1. N’an be kɔrɔla, an be se ka laɲinita ɲuman juman lo latigɛ an yɛrɛ ye?

N’AN be kɔrɔla, an be se ka siran ko nafa tɛna kɛ an na tugun Jehova ka baara la. Tiɲɛn lo ko fanga bɛrɛ tɛ an na tugun. Nka, an ye lɔnniya ni hakilitigiya sɔrɔ. O la, an be se k’a ɲini ka kanbelew ni sunguruw dɛmɛ u ka ɲɛtaga kɛ Alako ta fan fɛ ani u ka sɔn kunkanbaara kuraw ma. Balimacɛ dɔ ye diinan mɔgɔkɔrɔ ye kabi wagatijan ani a ko: “Wagati dɔ la, n’ y’a kɔrɔsi ko n’ barika be dɔgɔyara kɔrɔya kosɔn. Nka, n’ ninsɔn diyara kosɔbɛ k’a ye ko balima kanbele setigiw be yen minw be se ka n’ nɔɔ ta baara la.”

2. An bena mun lo lajɛ barokun nin na?

² Barokun tɛmɛnin na, an y’a ye ko ni kanbelew ni sunguruw b’u magwɛrɛ kosɔbɛ mɔgɔkɔrɔbaw la, o be u nafa. Barokun nin na, an bena a ye ko ni mɔgɔkɔrɔbaw majiginin lo, n’u b’u seko daan lɔn, n’u be tɔɔw waleɲuman lɔn ani n’u tɛgɛ labilanin lo, o be u dɛmɛ u ka jɛn ka baara kɛ ni kanbelew ni sunguruw ye. N’u b’o kɛ, o be kafomɔgɔw bɛɛ nafa.

3. Ka kɛɲɛ ni Filipikaw 2:3, 4 ye, majigilenya kɔrɔ ko di ani a be se ka kerecɛn dɛmɛ cogo di?

³ Mɔgɔkɔrɔbaw ka ɲi k’u yɛrɛ majigi n’u b’a fɛ ka kanbelew ni sunguruw dɛmɛ. Mɔgɔ majiginin b’a jati ko tɔɔw ka fisa n’ale ye (Filipikaw 2:3, 4 kalan). Mɔgɔkɔrɔba minw majiginin lo, olu b’a faamu ko baara dɔ be se ka kɛ koɲuman cogo caaman na minw bɛnnin lo  ni Bibulu ka fɔta ye. O la, u t’a ɲini bɛɛ ka koow kɛ i ko olu tun b’a kɛ cogo min na fɔlɔ la (Waaj. 7:10). Tiɲɛn lo ko u be koo nafaman caaman lɔn, u be se ka minw kofɔ kanbelew ni sunguruw ye. Nka, u b’a faamu ko “duniɲa ni cogo be yɛlɛmana” ani ko u ka ɲi ka kokɛcogo kuraw degi.—1 Kor. 7:31, NW.

4. Kafokulu kɔrɔsibagaw be Levitew ladegi cogo di?

⁴ Mɔgɔkɔrɔba minw majiginin lo, olu be sɔn a ma ko komi u kɔrɔla, u tɛ se ka baara caaman kɛ tugun i ko fɔlɔ la. Misali la, an ka kafokulu kɔrɔsibagaw ka koo lajɛ. N’u ye saan 70 sɔrɔ, u b’a ɲini u fɛ u ka baara wɛrɛ kɛ. O koo be se ka gwɛlɛya u ma sabu a ka di u ye kosɔbɛ ka baara kɛ u balimaw ye. U tun be baara min kɛra, o ka di u ye ani u bele b’a fɛ kosɔbɛ ka to k’o baara kɛ. Nka, u b’a faamu ko a ka fisa kanbelew k’u nɔɔ ta o baara la. O cogo la, u be koow kɛ i ko Levitew tun b’a kɛ cogo min na galen. N’olu tun ye saan 50 sɔrɔ, a tun be ɲini u fɛ u k’u ka baara lalɔ fanibugu kɔnɔ. O Levitew ka nisɔndiya tun tɛ bɔ u ka nɛɛma baara lo la. U tun be se ka min kɛ, u tun be u jija kosɔbɛ o la ani u tun be u seko bɛɛ kɛ ka kanbelew dɛmɛ (Nɔnb. 8:25, 26). Tiɲɛn lo ko minw tun ye kafokulu kɔrɔsibagaw ye, olu tɛ baara kɛra kafo caaman ye tugun. Nka u cira ka taga kafo minw kɔnɔ, u be baara ɲuman caaman kɛra yen.

