaramɔgɔ koo man d’a ye’ fana (Zab. 5:7). Jehova be o kɛcogow kɔniya yɛrɛ le. O lo kama, a ye mɔgɔ juguw bɛɛ halaki Nuhun ka tile la. A y’o kɛ sabu u tun ye dugukolo fa ni fariyakow ye (Zɛnɛzi 6:13). An ka ɲɛyirali wɛrɛ lajɛ. Jehova tɛmɛna kira Malasi fɛ k’a fɔ ko minw be u furumuso jalakibali janfa u kɛtɔ k’a furu sa, a be olu kɔniya. Ala tɛ sɔn u ka batoli la ani a bena u kiti u ka kɛwalew kosɔn.—Mal. 2:13-16; Eburuw 13:4.

12. Ka “kojugu haramuya,” o kɔrɔ ko di?

¹² Jehova b’a fɛ an ka “kojugu haramuya.” (Ɔrɔm. 12:9, Biblu Ala ta Kuma). Ka fɛɛn dɔ “haramuya,” o kɔrɔ ko k’o fɛɛn tɔgɔla kɔniya kosɔbɛ wala ka ɲigi a la. Miiri k’a filɛ a bena min kɛ i la n’u ko i ka dumuni tolinin dumu. O miiriya dama b’a to i farisi be tagama. O cogo kelen na, ka koo dɔ kɛ min man di Jehova ye, o miiriya dama ka ɲi ka gwoya an ye.

13. Mun na an ka ɲi k’an ka miiriyaw kɔrɔsi?

¹³ I ka miiriyaw kɔrɔsi. An ka miiriyaw be nɔɔ to an ka kɛwalew kan. O kama, miiriya minw be se k’a to an be jurumuba kɛ, Yezu ko an ka ban olu la (Mat. 5:21, 22, 28, 29). Siga t’a la, an b’a fɛ k’an sankolola Faa dusu diya. O kama, miiriya jugu fɛɛn o fɛɛn be na an hakili la, a kɔrɔtanin lo kosɔbɛ an ka sin k’u bɔ yen!

14. An ka kumaw be mun lo yira an koo la? An ka ɲi k’an yɛrɛ ɲininga mun ni mun lo la?

¹⁴ I ka kumaw kɔrɔsi. Yezu y’a fɔ ko: “Mɔgɔ daa be fɛɛn min fɔ, o be bɔ a dusu la le.” (Mat. 15:18). Tiɲɛn na, an ka kumaw b’a yira an ye mɔgɔ sugu min ye. O la, i yɛrɛ ɲininga ko: “Yala n’ be ban ka ngalon tigɛ, hali ni tiɲɛn fɔli bena kunko lase n’ ma wa? Ni n’ furula, yala n’ be n’ janto walisa n’ kana ɲɛbɔ muso wɛrɛ wala cɛɛ wɛrɛ fɛ wa? Yala n’ be ban pewu malobaliya kumaw na wa? Ni dɔ ye n’ dusu tiɲɛ, yala n’ b’a tigi jaabi ni dususuman ye wa?” N’i be miiri o ɲiningaliw la, o bena i nafa. An ka kumaw be se ka suma ni fani butɔnw ye. N’an ye butɔnw bɔ, a bena nɔgɔya an ma k’o  fani bɔ an kaan na. O cogo kelen na, n’an b’a fɛ k’an jogo kɔrɔw bɔ an yɛrɛ la, an ka ɲi ka kuma nɔgɔninw, ngalontigɛ ani malobaliya kumaw dabila.

15. K’an jogo kɔrɔw gwengwen yiri kan o kɔrɔ ko di?

¹⁵ Sɔn ka jijalibaw kɛ. Ciden Pol ye ɲɛyirali dɔ ta walisa k’an dɛmɛ k’a faamu ko a kɔrɔtanin lo kosɔbɛ an ka yɛlɛmani don an ka ɲɛnamaya kɛcogo la. A ko an k’an jogokɔrɔ gwengwen yiri kan (Ɔrɔm. 6:6). O kɔrɔ ko an ka Krista ladegi. Miiricogo ani kɛcogo minw man di Jehova ye, an ka ɲi k’u dabila pewu. A kɔrɔtanin lo an ka o koow kɛ walisa ka dusukun ɲuman ani ɲɛnamaya banbali jigiya sɔrɔ (Zan 17:3; 1 Piyɛri 3:21). An k’a to an hakili la ko Jehova tɛna a ka sariyaw yɛlɛma walisa k’an dusu diya. Nka, an lo ka ɲi k’an sɔɔn yɛlɛma ani ka koow kɛ ka kɛɲɛ n’a ka sariyaw ye.—Ezayi 1:16-18; 55:9.

