GƐRƐKIKAN kumaden min bayɛlɛmana julakan Bibulu kɔnɔ ko “wotoro,” o ɲɛsinna bolifɛn sifa caaman ma (Kɛw. 8:28, 29, 38). Nka a be komi Etiyopika tun be wotoro min kɔnɔ, o tun ka bon ni kɛlɛkɛwotoro wala ɲɔgɔndanboli wotoro ye. Kuun minw kama an ko ten, an k’u damanin lajɛ.

Etiyopikacɛ tun ye baaraɲamɔgɔ dɔ ye ani a tun be tagamajan kɛra. “O cɛɛ nin tun ye Etiyopi jamana ka masamuso Kandasi ka baaraɲamɔgɔw dɔ ye. Ale tun be masamuso ka nafolo bɛɛ kunna.” (Kɛw. 8:27). Bi, Sudan jamana be yɔrɔ min na ani mara min be Ezipiti worodugu fan fɛ, olu bɛɛ tun ye Etiyopi mara dɔw ye galen. N’a sɔrɔ o cɛɛ m’a ka voyazi kuru bɛɛ kɛ bolifɛn kelen lo kɔnɔ. Nka, a be komi a ka minanw tun ka ca o voyazijan kama. U tun be mɔgɔw ta bolifɛn minw kɔnɔ saan kɛmɛkulu fɔlɔ la, u dɔw tun ye seen naani wotorow ye ani u sanfɛla tun datugunin lo. Gafe dɔ ko: “O wotorow tun be se ka minan caaman ta, voyazi tun ka nɔgɔ n’u ye ani n’a sɔrɔ mɔgɔw tun be se ka sirajan kɛ n’u ye.” (Acts—An Exegetical Commentary).

Etiyopikacɛ tun be kalangwɛ kɛra tuma min na Filipu kumana n’a ye. Bibulu b’a fɔ ko: “Filipu bolila ka gwɛrɛ, k’a ye ko cɛɛ be kira Ezayi ka kitabu kalanna.” (Kɛw. 8:30). Dugutaga wotorow tun tɛ boli joona joona. O kama, Etiyopikacɛ tun be sera ka kalangwɛ kɛ ani Filipu sera ka boli k’a minɛ seen na.

Etiyopikacɛ “y’a ɲini Filipu fɛ ko a ka yɛlɛ ka sigi ale gɛrɛfɛ.” (Kɛw. 8:31). Ɲɔgɔndanboli be kɛ ni wotoro minw ye, olu bolibagaw tun ka teli ka lɔ le. Nka dugutaga wotorow kɔnɔ, sigiyɔrɔw tun be yen. O kama, Etiyopika ni Filipu sera ka sigi.

Kɔsa la, an ka gafew y’a daminɛ ka Etiyopikacɛ yira wotoro dɔ kɔnɔ min ka bon ni kɛlɛkɛwotoro wala ɲɔgɔndanboli wotoro ye. An basigira Kɛwaliw sapitiri 8nan ani tarikiko dɔw lo kan k’o kɛ.