Afɔku Siwo Le Femaxeeʋu Ðoɖo Me

ETSO NYƆ! ƑE NUŊLƆLA SI LE AUSTRALIA GBƆ

Le dzomeŋɔli ŋkeke aɖe si xexeme xɔ dzo ŋutɔ dzi le ƒe 1990 me la, Paul Onions si nye Britaintɔ si xɔ ƒe 24 kpla eƒe mɔzɔkplo nɔ afɔ zɔm le Hume Ʋumɔdodo dzi, le anyiehe Sydney, Australia, be ʋukula aɖe nana ye lift alo akɔ ye femaxee. Dzi dzɔ Paul esi ame aɖe si medze sii o tɔ ʋu be yeatsɔe femaxee. Mesusui kura be ʋua ɖoɖo ava de yeƒe agbe afɔku me kloe o. *

PAUL si menya be yeɖo afɔku me o la nɔ ŋgɔgbezikpuia dzi nɔ dze ɖom kple ʋukula la. Le aɖabaƒoƒo ʋɛ aɖewo megbe la, ʋukula sia si dze abe dɔmenyotɔ ene va do dziku eye wònɔ nya hem kplii. Emegbe ʋukulaa tɔ ʋua ɖe mɔa to zi ɖeka be yedi be yeatsɔ kasɛt aɖewo si dzi wolé ha ɖo le zikpuia gɔme. Gake tu boŋue wòɖe do goe, ke menye kasɛt o—eye wòɖoe Paul ƒe akɔta.

Paul gbe wɔwɔ ɖe ʋukulaa ƒe gbeɖeɖe be wòanɔ zikpuia dzi kpoo dzi, eɖe eƒe zikpuiŋuka la ɖa enumake hedo le ʋua me, de afɔ du me le mɔdodoa dzi sesĩe alesi wòate ŋui. Ʋukulaa kplɔe ɖo kple afɔ, le ʋu bubuwo ƒe ŋkume gaglãa. Ete ŋu tui mlɔeba eye wòlé eƒe awudede hee xlã ɖe anyi. Paul ʋli do le esi hesi du dze ŋgɔ ʋu aɖe si gbɔna, si wɔe be vɔvɔ̃ ɖo ʋukulaa si nye vidada aɖe kple viawo wòtɔ. Paul ɖe kuku nɛ vevie eye vidadaa na wòge ɖe ʋua me, eye wòku ʋua sesĩe nɔ mɔdodoa me tsom gɔdɔgɔdɔ dzoe. Emegbe kura hafi wova nya be amewula koŋue amesia si kplɔ Paul ɖo nye, ewu mɔzɔla femaxeeʋudila adre sɔŋ, wo dometɔ aɖewo nɔ zɔzɔm eveveve.

Nukae na amesiawo wuwu dzro amewula la? Esi wonɔ ʋɔnu drɔ̃m amewula sia la, ʋɔnudrɔ̃laa gblɔ be: “Amesiwo wòwu la dometɔ ɖesiaɖe nye sɔhɛ. Woxɔ tso ƒe 19 va ɖo 22. Wo katã nɔ mɔ zɔm le  teƒe si didi tso aƒe gbɔ, si fia be etsɔe be ne nane dzɔ ɖe wo dzi gɔ̃ hã la, womatsi dzi ɖe wo ŋu enumake o.”

Ablɔɖe be Woaɖi Tsa Faa

Tsaɖiɖi tso dukɔ me yi dukɔ me va le bɔbɔe na ame geɖe egbea wu alesi wònɔ ƒe ʋɛ aɖewo ko va yi. Le kpɔɖeŋu me, le ƒe atɔ̃ me la, Australiatɔ siwo ɖi tsa yi Asia ƒe xexlẽme dzi ɖe edzi wu zi gbɔ zi eve. Esi ƒewuiviwo kple ɖekakpui kpakple ɖetugbi siwo ƒe xexlẽme le dzidzim ɖe edzi di be nuteƒekpɔkpɔ nasu yewo si alo yewoate mɔzɔzɔ sesẽ akpɔ ta la, woɖoa yameʋuwo yia teƒe siwo gbɔ metsɔ o. Mɔzɔla siawo dometɔ geɖe ɖonɛ be yewoana ʋu natsɔ yewo le mɔ dzi femaxee atsɔ aɖe yewoƒe gazazãwo dzi akpɔtɔe. Nublanuitɔe le xexeame ƒe akpa geɖe la, ʋu ƒe amekɔkɔlemɔdzi femaxee meganye nusi ŋu wodoa vivi ɖo o eye meganye mɔzɔmɔnu si le dedie abe alesi wònɔ tsã ene o—eɖanye le ʋuɖolaawo loo alo le ametsɔlawo gome o.

