1. N’an b’a lakali an ye tiɲɛn lɔn cogo min na, o b’an nafa cogo di?

 SIGA t’a la, mɔgɔ caaman delila k’i ɲininga ko: “I ye tiɲɛn lɔn cogo di?” O ye ɲiningali fɔlɔ dɔ ye an ka teli ka min kɛ, n’an b’a ɲinina ka balima dɔ lɔn ka ɲɛ. N’an balimaw b’a lakalila an ye u ye Jehova lɔn cogo min na ani k’a kanu, a ka di an ye k’u lamɛn. An dusu ka di fana k’a ɲɛfɔ u ye fɛɛn min kama a ka di an ye ka kɛ Jehova Seere ye (Ɔrɔm. 1:11). O barow b’an hakili jigi ko tiɲɛn diinan koo ka gwɛlɛ an ma kosɔbɛ. O b’a to an b’an cɛsiri bɛrɛbɛrɛ ka to ka “taama tiɲɛ sira kan.” O kɔrɔ, ka koow kɛ ka kɛɲɛ ni Jehova sago ye ani k’a ka dugaw sɔrɔ.—3 Zan 4, Bible senuma.

2. An bena mun lo lajɛ barokun nin na?

² Fɛɛn minw kama a ka di an ye ka kɛ tiɲɛn sira kan, an bena u dɔw lajɛ barokun nin na. O kɔ, an bena a filɛ cogo min na an be se ka to k’a yira ko tiɲɛn koo ka di an ye, o min ye nilifɛn nafamanba ye. Siga t’a la, o bena a to an be Jehova waleɲuman lɔn kosɔbɛ sabu a y’an dɛmɛ ka tiɲɛn lɔn (Zan 6:44). O bena a to an b’an jija kosɔbɛ fana k’o tiɲɛn kofɔ mɔgɔ wɛrɛw ye.

3. Kuun jɔnjɔn juman lo kama tiɲɛn koo ka di an ye?

³ Tiɲɛn koo ka di an ye kuun caaman kosɔn. Nka kuun  jɔnjɔn min kama a koo ka di an ye, o ye ko an be Jehova Ala kanu, tiɲɛn be bɔ ale min yɔrɔ. A ka Kuma, o kɔrɔ Bibulu sababu fɛ, an y’a lɔn ko ale lo ye Sebagayabɛɛtigi ye ani ko ale lo ye sankolo ni dugukolo dan. Nka o dɔrɔn tɛ, an y’a lɔn fana ko ale lo y’an sankolola Faa kanutigi ye min be a janto an na kosɔbɛ (1 Piyɛri 5:7). An b’a lɔn ko an ka Ala ye “makaritigi, hinɛbaga Ala [ye]. A te dimi joona, a ka ɲumanya n’a ka kantigiya ka bon.” (Ɛkiz. 34:6). Tilenninya ka di Jehova ye (Ezayi 61:8). A mana a ye an be tɔɔrɔla, o b’a dusu tiɲɛ. A b’a fɛ ani a yɛrɛ kɔrɔtɔnin lo ka daan sigi an ka tɔɔrɔw bɛɛ la wagati latigɛnin na (Zer. 29:11). O bena kɛ wagati diiman ye yɛrɛ le! O bɛɛ lo kama an be Jehova kanu kosɔbɛ!

4-5. Mun na ciden Pol ye an ka jigiya suma ni banamini ye?

⁴ Kuun wɛrɛ juman lo kama tiɲɛn koo ka di an ye? Tiɲɛn be an nafa kosɔbɛ. Misali la, an be ni jigiya min ye siniɲasigi koo la, o ye Bibulu ka tiɲɛnkalan dɔ ye. Walisa k’a yira o jigiya nafa ye min ye, ciden Pol y’a sɛbɛ ko: “O jigi bɛ an dusukun na i ko banamini. A sigilen sinsinnen don.” (Eburuw 6:19, Bible senuma). Banamini b’a to kurun be lɔ ka ɲɛ. O cogo kelen na, an ka jigiya min basiginin lo Bibulu kan, o b’a to an hakili be sigi gwɛlɛyaw wagati la.

⁵ O vɛrise kɔnɔ, Pol tun be kumana kerecɛn mɔlenw ka jigiya lo koo la, o min ye ka taga ɲɛnamaya kɛ sankolo la. Nka, a ka kumaw ɲɛsinna kerecɛnw ma fana minw ka jigiya ye ka ɲɛnamaya banbali kɛ alijɛnɛ kɔnɔ dugukolo kan (Zan 3:16). Tiɲɛn na, ɲɛnamaya banbali jigiya kosɔn, kuun b’an ka ɲɛnamaya la.