5. I be kalan juman lo sɔrɔ Dan ni Katie ka koo la?

 ⁵ An ka Dan ka koo lajɛ. Ale ye kafokulu kɔrɔsili baara kɛ saan 23 kɔnɔ. Tuma min na a ye saan 70 sɔrɔ, u ye ale n’a muso Kati kɛ dan na piyɔniyew ye. U be ninsɔndiya sɔrɔla u ka baara kura la cogo di? Dan ko ale bolo degunnin lo sisan ka tɛmɛ sanga ni wagati bɛɛ kan! A b’a ka kunkanbaaraw dafa kafo kɔnɔ ani ka balimacɛw dɛmɛ walisa u ka saratiw dafa ka kɛ kɔrɔsigi cidenw ye. A be fɔrɔmasɔn di balimaw ma fana walisa u ka se waajuli la jamayɔrɔw la dugubaw kɔnɔ ani kasobonw na. Balima mɔgɔkɔrɔba, i be kudayi cidenya baara la wo, i tɛ a la wo, i be se ka tɔɔw dɛmɛ cogo caaman na. Cogo di do? I ka koow be cogo min na sisan, yɛlɛmaniw kɛ walisa ka ninsɔndiya sɔrɔ o la, laɲinita kuraw latigɛ ani i be se ka min kɛ, sinsin o lo kan.

6. Ni mɔgɔ b’a seko daan lɔn, mun na o ye hakilitigiyako ye? Ɲɛyirali dɔ fɔ.

⁶ Mɔgɔ min b’a seko daan lɔn, a t’a ɲini ka koo dɔw kɛ a tɛ se minw na. O la, o tigi ninsɔndiyanin be to ani a be to k’a seko kɛ. Mɔgɔ min b’a seko daan lɔn, an be se k’o tigi suma ni mɔgɔ dɔ ye min be mobili bolila ka yɛlɛ kuru dɔ kan. A be dɔ bɔ witɛsi la walisa ka to ka yɛlɛ. N’a sɔrɔ a tɛna yɛlɛ joona joona, nka a kɔni bena to ka yɛlɛ. O cogo kelen na, mɔgɔ min b’a seko daan lɔn, ale b’a lɔn wagati min na a ka ɲi ka “dɔ bɔ witɛsi la” walisa a ka to ka baara kɛ Jehova ye ani ka tɔɔw dɛmɛ.—Filip. 4:5.

7. Barizilayi y’a yira cogo di ko a b’a seko daan lɔn?

⁷ An ka Barizilayi ka koo lajɛ. Tuma min na a tun be ni saan 80 ye, masacɛ Dawuda y’a ɲini a fɛ ko a ka na to masaso kɔnɔ. Komi Barizilayi tun b’a lɔn ko ale tɛ se ka koo caaman kɛ tugun kɔrɔya kosɔn, a y’a fɔ masacɛ ye ko a k’a to kanbele Kimuyamu ka taga ale nɔɔ na (2 Sam. 19:36-38). I ko Barizilayi, a ka di mɔgɔkɔrɔbaw ye ka sababu di kanbelew ma u ka baara kɛ kafo kɔnɔ.

