NUKAE nèsusuna be Ʋɔnudrɔ̃gbe la nye? Ame geɖe susuna be luʋɔ biliɔn geɖewo ava to Mawu ƒe fiazikpuia ŋgɔ ɖekaɖeka. Eye woadrɔ̃ ʋɔnu amesiame le afima. Woatsɔ dzidzɔ me nɔnɔ le dziƒo aɖo eteƒe na ame aɖewo, ke ame bubuwo ya woatsɔ wo ade asi na fukpekpe mavɔ. Gake nya si Biblia ya gblɔ tso ɣeyiɣi sia ŋu la to vovo kura. Mawu ƒe Nya la megblɔ be enye vɔvɔ̃ ŋkeke o, ke boŋ be enye mɔkpɔkpɔ kple nuwo ɖɔɖɔɖo ƒe ɣeyiɣi.

Le Nyaɖeɖefia 20:11, 12 la, míexlẽ nu tso alesi apostolo Yohanes ƒo nu tso Ʋɔnudrɔ̃gbea ŋui, be: “Mekpɔ fiazikpui ɣi gã aɖe kple amesi bɔbɔ nɔ edzi, amesi ƒe ŋku me anyigba kple dziƒo si tso, eye womegakpɔ teƒe aɖeke na wo o. Eye mekpɔ ame kukuwo, ame tsitsiwo kple ɖeviwo, le tsitre ɖe fiazikpui la ŋgɔ, eye woʋu agbalẽwo; eye woʋu agbalẽ bubu aɖe, si nye agbegbalẽ; eye wodrɔ̃ ʋɔnu ame kukuawo ɖe nusiwo woŋlɔ ɖe agbalẽawo me le woƒe dɔwɔwɔwo ŋuti la nu.” Amekae nye Ʋɔnudrɔ̃la si ŋu woƒo nu tsoe le afisia?

Yehowa Mawue nye ameƒomea ƒe Ʋɔnudrɔ̃la gãtɔ. Gake etsɔ ʋɔnudɔdrɔ̃a de asi na ame aɖe. Le Dɔwɔwɔwo 17:31 la, apostolo Paulo gblɔ be Mawu “[ɖo] ŋkeke, si dzi wòle ʋɔnu drɔ̃ ge xexeame godoo le dzɔdzɔenyenye nu to ŋutsu aɖe, si woɖo la  dzi.” Ʋɔnudrɔ̃la ma si woɖo lae nye Yesu Kristo si wofɔ ɖe tsitre. (Yohanes 5:22) Gake ɣekaɣie Ʋɔnudrɔ̃gbea adze egɔme? Ɣeyiɣi didi kae wòaxɔ?

Nyaɖeɖefia ƒe agbalẽa ɖee fia be Ʋɔnudrɔ̃gbea adze egɔme le Harmagedon-ʋaa megbe, esime woatsrɔ̃ Satana ƒe nuɖoanyia le anyigba dzi. * (Nyaɖeɖefia 16:14, 16; 19:19–20:3) Le Harmagedon megbe la, woade Satana kple eƒe gbɔgbɔ vɔ̃wo aʋli me ƒe akpe ɖeka. Ɣemaɣi la, dziƒo hatidziɖula 144,000 la anye ʋɔnudrɔ̃lawo eye woaɖu “fia kple Kristo ƒe akpe ɖeka.” (Nyaɖeɖefia 14:1-3; 20:1-4; Romatɔwo 8:17) Menye nudzɔdzɔ kpata aɖe si adzɔ le gaƒoƒo 24 me koe Ʋɔnudrɔ̃gbea nye o. Axɔ ƒe akpe ɖeka.

Le ƒe akpe ɖeka ƒe ɣeyiɣi ma me la, Yesu Kristo “le ʋɔnu drɔ̃ ge ame gbagbewo kple ame kukuwo.” (Timoteo II, 4:1) ‘Ame gbagbeawoe’ nye “ameha gã” si atsi agbe le Harmagedon me. (Nyaɖeɖefia 7:9-17) Apostolo Yohanes kpɔ “ame kukuwo” hã “le tsitre ɖe fiazikpui la ŋgɔ.” Abe alesi Yesu do ŋugbee ene la, “amesiwo katã le yɔdowo me la, woase [Kristo ƒe] gbe” eye “woado go” to tsitretsitsi me. (Yohanes 5:28, 29; Dɔwɔwɔwo 24:15) Gake nuka dzie woanɔ te ɖo adrɔ̃ ʋɔnu amewo katã?

