Yeremiya 7:1-34
7 Yehowa ƒe gbe si va na Yeremiyae nye esi:
2 “Tsi tre ɖe Yehowa ƒe aƒe ƒe agbo la me, eye nàɖe gbeƒã nya sia le afi ma be, ‘Mi Yudatɔ siwo katã gena ɖe agbo siawo me be miade ta agu na Yehowa, mise Yehowa ƒe nya.
3 Ale aʋakɔwo ƒe Yehowa, Israel ƒe Mawu la, gblɔe nye esi: “Miɖɔ miaƒe zɔzɔme kple miaƒe nuwɔnawo ɖo, ekema mana mianɔ teƒe sia.+
4 Migaɖo dzi ɖe alakpanyawo ŋu anɔ gbɔgblɔm be, “Yehowa ƒe gbedoxɔ, Yehowa ƒe gbedoxɔ, Yehowa ƒe gbedoxɔe nye esia!’* o.+
5 Elabena ne mieɖɔ miaƒe zɔzɔme kple miaƒe nuwɔnawo ɖo vavã; ne miedrɔ̃ nya le ame kple ehavi dome ɖe eteƒe;+
6 ne miete amedzro, tsyɔ̃evi alo ahosi ɖe anyi o;+ ne miekɔ ʋu maɖifɔ ɖe anyi le teƒe sia o; eye miedze mawu bubuwo yome hena miaƒe gbegblẽ o la;+
7 ekema mana mianɔ teƒe sia, le anyigba si metsɔ na mia tɔgbuiwo la dzi ɖaa tegbee.”’”*
8 “Ke miele dzi ɖom ɖe alakpanyawo ŋu,+ gake womaɖe vi aɖeke kura o.
9 Miele fi fim,+ le ame wum, le ahasi wɔm, le alakpatam kam,+ le vɔwo sam* na Baal+ hedze mawu bubu siwo mienya o yome tso,
10 hafi va tsia tsitre ɖe ŋkunyeme le aƒe sia si ŋu woyɔa nye ŋkɔ ɖo la me nɔa gbɔgblɔm be, ‘Woaxɔ na mí godoo,’ evɔ miele ŋunyɔnu siawo katã wɔmaa?
11 Ðe aƒe sia si ŋu woyɔa nye ŋkɔ ɖo la zu adzodalawo ƒe do le mia ŋkumea?+ Kpɔ ɖa, nye ŋutɔ mekpɔe,” Yehowa ye gblɔe.
12 “‘Ke azɔ miyi nɔnyeƒe si nɔ Silo,+ afi si mena nye ŋkɔ nɔ tsã,+ ne miakpɔ nu si mewɔe le nye dukɔ Israel ƒe nu vɔ̃ɖi wɔwɔ ta ɖa.’+
13 Yehowa be, ‘Miewɔa nu siawo katã, togbɔ be meƒo nu na mi zi geɖe,* gake mieɖo to o,+ eye meyɔa mi, gake mietɔna o.+
14 Eya ta mawɔ aƒe sia si ŋu nye ŋkɔ le,+ si ŋu miele dzi ɖom ɖo,+ kple teƒe sia si metsɔ na mia kple mia tɔgbuiwo la, abe ale si tututu mewɔ Silo ene.+
15 Matsɔ mi aƒu gbe le nye ŋkuta, abe ale si ko metsɔ mia nɔvi siwo katã nye Efrayim ƒe dzidzimeviwo ƒu gbee ene.’+
16 “Ke wò la, mègado gbe ɖa ɖe dukɔ sia ta o. Mègaƒo koko alo ado gbe ɖa alo aɖe kuku hã nam ɖe wo ta o,+ elabena nyemasee na wò o.+
17 Ðe mèle nu siwo wɔm wole le Yuda duwo me kple Yerusalem ƒe ablɔwo dzi la kpɔm oa?
