Aleke Wowɔna Dea “Amewuwu ƒe Numamezuzu” ƒe Dzi Ƒo?

“Kilometa akpe nanewoe tso ɖevi sitsoƒedila siwo ƒe seselelãme ŋu wode abii siwo le Kosovo, kpakple Amerika ɖevi siwo ŋu wowɔ ŋutasesẽnu kple nu veame bubuwo ɖo la dome, gake woƒe seselelãmewo ya dome madidi nenema o.”—Marc Kaufman, The Washington Post.

Míelɔ̃ alo míelɔ̃ o, ku kpɔa ŋusẽ ɖe mí katã mía dzi le mɔ aɖe nu. Esia nye nyateƒe metsɔ le eme afisi míele o—eɖanye dukɔ si me ʋunyaʋunyawɔwɔ vɔ̃ɖiwo le alo esi me nuwo li ke le vie mee o.

MÍATE ŋu akpɔ “amewuwu ƒe numamezuzu” le blanuiléle, nuxaxa, atikevɔ̃ɖizazã, nuwɔna siwo gblẽa nu le ameɖokui ŋu, ameɖokuiwuwu, kple ame gbogbowo wuwu si bɔ egbea la me. Nufialagã Michael Kearl, si le Hadomeŋutinunya kple Amegbetɔŋutinunya Ŋutinusrɔ̃ƒe, le Triniti Yunivɛsiti le San Antonio, Texas, U.S.A., ɖe nu me ku ɖe alesi wotrɔ asi le amewuwu ŋui la ŋuti be: “Le nukpɔsusu si le mía si le ƒe alafa blavelia ƒe nuwuwu [ƒe 1999] nu la, . . . wova le ku bum be enye ŋusẽdonu si dzi agbe, lãmekɔkɔ ɖe nu ŋu, kple hadomenuwɔnawo nɔ te ɖo. Ku ye doa ŋusẽ míaƒe mawusubɔsubɔ, xexemenunya, dunyahehe me nukpɔsusuwo, agbalẽsɔsrɔ̃, kple atikewɔmɔnuwo. Enaa nyadzɔdzɔgbalẽwo kple nugblẽfexedɔwɔƒewo wɔa ga, eyae ɖea ami ɖe television dzi wɔnawo, eye . . . wòdoa ŋusẽ míaƒe mɔɖaŋudɔwɔƒewo gɔ̃ hã.” Mina míalé ŋku ɖe alesi nudzɔdzɔ sia si woyɔna be amewuwu ƒe numamezuzu dzena le míaƒe ɣeyiɣiawo mee ƒe kpɔɖeŋu aɖewo ŋu.

 Aʋawɔnuwo Dzadzra

“Amewuwu ƒe numamezuzu” sia dzena gbesiagbe le aʋawɔnuwo dzadzra me. Asrafowoe woɖo be woatsɔ aʋawɔnuwo awui, gake dukɔmevi dzrowo koŋ ye wotsɔa wo wunae, eye nyɔnu kple ɖevi maɖifɔwo nɔa wo me. Le aʋawɔwɔ me, eɖanye dukɔmeviʋawo loo alo aʋa kae o, agbe megaɖia naneke o. Ho nenie tukpe si amewula zãna xɔna?

Alesi amewo ƒe asi te ŋu sua amewunuwo dzi bɔbɔe le dukɔ aɖewo me wɔe be ame ɖekaɖekawo kple amehawo wuwu le dzidzim ɖe edzi ŋɔdzitɔe ɣesiaɣi. Le afɔku si me woda tu amewo le le kɔledzi le Littleton, Colorado, megbe la, amewo ƒo nu tsi tre ɖe alesi wodzraa amewunuwo faa kple alesi ɖeviwo ƒe asi te ŋu sua wo dzi bɔbɔe la ŋu. Ðevi siwo kuna anyrawɔleameŋuku le United States ƒe xexlẽme yi dzi ŋutɔ—Newsweek magazine gblɔ be woade 40 kwasiɖa ɖesiaɖe le mama dedie nu. Le xexlẽme sia me la, wo dometɔ 90 le alafa me kloe nye amesiwo woda tui. Esia sɔ kple amesiwo wowuna le nudzɔdzɔwo abe esi dzɔ le Littleton ene la ƒe teƒe 150 ƒe sia ƒe!