8. Alabatosoba lɔli koo la, masacɛ Dawuda y’a yira cogo di ko a b’a seko daan lɔn?

⁸ Masacɛ Dawuda fana y’a yira koɲuman ko a b’a seko daan lɔn. A tun b’a fɛ n’a dusu bɛɛ ye ka boon dɔ lɔ Jehova ye. Nka, Jehova y’a fɔ a ye ko o nɛɛma bena di kanbele Solomani lo ma. Dawuda sɔnna o ma ani a ye dɛmɛ don kosɔbɛ o baara koo la (1 Til. Kib. 17:4 ; 22:5). A m’a miiri ko a ka fisa ale lo k’o Alabatosoba lɔ sabu Solomani “belen ye den le ye, a ma deri nin baara ɲɔgɔn na fana.” (1 Til. Kib. 29:1, Biblu Ala ta Kuma). Dawuda tun b’a lɔn ko mɔgɔ minw bena o baara kɛ, olu sanda wala u ka lɔnniya lo tɛna a to o baara be ɲɛ. A tun b’a lɔn ko o baara bena ɲɛ Jehova ka duga lo barika la. I ko Dawuda, balima mɔgɔkɔrɔbaw b’u jija Jehova ka baara la hali ni baara wɛrɛ kalifara u ma. U b’a lɔn ko u ka baara kalifara kanbele minw ma, Jehova bena olu duga.

9. Tɔnbolo dɔ ka kɔmite mɔgɔ dɔ y’a yira cogo di ko a b’a seko daan lɔn?

⁹ Bi fana, balima dɔw b’a yira ko u b’u seko daan lɔn. Balimacɛ Shigeo ye u dɔ ye. Saan 1976, a saan 30, a kɛra tɔnbolo dɔ ka kɔmite mɔgɔ dɔ ye. Saan 2004, a kɛra o kɔmite ka kɔrdinatɛri ye. Saan damanin o kɔ, a y’a kɔrɔsi ko fanga bɛrɛ tɛ a la tugun ani ko a be wagati caaman ta k’a ka baaraw kɛ. A ye delili kɛ o koo la ani a y’a miiri ko a ka fisa kanbele dɔ ka kɛ kɔrdinatɛri ye. Shigeo  tɛ kɔrdinatɛri ye tugun, nka a bele be jɛn ka baara kɛ ni kɔmite mɔgɔ tɔɔw ye. Barizilayi, masacɛ Dawuda ani Shigeo ka koo b’a yira ko mɔgɔ min majiginin lo ani a b’a seko daan lɔn, kanbelew tɛ min lɔn a tɛ sinsin o kan. U be min lɔn, a be sinsin o lo kan. A tɛ sanga ni kanbelew ye, nka a b’u jati a baarakɛɲɔgɔnw lo ye.—Talenw 20:29.

10. Balima mɔgɔkɔrɔbaw be balima kanbelew ni sunguruw jati cogo di?

¹⁰ Balima mɔgɔkɔrɔbaw b’a jati ko kanbelew ni sunguruw ye Jehova ka nilifɛnw ye ani u b’a waleɲuman lɔn u kosɔn. Ni mɔgɔkɔrɔbaw barika be dɔgɔyara, u ninsɔn ka di k’a lɔn ko a ka di kanbelew ni sunguru setigiw ye k’u nɔɔ ta ani ka dɛmɛ don kafo kɔnɔ.

11. Ruti 4:13-16 b’a yira cogo di ko nafa b’a la mɔgɔkɔrɔbaw ka sɔn kanbelew ni sunguruw k’u dɛmɛ?

¹¹ Mɔgɔkɔrɔba dɔw kofɔra Bibulu kɔnɔ minw sɔnna kanbelew ni sunguruw ka dɛmɛ ma. Nawomi ye u dɔ ye ani a ye ɲɛyirali ɲuman ye an fɛ o koo la. A dencɛ sanin kɔ, a y’a buranmuso Ruti jija ko a ka kɔsegi a somɔgɔw fɛ. Nka, Ruti banna ani a tagara ni Nawomi ye Bɛtilehɛmu. O diyara Nawomi ye kosɔbɛ ani a sɔnna Ruti ka dɛmɛ ma (Ruti 1:7, 8, 18). U fila bɛɛ ye nafa sɔrɔ o la kosɔbɛ! (Ruti 4:13-16 kalan). Majigilenya bena mɔgɔkɔrɔbaw lasun ka Nawomi ladegi.

