1-2. a) Ka kɛɲɛ ni Talenw 16:31 ye, an ka ɲi k’an balima mɔgɔkɔrɔbaw jati cogo di? b) An bena ɲiningali jumanw lo jaabi barokun nin na?

ETAZINI ka zaradɛnba dɔ la Arkansas mara la, luluw be sɔrɔ dugukolo kan. Nka u ma saniya ani ka labɛn. O kama, mɔgɔ caaman b’u ye ani u be tɛmɛ n’u ka sira ye sabu u t’a lɔn ko kabakuru sɔngɔ gwɛlɛw lo.

² Faan dɔw fɛ, an balima mɔgɔkɔrɔbaw be komi o luluw, u nafa ka bon kosɔbɛ. Bibulu b’a fɔ ko u ka kunsigwɛ ye “kunkɔrɔtafɛn ye.” (Talenw 16:31 kalan; 20:29). Nka n’an m’an janto, a be se ka kɛ ko an t’o balimaw kɔrɔsi. Ni kanbelew ni sunguruw b’a faamu ko mɔgɔkɔrɔbaw nafa ka bon, u be fɛɛn dɔ sɔrɔ min nafa ka bon ni nafolo yɛrɛyɛrɛ ye. Barokun nin na, an bena ɲiningali saba nunu jaabi: Mun na mɔgɔkɔrɔba kantigiw koo ka gwɛlɛ Jehova ma? Mɔgɔkɔrɔbaw be ni lɔyɔrɔ juman lo ye Jehova ka ɔriganisasiyɔn kɔnɔ? An be se ka nafa sɔrɔ bɛrɛbɛrɛ u ka koo la cogo di?

3. Ka kɛɲɛ ni Zaburuw 92:13-16 ka fɔta ye, Mun na mɔgɔkɔrɔba kantigiw nafa ka bon kosɔbɛ Jehova ɲɛɛ kɔrɔ?

³ Mɔgɔkɔrɔba kantigiw nafa ka bon kosɔbɛ Jehova Ala ɲɛɛ kɔrɔ. A b’a lɔn u ye mɔgɔ sifa minw ye tigitigi ani u ka jogo ɲumanw ka di a ye kosɔbɛ. Mɔgɔkɔrɔbaw ye saan caaman kɛ kantigiya la Jehova ka baara la. U ye hakilitigiya min sɔrɔ o sen fɛ, n’u b’o kofɔ kanbelew ni sunguruw ye, o ka di Jehova ye kosɔbɛ (Zɔbu 12:12; Talenw 1:1-4). Mɔgɔkɔrɔbaw koo ka di Jehova ye fana u ka muɲuli kosɔn (Mal. 3:16). U ye gwɛlɛyaw sɔrɔ, nka u  ka limaniya barika ma dɔgɔya Jehova koo la. U be ni jigiya min ye siniɲasigi koo la, o barika ka bon ka tɛmɛ wagati min na u ye tiɲɛn lɔn. U koo ka di Jehova ye sabu “hali n’u kɔrɔla,” u bele be to k’a kofɔ mɔgɔw ye.—Zaburuw 92:13-16 kalan.

4. Mun lo be se k’an balima mɔgɔkɔrɔbaw jija?

⁴ Ni kɔrɔya be sera i ma, i ka la a la ko i ye baara min kɛ saan tɛmɛninw na, Jehova tɛ ɲinɛ o kɔ (Eburuw 6:10). I ye i seen don bɛrɛbɛrɛ waajuli baara la minkɛ, o diyara an sankolola Faa ye. I ye gwɛlɛyaw muɲu hali minw y’i dusu tiɲɛ, i ye kanminɛli kɛ ani i ye Bibulu ka sariya tilenninw lafasa. I ye baara kɔrɔtaninw kɛ kantigiya la Jehova ka ɔriganisasiyɔn kɔnɔ ani i ye fɔrɔmasɔn di tɔɔw ma. Yɛlɛmani caaman kɛra Jehova ka ɔriganisasiyɔn kɔnɔ ani i y’i seko bɛɛ kɛ ka koow kɛ ka kɛɲɛ n’o yɛlɛmaniw ye. Mɔgɔ minw be kudayi cidenya baara la, i ye olu dɛmɛ ani k’u jija. Jehova Ala b’i kanu kosɔbɛ sabu i ye kantigi ye. A y’a daa di ko a tɛna “a ka mɔgɔtilenninw to” abada! (Zab. 37:28). A ye layidu ta i ye ko: ‘Ne le bena lɔ n’i ka koo ye fɔɔ ka se i kunsigi gwɛwaati ma.’ (Ezayi 46:4). O la, kana a miiri ko komi i kɔrɔla, nafa t’i la tugun Jehova ka ɔriganisasiyɔn kɔnɔ. Tiɲɛn na, nafa b’i la kosɔbɛ!

