Yesaya 4:1-6
4 Gbe ma gbe la, nyɔnu adre alé ŋutsu ɖeka+ agblɔ be:
“Míaɖu míawo ŋutɔ míaƒe abolo,Eye míado míawo ŋutɔwo míaƒe awuwo;Na woayɔ wò ŋkɔ ɖe mía ŋu ko,Ne nàɖe míaƒe ŋukpe ɖa.”*+
2 Gbe ma gbe la, nu si Yehowa na wòmie la anye atsyɔ̃ kple ŋutikɔkɔe, eye anyigba la dzi kutsetse anye adegbeƒonu kple atsyɔ̃ na Israel ƒe ame siwo tsi agbe.+
3 Woayɔ ame siwo kpɔtɔ ɖe Zion kple ame siwo wogblẽ ɖe Yerusalem, ame sia ame si ƒe ŋkɔ woŋlɔ ɖi be wòanɔ agbe le Yerusalem la, be kɔkɔe.+
4 Ne Yehowa tsɔ ʋɔnudɔdrɔ̃ ƒe gbɔgbɔ kple dzobibi ƒe gbɔgbɔ+ klɔ Zion vinyɔnuwo ƒe ɖiƒoƒo* ɖa,+ eye wòklɔ ʋu si Yerusalem kɔ ɖi la ɖa le eme la,
5 ekema Yehowa aɖo alilikpo kple dzudzɔ ɖe Zion To la katã kple eƒe takpeƒe la dzi le ŋkeke me, eye wòaɖo dzobibi keklẽ ɖa le zã me;+ agbadɔ anɔ eƒe ŋutikɔkɔe nɔƒe blibo la katã tame.
6 Eye agbadɔ anɔ anyi anye vɔvɔli le ŋkeke me le ŋdɔkutsu nu,+ eye wòanye sitsoƒe kple bebeƒe tso ahom kple tsidzadza nu.+