6-7. Yvonne kɛtɔ ka tiɲɛn lɔn siniɲasigi koo la, o y’a nafa cogo di?

⁶ An ka Yvonne ka koo lajɛ. A ma lamɔ tiɲɛn sira kan ani a denmisɛn tuma, a tun be siran saya ɲɛ. A hakili b’a la ko loon dɔ, a ye kuma dɔw kalan a tɛ se ka ɲinɛ minw kɔ. A tun sɛbɛra ko: “Loon dɔ, an tɛna sini sɔrɔ tugun.” Yvonne ko: “O kuma tun be n’ bali ka sinɔgɔ sufɛ sabu n’ tun be to ka miiri siniɲasigi koo la. N’ tun be to ka miiri ko: ‘Ɲɛnamaya kuun bɛɛ kɔni lo tɛ nin ye? Mun na Ala ye n’ dan do?’ N’ tun t’a fɛ ka sa!”

⁷ Kɔfɛ, Yvonne sunguru tuma, a ye Jehova Seere dɔw kunbɛn. A ko: “N’ y’a daminɛ ka la a la ko n’ be se ka kɛ ni jigiya ye ka ɲɛnamaya banbali kɛ alijɛnɛ kɔnɔ dugukolo kan.” An balimamuso ye tiɲɛn lɔn minkɛ, o y’a nafa cogo di? A ko: “Siniɲasigi ni saya ɲɛsiran tɛ n’ bali ka sinɔgɔ sufɛ tugun.” A gwɛnin lo ko tiɲɛn koo ka gwɛlɛ Yvonne ma kosɔbɛ. A ka di a ye kosɔbɛ fana k’a ka jigiya kofɔ tɔɔw ye siniɲasigi koo la.—1 Tim. 4:16.

8-9. a) Yezu ka talen dɔ la, cɛɛ dɔ ye nafolo min sɔrɔ, a y’a yira cogo di ko a b’o jati fɛɛn nafamanba ye? b) Ele be tiɲɛn jati cogo di?

⁸ Ala ka Masaya kibaro diiman ye Bibulu ka tiɲɛnkalan dɔ ye. Tiɲɛnkalan min ɲɛsinna Ala ka Masaya koo ma, Yezu y’o suma ni nafolo dogonin dɔ ye. A y’a fɔ Matiyo 13:44 kɔnɔ ko: “Sankolo masaya be i ko nafolo dogonin, foro dɔ la. Cɛɛ dɔ tagara o sɔrɔ k’a ta k’a dogo tugu. A nisɔn diyara kosɔbɛ, fɔɔ a tagar’a bololafɛn bɛɛ feere ka segi ka taga foro nin san.” O cɛɛ tun tɛ nafolo ɲinina. Nka tuma min na a y’a  ye, a ye jijalibaw kɛ k’a sɔrɔ. A yɛrɛ y’a bololafɛnw bɛɛ feere. Mun na do? Sabu a tun b’a lɔn ko a ye nafolo min ye, o nafa ka bon kosɔbɛ. A karila fɛɛn minw bɛɛ kɔ, o nafolo nafa tun ka bon ka tɛmɛ u bɛɛ kan.

⁹ Yala ele be tiɲɛn jati o cogo la wa? Siga t’a la, i b’a jati o cogo la! Kabi sisan, an be ninsɔndiya sɔrɔla Jehova sago kɛli la ani an be ni jigiya ye ka ɲɛnamaya kɛ fɔɔ abada sini ma Ala ka Masaya kɔrɔ. Duniɲa nin ka fɛɛn si tɛ se ka suma n’o ye! An mana kari fɛɛn o fɛɛn kɔ walisa ka jɛnɲɔgɔnya teriman kɛ ni Jehova ye, o ka kan sabu n’an ‘koo ka di’ a ye, an be ninsɔndiyaba sɔrɔ o lo la.—Kɔlɔs. 1:10.

10-11. Mun lo ye Michael lasun ka yɛlɛmanibaw kɛ a ka ɲɛnamaya kɔnɔ?

