Kanbele dɔ, min tɔgɔ ko Will, ale y’a fɔ ko: “N’i t’a lɔn i bena Bibulu kalangwɛ kɛ cogo min na walisa a ka diya i ye, o be se k’a kɛ a kalanlɔgɔ t’i minɛ.”

 I b’a fɛ k’a lɔn i be se ka min kɛ walisa Bibulu kalangwɛ ka diya i ye wa? N’o lo, barokun nin bena i dɛmɛ.

•  Miiri k’a filɛ koow kɛra cogo min na tigitigi

•  Sɛgɛsɛgɛri kɛ!

•  I filankuruw be min miiri

 A kɛ i n’a fɔ i tun be yen koow kɛyɔrɔ la. I be se ka ladili nunu sira tagama:

1.   I b’a fɛ ka Bibulu ka maana min kalan, o sugandi. I be se ka maana dɔ sugandi Evanziliw la wala ka bɔ Bibulu kalangwɛ kabakomanw na jw.org kan.

2.   O maana kalan. I be se k’a kalan i kelen. I be se fana k’a kalan n’i teriw wala n’i somɔgɔw ye. Dɔ be se ka lakalibaga ka yɔrɔ kalan ani mɔgɔ wɛrɛw be kokɛbagaw ka yɔrɔ kalan.

3.   Ladili nunu dɔ wala u damanin sira tagama k’a filɛ:

   •   Desɛn dɔw kɛ walisa ka o maana faamu ka ɲɛ. I be se fana ka desɛn dɔw kɛ k’a yira koow kɛra ka tugu tugu ɲɔgɔn kɔ cogo min na. Desɛn kelen kelen bɛɛ la, ɲɛfɔli dɔ kɛ walisa k’a yira min be kɛra.

   •   N’an be mɔgɔ limaniyanin dɔ ka maana kalanna, a tigi ye min kɛ ani a be ni jogo minw ye, u sɛbɛ. A sɛbɛ fana a tigi ye duga minw sɔrɔ.

   •   A kɛ i n’a fɔ i ye kunnafoni dibaga ye ani i be koo dɔ lakalila min kɛra a ma mɛɛn. Mɔgɔ minw tun be yen koow kɛtuma na, a kɛ i n’a fɔ i be olu dɔw ɲiningara u ka fɛtaw la.

   •   Mɔgɔ minw kofɔra o maana kɔnɔ, a be se ka kɛ ko u la dɔ ye desizɔn jugu ta. N’o lo, miiri k’a filɛ n’o tigi tun ye desizɔn ɲuman ta. Misali, miiri k’a filɛ tuma min na Piyɛri y’a dalacɛ Yezu la (Mariki 14:66-72). Piyɛri tun be se ka koow kɛ ka ɲɛ cogo di hali n’a tun sirannin lo?

   •   N’i b’a fɛ, basigi Bibulu kan ka maana dɔ sɛbɛ walisa o ka kɛ i n’a fɔ teyatiri. Ani, a filɛ i be se ka kalan min sɔrɔ ka bɔ o maana na.—Ɔrɔmukaw 15:4.

 Kunnafoni minw ɲɛsinna maana dɔ ma, n’i miirila u kan koɲuman, n’a sɔrɔ i be se ka koo wɛrɛw faamu i tun ma kɔn ka minw kɔrɔsi. Tuma dɔw la, kumaden kelen wala fila dɔrɔn be se k’i dɛmɛ ka koo caaman faamu Bibulu ka maana dɔ la.

 Misali la, Matiyo 28:7 ani Mariki 16:7 kɔnɔnakumaw suma ni ɲɔgɔn ye.

•    Mun na Mariki y’a fɔ ko Yezu tun bena a yɛrɛ yira kalandenw na “ani Piyɛri” la?

•  Kunnafoni dɔ, min be se k’i dɛmɛ k’o jaabili sɔrɔ: Mariki yɛrɛ tun tɛ yen o fɔtuma na. O la, n’a sɔrɔ Piyɛri lo y’o kunnafoni di a ma.

•  I be se kalan wɛrɛ minw sɔrɔ: Tuma min na Piyɛri y’a mɛn ko Yezu b’a fɛ k’a ye tugun, mun na o y’a hakili sigi? (Mariki 14:66-72). Yezu y’a yira cogo di ko a ye Piyɛri teri sɔbɛ ye? I be se k’a Yezu ladegi cogo di ani ka kɛ teri sɔbɛ ye tɔɔw fɛ?

 Bibulu ka maana dɔ kalannin kɔ, n’i miirila k’a filɛ koow kɛra cogo min na tigitigi ani n’i ye sɛgɛsɛgɛri kɛ walisa ka koo wɛrɛw faamu, Bibulu kalangwɛ bena diya i ye kosɔbɛ!