Le ŋutega si apostolo Yohanes kpɔ nu la, “woʋu agbalẽwo,” eye “wodrɔ̃ ʋɔnu ame kukuawo ɖe nusiwo woŋlɔ ɖe agbalẽawo me le woƒe dɔwɔwɔwo ŋuti la nu.” Nusiwo amewo wɔ va yi ŋuti nuŋlɔɖiwoe le agbalẽ siawo mea? Ao, womadrɔ̃ ʋɔnu amewo ɖe nusiwo wowɔ va yi hafi ku la nu o. Aleke míewɔ nya? Biblia gblɔ be: “Amesi ke ku la, wotso afia nɛ, ɖee tso nuvɔ̃ me.” (Romatɔwo 6:7) Esia fia be wote fli ɖe nuvɔ̃ siwo katã amesiwo wofɔ ɖe tsitre wɔ va yi la me. Eyata agbalẽawo anye kpɔɖeŋu na nudidi bubu siwo Mawu aɖo ɖi. Ne amesiwo tsi agbe le Harmagedon me kple amesiwo wofɔ ɖe tsitre siaa di be yewoanɔ agbe tegbee la, ke ele be woawɔ Mawu ƒe sededewo dzi, eye woawɔ ɖe nudidi yeye ɖesiaɖe si Yehowa aɖe fia le ƒe akpe ɖeka ƒe  ɣeyiɣia me hã dzi. Eyata nusi amesiame awɔ ɣemaɣi le Ʋɔnudrɔ̃gbea dzie woanɔ te ɖo adrɔ̃ ʋɔnui.

Ʋɔnudrɔ̃gbea ana mɔnukpɔkpɔ ame biliɔn geɖe be woasrɔ̃ nu tso Mawu ƒe lɔlɔ̃nu ŋu zi gbãtɔ ahawɔ ɖe edzi. Esia fia be nufiafiadɔ gã aɖe ayi edzi ɣemaɣi. Nyateƒee, “xexeametɔwo [asrɔ̃] dzɔdzɔenyenye.” (Yesaya 26:9) Gake menye amesiamee adi be yeawɔ Mawu ƒe lɔlɔ̃nu o. Yesaya 26:10 gblɔ be: ‘Ne wove ame vɔ̃ɖi nu la, masrɔ̃ dzɔdzɔenyenye o, ke boŋ awɔ nu vɔ̃ɖi le anyigba dzɔdzɔe dzi, eye malé ŋku ɖe Yehowa ƒe gãnyenye ŋu o.’ Woatsrɔ̃ ame vɔ̃ɖi siawo ɖikaa le Ʋɔnudrɔ̃gbea.—Yesaya 65:20.

Ne Ʋɔnudrɔ̃gbea wu enu la, amesiwo tsi agbe la ‘agbɔ agbe’ ŋutɔŋutɔ azu ame deblibowo. (Nyaɖeɖefia 20:5) Eyata Ʋɔnudrɔ̃gbea ana ameƒomea nagaɖo blibodede si me wònɔ le gɔmedzedzea me gbɔ ake. (Korintotɔwo I, 15:24-28) Azɔ woawɔ dodokpɔ mamlɛ aɖe. Woaɖe Satana tso aʋli me eye woaɖe mɔ nɛ be wòadze agbagba be yeable ameƒomea zi mamlɛtɔ. (Nyaɖeɖefia 20:3, 7-10) Amesiwo tsi tre ɖe eŋu la akpɔ Biblia ƒe ŋugbedodo sia me vava teƒe bliboe, be: “Ame dzɔdzɔewo anyi anyigba la dome, eye woanɔ edzi tegbee.” (Psalmo 37:29) Ẽ, yayrae Ʋɔnudrɔ̃gbea anye na ameƒomea me tɔ wɔnuteƒewo!