Tsaɖiɖi Yi Afisi  Tsitsetse Dzeaniwo Le

ETSO NYƆ! ŊLƆLA SI LE ZAMBIA GBƆ

KAKA ƒe 1855 naɖo la, David Livingstone, si nye mawunyadɔgbedela kple anyigbayeyedila tso Scotland, zã ƒe geɖe tsɔ zɔ mɔ legbewo le Afrika—si nye anyigbagã si ŋuti xexeame menya nu boo aɖeke le o. Esime wòzɔ to Zambezi-tɔsisi gãa to ɖo ta ɣedzeƒe gome la, afimatɔwo tsɔ vɔvɔ̃ kple bubu ƒo nui tso tsitsetse gã si le ŋgɔ la ŋu. Le alesi eƒe hoowɔwɔ le ɖiɖimee hele dzudzɔ tumee ta la, afimatɔwo yɔe be Mosi-oa-Tunya, si gɔmee nye “Dzudzɔ si Le Gbe Ðem.”

Livingstone ɖoe be yeate ɖe tsitsetse, si woyɔna fifia be Victoria Tsitsetse, la ŋu akpɔe nyuie. Esime wònɔ nusi wòkpɔ gbã ɖɔm la, eŋlɔ bena: “Esi metsɔ vɔvɔ̃ wɔ blewu yi ɖaɖo eto la, melé ŋku ɖe ʋe gã si Zambezi-tɔsisia ɖe tso eƒe go ɖeka dzi yi kemɛ dzi la ŋu nyuie, hekpɔ be tɔsisi aɖe si ƒe kekeme nye meta akpe ɖekae le sisim tso kɔkɔƒe aɖe si ade meta 30 va le kɔkɔm ɖe afisi ƒe lolome anɔ meta wuiatɔ̃ va ɖo blaeve.”

Ne Victoria Tsitsetse, si le Zambia kple Zimbabwe ƒe liƒo dzi, ɖɔ la, wobunɛ be eyae nye tsitsetse si keke wu ɖesiaɖe le anyigba dzi! Le ɣeyiɣi mawo me la, tsi lita 545,000,000 sina tsoa kɔkɔƒe si nye meta 108 va kɔna ɖe ʋe gã aɖe me le miniti ɖesiaɖe me. Ekema Zambezi-tɔa katã sina toa agado globo gɔdɔgɔdɔe aɖe si nu mekeke de meta 65 o me. Anyigba kple tɔa siaa ƒe nɔnɔme tɔxɛ siawoe na Victoria Tsitsetse la nye nusi naa ame kea nu ɖe te nyateƒe.

Nuto siwo ƒo xlã tsitsetsea hã me nya kpɔ wu gbɔgblɔ. Esi wònye ɖe woɖoe ɖi be wòanye dukɔa ƒe modzakaɖebɔ ta la, ati kple numemie vovovo gbogbo aɖewo le afima, tsɔ kpe ɖe lã dodzidzɔnamewo—siwo dometɔ aɖewo nye tɔmenyiwo, atiglinyiwo, sɔvedawo, sẽwo, gbetedziwo, kple dzatawo gɔ̃ hã—ŋu. Xevi dzeaniwo abe hɔ̃wo kple aʋako siwo mebɔ o ene hã wɔa atɔwo ɖe agakpewo ƒe tsutsuẽƒewo.

Livingstone gblɔ be, “ame aɖeke mate ŋu atsɔ teƒea ƒe anidzedze asɔ kple naneke le England o. Europatɔ aɖeke mekpɔe kpɔ o; gake mawudɔlawo anya kpɔa nu dzeani siawo ne wodzo va yina.” Egbea, si anye ƒe 150 kloe tso esime Livingstone kpɔ teƒe sia zi gbãtɔ hetsɔ England Fianyɔnu Victoria ƒe ŋkɔ nɛ be Victoria Tsitsetse megbe la, ame akpe alafa geɖe tsoa xexeame ƒe akpa vovovowo va kpɔa eƒe anidzedze kple ŋku ƒe sia ƒe.

