Etsɔme Kae Li na Dugãwo?

“BE WOALÉ ŋku ɖe dugãwo ŋu fia be woade ŋugblẽ le míaƒe etsɔme ŋu.” Aleae Ismail Serageldin si le Xexeame Katã ƒe Gadzraɖoƒea gblɔ. Gake nusiwo teƒe míekpɔ xoxo fia be etsɔme nyui aɖeke meli o.

Enyo ŋutɔ be wole agbagba ɖesiaɖe dzem be agbenɔnɔ le dugãwo me la nanyo ɖe edzi. Nyitsɔ laa la, wogbugbɔ New York City ƒe akpa si nye Times Square si le Manhattan la dzra ɖo keŋkeŋ. Tsã wonya teƒe sia be enye afisi wowɔa amamaɖeɖenuwɔnawo, dzraa atikevɔ̃ɖiwo, hewɔa nu vlowo le ŋutɔ. Fifia fiase yeyewo kple fefewɔƒewoe xɔ eƒe ablɔwo dzi—si naa amedzro akpe geɖe yia afima. National Geographic magazine gblɔ be Naples, Italy, si nye “dugã dzeani aɖe si wotsɔna sɔna kple London kple Paris tsã la” hã gbã le Xexemeʋa II me. Naples va zu afisi wonya nyuie be nuvlowɔwɔ kple zitɔtɔ nɔ ŋutɔ. Gake esi wotia dugã sia be woawɔ dunyahelawo ƒe takpekpe aɖe le afima le ƒe 1994 me la, míagblɔ be wogbugbɔe gatso hegbugbɔ asi trɔ le dua ƒe akpa si amewo nɔna wu ŋu.

Le nyateƒe me la, nana be dugãwo me nanɔ dedie eye wo me nadza la bia ga gbogbo. Zi geɖe la, be woakpɔ dedienɔnɔ gbɔ bia be woadzi kpovitɔwo ƒe agbɔsɔsɔ ɖe dzi. Nu bubu si wògblẽna hãe nye be ŋku nɔa amewo ŋu ɣesiaɣi. Televisionɖemɔ̃wo kple adzamekpovitɔwo nɔa ame hahoo nuto aɖewo me ɣesiaɣi. Ne èle zɔzɔm le tsaɖibɔ aɖe me eye nèle tsidzidziwo, kpetatawo, alo seƒoƒowo ŋu tom la, ɖewohĩ ànɔ dedienɔnɔgbɔkpɔmɔ̃wo ŋu tom le manyamanya me.

Ɣeaɖewoɣi hã, asitɔtrɔ siwo wowɔna la gblẽa nu le ame dahewo ŋu. De ŋugble le du xoxowo dzadzraɖo be amesiwo si nu le la nava nɔ eme la ŋu kpɔ. Ganyawo ƒe tɔtrɔ—“asiɖeɖe le nuwo wɔwɔ ŋu atrɔ ɖe wo dzadzraɖo ŋu, kple mɔ̃wo zazã ɖe amegbetɔwo teƒe”—ye na wogbugbɔa du xoxowo dzrana ɖo. (Gentrification of the City, si me Neil Smith kple Peter Williams to) Esi ɖokuisidɔwo wɔwɔ va le tsigãdzinu zum eye wole aɖaŋudɔwɔla bibiwo dim vevie ta la, aƒe siwo me kesinɔtɔwo anɔ la hã va hiãna geɖe wu. Le esi teƒe be amesiwo  woxea fetu gãwo na nanɔ dɔme yim le gbɔtoduwo me anɔ gbɔgbɔm la, wodina boŋ be yewoagbugbɔ aƒewo adzra ɖo le nuto siwo me ame dahewo nɔ tsã me.

Godoo la, esia dea nutoa dzi ŋutɔ. Gake ne nutoa le nyonyom ɖe edzi la, nuwo ƒe asi hã yia dzi. Zi geɖe la, ame dahewo va kpɔnɛ be yewomagate ŋu anɔ nuto siwo me yewonɔ hewɔ dɔ le ƒe geɖe la me o!

