Míaƒe Xexeme Wɔnukua—Ðe Wòdzɔ le Vomea?

AME aɖewo gblɔna be: ‘Ẽ, ɖeko míaƒe xexeame va dzɔ le vome.’ Ame bubuwo, vevietɔ mawudzixɔselawo, melɔ̃na ɖe edzi o. Ame bubuwo hã menya alesi tututu nyaa le o. Nukae nye wò dzixɔse?

Aleke kee nye wò nukpɔsusu o, àlɔ̃ ɖe edzi ɖikekemanɔmee be nu wɔnukue míaƒe xexeame nye. De ŋugble le ɣletivihatsotsowo ŋu kpɔ. Wobu akɔnta be woade biliɔn 100 le xexeame ƒe afisiwo ŋku te ŋu kpɔna la me. Ɣletivi siwo ƒe xexlẽme gogo biliɔn ɖeka vaseɖe esiwo wu triliɔn ɖeka ye le hatsotso ɖesiaɖe me.

Ɣletivihatsotso akpa gãtɔ ƒo ƒu ɖekae zu ɣletivihatsotso ƒokpliwo, ɖewo le ʋɛ eye bubuwo de akpe nanewo. Le kpɔɖeŋu me, woɖɔ ɣletivihatsotso si te ɖe mía ŋu, si nye Andromeda be enye míaƒe Masa Ɣletivihatsotsoa ƒe evelia. Nuheŋusẽe lé ɣletivihatsotso nyadri eve siawo ɖe wo nɔewo ŋu. Ɣletivihatsotso sue bubu siwo te ɖe wo ŋu wɔ ɖeka kple wo wozu ɣletivihatsotso ƒokpliwo.

Ɣletivihatsotso ƒokpli gbogbo aɖee le xexeame. Nuheŋusẽ léa ɣletivihatsotso ƒokpli aɖewo ɖe wo nɔewo ŋu, wozua hatsotso ƒokpli nyadriwo. Gake tso dometsotso ma dzi la, nuheŋusẽ megate ŋu léa wo ɖekae o. Dzɔdzɔmeŋutinunyalawo de dzesii be ɣletivihatsotso ƒokpli nyadriwo le tetem ɖa tso wo nɔewo gbɔ. Ne míagblɔe bubui la, xexeame le kekem ɖe edzi. Nu wɔnuku sia si ŋu woke ɖo la ɖee fia be anɔ eme be gɔmedzedze aɖe nɔ anyi esime xexeame nɔ sue wu eye nuwo te ɖe wo nɔewo ŋu wu. Zi geɖe wogblɔna be wówo gã aɖe mee xexeame to va dzɔ.

Dzɔdzɔmeŋutinunyala aɖewo kea ɖi vevie nenye be amegbetɔwo ate ŋu ava nya alesi xexeame wɔ va dzɔ. Bubuwo susua nya gblɔna le alesi míaƒe xexeame ate ŋu ava dzɔ esi menye nunyala aɖee wɔe o ŋu. Magazine si nye Scientific American, dzro nyati si nye “Aleke Xexeame Wɔ Va Dzɔ?” me le January 1999 ƒe tata me. Wokpɔ kpɔtsɔtsɔwo le dzɔdzɔmeŋutinunyalawo ƒe nufiafia aɖewo ŋu xoxo. Magazinea gblɔ be: “Nublanuitɔe la, asesẽ ŋutɔ . . . be ɣletiviŋununyalawo nado nukpɔsusu siawo dometɔ aɖe akpɔ.”

Nukpɔsusu si nye be ɖe xexeame va dzɔ le vome la bia be míaxɔ nusi dzɔdzɔmeŋutinunyalawo ɖɔna be wonye “dzɔgbenyuifɔkuwo” alo “nudogoɖenunuwo” dzi  ase. Le kpɔɖeŋu me, atɔm suetɔwo kekeake—siwo nye hydrogen (haidrodzin) kple helium (hiliɔm)—bɔ ɖe xexeame. Gake menye haidrodzin koe hiã hena agbenɔnɔ o, ke boŋ atɔm deŋgɔ gbogbo bubuwo hã hiã, vevietɔ karbon kple ɔksidzin. Tsã la, dzɔdzɔmeŋutinunyalawo bua tame le afisi atɔm vevi siawo tso ŋu.

