Esi David ɖo ŋu ɖe Yehowa ŋu ta, eɖu Goliat dzi. (1Sa 17:45) Yehowa di be yeazã yeƒe ŋusẽ atsɔ akpe ɖe ye subɔlawo katã ŋu. (2Kr 16:9) Aleke míaɖee fia be míeɖoa ŋu ɖe Yehowa ŋu, ke menye ɖe míaƒe ŋutetewo kple nuteƒekpɔkpɔwo ŋu o? Mɔ etɔ̃ aɖewoe nye esi:

• Do gbe ɖa edziedzi. Menye ne èda vo koe nàdo gbe ɖa abia tsɔtsɔke o, do gbe ɖa hã be Yehowa nado ŋusẽ wò nànɔ te ɖe tetekpɔwo nu. (Mt 6:12, 13) Menye ne ètso nya me le nane ŋu vɔ koe nàdo gbe ɖa be Yehowa nayra ɖe edzi o, do gbe ɖa nàbiae nunya kple mɔfiame hafi nàtso nyaa me.—Yak 1:5

• Wɔ ɖoɖo ɖe Biblia xexlẽ kple esɔsrɔ̃ ŋu. Xlẽ Biblia gbe sia gbe. (Ps 1:2) De ŋugble le kpɔɖeŋu siwo le Biblia me ŋu, eye nàwɔ ɖe nu siwo nèsrɔ̃ tso wo mea dzi. (Yak 1:23-25) Dzra ɖo ɖe gbeadzisubɔsubɔdɔa ŋu; mègaɖo ŋu ɖe nuteƒekpɔkpɔ siwo su asiwòa ŋu o. Be hame ƒe kpekpewo naɖe vi na wò bliboea, srɔ̃ nu siwo míavae srɔ̃a do ŋgɔ

• Wɔ nu aduadu kple Yehowa ƒe habɔbɔa. Nɔ ŋudzɔ ɖe mɔfiame yeye siwo habɔbɔa na ŋu eye nàwɔ wo dzi enumake. (4Mo 9:17) Ðo to hamemetsitsiawo ne wona mɔfiamewo alo ɖo aɖaŋu na wò.—Heb 13:17

MIKPƆ VIDEO SI NYE SUSU AÐEKE MELI SI TA MÍAVƆ̃ NA YOMETITI O, EYOME MIAÐO BIABIA SIAWO ŊU:

• Nu kawoe na nɔviawo vɔ̃ ŋutɔ?

• Nu kawoe kpe ɖe wo ŋu be womegavɔ̃ azɔ o?