Enye nusi sɔ ŋutɔ be wobua Victoria Tsitsetse la be enye dzɔdzɔmenu wɔnuku siwo le xexeame la

 dometɔ ɖeka. Ke hã, Zambia ƒe tɔsisi gã gbogboawo dzi tsitsetse geɖe siwo ame geɖe menya o la hã nya kpɔna ale gbegbe. Taflatse mina míakpɔ wo dometɔ aɖewo ɖa.

Ngonye Tsitsetse

Le November ƒe ŋkeke xɔdzo aɖe si me tsi medza o dzi, si anye ƒe eve lɔƒo hafi Livingstone nakpɔ Victoria Tsitsetse la zi gbãtɔ la, eva ɖo Ngonye Tsitsetse, si woyɔna hã be Sioma Tsitsetse la gbɔ. Eŋlɔ bena: “Gbe dama siwo nya kpɔ ŋutɔ abe esiwo le afisiafi ene la xɔ ƒukpo siwo kɔ gbɔ tsitsetsea ŋu dzi. Esi menɔ agakpe siwo dzi tsitsetsea nɔ sisim tsoe dzi la, nusi mekpɔ la nya kpɔ ale gbegbe.” Amesiwo ɖia tsa ɖakpɔa Ngonye Tsitsetsea egbea la lɔ̃na ɖe Livingstone ƒe nyawo dzi enumake.

Livingstone gblɔ be: “Teƒe xaxɛ si anɔ meta alafa ɖeka koe tɔsisia ƒe akpa gãtɔ, si didi kilometa geɖe le anyime la, ƒe kekeme nye. Ne tsia si yina la, enɔa vi dam, eye wòɖenɛ fiana be tsi gbogbo aɖe le mimlim le wo nɔewo dzi dzem, ale gbegbe be asesẽ na tsiƒula si bi wu gɔ̃ hã be wòanɔ tsia ŋgɔ.”

Lumangwe Tsitsetse

Zambia ƒe tsitsetse bubuwo dometɔ geɖe sa ɖe aga eye womegblẽ wo o. Woƒe lolome le vovovo. Lumangwe Tsitsetse la le abe Victoria Tsitsetse sue ene. Gake menye tsitsetse vie wonye kura o. Tsitsetse siwo le afima la dometɔ ɖeka sina tsoa afisi kɔkɔ abe meta 30 ene eye wòkeke meta 100 kple edzivɔ. Afu si dona tsoa tsitsetsea me la léa anyigba xɔdzo dzi ve sue aɖe gɔ̃ hã ɖe te.

Kalambo Tsitsetse

Kalambo Tsitsetse, si nye tsitsetse kɔkɔtɔ kekeake le Zambia, sina tsoa kponyigba gã gbadza aɖe tame va kɔna ɖe Afrika ƒe Ɣedzeƒe Bali Gã la me. Esina tsoa teƒe aɖe si kɔkɔ wu meta 200 ɖakɔna ɖe agakpe tsutsuẽwo dzi tẽ, afisi damixe gã siwo mebɔ o la ƒoa vi ɖo le kuɖiɣiwo.

Agbalẽ si nye National Monuments of Zambia gblɔ be: “Esia na Kalambo va zu tsitsetse siwo kɔna tẽ tso teƒe kɔkɔ aɖe wu le Afrika ƒe evelia [le Tugela Tsitsetse si le South Africa megbe] eye wòxɔ nɔƒe wuievelia le xexeame—ekɔ wu Victoria Tsitsetse la zi gbɔ zi eve.”

Togbɔ be tsitsetse sia gbɔ yiyi sesẽ hã la, afima nuŋlɔla C. A. Quarmby ɖɔ Kalambo be enye “Afrika nu siwo kpɔkpɔ womeŋlɔna be o la dometɔ ɖeka.” Egblɔ ɖi be: “Adidi ŋutɔ hafi wòava zu afisi amesiame ate ŋu ade. . . . Ame ʋɛ aɖewo siwo ƒe ta nyo koe te ŋu dea Kalambo.”