Nudogoɖenunu koe wònye be wowɔa atɔm deŋgɔ siwo hiã be wòalé agbe ɖe te la le ɣletivi klitsu aɖewo mea? Eye nudogoɖenunu koe wònye be ɣletivi klitsu siawo dometɔ aɖewo wóna, eye atɔm xɔasi siwo mebɔ o la dona le wo mea? Aƒetɔ Fred Hoyle, si nɔ eme hafi woke ɖe nusiawo ŋu la gblɔ be: “Nyemexɔe se be dzɔdzɔmeŋutinunyala aɖeke si lé ŋku ɖe kpeɖodziawo ŋu ado kpo nyataƒoƒo be ɖe woɖo koŋ ɖo se siwo kplɔa nuklia ŋuti dzɔdzɔmeŋusẽwo o.”

Ke azɔ, mina míalé ŋku ɖe gɔmedzenu si me woto wɔ míaƒe xexeame la ŋu geɖe wu.

[Aɖaka/Nɔnɔmetata si le axa 4]

KEKEÐENU ƑE NUFIAFIA LA

Dzɔdzɔmeŋutinunyala aɖewo xɔe se be woate ŋu aɖe alesi xexeame ƒe nɔnɔme aɖewo wɔ va dzɔ nunyala aɖeke ƒe asi manɔmee, abe alesi tututu wòkekena ɖe enui ene la me. Wozãa nufiafia si woyɔna be kekeɖenu tsɔ ɖea emee. Gake kekeɖenu nufiafia la meƒo nu tso afisi nuawo dzɔ tso ŋu o. Ebia be woaxɔe se be nane nɔ anyi do ŋgɔ si me míaƒe xexeame to va dzɔ le vome.

Le kekeɖenu nufiafiaa me la, wogblɔ be xexeame nɔ sue wu atɔm eye wòva lolo zi ɖeka wu míaƒe ɣletivihatsotsoa le sɛkɛnd ɖeka me. Wogblɔ be tso ema dzi la, xexeame yi edzi nɔ kekem ɖe enu vivivi, ɖe ɖoɖo nu. Egbea, wobua xexeame ƒe akpa si wokpɔna be enye xexeme si lolo wu kura si womekpɔna o ƒe kakɛ sue aɖe ko. Kekeɖenu nufialawo gblɔna be nudogoɖenunu koe wònye be xexeme si wokpɔna la dzena le ɖoɖo tɔxɛ nu le afisiafi. Wogblɔ be anɔ eme be eƒe akpa si lolo wu si womekpɔna o la to vovo kura, alo nuwo tɔtɔ le afima. Ɣletiviŋutinunyala Geoffrey Burbidge gblɔ be “womate ŋu alé ŋku ɖe nuwo ŋu atsɔ aɖo kpe kekeɖenu ƒe nufiafiaa dzi gbeɖe o.” Le nyateƒe me la, kekeɖenu ƒe nufiafiaa mewɔ ɖeka kple ŋkuléle ɖe nu ŋu atsɔ aɖo kpe nuwo dzi ƒe mɔnu yeye si woto vɛ o. Wova kpɔe fifia be ne ɖe nufiafiaa nye nyateƒe la, anye ne abia be ŋusẽ si tsi tre ɖe nuheŋusẽ ŋu, si meli o, nanɔ anyi. Howard Georgi, si nye dzɔdzɔmeŋutinunyala le Harvard Yunivɛsiti gblɔ le kekeɖenu nufiafiaa ŋu be “enye dzɔdzɔmeŋutinunya me glitoto wɔnuku, si ne míagblɔe la, ɖeko wòsɔ kple nuwɔwɔ ŋuti glitoto ɖesiaɖe si mese kpɔ.”

[Nɔnɔmetata si le axa 3]

Nusianu kloe si le dzedzem le Hubble Didiƒekpɔmɔ̃ ƒe foto sia me nye ɣletivihatsotso

[Afi Si Míexɔ Mɔɖeɖe Tso]

Pages 3 and 4 (blurred): Robert Williams and the Hubble Deep Field Team (STScI) and NASA

[Nɔnɔmetata siwo le axa 4]

“Ðe woɖo koŋ ɖo se siwo kplɔa nuklia ŋuti dzɔdzɔmeŋusẽwo.”—Aƒetɔ Fred Hoyle, eɖee fia le ɣletiviwo ƒe wowó si woyɔ be 1987A me

[Afi Si Míexɔ Mɔɖeɖe Tso]

Dr. Christopher Burrows, ESA/STScI and NASA

Photo courtesy of N. C. Wickramasinghe