Zã Wò Ga Nunyatɔe

ZI GEÐE la, amewo gblɔna be Biblia mee woɖe nya si nye, “Gae nye nu vɔ̃wo katã ƒe ke” la tso. Gake nu si Biblia gblɔ ŋutɔŋutɔ ye nye: ‘Nu vɔ̃wo katã ƒe ke enye galɔlɔ̃.’ (1 Timoteo 6:10, Biblia Alo Ŋɔŋlɔ Kɔkɔe La—Le Eʋegbe Me) Ame aɖewo va lɔ̃ ga ale gbegbe eye wotsɔa woƒe agbe katã ɖoa anyi na kesinɔnuwo nu ƒoƒo ƒu. Ame aɖewo va zu kluviwo na ga eye esia gblẽ nu le wo ŋu vevie. Gake ne wozã ga nyuie la, ate ŋu anye ŋudɔwɔnu nyui aɖe ŋutɔ. Biblia lɔ̃ ɖe edzi be “ga kpɔa kuxi geɖewo gbɔ.”—Nyagblɔla 10:19, Holy Bible—Easy-to-Read Version.

Togbɔ be Biblia menye gaŋutiɖoɖowɔgbalẽ o hã la, aɖaŋuɖoɖo siwo wɔa dɔ la le eme, siwo ate ŋu akpe ɖe ŋuwò nàzã wò ga nunyatɔe. Zi geɖe la, gazazã ŋuti aɖaŋuɖolawo kafua afɔɖeɖe atɔ̃ siwo gbɔna la na amewo, eye afɔɖeɖe siawo wɔ ɖeka kple gɔmeɖose siwo woŋlɔ ɖe Biblia me tso blema ke.

Dzra ga ɖo. Biblia me nuŋlɔɖiwo ɖee fia be wofia vevienyenye si le gadzadzraɖo ŋu la blema Israel viwo. Wogblɔ na wo be woadzra nu siwo wokpɔna ƒe sia ƒe la ƒe ewolia ɖo ɖi, si woava zã ɖe dukɔa ƒe ŋkeke nyui ɖuƒe yiyi koŋ ŋu. (5 Mose 14:22-27) Apostolo Paulo hã de dzi ƒo na Kristotɔ gbãtɔwo nenema ke be woadzra ga aɖe ɖo kwasiɖa sia kwasiɖa be woate ŋu akpɔ nane adzɔ atsɔ akpe ɖe haxɔsetɔ siwo hiã tu la ŋu. (1 Korintotɔwo 16:1, 2) Gaŋutiɖoɖowɔla geɖewo kafua gadzadzraɖo. Na gadzadzraɖo nanɔ vevie na wò. Ne ènya xɔ fetu ko la, tsɔ ga si nèɖo be yeadzra ɖo la yi ɖada ɖe gadzraɖoƒe alo afi si wòanɔ dedie le. Esia akpe ɖe ŋuwò be nàɖu didi ɖe sia ɖe si anɔ mewò be yeazãe la dzi.

Wɔ ɖoɖo ɖe gazazã ŋu. Esiae nye mɔ nyuitɔ ɖeka kolia si dzi nàto awɔ wò ga ŋu dɔ nyuie, ada asɔ, alo aɖe wò gazazã dzi kpɔtɔ. Gazazãŋutiɖoɖo nyui ana nànya nu siwo ŋu nèzãa wò ga ɖo, eye ate ŋu akpe ɖe ŋuwò nàɖo wò gazazã ŋuti taɖodzinuwo gbɔ. Nya ga ale si nu sua asiwò le ɣletia ƒe nuwuwu ƒe home, eye mègazã wu esi nèkpɔna o. Srɔ̃ ale si nàte ŋu ade vovototo nu siwo hiã wò ŋutɔŋutɔ kple nu siwo dzroa wò dome. Yesu de dzi ƒo na eƒe nyaselawo nunyatɔe le nya sia gome be ‘woabu akɔnta’ hafi adze dɔ aɖe wɔwɔ gɔme. (Luka 14:28) Biblia ɖo aɖaŋu na mí be míaƒo asa na fenyinyi madzemadzee.—Lododowo 22:7.

Wɔ ɖoɖo ɖe etsɔme ŋu. Bu wò etsɔmenuhiahiãwo ŋu nyuie. Le kpɔɖeŋu me, ne èɖoe be yeado ga atso aƒe la, gadodo tso gadzraɖoƒe si ƒe gadoname ƒe demexɔxɔ mayi dzi boo o gbɔ anye nyametsotso nyuitɔ. Nenema kee ƒome ƒe ta aɖe akpɔe be ehiã be yeawɔ nugblẽfexexe na ame ŋuti ɖoɖo ku ɖe ye kple yeƒe ƒomea ƒe agbe, lãmesẽ, kpakple afɔku ɖe sia ɖe si adzɔ ɖe yewo dzi ŋu, alo nugblẽfexeɖoɖo bubuwo. Ðoɖowɔwɔ ɖe wò etsɔmenuhiahiãwo ŋu ate ŋu alɔ ɖoɖowɔwɔ ɖe wò dzudzɔxɔxɔ le dɔ me ŋu hã ɖe eme. Lododowo 21:5 ɖo ŋku edzi na mí be “vevidola ƒe ɖoɖowo hea viɖe vanɛ.”—Agbenya La.