12. Ciden Pol y’a ka waleɲumanlɔn yira cogo di?

¹² Ciden Pol tun be tɔɔw waleɲuman lɔn u ka dɛmɛ kosɔn. Misali la, a ye Filipi balimaw fo sabu u y’a makoɲɛfɛnw ci a ma (Filip. 4:16). A ye Timote fana  waleɲuman lɔn a ka dɛmɛ kosɔn (Filip. 2:19-22). Tuma min na u tun be tagara ni Pol ye kaso la Ɔrɔmu, balima dɔw nana a jija. A ye barika la Ala ye o kosɔn (Kɛw. 28:15). Pol tun kisɛyanin lo ani a tun be kilomɛtɛrɛ waa caaman kɛ walisa ka waajuli kɛ ani k’a balimaw jija kafow kɔnɔ. Nka a tun majiginin lo minkɛ, a tun be sɔn a balimaw ka dɛmɛ ma.

13. Mɔgɔkɔrɔbaw be se k’a yira cogo di ko u be kanbelew ni sunguruw waleɲuman lɔn?

¹³ Mɔgɔkɔrɔbaw, aw be se k’a yira cogo caaman na ko aw be aw ka kafo ka kanbelew ni sunguruw waleɲuman lɔn. U be se k’a ɲini ka i ta ka taga yɔrɔ dɔ la, ka sanniw wala koo wɛrɛw kɛ i ye. Sɔn u ka dɛmɛ na ani u waleɲuman lɔn o kosɔn. A to i hakili la ko Jehova b’a yirala o fɛ ko a b’i kanu. Balima minw b’i dɛmɛ, olu be se ka kɛ i teri sɔbɛw ye. A ɲini tuma bɛɛ k’i balima kanbelew ni sunguruw dɛmɛ u ka jɛnɲɔgɔnya ɲuman kɛ ni Jehova ye. A fɔ u ye i ninsɔn ka di cogo min na k’a ye ko u b’u jijara ka baara caaman kɛ kafo kɔnɔ. Sɔn ka wagati kɛ n’u ye ani koo minw y’i sɔrɔ i ka ɲɛnamaya kɔnɔ, o lakali u ye. N’i b’o kɛ, i bena a yira ko i ye ‘ɲumanlɔnbaga ye.’ Mun kosɔn? Sabu Jehova y’a to kanbelew ni sunguru caaman be kafo kɔnɔ.—Kɔlɔs. 3:15; Zan 6:44; 1 Tes. 5:18.

14. Masacɛ Dawuda y’a yira cogo di ko a tɛgɛ labilanin lo?

¹⁴ Masacɛ Dawuda y’a yira fana ko a tɛgɛ labilanin lo. O ye jogo kɔrɔtanin ye mɔgɔkɔrɔbaw ka ɲi ka kɛ ni min ye. A ye wariba ani fɛɛn nafaman caaman wɛrɛw bɔ a yɛrɛ ka nafolo la k’o di walisa ka dɛmɛ don Alabatosoba lɔli baara la (1 Til. Kib. 22:11-16; 29:3, 4). A y’o kɛ hali k’a sɔrɔ Solomani tɔgɔ lo tun bena la o batosoba kan. N’a sɔrɔ fanga t’an na tugun ka dɛmɛ don Masaya Boonw n’a ɲɔgɔnnaw lɔli baara la. Nka, an bele be se ka to ka dɛmɛ don o baaraw la, an kɛtɔ ka niliw kɛ ka kɛɲɛ n’an ka koow cogoya ye. An ye lɔnniya min sɔrɔ saan caaman kɔnɔ, an be se fana ka kanbelew ni sunguruw dɛmɛ n’o ye.

15. Ciden Pol ye fɛɛn nafaman jumanw lo tilan ni Timote ye?

¹⁵ An ka ciden Pol ka koo lajɛ, ale min tɛgɛ tun labilanin lo fana. A y’a ɲini Timote fɛ a ka ale bila sira a ka misɔndenya baara la. A y’a ka waajuli kɛcogo ni mɔgɔw kalancogo yira kanbele Timote la fana (Kɛw. 16:1-3). Pol ka fɔrɔmasɔn ye Timote dɛmɛ a kɛra waajulikɛla ɲuman ani kalanfa ɲuman ye (1 Kor. 4:17). Pol ye Timote kalan min na, ale fana ye mɔgɔ wɛrɛw kalan o la.

