Dɔwɔwɔwo 21:1-40
21 Ke esi míedzo le wo gbɔ mlɔeba eye míeɖo tɔdziʋua la, míezɔ mɔ tẽe va Kos; le ŋufɔke la, míeva ɖo Rodo, eye tso afi ma míeyi Patara.
2 Esi míekpɔ tɔdziʋu aɖe si yina Foinike la, míeɖoe, eye míeho.
3 Esi míeɖo afi si míenɔ Kipro ƒukpoa kpɔm le adzɔge ɖaa la, míeɖee ɖe megbe le miame, eye míeyi Siria heva ɖi go ɖe Tiro, afi si tɔdziʋua yina eƒe agbawo ɖe ge ɖo.
4 Míedi nusrɔ̃lawo hekpɔ wo, eye míenɔ afi ma ŋkeke adre. Ke wogblɔ na Paulo enuenu to gbɔgbɔ la dzi be wòagaɖo afɔ Yerusalem o.+
5 Eya ta esi míaƒe ŋkekeawo de la, míedze mɔ, ke wo katã, nyɔnuwo kple ɖeviwo siaa, ɖo mí ɖa va se ɖe keke dua godo ke. Míedze klo ɖe ƒua ta do gbe ɖa,
6 eye míeklã mía nɔewo. Azɔ míeɖo tɔdziʋua, eye woawo hã wotrɔ yi woƒe aƒewo me.
7 Ale míewu ƒudzimɔzɔzɔ si gɔme míedze tso Tiro la nu, eye míeva ɖo Ptolemai, eye míeyi ɖado gbe na nɔviawo henɔ wo gbɔ ŋkeke ɖeka.
8 Le ŋufɔke la, míeva ɖo Kaisarea, eye míeyi ɖadze nyanyuigblɔla Filipo, si nye ame adreawo+ dometɔ ɖeka, ƒe aƒe me.
9 Vinyɔnu ene siwo nye ɖetugbui leaƒewo* le ŋutsu sia si, siwo gblɔa nya ɖi.+
10 Ke esi míenɔ afi ma ŋkeke geɖe la, nyagblɔɖila aɖe si ŋkɔe nye Agabo+ la tso Yudea va.
11 Eye wòva mía gbɔ hetsɔ Paulo ƒe alidziblanu bla eya ŋutɔ ƒe afɔwo kple asiwo hegblɔ be: “Ale gbɔgbɔ kɔkɔe la gblɔe nye esi, ‘Aleae Yudatɔwo abla ŋutsu si tɔ alidziblanu sia nye la le Yerusalem,+ eye woatsɔe ade asi na dukɔwo me tɔwo.’ ”+
12 Esi míese nya sia la, míawo kple ame siwo nɔ afi ma míeɖe kuku nɛ vevie be wòagayi Yerusalem o.
13 Ke Paulo ɖo eŋu be: “Nu kae nye esi wɔm miele le avi fam be miagblẽ tame si meɖo kplikpaa la me?* Migavɔ̃ o, mele klalo, menye be woablam ɖeɖe ko o, ke be maku le Yerusalem le Aƒetɔ Yesu ƒe ŋkɔ la ta hã.”+
14 Esi melɔ̃ be woaƒoe ɖe ye nu o ta la, míedzudzɔ fuɖeɖe nɛ* hegblɔ be: “Yehowa* ƒe lɔlɔ̃nu neva eme.”
15 Ke le ŋkeke siawo megbe la, míedzra ɖo na mɔa zɔzɔ, eye míedze mɔ ɖo ta Yerusalem.
16 Nusrɔ̃la aɖewo hã tso Kaisarea yi kpli mí, be woakplɔ mí ayi ame si ƒe aƒe me míadze la gbɔ, si ŋkɔe nye Mnason si tso Kipro, eye wònye nusrɔ̃la gbãtɔwo dometɔ ɖeka.
17 Esi míeɖo Yerusalem la, nɔviawo xɔ mí kple dzidzɔ.
18 Le ŋufɔke la, Paulo zɔ kpli mí yi Yakobo+ gbɔ, eye hamemetsitsiawo katã hã nɔ afi ma.
19 Eye wòdo gbe na wo hede asi nu siwo Mawu wɔ le dukɔwo dome to eƒe subɔsubɔdɔa dzi la ŋuti nyawo gbɔgblɔ me na wo tsitotsito.