Le nyateƒe me la, mɔ meyi Zambia ƒe tsitsetse kple dzɔdzɔmenu dzeani geɖe gbɔ o. National Monuments of Zambia gblɔ be “Land-rover koe woate ŋu atsɔ ato mɔ siwo womedo o la dzi hafi aɖo” wo dometɔ aɖewo “gbɔ eye afɔ koe woate ŋu azɔ ayi bubuwo ya gbɔ.” Le nyateƒe me la, ema hã naa teƒe siawo le etɔxɛ. Ke hã, amewo ate ŋu ava asrã teƒeawo kpɔ. Aƒetɔ Kagosi Mwamulowe, si nye anyigbaŋutinunyala le Zambia Dukɔa ƒe Dekɔnuwo Takpɔkpɔ ƒe Dɔwɔƒea, ɖe nu me be yewoƒe taɖodzinu enye be yewoana teƒe wɔnuku siawo kpɔkpɔ nado dzidzɔ na amewo eye le ɣeyiɣi ma ke me la, yewoakpɔ alesi tututu wole la ta.

Zambia ƒe Nu Xɔasitɔ Kekeake

Le agbalẽ si nye Zambia si Richard Vaughan ŋlɔ me la, ede dzesii be: “Zambia gakpɔtɔ nye anyigba si dzi dzɔdzɔmenu dzeani geɖewo le, evɔ amedzrowo kple Zambiatɔwo siaa menya wo dometɔ akpa gãtɔ o. . . . Tawo, tɔsisiwo, avewo kple to gã vovovowo le dukɔa me.” Gake nu bubue nye dukɔa ƒe nu xɔasitɔ kekeake.

Vaughan gblɔ be: “Wonya dukɔa me tɔwo ɖe woƒe vividoɖeameŋu kple nukomoɖoɖo kpakple alesi wotrɔna ɖe nɔnɔmewo ŋui ta.” Nuŋlɔla bubu, David Bristow, ya gblɔ be, “nu vevitɔ si le Zambia enye dukɔa me tɔwo, wodea dzo lãme na ame abe ŋdɔ si ʋuna le Afrika la ene.” Ne edzɔ be nèva xexea ƒe akpa dzeani sia gbeɖeka la, míeka ɖe edzi be alɔ̃ ɖe nya sia dzi.

 [Anyigbatata/Nɔnɔmetata si le axa 26]

(Edze nyuie le agbalẽa ŋutɔ me)

TANZANIA

DEMOCRATIC REPUBLIC OF CONGO

ANGOLA

ZAMBIA

KALAMBO TSITSETSE

LUMANGWE TSITSETSE

Lusaka

NGONYE TSITSETSE

VICTORIA TSITSETSE

ZIMBABWE

MOZAMBIQUE

INDIA-TSIAƑU

[Nɔnɔmetatawo]

Lumangwe Tsitsetse​——le abe Victoria Tsitsetse sue ene

Kalambo Tsitsetse​——eƒe kɔkɔme anye Victoria Tsitsetsea ƒe teƒe eve

Ngonye Tsitsetse​——“zi geɖe la, wò ɖeka koe anɔ teƒe bliboa”

[Afi Si Míexɔ Mɔɖeɖe Tso]

Lumangwe Tsitsetse kple Ngonye Tsitsetse: Marek Patzer/www.zambiatourism.com; anyigbatata: Mountain High Maps® Copyright © 1997 Digital Wisdom, Inc.

[Nɔnɔmetata si le axa 25]

Victoria Tsitsetse​—“Dzudzɔ si Le Gbe Ðem”

[Afi Si Míexɔ Mɔɖeɖe Tso

Marek Patzer/www.zambiatourism.com