18 Viwo le nake fɔm, fofowo le dzo dom, nyɔnuwo le amɔwɔ blum, ne woamè vɔsabolo na Dziƒofianyɔnu*+ la, eye woƒoa aha ɖi na mawu bubuwo, be woatsɔ ado dziku nam.+
19 Yehowa be, ‘Nyee wole nu vevi wɔmee* loo? Alo menye woawo ŋutɔwo boŋue le nu vevi wɔm wo ɖokui hena woƒe ŋukpe oa?’+
20 Eya ta ale Aƒetɔ Dziɖulagã Yehowa gblɔe nye esi, ‘Kpɔ ɖa! Matrɔ nye dziku kple nye dɔmedzoe helĩhelĩ akɔ ɖe teƒe sia dzi,+ ɖe amegbetɔwo, aƒemelãwo, gbemetiwo kple anyigbadzikutsetsewo dzi; abi nu, eye womatsii o.’+
21 “Ale aʋakɔwo ƒe Yehowa, Israel ƒe Mawu la, gblɔe nye esi, ‘Mitsɔ miaƒe numevɔsa kpe ɖe miaƒe vɔsa bubuwo ŋu, eye miawo ŋutɔwo miɖu lã la.+
22 Elabena gbe si gbe mekplɔ mia tɔgbuiwo tso Egipte-nyigba dzi la, nyemeƒo nu kpli wo alo de se na wo be woasa numevɔ nam alo asa vɔ bubuwo nam o.+
23 Ke boŋ nya siae metsɔ de se na wo be: “Miɖo to nye gbe, ekema manye miaƒe Mawu, eye miawo mianye nye dukɔ;+ mizɔ mɔ siwo ƒe se mede na mi la katã dzi, ne eme nanyo na mi.”’+
24 Ke wogbe esese, eye womeƒu to anyi o;+ ke boŋ wozɔ le woawo ŋutɔwo ƒe ɖoɖowo* nu, le woƒe dzimesesẽ vɔ̃ɖi la nu,+ ale be wotrɔ yi megbe, menye ŋgɔ o
25 tso gbe si gbe mia tɔgbuiwo dzo le Egipte-nyigba dzi va se ɖe egbe sia.+ Eya ta meɖoa nye subɔla nyagblɔɖilawo katã ɖe mi, gbe sia gbe tso ŋkeke yi ŋkeke.*+
26 Ke wogbe toɖoɖom, eye womeƒu to anyi o.+ Ke boŋ wosẽ dzi me,* eye woƒe nuwɔna vɔ̃ɖi wu wo tɔgbuiwo tɔ!
27 “Àgblɔ nya siawo katã na wo,+ gake womaɖo to wò o; àyɔ wo, gake womatɔ na wò o.
28 Gblɔ na wo be, ‘Esiae nye dukɔ si mesea Yehowa woƒe Mawu ƒe gbe o, eye meɖoa to amehehe o. Nyateƒetoto nu yi, eye womegasenɛ le wo nu o.’*+
29 “Lũ wò ɖa si nègblẽ ɖi* la nàtsɔ aƒu gbe, eye nàdzi konyifaha le togbɛ ƒeƒlewo tame, elabena Yehowa gbe dzidzime sia eye wòagblẽ dzidzime sia si do dziku nɛ la ɖi.
30 Yehowa be, ‘Elabena Yuda viwo wɔ nu si nye vɔ̃ le ŋkunyeme. Woli woƒe legba nyɔŋuwo ɖe aƒe si ŋu woyɔa nye ŋkɔ ɖo la me, ne woagblẽ kɔ ɖo nɛ.+
31 Wowɔ nuxeƒewo ɖe Tofet le Hinom Vi Ƒe Bali*+ la me, ne woatɔ dzo wo viŋutsuwo kple wo vinyɔnuwo,+ nu si nyemeɖo na wo o, eye meva dzi me* nam kpɔ gɔ̃ hã o.’+
32 “‘Eya ta kpɔ ɖa, ŋkekewo li gbɔna,’ Yehowa ye gblɔe, ‘esime womagayɔe be Tofet alo Hinom Vi Ƒe Bali* o, ke boŋ Amewubali. Elabena woaɖi ame ɖe Tofet va se ɖe esime teƒe aɖeke maganɔ anyi o.+
33 Dukɔ sia ƒe kukuawo azu nuɖuɖu na dziƒoxewo kple anyigbadzilãwo, eye ame aɖeke mado vɔvɔ̃ na wo anya wo ɖa o.+
34 Mana aseyetsotso kple dzidzɔɣli, ŋugbetɔsrɔ̃ ƒe gbe kple ŋugbetɔ ƒe gbe+ nu natso le Yuda duwo me kple Yerusalem ƒe ablɔwo dzi; elabena anyigba la azu gbegbe.’”+
Etenuŋɔŋlɔ
^ Egɔmeɖeɖe tẽe, “esiawo,” gbedoxɔa kple eŋutixɔ vovovoawo katãe wowɔnɛ.
^ Alo, “tso mavɔ me yi mavɔ me.”
^ Alo, “dzudzɔ dom.”
^ Egɔmeɖeɖe tẽe, “mefɔna ŋdi kanya heƒoa nu na mi.”
^ Enye mawunɔ aɖe si Israel gbexɔse la subɔ; ɖewohĩ vidzidzi ƒe mawunɔe.
^ Alo, “dziku dom na.”
^ Alo, “adaŋudedewo.”
^ Egɔmeɖeɖe tẽe, “mefɔna ŋdi kanya dɔa wo.”
^ Egɔmeɖeɖe tẽe, “wolia kɔ.”
^ Egɔmeɖeɖe tẽe, “wòtsò le wo nu.”
^ Alo, “Lũ wò ɖa si nètsɔ ɖe adzɔgbe.”
^ Kpɔ Nya Tɔxɛwo Gɔmeɖeƒea, “Gehena.”
^ Alo, “susu me.”
^ Kpɔ Nya Tɔxɛwo Gɔmeɖeƒea, “Gehena.”
