Yesaya 21:1-17
21 Nya ɖe gbegbe si le ƒuta la ŋu:*+
Egbɔna abe ahom si tu tso anyiehe ene,Tso gbegbe, tso anyigba dziŋɔ aɖe dzi.+
2 Woɖe ŋutega dziŋɔ aɖe fiam:
Ametatrɔla le ame ta trɔm,Eye nugblẽla le nu gblẽm.
Elam, ho yi! Media, ɖe to ɖee!+
Matsi hũɖeɖe siwo katã wòhe vɛ la nu.+
3 Eya ta metɔtɔ vevie.*+
Mele veve semAbe nyɔnu funɔ si le ku lém ene.
Metɔtɔ ale gbegbe be nyemegale nu sem o;Dzidzi ƒom ale gbegbe be nyemegale nu kpɔm o.
4 Nye dzi ʋuʋu; ŋɔdzi na nye lãme le ƒoƒom kpakpakpa.
Fiẽ si mekpɔa mɔ na vevie la zu ŋɔdzi nam.
5 Miɖo kplɔ̃, miɖo zikpuiawo!
Miɖu nu miano nu!+
Mi amegãwo, mitso, misi ami na akpoxɔnu!
6 Elabena ale Yehowa gblɔ nam ye nye esi:
“Yi nàɖo gbetakpɔla, ne nàna wòagblɔ nu si wòkpɔ.”
7 Ekpɔ aʋatasiaɖam si hem sɔ eve le,Aʋatasiaɖam si hem tedziwo le,Aʋatasiaɖam si hem kposɔwo le.
Eɖo ŋku anyi heƒu to anyi vevie.
8 Eye wòɖe gbe abe dzata ene be:
“Oo Yehowa, metɔ ɖe gbetakpɔxɔ la dzi ɖaa le ŋkeke me,Eye mele nye dzɔƒe zã sia zã.+
9 Kpɔ nu si gbɔna ɖa:
Ŋutsuwo le aʋatasiaɖam si hem sɔ eve le la me!”+
Eye wòdo ɣli gblɔ be:
“Emu loo! Babilon mu!+
Egbã eƒe mawuwo ƒe legbawo katã ƒu anyi!”+
10 Oo, nye ame siwo woƒo,Nye nuku tso nye nukuƒoƒe,*+Megblɔ nya si mese tso aʋakɔwo ƒe Yehowa, Israel ƒe Mawu gbɔ la na mi.
11 Nya ɖe Duma* ŋu:
Ame aɖe do ɣli le yɔyem tso Seir be:+
“Dzɔla, zã va yi vɔa?
Dzɔla, zã va yi vɔa?”
12 Dzɔla la ɖo eŋu be:
“Ŋu le keke ge, eye zã agado.
Ne miedi be yewoabia la, mibia.
Migava faa!”
13 Nya ɖe tagba ŋu:
Oo, mi Dedan mɔzɔhawo,+Miatsi ave me adɔ le tagba.
14 Mitsɔ tsi yi ɖakpe tsikɔwuitɔ.Oo, Tema-nyigba dzi tɔwo,+Mitsɔ nuɖuɖu yi ɖakpe ame si le sisim.
15 Elabena yi nue wosi le, yi si woɖe le aku me,Dati si me wovu, kple aʋa la ƒe nyanyra nue wosi le.
16 Elabena ale Yehowa gblɔ nam ye nye esi: “Le ƒe ɖeka me tututu, abe apadɔwɔla ƒe ƒe ene* la, Kedar ƒe ŋutikɔkɔe+ la katã nu ayi.
17 Kedar ƒe aʋawɔla, aŋutrɔdala susɔeawo, azu ʋɛ, elabena Yehowa, Israel ƒe Mawu, ye gblɔe.”
Etenuŋɔŋlɔ
^ Ðewohĩ efia nuto si me blema Babilon nɔ tsã.
^ Egɔmeɖeɖe tẽe, “ali tsom.”
^ Egɔmeɖeɖe tẽe, “Nye nukuƒoƒevi.”
^ Egɔmee nye, “Ðoɖoezizi.”
^ Alo, “abe ale si apadɔwɔla bua ƒee ene.”