16. Mun na Shigeo ye fɔrɔmasɔn di tɔɔw ma?

¹⁶ Bi, mɔgɔkɔrɔbaw tɛ siran ka fɔrɔmasɔn nafaman di kanbelew ni sunguruw ma walisa u ka u nɔɔ ta. U tɛ siran ko n’u y’o kɛ, nafa foyi tɛna kɛ olu la tugun kafo kɔnɔ. Misali la, an kumana Shigeo min koo la, ale ye fɔrɔmasɔn di kanbele dɔw ma minw tun ye tɔnbolo ka kɔmite mɔgɔ dɔw ye. A y’o kɛ saan caaman kɔnɔ walisa ka dɛmɛ don Ala ka Masaya ka koow la a be jamana min na. O la, tuma min na a tun tɛ se ka kɛ kɔmite ka kɔrdinatɛri ye tugun, balimacɛ dɔ y’a nɔɔ ta min tun ye fɔrɔmasɔn ɲuman sɔrɔ. Shigeo kɛra tɔnbolo ka kɔmite mɔgɔ dɔ ye saan 45 ni kɔ kɔnɔ. A ye lɔnniya min sɔrɔ o sen fɛ, a bele be to ka kanbelew dɛmɛ n’o ye. Balimacɛ minw be i ko Shigeo, olu be Ala sagokɛlaw dɛmɛ yɛrɛ le!

17. Ka kɛɲɛ ni Luka 6:38 ye, mɔgɔkɔrɔbaw be se ka mun lo di tɔɔw ma?

 ¹⁷ Balima mɔgɔkɔrɔbaw, aw ka koo b’a yira ka gwɛ ko ka Jehova sago kɛ ni limaniya ani kantigiya ye, o lo ɲɔgɔn tɛ. Aw ka ɲɛyirali fɛ, aw b’a yira ko n’an b’a ɲini ka Bibulu ka sariyakolow lɔn ani k’u sira tagama, o b’an nafa. Aw b’a lɔn koow tun be kɛ cogo min na fɔlɔ la. O bɛɛ n’a ta, aw y’a faamu ko a kɔrɔtanin lo aw ka koow kɛ ka kɛɲɛ ni yɛlɛmaniw ye. Aw mɔgɔkɔrɔba minw batizera a ma mɛɛn, aw fana be se ka tɔɔw dɛmɛ cogo caaman na. Misali la, aw be se k’a fɔ u ye aw ye ninsɔndiya min sɔrɔ ka Jehova lɔn tuma min na aw kɔrɔla. Aw ye koo minw faamu ani ka kalan minw sɔrɔ, n’aw b’o lakali kanbelew ni sunguruw ye, o bena diya u ye. N’aw be dɔ bɔ aw ka lɔnniya marayɔrɔ la ka “tɔw sɔn,” Jehova bena aw duga kosɔbɛ.—Luka 6:38 kalan.

18. Mɔgɔkɔrɔbaw ani kanbelew ni sunguruw be se ka ɲɔgɔn dɛmɛ cogo di?

¹⁸ Aw mɔgɔkɔrɔba kanulenw, n’aw be aw magwɛrɛ kanbelew ni sunguruw la, aw bena se ka ɲɔgɔn dɛmɛ (Ɔrɔm. 1:12). Fɛɛn nafaman dɔ be aw kelen kelen bɛɛ fɛ min tɛ tɔɔ kelen fɛ. Mɔgɔkɔrɔbaw, aw ye saan caaman minw kɛ, o y’a to aw ye hakilitigiya ni lɔnniya sɔrɔ. Kanbelew ni sunguruw, fanga be aw la. Ni kanbelew ni sunguruw ani mɔgɔkɔrɔbaw be jɛn ka baara kɛ teriya la, o be nɔɔrɔ la an sankolola Faa kan ani o be kafomɔgɔw bɛɛ nafa.