¹⁰ An fanba ye fɛɛn caaman saraka walisa k’an koo diya Jehova ye. Dɔw ye baara dɔ to yen min sara ka ca ani dɔ wɛrɛw t’a ɲinina ka kɛ waritigiw ye tugun. Dɔw y’u ka ɲɛnamaya kɛcogo yɛlɛma pewu tuma min na u ye Jehova lɔn. Michael y’o lo kɛ. A ma lamɔ tiɲɛn sira kan ani a kanbele tuma na, a ye karate degi. A ko: “N’ tun be waso sabu n’ tun ye cɛɛ kɔgɔnin ye. Tuma dɔw la yɛrɛ, a tun be n’ ɲɛɛ na ko mɔgɔ si tɛ se n’ kɔrɔ.” Nka tuma min na Michael ye bibulukalan daminɛ, a y’a faamu Jehova be min miiri fariyakow la (Zab. 11:5). Balimacɛ min tun be bibulukalan kɛra n’a ye, a y’a fɔ ale n’a muso koo la ko: “U ma deli k’a fɔ n’ ye abada ko n’ ka karate dabila. U tora ka n’ kalan Bibulu ka tiɲɛnkalanw na dɔrɔn.”

¹¹ Michael tora ka Jehova lɔn kosɔbɛ minkɛ, a ka kanuya barika tora ka bonya a koo la. Jehova be makari a sagokɛlaw la cogo min na, o yɛrɛ lo ye a dusukun sɔrɔ kosɔbɛ. Kɔfɛ, a y’a faamu ko a ka ɲi ka yɛlɛmaniba dɔ kɛ. A ko: “N’ tun b’a lɔn ko ka karate dabila, o bena gwɛlɛya n’ ma ka tɛmɛ fɛɛn bɛɛ kan. Nka, n’ tun b’a lɔn fana ko o tun bena diya Jehova ye. Ani n’ tun lanin b’a la ko n’ tun mana fɛɛn o fɛɛn saraka Jehova sago kɛli kosɔn, o ka kan.” Michael be tiɲɛn jati fɛɛn nafamanba ye minkɛ, o y’a lasun ka yɛlɛmanibaw kɛ.—Zaki 1:25.

12-13. Bibulu ka tiɲɛnkalanw ye Mayli dɛmɛ cogo di?

¹² Walisa k’a yira ko tiɲɛn nafa ka bon kosɔbɛ, Bibulu y’a suma ni fitinɛ ye min be yeelen bɔ dibi la (Zab. 119:105; Efɛz. 5:8). Mayli be bɔ Azɛribajan jamana na. Ale y’a kɔrɔsi ko Ala ka Kuma ye yeelen bɔ a ye. A facɛ tun ye silamɛ ye ani a bamuso tun ye Yahutu ye. Mayli ko: “N’ ma deli ka sigasiga ko Ala be yen. Nka, ɲiningali dɔw tun be n’ ninna ban. N’ tun be n’ yɛrɛ ɲininga ko: ‘Mun na Ala ye adamadenw dan? Nafa juman lo b’a la mɔgɔ ka tɔɔrɔ a ka ɲɛnamaya kuru bɛɛ la ani kɔfɛ, u b’a jɛni jahanama tasuma kɔnɔ fɔɔ abada?’ Komi mɔgɔw be to k’a fɔ ko koo o koo mana kɛ, o ye Ala sago lo ye, n’ tun be to ka n’ yɛrɛ ɲininga ko: ‘Yala a ka di Ala ye ka tɔɔrɔ la mɔgɔw kan ani ka tila ka ninsɔn diya u ka tɔɔrɔw kosɔn wa?’ ”

¹³ Mayli tora k’a ka ɲiningaliw jaabili ɲini. Kɔfɛ, a sɔnna bibulukalan na ani a kɛra Jehova Seere ye. A ko: “Bibulu be koow ɲɛfɔ cogo ɲuman min na, o ye n’ dɛmɛ n’ tora ka koow filɛ ni ɲɛɛ ɲuman ye. O ɲɛfɔli ɲumanw y’a to n’ ye  hakilisigi sɔrɔ.” I ko Mayli, an bɛɛ be Jehova fo sabu ‘a y’an sama ka bɔ dibi la k’an bila a ka kɛnɛba la.’—1 Piyɛri 2:9.

14. An be se k’an ka kanuya barika bonya cogo di tiɲɛn koo la? (Koorilen nin fana lajɛ: “ Tiɲɛn sumana ni fɛɛn wɛrɛ minw ye.”)

¹⁴ An ye ɲɛyirali damanin lo lajɛ minw b’a yira ko tiɲɛn nafa ka bon. N’a sɔrɔ i be miirila ɲɛyirali caaman wɛrɛw la. Kuun wɛrɛ minw kosɔn tiɲɛn ka ɲi ka diya an ye, i be se k’a latigɛ k’u lajɛ i ka kelenna kalan na. Ni tiɲɛn tora ka diya an ye, an bena to ka fɛɛrɛw ɲini k’o yira.