5. Balima mɔgɔkɔrɔbaw ka ɲi ka mun lo to u hakili la?

⁵ Balima mɔgɔkɔrɔbaw be se ka koo caaman kɛ Jehova ka ɔriganisasiyɔn kɔnɔ. N’a sɔrɔ fanga t’u la i ko fɔlɔ la. Nka, u ye saan caaman minw kɛ, o y’a to u ye koo caaman lɔn. Jehova bele be se ka tɛmɛ u fɛ cogo caaman na k’a ka baara kɛ. Ɲɛyirali nataw la, an bena a ye a y’o kɛ cogo min na galen ani an ka wagati la.

6-7. Mɔgɔkɔrɔba minw kofɔra Bibulu kɔnɔ ani u ye dugaw sɔrɔ u ka kantigiya kosɔn, u dɔw kofɔ.

⁶ Mɔgɔ kantigi dɔw kofɔra Bibulu kɔnɔ minw tora ka baara kɛ Jehova ye ni kisɛya ye, kɔrɔya bɛɛ n’a ta. Misali la, Musa tun be ni saan 80 ɲɔgɔn lo ye tuma min na a kɛra Jehova ka kira ani  Israɛldenw ɲɛminɛbaga ye. A be komi tuma min na Daniyɛli tun be ni saan 90 ni kɔ ye, a bele tun ye Jehova ka kira ye. A be komi ciden Zan fana tun be ni saan 90 ni kɔ ye, tuma min na a ye Yirali ka kitabu sɛbɛ hakili senu barika la.

⁷ Mɔgɔkɔrɔba kantigi wɛrɛw lɔnnin tɛ kosɔbɛ ani mɔgɔw ka teli ka ɲinɛ u kɔ. Nka, Jehova y’a janto u la ani a y’u duga u ka kantigiya kosɔn. Misali la, Simeyɔn tun ye “mɔgɔɲuman ye, a tun be Ala ka sariyaw bɛɛ bato.” Nka, Bibulu tɛ bɛrɛ fɔ an ye a koo la. O bɛɛ n’a ta, Jehova tun b’a lɔn mɔgɔ min lo. A ye bonya la Simeyɔn kan a kɛtɔ k’a to a ye Yezu denɲɛninman ye ani ka kiraya kɛ Yezu n’a bamuso koo la (Luka 2:22, 25-35). Miiri fana kira Anɛ koo la. Firiyamuso tun lo ani tuma min na a tun be ni saan 84 ye, “tuma o tuma a tun be to ka taga Alabatosoba kɔnɔ.” A tun tɛ fɔn Alabatosoba kɔnɔ minkɛ, Jehova y’a duga kosɔbɛ ani a y’a to ale fana ye Yezu denɲɛninman ye. Simeyɔn ni Anɛ fila bɛɛ koo tun ka gwɛlɛ Jehova ma.—Luka 2:36-38.

8-9. Firiyamusow be dɛmɛ juman lo don Jehova ka ɔriganisasiyɔn kɔnɔ?

⁸ Bi, mɔgɔkɔrɔba caaman be Jehova sago kɛra kantigiya la ani u ye ɲɛyirali ɲumanw ye kanbelew ni sunguruw fɛ. An ka balimamuso Lois Didur ka koo lajɛ. A saan 21 dɔrɔn, a kɛra dan na piyɔniye ye Kanada jamana na. O kɔ, ale n’a cɛɛ John ye saan caaman kɛ kafokulu kɔrɔsili baara la. O kɔ, u ye saan 20 ni kɔ kɛ Kanada Betɛli la. Tuma min na Lois tun be ni saan 58 ye, u ko ale n’a cɛɛ John ka taga baara dɔ kɛ Ikrɛni jamana na. U ye mun lo kɛ do? Yala u y’a miiri ko olu kɔrɔnin lo kojugu, u tɛ se ka taga baara kɛ jamana wɛrɛ la wa? Ayi. U sɔnna ka taga ani John kɛra tɔnbolo ka kɔmite mɔgɔ dɔ ye o yɔrɔ la. Saan wonlonfila o kɔ, John sara. Nka, Lois y’a latigɛ ka to yen. Sisan, a be ni saan 81 ye. A bele be baara kɛra kantigiya la Jehova ye Ikrɛni Betɛli la ani a koo ka di betɛlidenw ye kosɔbɛ ye.