16. Mun na i ka ɲi k’i jija ka to ka nege juguw kɛlɛ?

¹⁶ I jija ka to ka nege juguw kɛlɛ. Hali i batizenin kɔ, i ka ɲi ka to k’i jija ka nege juguw kɛlɛ. An ka Maurício ka koo lajɛ. A kanbele tuma, a y’a daminɛ k’a cɛɲɔgɔnw ɲini. Kɔfɛ, a ye Jehova sagokɛlaw kunbɛn ani a ye bibulukalan daminɛ n’u ye. A ye yɛlɛmaniw kɛ a ka ɲɛnamaya kɔnɔ ani o kɔ, a batizera saan 2002. Maurício be Jehova sago kɛra a saan caaman ye nin ye sisan. O bɛɛ n’a ta a ko: “Tiɲɛn fɔ ka di, n’ ka ɲi ka nege juguw kɛlɛ tuma dɔw la.” Nka, a t’a to o k’a fari faga. A ko: “N’ tɛ n’ fari faga sabu n’ b’a lɔn ko ni n’ y’a latigɛ k’o nege juguw kɛlɛ, n’ be se ka n’ koo diya Jehova ye.” *

17. Mun lo y’i jija Nabiha ka koo la?

¹⁷ Dɛmɛ ɲini Jehova fɛ ani sanni i k’i jigi la i yɛrɛ kan, a to hakili senu k’i ɲɛminɛ (Gal. 5:22; Filip. 4:6). An ka ɲi ka jijalibaw lo kɛ n’an b’a fɛ k’an jogo kɔrɔw dabila ani an kana segi k’u ta. An ka muso dɔ ka koo lajɛ min tɔgɔ ko Nabiha. A facɛ tagara k’a to yen tuma min na a tun be ni saan 6 dɔrɔn ye. A ko: “O ye n’ dusu kasi yɛrɛ le.” Nabiha kɔrɔbayatɔ,  a dusu tun ka bon kojugu ani a tun ka fari. A y’a daminɛ ka dɔrɔgi feere. O kama u y’a minɛ ani k’a don kaso la saan damanin kɔnɔ. Jehova Seere dɔw tagara bɔ a ye kaso la ani u y’a daminɛ ka bibulukalan kɛ n’a ye. Nabiha y’a daminɛ ka yɛlɛmanibaw kɛ. A ko: “A tun ka nɔgɔ n’ ma ka delinanko jugu dɔw dabila. Nka, a tun ka gwɛlɛ n’ ma kosɔbɛ ka sigarɛtimin dabila.” Nabiha ye bondori kɛ saan kelen ni kɔ kɔnɔ ani a laban, a sera ka o delinanko jugu dabila. Mun lo y’a dɛmɛ? A ko: “N’ tun be to ka Jehova deli tuma o tuma minkɛ, o ye n’ dɛmɛ ka sigarɛtimin dabila.” Sisan a b’a fɔ tɔɔw ye ko: “N’ lanin b’a la ko ni ne sera ka yɛlɛmaniw kɛ walisa ka n’ koo diya Jehova ye, bɛɛ be se!” *

18. Ka kɛɲɛ ni 1 Korɛntikaw 6:9-11 ka fɔta ye, Ala sagokɛla caaman sera ka mun lo kɛ?

¹⁸ Saan kɛmɛkulu fɔlɔ la, Jehova ye cɛɛw ni muso dɔw sugandi walisa u ka kɛ Krista marakɛɲɔgɔnw ye. Fɔlɔ la, u dɔw tun be kojugubaw kɛ. Misali la, u tun ye kakalaw, cɛɲɔgɔnɲinilaw, musoɲɔgɔnɲinilaw ani soonw ye. Nka Ala ka hakili senu sababu la, u sera k’u sɔɔn yɛlɛma (1 Korɛntikaw 6:9-11 kalan). Bi fana, Bibulu ye mɔgɔ miliyɔn caaman dɛmɛ ka yɛlɛmaniw kɛ u ka ɲɛnamaya kɔnɔ. * A tun ka gwɛlɛ u ma ka delinanko jugu minw dabila, u sera k’u dabila. U ka koo b’a yira ko ele fana be se k’i sɔɔn yɛlɛma ani ka see sɔrɔ delinanko juguw kan walisa ka batɛmu saratiw dafa.

19. An bena mun lo lajɛ barokun nata la?

¹⁹ Mɔgɔ minw b’a fɛ ka batize, u ka ɲi k’u jija kosɔbɛ ka jogo kɔrɔw dabila. Nka o dɔrɔn tɛ. U ka ɲi k’u jija fana ka jogo kuraw ta. Barokun nata la, an bena a ye an be se ka min kɛ walisa ka jogo kuraw ta ani tɔɔw be se k’an dɛmɛ k’o kɛ cogo min na.