Womate ŋu atsɔ kakaɖeameɖokuidzi kple mɔzɔzɔ ƒe amedzodzro vevie aɖɔ li ŋuɖɔɖɔɖo kple susuŋudɔwɔwɔ gbeɖe o. Agbalẽvi aɖe si woŋlɔ na ƒome siwo le wo vi siwo bu dim gblɔ be: “Zi geɖe la, didi vevie be woazɔ mɔ wɔnɛ be sɔhɛwo medzrana ɖo nyuie hafi zɔa mɔa o eye womebua afɔkuwo alo woƒe agbanɔamedziwo ŋu nyuie o.”

Agbalẽvia gblɔ kpee be: “Amesiwo zɔa mɔ kple ƒuƒoƒo si wɔa ɖoɖo ɖe tsaɖiɖi ŋu, asitsalawo, alo amesiwo yina ɖe teƒe siwo ŋu wowɔ ɖoɖo nyui ɖo la mete ŋu buna bɔbɔe o. Eɖanye le Australia alo dukɔ bubu me o, edze abe amesiwo kplaa akplo zɔa afɔ eye wovea nu le ga ŋu le mɔzɔzɔ me dometɔ akpa gãtɔe va nyea bubulawo mlɔeba ene.”

Eɖanye ʋu ƒe amekɔkɔlemɔdzi femaxee mɔzɔzɔ ye alo menye eyae o, mɔzɔzɔ teƒe siwo woato ƒe ɖoɖo aɖeke manɔamesii—togbɔ be asɔe na ame aɖewo siwo medi be wòanye kplamatsedonu na yewo o hã—ate ŋu ade ame afɔku me bɔbɔe wu. Ne ƒometɔwo kple xɔlɔ̃wo menya afisi tututu mɔzɔlaa le o la, womate ŋu ana kpekpeɖeŋu ne nya aɖe dzɔ kpata o. Le kpɔɖeŋu me, aleke wòanɔ ne mɔzɔla aɖe va do ɖe kɔdzi le ɖime eye eƒe aƒemetɔ aɖeke menya afisi wòle o?

Nana be Kadodo Nanɔ Anyi

Britaintɔ nyadzɔdzɔŋlɔla Richard Shears ŋlɔ nu tso femaxeeʋudila adre “siwo dzudzɔ nuƒoƒo kple woƒe ƒometɔwo kple wo xɔlɔ̃wo le vome” ŋu ɖe eƒe agbalẽ si nye Highway to Nowhere me. Nyateƒee, gbã ƒometɔwo mate ŋu anya ne ɖe woƒe ƒometɔawo bu loo alo be ɖeko wodzudzɔ kaƒoƒo na yewo o. Esia awɔe be ne womele mɔzɔlaawo ƒe ŋkɔ sem o la, woahe ɖe megbe le nyanyanana dziɖuɖumegãwo me.

Edzɔna ɖe mɔa zɔlawo dometɔ ɖeka dzi enuenu be etsoa eƒe dzeɖoɖo kple edzilawo dzi ne ga suewo vɔ le esi. Esia na edzilawo xlɔ̃ nu ƒomewo be woadi telefongbalẽvi na wo viwo alo woato mɔ aɖe dzi ana woaƒo ka na aƒeme. Togbɔ be ɖewohĩ esia makpɔ ɖetugbi sia ƒe agbe ta o hã la, zi geɖe la, dzeɖoɖo kple ƒometɔwo edziedzi ate ŋu awɔe be mɔzɔlaa naƒo asa na kuxi suesuewo alo ne mede ɖeke o la, wòanya alesi wòanɔ te ɖe wo nui.

Anɔ eme be ame adre mawo siwo tsɔ akplo kpla ko dze mɔ siwo wowu la anya xlẽ mɔzɔgbalẽ siwo yɔ Australia be enye dukɔ siwo me femaxeeʋudilawo ate ŋu anɔ dedie le wu dometɔ ɖeka. Gake le afisia hã la, edze ƒã be ŋuɖoɖo ɖe femaxeeʋu ŋu nye nusi me susu mele o—eɖanye evevevee wozɔe loo alo eɖanye le dukɔ siwo me “le dedie wu kekeake” mee o. Edea ame dzi ne wobu nuwo ŋu le alesi wole tututu nu—ƒo asa na afɔkuwo be nàgbɔ va ɖo aƒe dedie le dzidzɔ me.

[Etenuŋɔŋlɔ]

[Nɔnɔmetata si le axa 25]

Dzilawo ate ŋu aƒo asa na dzitsitsi dzodzro ne wodi telefongbalẽvi na wo viwo alo kpe ɖe wo ŋu to mɔ bubu aɖe dzi be woaƒo ka na aƒeme