20 Esi wose esia la, wokafu Mawu, gake wogblɔ nɛ be: “Nɔvi, èkpɔe be xɔsetɔ akpe geɖe le Yudatɔwo dome, eye wo katã woku ɖe Se la ŋu goŋgoŋ.+
21 Ke wose le ŋutiwò be, èle nu fiam Yudatɔ siwo le dukɔwo dome la be woagbe nu le Mose ƒe se la gbɔ, eye nèle gbɔgblɔm na wo be, woagatso aʋa na wo viwo alo azɔ le kɔawo nu o.+
22 Ke nu kae míawɔ le nya sia ŋu? Woasee godoo be èva.
23 Eya ta wɔ nu sia, si míagblɔ na wò: Ŋutsu ene le mía dome, siwo ɖe adzɔgbe aɖe.
24 Kplɔ ame siawo ne wò kpli wo miayi aɖakɔ mia ɖokuiwo ŋu le kɔa nu, eye nàxe woƒe nugblẽfewo, ne woalũ ta na wo. Ekema ame sia ame anyae be nya siwo wogblɔ na wo tso ŋuwò la dometɔ aɖeke mele eme o, ke boŋ be èle zɔzɔm ɖe ɖoɖo la nu, eye be èléa Se la hã me ɖe asi.+
25 Ke le xɔsetɔ siwo le dukɔwo me gome la, míeŋlɔ nyametsotso si míewɔ heɖoe ɖe wo be, woate wo ɖokuiwo ɖa tso nu siwo wotsɔ sa vɔ na trɔ̃wo,+ kple ʋu+ kple lã tsiʋumewo*+ kpakple gbɔdɔdɔ manɔsenu*+ ŋu.”
26 Ale esi ŋu ke la, Paulo kplɔ ŋutsuawo kpe ɖe eɖokui ŋu, eye eya kpli wo wokɔ wo ɖokuiwo ŋu le kɔa nu,+ eye wòyi gbedoxɔa me, be yeana woanya ŋkeke siwo ŋutikɔkɔ le kɔa nu axɔ, ne woana vɔsanu ɖe wo dometɔ ɖe sia ɖe ta.
27 Ke esi wòsusɔ vie ŋkeke adreawo nawu enu la, Yudatɔ siwo tso Asia la kpɔe le gbedoxɔa me, eye wode zi ameha blibo la me, eye wolée
28 hele ɣli dom be: “Israel ŋutsuwo, mixɔ na mí loo! Ŋutsu si le nu fiam ame sia ame le afi sia afi be woatsi tre ɖe míaƒe dukɔ la kple míaƒe Se la kpakple teƒe sia ŋu lae nye esia. Gawu la, ekplɔ Helatɔwo gɔ̃ hã va gbedoxɔa me heƒo ɖi teƒe kɔkɔe sia.”+
29 Elabena wokpɔ eya kple Trofimo,+ Efesotɔ la, le dua me va yi, eye wosusu be Paulo kplɔe va gbedoxɔa me.
30 Eye du blibo la katã tɔ zi, eye amewo ƒu du va lé Paulo hee do goe le gbedoxɔa me, eye wotu ʋɔtruawo enumake.
31 Esi wole agbagba dzem be yewoawui la, nya la ɖo asrafoha la ƒe amegã gbɔ be, Yerusalem dua tɔ zi;
32 eye enumake wòkplɔ asrafowo kple asrafomegãwo, eye woƒu du yi wo gbɔ. Esi wokpɔ aʋafiagã la kple asrafoawo la, wodzudzɔ Paulo ƒoƒo.
33 Eye aʋafiagã la te ɖe wo ŋu, eye wòlée heɖe gbe be woatsɔ kɔsɔkɔsɔ eve ablae;+ eye wòbia ame si wònye kple nu si wòwɔ.
34 Gake ameha la me tɔ aɖewo te ɣlidodo be ale, bubuwo hã be ale. Esi mete ŋu nya nu si koŋ dzɔ o le zitɔtɔa ta la, eɖe gbe be woakplɔe ava asrafowo nɔƒe la.
35 Ke esi wòɖo atrakpuiawo dzi la, nɔnɔmea va bia be asrafoawo nakɔe, le esi ameha la nɔ nyanyram adãtɔe ta,
36 elabena ameha la me tɔ gbogboawo kplɔ wo ɖo le ɣli dom be: “Miwui!”
37 Esi wòsusɔ vie woakplɔ Paulo aɖo asrafowo nɔƒea la, egblɔ na aʋafiagã la be: “Mɔɖeɖe li be magblɔ nya aɖe na wòa?” Ebiae be: “Èse Helagbea?
38 Ke menye wòe nye Egiptetɔ ma si de zitɔtɔ amewo me ɣeaɖeɣi, ame si kplɔ hlɔ̃dola akpe ene yi gbedzi la oa?”
39 Eye Paulo ɖo eŋu be: “Le nyateƒe me la, Yudatɔe+ menye tso Tarso+ le Kilikia; du xɔŋkɔ aɖe mee metso. Eya ta meɖe kuku na wò, ɖe mɔ nam maƒo nu na ameawo.”
40 Esi wòɖe mɔ na Paulo la, etsi tsitre ɖe atrakpuiawo dzi, eye wòwɔ asi na ameawo. Esi ɖoɖoe zi toŋtoŋ la, eƒo nu na wo le Hebrigbe+ me be:
Etenuŋɔŋlɔ
^ Womeɖe srɔ̃ o.
^ Alo, “be miagbã dzi nam.”
^ Egɔmeɖeɖe tẽe, “míezi ɖoɖoe.”
^ Kpɔ Megbenyawo A5.
^ Alo, “lã si wowu evɔ womeɖuɖu ʋu le lãme nɛ o.”
^ Helagbe, pornia. Kpɔ Nya Tɔxɛwo Gɔmeɖeƒea.