Dugã la ƒe Gbagbãea?

Ðewohĩ azɔ ye mɔ̃ɖaŋu yeyewo anya dze ŋusẽkpɔkpɔ ɖe dugãwo dzi. Esi wova le Internet zãm le nuƒeƒle kple asitsatsa me wu la, esia ate ŋu akpɔ ŋusẽ gã aɖe ɖe wo dzi. Mɔ̃ɖaŋu yeyewo wɔe be woɖe asitsadɔ aɖewo dzoe le dugãwo me xoxo—eye wokplɔ dɔwɔla geɖewo dzoe.

Esi nuƒeƒle kple dɔwɔwɔ le internet dzi va le nu vevi zum ta la, mɔzɔzɔ ayi asitsanuto siwo me amewo sɔ gbɔ ɖo me megadzroa amewo o. Agbalẽ si nye Cities in Civilization doe ɖa be: “Ðewohĩ míakpɔ dɔwɔla aɖewo, vevietɔ ɣeyiɣi aɖe ƒe dɔwɔlawo, woanɔ aƒeme alo nutome awɔ dɔ to kɔmpiutawo dzi, . . . si ana amewo ƒe agbɔsɔsɔ dzi naɖe akpɔtɔ.” Xɔtuɖaŋunyala Moshe Safdie hã susui nenema be: “Le nɔnɔme yeye sia me la, míakpɔ kɔƒedu miliɔn geɖe siwo kaka ɖe xexeame katã, si ana duvimenɔlawo nakpɔ dzidzeme si nɔa kɔƒeduwo me eye woato kɔmpiutawo dzi akpɔ gome le nusiwo yia edzi le dugã xɔŋkɔwo me hã me.”

Etsɔme Kae Li na Dugãwo?

Numekula geɖe xɔe se be togbɔ be mɔ̃ɖaŋununya le dzidzim ɖe edzi hã la, dɔ kple nu deamedzi le dugãwo me ayi edzi anɔ amewo hem va wo me. Etsɔme ka kee ɖali na dugãwo o, esiwo li egbea ɖo xaxa me fifia! Eye xɔ kple dzadzɛnyenye ƒe kuxi gã siwo le fu ɖem na dugãmenɔla dahe siwo le dzidzim ɖe edzi la gbɔ kpɔnu aɖeke meli o. Eye ame aɖeke mete ŋu le mɔ aɖe si dzi woato aɖe nuvlowɔwɔ, nutowo me ƒe gbegblẽ, alo ɖiƒoƒo ɖa le dugãwo me tom vɛ o.

Ame aɖewo agblɔ be ɖeko wòle be dziɖuɖuwo nazã ga geɖe ɖe woƒe dugãwo ŋu. Gake ne míede ŋugble le nusiwo dziɖuɖu geɖewo te ŋu wɔ le woƒe nuwo zazã me ŋu la, ɖe wòanya wɔ be woasusu be dugãwo ƒe kuxiwo gbɔ kpɔkpɔ le ko abe ga si woatsɔ akpɔ wo gbɔe la kpɔkpɔ enea? Ƒe bla nanewo enye si va yi la, agbalẽ si nye The Death and Life of Great American Cities gblɔ be: “Nusi susum wole enye be ne ɖe ga le mía si míazã la . . . , anye ne míeɖe nɔƒe madeamedziwo katã ɖa . . . Gake kpɔ nusi míetsɔ ga biliɔn gbogbo si míekpɔ va yi la wɔe ɖa: “Xɔ manyomanyo siwo va zua aglãdzelawo, nudomegblẽlawo, kple hadomegbenɔla siwo si mɔkpɔkpɔ aɖeke mele o la nɔƒe wu nɔƒe madeamedzi siwo teƒe míebe woava xɔ ɖo.” Nya siawo gakpɔtɔ nye nyateƒe egbea.

