Ala be yen tiɲɛn na wa?

A LAMƐN KAAN NIN NA

Bibulu ka jaabili

Ɔnhɔn Ala be yen. Bibulu be dalilu barikamanw di minw b’a yira ko Ala be yen. Bibulu b’an jija ko an ka limaniya Ala la sanni ka la diinanw ka kalanw na an kunfɛ. A b’an jija fana ko an ka baara kɛ n’an “hakili” ye walisa ka “koo bɛɛ sɛgɛsɛgɛ.” (1 Zan 5:20; 1 Tesalonikaw 5:21). An ka dalilu dɔw lajɛ minw basiginin lo Bibulu kan:

Duniɲa labɛnnin lo koɲuman ani ninmanfɛnw b’a kɔnɔ. O b’a yira ko Danbaga be yen. Bibulu b’a fɔ ko: “Ayiwa, boon bɛɛ n’a lɔbaga lo, nga fɛɛn bɛɛ lajɛnnin danbaga ye Ala le ye.” (Eburuw 3:4). Hali n’o tiɲɛnkuma faamu ka nɔgɔ, mɔgɔ kalannin caaman b’a jati ko a barika ka bon. a
Adamadenw b’a fɛ k’a lɔn ɲɛnamaya kuun ye min ye. Hali n’an makoɲɛfɛnw bɛɛ b’an fɛ, o t’an wasa fɔɔ n’an sera k’a faamu ɲɛnamaya kuun ye min ye. Bibulu b’a fɔ ko: “Mɔgɔ minw b’a lɔn k’u mako be Ala la, olu dagamunin lo, bari sankolo masaya ye u ta ye.” O kɔrɔ ko, an danna kuun min kama, o ye ka Ala lɔn ani k’a bato (Matiyo 5:3; Yirali 4:11). An mako b’a la k’an ka Alako nege wasa minkɛ, o b’a yira ko Ala be yen, ko a ye Danbaga kanutigi ye ani ko a b’a fɛ an k’o nege wasa.—Matiyo 4:4.
Bibulu ka kiraya kuma caaman sɛbɛra saan kɛmɛkulu caaman ka kɔn u kɛwagati ɲɛ ani u dafara tigitigi i ko Bibulu tun y’a fɔ cogo min na. O kiraya kumaw fɔra ka gwɛ ani u dafara cogo tigitigi minw na, o b’a yira ko u bɔra tigi min yɔrɔ, a ka setigiya ka bon ni adamadenw ta ye.—2 Piyɛri 1:21.
Bibulu sɛbɛbagaw tun be lɔnnikow faamu ka tɛmɛ u ka wagati mɔgɔw kan. Misali la, galen, mɔgɔ caaman tun b’a miiri ko dugukolo bilanin be bɛgɛn dɔ lo kan i n’a fɔ sama, kongolɛ wala misi. Nka, Bibulu b’a fɔ ko dugukolo “bilanin te foyi kan.” (Zɔbu 26:7). A b’a fɔ ka gwɛ fana ko dugukolo “koorinin” lo i ko balɔn (Ezayi 40:22, Biblu Ala ta Kuma). Bibulu sɛbɛbagaw sera k’o koo faamu cogo di ka kɔn u ka wagati mɔgɔw ɲɛ? Mɔgɔ caaman fɛ, a bɛnnin lo k’a miiri ko o lɔnniya bɔra Ala yɔrɔ le.
Ɲiningali dɔw ka gwɛlɛ. Ni mɔgɔ ma jaabili ɲumanw sɔrɔ u la, o be se k’a to a tigi tɛ la Ala la tugun. Nka Bibulu b’o ɲiningaliw jaabi. O ɲiningali dɔw ye ko: Ni Ala ye kanutigi ani Sebagayabɛɛtigi ye, mun na tɔɔrɔ ani koo jugu be yen duniɲa kɔnɔ? Mun na diinanw be mɔgɔ lasun ka koo jugu kɛ sanni ka koo ɲuman kɛ?—Titi 1:16.

a Misali la, lɔnnikɛla dɔ tɔgɔ ko Allan Sandage ani a tɛ niin na tugun. A tun y’a fɔ duniɲa koo la ko: “Duniɲa ka koow labɛnna cogo ɲuman min na, o b’a to n’ lanin t’a la ko fɛɛnw nana u kunfɛ. Siga t’a la, sariya dɔw lo y’a to u labɛnnin lo koɲuman ten. A ka gwɛlɛ ne ma k’a faamu ko Ala be yen. Nka ni Danbaga be yen, o dɔrɔn lo b’a yira fɛɛn min kama duniɲa ka koow labɛnna cogo kabakoman na ten ani a lakolon tɛ.”