15. An be se k’a yira cogo minw na ko tiɲɛn koo ka di an ye, u la dɔ ye juman ye?

¹⁵ N’an be Bibulu n’an ka gafew sɛgɛsɛgɛ tuma o tuma, an b’a yira ko tiɲɛn koo ka di an ye. An be tiɲɛn sira kan a mɛɛnna wo, a ma mɛɛn wo, fɛɛn caaman bele be yen an tɛ minw lɔn. A tun fɔra Kɔrɔsili Sangaso nimɔrɔ fɔlɔ kɔnɔ ko: “Tiɲɛnkalanw be i n’a fɔ filɛru minw dogonin be biin juguw cɛma. Ni mɔgɔ b’a fɛ k’o filɛruw ɲɔgɔn sɔrɔ, a ka ɲi k’u ɲini koɲuman. . . . N’a ye dɔ sɔrɔ, a man ɲi ka dan kelen dɔrɔn ma. . . . Nka, a ka ɲi ka to  ka sɛgɛsɛgɛri kɛ walisa ka filɛru caaman wɛrɛw sɔrɔ.” O b’a yira ko sɛgɛsɛgɛri tɛ ɲɛ jijali kɔ, nka kuun b’o la.

16. Sɛgɛsɛgɛri cogo juman lo be ele nafa? (Talenw 2:4-6).

¹⁶ Kalangwɛ ni sɛgɛsɛgɛri man di an dɔw ye. Nka, Jehova b’a ɲini an fɛ an ka to k’a “ɲini” ka Bibulu ka tiɲɛnkalanw faamu ka ɲɛ (Talenw 2:4-6 kalan). N’an b’an jija k’o kɛ, o b’an nafa tuma bɛɛ. Corey y’a ɲɛfɔ ko a ka Bibulu kalangwɛ tuma na, a be sinsin vɛrise kelen lo kan. A ko: “Jukɔrɔla kunnafoniw ani vɛrise wɛrɛ minw kofɔra ka ɲɛsin o vɛrise ma, n’ be u bɛɛ kalan. N’ be sɛgɛsɛgɛri wɛrɛw kɛ fana. . . . O cogo la, n’ be koo caaman faamu.” An be tɛmɛ o fɛɛrɛ wala fɛɛrɛ wɛrɛ fɛ wo, an b’a yira ko an be tiɲɛn jati fɛɛn nafamanba ye, n’an be wagati kunmabɔ ani ka jijaliw kɛ walisa ka Bibulu sɛgɛsɛgɛ koɲuman.—Zab. 1:1-3.

17. Ka tiɲɛn sira tagama, o kɔrɔ ko di? (Zaki 1:25).

¹⁷ Ka Bibulu ka tiɲɛnkalanw sɛgɛsɛgɛ, o dama tɛ bɔri kɛ. N’an b’a fɛ tiɲɛn k’an nafa bɛrɛbɛrɛ, an ka ɲi k’a sira tagama, o kɔrɔ, an ye min kalan, an ka ɲi ka koow kɛ ka kɛɲɛ n’o ye. O dɔrɔn lo bena a to an be ninsɔndiya sɔbɛ sɔrɔ (Zaki 1:25 kalan). An be se ka la a la cogo di ko an be tiɲɛn sira tagamana? Balimacɛ dɔ ko an k’an yɛrɛ sɛgɛsɛgɛ k’a filɛ an ye min kalan, an b’o sira tagamana an ka ɲɛnamaya faan minw na ani an ka ɲi k’o kɛ an ka ɲɛnamaya faan wɛrɛ minw na. Ciden Pol ko: “An ye koo minw kɛ fɔɔ ka na se sisan ma, an ka banba ka taga ɲa n’o koow ye.”—Filip. 3:16.

18. Mun na an b’an seko bɛɛ kɛ ka “taama tiɲɛ sira kan”?

¹⁸ N’an b’an seko bɛɛ kɛ ka “taama tiɲɛ sira kan,” an ka miiri k’a filɛ o b’an nafa cogo min na! O b’an ka ɲɛnamaya kɛcogo fisaya. Nka o dɔrɔn tɛ, o be Jehova n’an balimaw ninsɔn diya fana (Talenw 27:11; 3 Zan 4). Kuun jɔnjɔn minw kama an ka ɲi ka tiɲɛn kanu ani k’a sira tagama, an y’o lo lajɛ ten.