⁹ I ko Lois, mɔgɔ caaman t’u janto balimamuso dɔw la i ko tuma min na u cɛɛw tun be sii la. Nka, nafa bele b’u la. Balimamuso dɔw ye u cɛɛw dɛmɛ saan caaman kɔnɔ ani u bele be baara kɛra Jehova ye kantigiya la. Olu koo ka gwɛlɛ a ma kosɔbɛ (1 Tim. 5:3). Ka fara o kan, o balimamusow be kanbelew ni sunguruw jija yɛrɛ le!

10. Tony ye ɲɛyirali ɲuman juman lo to an ye?

¹⁰ Balima kantigi caaman minw be mɔgɔkɔrɔbaw ladonyɔrɔw la, olu fana nafa ka bon kosɔbɛ. Misali la, balimacɛ dɔ tɔgɔ ko Tony ani sisan, a be mɔgɔkɔrɔbaw ladonyɔrɔ dɔ la. A batizera  a saan 20, Pɛnnsilvani mara la Etazini, saan 1942 utikalo la. Dɔɔni o kɔ, u y’a weele sɔrɔdasiya la. A banna minkɛ, u y’a don kaso la saan fila ni tilan. Ale n’a muso Hilda ye deen fila sɔrɔ ani u y’u lamɔ tiɲɛn sira kan. Saan tɛmɛninw na, Tony kɛra diinan mɔgɔkɔrɔw ɲɛbila ye kafo saba kɔnɔ (bi, o be weele ko “diinan mɔgɔkɔrɔw ka koow labɛnbaga”). A kɛra fana kafokulu ka lajɛnba kɔrɔsibaga ye. A tun be taga bɔ kasodenw ye fana ka lajɛnw ani bibulukalan kɛ n’u ye. Sisan, Tony be ni saan 98 ye. Nka a bele be baara kɛra Jehova ye. A b’a seko fisaman kɛra Jehova ka baara la n’a balimaw ye kafo kɔnɔ!

11. Balima minw be mɔgɔkɔrɔbaw ladonyɔrɔw la, an be se k’a yira cogo di ko u koo ka gwɛlɛ an ma kosɔbɛ?

¹¹ Balima minw be mɔgɔkɔrɔbaw ladonyɔrɔw la, an be se k’a yira cogo di ko an be bonya la u kan? N’a be se ka kɛ, diinan mɔgɔkɔrɔw be se k’u dɛmɛ u ka na lajɛnw na wala u ka lajɛn kalanw lamɛn ani ka waajuli kɛ. An be se k’a yira ko an b’an janto u la an kɛtɔ ka taga bɔ u ye wala k’u weele videwo sababu fɛ. An b’a fɛ k’an mako don kosɔbɛ an balimaw na minw be mɔgɔkɔrɔbaw ladonyɔrɔw la, ani u yɔrɔ ka jan u ka kafo ma. An ka ɲi k’an janto walisa an kana ɲinɛ o balimaw kɔ. N’a sɔrɔ a man nɔgɔ u dɔw ma ka kuma u yɛrɛ koo la wala u b’a jati ko o bɛnnin tɛ. Nka, u ye ninsɔndiya min sɔrɔ Jehova ka baara la, n’an be wagati ta ka baro kɛ n’u ye o koo la ani k’u lamɛn, o bena an nafa kosɔbɛ.

12. An be se ka balima sugu jumanw lo sɔrɔ an yɛrɛ ka kafo kɔnɔ?

¹² A be se ka bari an na k’a ye ko an yɛrɛ ka kafo kɔnɔ, balima mɔgɔkɔrɔba kantigiw be yen, minw ye ɲɛyirali ɲumanw ye. Balimamuso Harriette ye Jehova sago kɛ kantigiya la saan caaman kɔnɔ a ka kafo kɔnɔ Etazini, Nijɛsey mara la. O kɔ, a yɛlɛmana a denmuso fɛ. A ka kafo kura balimaw ye wagati ta k’a ɲini k’a lɔn koɲuman ani u y’a ye ko nafa b’a la kosɔbɛ. Walisa k’o balimaw jija, wale minw kɛra waajuli la tuma min na a ye tiɲɛn lɔn saan 1925 fan fɛ, a y’o lakali u ye. O wagati la, a tun be to ka taga n’a ka ɲinko bɔrɔsi ye waajuli la tuma o tuma sabu u tun be se k’a minɛ ka don kaso la. Saan 1933, a ye lɔgɔkun kelen kɛ kaso la siɲɛ fila. O wagati la, a cɛɛ tun b’a janto u ka deen fitinin saba la. Jehova Seere tun tɛ ani a tun b’a muso dɛmɛ. Siga t’a la, balima mɔgɔkɔrɔba minw ye kantigiw ye i ko Harriette, u ka kan ni bonya ye!