Modzakaɖemɔnuwo

Sinimawo zãa amewuwu tsɔ wɔa gae. Le kpɔɖeŋu me, sinima me wɔna ate ŋu aɖe nuvlowɔwɔ, atikevɔ̃ɖisitsatsa, alo hamenɔnɔ awɔ nu vlo afia wòanya kpɔ, si awɔe be woabu agbe kple agbenyuinɔnɔ ŋuti gɔmeɖosewo nu tsɛwoe. Sinima aɖewo li siwo me wona ku dzena nudzeameŋu gɔ̃ hã—woɖea amewo fiana wonɔa agbe le ku megbe eye wo dometɔ aɖewo va srãa agbagbeawo kpɔna—eye nusi ko wòwɔnae nye be ena wobua ku nu tsɛe.

Nenema ke wòle le television dzi wɔna kple hadzidzi aɖewo hã me. Wogblɔ be ɖevi siwo wu amewo le Littleton la kpɔa ŋudzedze ɖe ha sesẽ dzila aɖe si va xɔ ŋkɔ le “amesiwo nye ŋutsu ganye nyɔnu ƒe nuwɔna, kple satanasubɔsubɔ ƒe nɔnɔme” siwo wòɖena fiana, kple ha siwo ƒe “tanya me aglãdzedze kple ku dzena le” me la ŋu vevie.

Le United States la, wogbugbɔ trɔ asi le se si kplɔa amesiwo ate ŋu akpɔ sinima aɖewo ŋu be wòakpɔ ɖeviwo ta be woagakpɔ nusiwo agblẽ nu le wo ŋu o. Gake mete ŋu ɖe vi aɖeke o. Jonathan Alter, ŋlɔ nu tso eŋu le Newsweek me be nusia “ate ŋu ana ɖeviwo nadi be yewoanya nu tso gbegblẽnuwo ŋu wu.” Egblɔ kpee be ne woado ŋukpe fefewɔlawo ahazi wo dzi be woaɖiɖi ŋutasẽnuwɔna siwo nɔa nyatakakamɔnuwo me la, ahiã be Dukplɔla Clinton “nana woanya adzɔha gã mawo katã (kple woƒe amegãwo),” siwo menye ɖeko woɖea hɛtɔamewo kple ‘aglãdzehawo’ le woƒe sinimawo me ko evɔ o ke wowɔa kɔmpiuta dzi fefe siwo ɖea mɔ na ɖeviwo be “‘woawu ame’ abe alesi wowua ame ‘ŋutɔŋutɔ’ ene.”

Amewuwu le Video dzi Fefewo me Kple le Internet Dzi

Robert Waring ƒo nu tso alesi amewuhoʋlifefewo va bɔ ɖe sɔhɛwo domee ŋu ɖe eƒe agbalẽ si nye The Deathmatch Manifesto me. * Aƒetɔ Waring xɔe se be ame gbogbo aɖe kpɔa gome le fefe siawo me le adzame. Menye nusɔsrɔ̃ aɖekee le fefe siawo me o, ke boŋ amewuwu ye wofiana. Waring gblɔ be: “Fefe kple ame gbagbe si nye futɔ si tso xexeame ƒe akpa ɖesiaɖe ahadze agbagba be yeaɖu edzi nye nuwɔna si kpɔa ŋusẽ ɖe ame dzi ŋutɔ. Anɔ bɔbɔe ŋutɔ be nu ma wɔwɔ naxɔ susu me na ame.” Nuwɔna siwo woɖena fiana abe alesi nuawo le dzɔdzɔm ŋutɔŋutɔ ene siwo me ʋukɔkɔɖihoʋiʋliawo yia edzi le va kpɔa ŋusẽ ɖe sɔhɛwo dzi ale be asiɖeɖe le eŋu va zua dɔ na wo. Amesiwo mate ŋu akpɔ gome le wo me le Internet dzi o la dometɔ aɖewo ƒlea video kasɛt siwo dzi fefe mawo le hewɔnɛ le television dzi le aƒeme. Eva zu numame na ame bubuwo be woayi dutoƒo fefewɔƒewo ava haya mɔ̃ siwo wotsɔ wɔa video dzi fefe siawoe eye wowɔa avu kple futɔ bubuwo vaseɖe ku me abe ‘nudzɔdzɔ ŋutɔŋutɔ’ ene.