Srɔ̃ asinudɔ. Dzra ɖo ɖe wò etsɔme ŋu to asinudɔ alo aɖaŋudɔwo sɔsrɔ̃ me, kpakple to beléle na wò lãmesẽ le ŋutilã kple seselelãme gome me. Dzadzraɖo siawo ava ɖe vi na wò emegbe. Yi edzi  nànɔ nu yeyewo srɔ̃m le wò agbenɔɣi katã. Biblia dea asixɔxɔ gã aɖe ‘nunya vavã kple tamebubuŋutete’ ŋu, eye wòdea dzi ƒo na mí be míatu nɔnɔme siawo ɖo.—Lododowo 3:21, 22; Nyagblɔla 10:10.

Da sɔ. Da sɔ le gazazã me. Numekuku geɖe siwo wowɔ la ɖee fia be ame siwo lɔ̃a amewo wu ga la kpɔa dzidzɔ wu. Ame aɖewo ɖea mɔ ŋukeklẽ ɖea ke le wo te. Aleke wòdzɔnae? Ne wova le woƒe nuhiahiã veviwo gbɔ kpɔm na wo ɖokuiwo nyuie vɔ la, wova dea asi kesinɔnuwo yome titi me. Gake le nuɖuɖu, nudodo, kple dɔƒe ƒe amesisusu megbe la, nu agbɔsɔsɔme kae amegbetɔ gahiã? Mewɔ nuku o be Biblia ŋlɔla si ƒe nya míeyɔ le nyati sia ƒe gɔmedzedze la ŋlɔ hã be: “Esi nunyiame kple nudodo le mía si la, nu siawo adze mía ŋu.” (1 Timoteo 6:8) Ŋudzedzekpɔkpɔ ɖe nu si le mía si ŋu tutu ɖo ana míaƒo asa na galɔlɔ̃ kple kuxi siwo katã wòhena vae.

Nyateƒee, nu vɔ̃wo katã ƒe ke ye nye galɔlɔ̃. Ga ava ɖu aƒetɔ ɖe dziwò ne èɖe mɔ nɛ. Gake ne èzãa ga nyuie la, ga ate ŋu ana nàkpɔ vovo ate ŋu ati nu siwo le vevie wu le agbe me, abe ƒomedodo nyui me nɔnɔ kple ƒometɔwo, xɔlɔ̃wo, kpakple Mawu ene, yome. Ke hã, edze abe míate ŋu avo keŋkeŋ tso dzimaɖitsitsi ɖe ga ŋu me le xexe sia me o ene. Ðe ga akpɔtɔ anye dzimaɖitsitsitsoƒe na ame ɖaa? Mɔkpɔkpɔ kae li be ahedada nu ava yi gbe ɖeka? Nyati si kplɔ esia ɖo aɖo nya siawo ŋu.—g09 03-E.

[Nya si ɖe dzesi si le axa 23]

Nya ga ale si nu sua asiwò le ɣletia ƒe nuwuwu ƒe home, eye mègazã wu esi nèkpɔna o

[Nya si ɖe dzesi si le axa 23]

Srɔ̃ ale si nàte ŋu ade vovototo nu siwo hiã wò kple nu siwo dzroa wò dome

[Nya si ɖe dzesi si le axa 24]

Le nuɖuɖu, nudodo, kple dɔƒe ƒe amesisusu megbe la, nu agbɔsɔsɔme kae amegbetɔ gahiã?

 [Aɖaka/Nɔnɔmetata si le axa 25]

FIA VIWÒWO ALE SI WOAZÃ GAE

Ale si gamazamazã nyuie na ame tsitsi geɖewo le fu kpem egbea ta la, gaŋutiɖaŋuɖolawo le dzi dem ƒo na dzilawo be woafia wo viwo ale si woazã gae—eye woadze egɔme kaba. Bia ɖevi geɖe be afi kae ga tsona hã kpɔ, eye ɖewohĩ woaɖo eŋu be, “Papa” alo “gadzraɖoƒe.” Ne àte ŋu afia asixɔxɔ si le ga ŋu viwòwo—ale si woate ŋu ade vovototo nuhiãme kple nudzroame dome, ale si woadzra ga ɖo, kple ale si woade ga nane si ahe viɖe vɛ na wo me—la, ekema, àkpe ɖe wo ŋu woaƒo asa na fuɖename siwo fenyinyi kple gakuxiwo hena vanɛ. Eŋutiɖaŋuɖoɖo ʋɛ aɖewoe nye esiwo gbɔna.

1. Nye kpɔɖeŋu nyui. Zi geɖe la, viwòwo asrɔ̃ wò nuwɔna wu nya si nègblɔna.

2. Ðo seɖoƒe na wò gazazã. Mia kple viwòwo midzro ga ale si nu mia dometɔ ɖe sia ɖe azã me. Srɔ̃ ale si nàgblɔ be ao ne ehiã, eye nàte afɔ to.

3. Ðe mɔ na wo woatso nya me le ale si woazã woƒe gae ŋu. Ne woxɔa gakpekpeɖeŋu aɖe alo wɔa dɔ xɔa fetu la, fia afɔɖoƒe aɖewo wo. Emegbe ɖe mɔ na wo woawo ŋutɔwo nawɔ nyametsotso aɖewo.

4. Fia wo ale si woana nu ame. De dzi ƒo na viwòwo be woasrɔ̃ ale si woana nu siwo le wo si la ƒe ɖe ame bubuwo eye le ɣeyiɣi ma ke me la, woanɔ nane dzram ɖo edziedzi atsɔ ade bubu Mawu ŋu.