13. Mɔgɔkɔrɔbaw be ni lɔyɔrɔ min ye Jehova ka ɔriganisasiyɔn kɔnɔ, an ye mun lo faamu o koo la?

¹³ An balima mɔgɔkɔrɔbaw lɔyɔrɔ ka bon kosɔbɛ Jehova ka ɔriganisasiyɔn kɔnɔ. U y’a ye cogo caaman minw na Jehova ye a ka ɔriganisasiyɔn ani olu yɛrɛ duga. U ye kalan nafamanba sɔrɔ u ka filiw la. A jati k’u ye “lɔnniya bɔyɔrɔ ye” ani a ɲini ka kalan sɔrɔ u fɛ (Talenw 18:4). N’i be wagati ta k’a ɲini k’u lɔn, o bena i ka limaniya barika bonya ani i bena koo caaman faamu!

14. Deteronɔmu 32:7 be kanbelew ni sunguruw jija u ka mun lo kɛ?

¹⁴ A ɲini ka baro kɛ ni mɔgɔkɔrɔbaw ye (Deteronɔmu 32:7 kalan). N’a sɔrɔ u tɛ yeli kɛ ka ɲɛ tugun, u seenw ka suma ani u ka suma kuma na fana. Nka, u t’a fɛ ka sigi gwansan ani u be ni “tɔgɔɲuman” ye  Jehova ɲɛɛ kɔrɔ (Waaj. 7:1). A to i hakili la fɛɛn min kama u koo ka gwɛlɛ Jehova ma ani to k’u bonya. Elize ladegi. A ye loon laban min kɛ ni kira Eli ye, a sinsinna a kan ko ale bena to n’a ye. A y’a fɔ Eli ye siɲɛ saba ko: “Ne tena bɔ i kɔ!”—2 Mas. 2:2, 4, 6.

15. An be se ka mɔgɔkɔrɔbaw ɲininga mun ni mun lo la?

¹⁵ I mako don kosɔbɛ mɔgɔkɔrɔbaw la, i kɛtɔ k’u ɲininga nɛmɛnɛmɛ koo dɔw la (Talenw 1:5; 20:5; 1 Tim. 5:1, 2). Misali la, i be se k’u dɔ ɲininga ko: “I kanbele tuma wala i sunguru tuma na, mun lo y’a to i lara a la ko i ye tiɲɛn diinan sɔrɔ?” “Koo minw y’i sɔrɔ, u y’i dɛmɛ cogo di i ye i magwɛrɛ kosɔbɛ Jehova la?” “Mun lo y’i dɛmɛ i ninsɔndiyanin tora Jehova ka baara la?” (1 Tim. 6:6-8). O kɔ, n’u b’u ka koow lakalila, u lamɛn koɲuman.

16. Ni kanbele wala sunguru dɔ be baro kɛ ni mɔgɔkɔrɔba dɔ ye, o be u fila bɛɛ nafa cogo di?

¹⁶ Ni kanbele wala sunguru dɔ be baro kɛ ni mɔgɔkɔrɔba dɔ ye, o be u fila bɛɛ nafa (Ɔrɔm. 1:12). O bena a to ele kanbele wala sunguru be la a la kosɔbɛ ko Jehova b’a janto a sagokɛla kantigiw la. O mɔgɔkɔrɔba fana bena a ye ko a koo ka di a balimaw ye. A bena diya a ye k’a lakali i ye Jehova y’ale duga cogo minw na.

17. Mun na an be se k’a fɔ ko ni an balimaw be kɔrɔla ka taga, dɔ be fara u ka cɛɲi kan?

¹⁷ Kɔrɔya be dɔ bɔ mɔgɔ fari n’a ɲɛda cɛɲi na. Nka minw be kantigiya kɛra Jehova ye, dɔ be fara olu cɛɲi kan, n’u be kɔrɔla ka taga (1 Tes. 1:2, 3). Mun na an b’o fɔ? Sabu saanw tɛmɛtɔ, u ye fɔrɔmasɔn sɔrɔ Jehova ka hakili senu barika la ani u ye jogo ɲumanw sɔrɔ. An ka to k’a ɲini k’an balima mɔgɔkɔrɔba kanulenw lɔn ka ɲɛ, ka bonya la u kan ani ka kalan sɔrɔ u fɛ. N’an tora k’o kɛ, u koo bena gwɛlɛya an ma kosɔbɛ!

18. An bena mun lo lajɛ barokun nata la?

¹⁸ Walisa kafo ka sabati, kanbelew ni sunguruw ka ɲi ka balima mɔgɔkɔrɔbaw bonya. Nka mɔgɔkɔrɔbaw fana ka ɲi k’a lɔn ko nafa be kanbelew ni sunguruw la. Barokun nata la, an bena a ye mɔgɔkɔrɔbaw be se k’a yira cogo min na ko balima kanbelew ni sunguruw koo ka gwɛlɛ u ma.