Togbɔ be woma “amewuhoʋlifefeawo” ɖe hatsotsowo me le ƒe si ezãlawo xɔ nu hã la, nyateƒeae nye be womete ŋu le edzi wɔm koŋ o. Eddie si xɔ ƒe 14, si tso United States gblɔ be: “Zi geɖe woagblɔ na wò be mètsi o, gake womatɔ te wò be nàgaƒle [fefewɔnuawo] o.”  Ðeka aɖe si me wodaa tu amewo le anyratɔe ye dzɔa dzi nɛ. Togbɔ be edzilawo nya nu tso eŋu eye medze wo ŋu o hã la, ƒã hafi woléa ŋku ɖe eŋu akpɔ be ele gome kpɔm le fefea me hã. Ƒewuivi aɖe ƒo nya ta ale: “Míaƒe dzidzimeae mesea veve ɖe ŋutasesẽnuwo nu o wu dzidzime ɖesiaɖe. Televisionwo va le ɖeviwo hem fifia geɖe wu dzilawo, eye television kpɔa ŋutasesẽ ƒe dzodzro siwo nɔa ɖeviwo me la gbɔ.” John Leland ŋlɔ ɖe Newsweek me be: “Esi wònye ƒewuivi siwo ade miliɔn 11 sɔŋ te ŋu zãa Internet fifia [le United States] ta la, nusiwo dzilawo mate ŋu anya o va le ŋusẽ kpɔm ɖe ƒewuivi siwo ƒe xexlẽme le dzidzim ɖe edzi la dzi.”

Agbenɔnɔ Siwo Hea Amewuwu Vɛ

Ke agbe siwo amewo nɔna le “amewuhoʋlifefe” kple sinima siwo me woɖea ŋutasesẽnuwɔnawo le kpɔkpɔ vɔ megbe ya ɖe? Togbɔ be le agbenɔnɔ ŋutɔŋutɔ me mehiã be míanɔ kame tem vaseɖe ku me kple nuwɔwɔ klitsu siwo menye amegbetɔwo o hã la, ame geɖe nɔa agbe si gblẽa nu le woawo ŋutɔ ŋu. Le kpɔɖeŋu me, le ƒomewo ƒe nyagbename, lãmesẽ dɔwɔƒewo, kple dɔwɔƒe bubu siwo xlɔ̃a nu le afɔku siwo le atamanono kple atikevɔ̃ɖizazã me megbe la, nusiawo kpɔtɔ le dzidzim ɖe edzi. Zi geɖe la, wona wokua kukpo. Be woadzi viɖe manɔsenuwo ɖe edzi ta la, adzɔha gãwo kple atikevɔ̃ɖisitsalawo yia edzi zãa amewo ƒe dzimaɖitsitsi, mɔkpɔkpɔbuɖeame, kple gbɔgbɔmenɔnɔme wɔnublanui si me wole tsɔ dzranɛ na wo.

Amekae Le Megbe na Nusiawo Katã?

Ðe Biblia ƒo nu tso ku ŋu be enye nusi sɔ be woatsɔ aɖe modzakaea? Ðe wòsɔ be woanɔ agbe le mɔ si ate ŋu awu mí nua? Ao. Le Kristotɔ vavãwo gome, abe apostolo Paulo ene la, ku menye naneke tsɔ wu “futɔ” o. (Korintotɔwo I, 15:26) Kristotɔwo mebua ku be enye nu  nyui kple dzidzɔdonu o, ke boŋ be enye nane si mele dzɔdzɔme nu o, enye nuvɔ̃ kple aglãdzedze ɖe Mawu ŋu me tsonu tẽ. (Romatɔwo 5:12; 6:23) Ku menɔ Mawu ƒe gɔmedzetameɖoɖo na amegbetɔ me gbeɖe o.

Wogblɔ be Satana sie “ku ƒe ŋusẽ le.” Woyɔnɛ be “amewula,” menye le esi wònye eyae wua amewo tẽ ta kokoko o, ke boŋ le esi wòwua wo to amebeble, amewo nu beble be woawɔ nuvɔ̃, alesi wònɔa megbe na nuwɔna siwo hea ame dea gbegblẽ kple ku me, kple alesi wòtsɔa amewunuwɔnawo dea ŋutsuwo, nyɔnuwo, kple ɖeviwo gɔ̃ hã ƒe susu me tae. (Hebritɔwo 2:14, 15; Yohanes 8:44; Korintotɔwo II, 11:3; Yakobo 4:1, 2) Gake nukatae wònye sɔhɛwo koŋue wòtɔ ŋkui? Nukae míate ŋu awɔ atsɔ akpe ɖe wo ŋu?

[Etenuŋɔŋlɔ]

[Nɔnɔmetata si le axa 7]

“Míaƒe dzidzimeae mesea veve ɖe ŋutasesẽnuwo nu o wu dzidzime ɖesiaɖe”