Ke ne menye gae nye egbɔkpɔnu o la, ke nukae? Ele be míaɖo ŋku edzi be amewoe nɔa  dugãwo me, ke menye xɔwo kple ablɔwo koe o. Eyata ne míebu nya bliboa ŋu kpɔ la, ne dugã me gbenɔnɔ anyo ɖe edzi la, amewo ƒe nɔnɔmee wòle be woatrɔ. Lewis Mumford gblɔ le agbalẽ si nye The City in History me be: “Nusi te ŋu nana dugã nɔa anyi eteƒe didinae nye emenɔlawo ƒe belélenanu kple nɔnɔme nyuiwo.” Ne woaɖe atikevɔ̃ɖizazã, gbolowɔwɔ, ɖiƒoƒo, nutowo me ƒe gbegblẽ, tamasɔmasɔ le hadomegbenɔnɔ me, nudomegbegblẽ, nuŋɔŋlɔɖegliŋu, kple bubuawo ɖa la, ebia nu geɖe wu kpovitɔwo dzidziɖedzi alo aŋɔ yeye sisi na xɔwo ko. Ele be woakpe ɖe amewo ŋu be woawɔ tɔtrɔ ɖedzesiwo le woƒe tamebubu kple agbenɔnɔ me.

Dɔdzikpɔlawo Tɔtrɔ

Edze ƒã be amegbetɔwo mate ŋu ahe tɔtrɔ gã sia vɛ o. Eyata agbagba siwo dzem wole be woakpɔ dugã siwo li egbea ƒe kuxiwo gbɔ madze edzi o—susu nyui kae ɖale wo ŋu o. Gake dzi meɖena le Biblia-nusrɔ̃viwo ƒo o elabena wokpɔa nɔnɔme sesẽ siwo me egbe dugãnutowo le la be enye míaƒe anyigba si dzi amegbetɔwo mete ŋu le kpɔkpɔm nyuie o la ƒe kpɔɖeŋu bubu. Egbe dugã siwo le kekem nyamanyama hetɔtɔ la ɖo kpe Biblia ƒe nya siwo le Yeremya 10:23 dzi be: “Amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” Amegbetɔ ƒe agbagbadzedze be wòaɖu eɖokui dzi la he nɔnɔme wɔnublanui siwo teƒe mekɔ o la vɛ—kuxi siwo dzena nyuie le míaƒe dugãwo me.

Ke hã Biblia ƒe ŋugbedodo si woŋlɔ ɖe Nyaɖeɖefia 11:18 ate ŋu anye akɔfafa na dugãmenɔla siwo le xexeame katã be Mawu ‘atsrɔ̃ amesiwo gblẽa anyigba la.’ Le esi teƒe be woabu nya sia afɔku nyae la, efia asi etsɔme nyui aɖe na ameƒomea. Efia be Mawu ato dziɖuɖu, alo Fiaɖuƒe, aɖe dzi axɔ míaƒe ɣletinyigba dzikpɔkpɔ dɔa awɔ. (Daniel 2:44) Magadzɔ be ame miliɔn gbogbowo nanɔ hiãkame si gbɔ eme me, aƒe nyui kple dzadzɛnyenye si hiã manɔmee, woaklo bubu le wo ŋu eye mɔkpɔkpɔ nabu ɖe wo o. Le Mawu ƒe dziɖuɖua te la, ŋutilãmenuwo, lãmesẽ nyui, kple aƒe nyuiwo anɔ amewo si.—Yesaya 33:24; 65:21-23.

Xexeme yeye sia koe nye dugã siwo li egbea ƒe kuxiwo gbɔ kpɔnu ŋutɔŋutɔ.

[Nɔnɔmetata siwo le axa 8]

Wole agbagba ɖesiaɖe dzem be agbenɔnɔ le dugãwo me nanyo ɖe edzi

Naples, Italy

New York City, U.S.A.

Sydney, Australia

[Afi Si Míexɔ Mɔɖeɖe Tso]

SuperStock

[Nɔnɔmetata si le axa 10]

Mawu ƒe xexeme yeyea akpɔ dugã siwo li egbea me nɔlawo ƒe kuxiwo gbɔ