Dzɔdzɔmeŋutinunyalawo ƒe ƒuƒoƒo aɖe xɔe se be anyigba si ʋuʋu le ƒe 2011 me le Lorca si le Spain ƒe anyiehe la anya tso amegbetɔwo ƒe nuwɔnawo gbɔ. Ame asieke ye tsi anyigbaʋuʋu ma me eye ame geɖewo xɔ abi. Anyigbaŋutinunyalawo va kpɔe be ale si wohea tsi gbogbo aɖewo tsoa to me le nuto ma me tsɔ dea nukuwoe la wɔ akpa aɖe le anyigbaʋuʋu gblẽnu ma me.

Modzakaɖetsaɖila siwo tso China zã Amerika dɔlar miliɔn akpe 102 ɖe dutamɔzɔzɔ ŋu le ƒe 2012 me. Le Dukɔ Ƒoƒuawo Ƒe Xexea Me Ƒe Tsaɖilawo Ƒe Habɔbɔ ƒe nya nu la, esiae nye zi gbãtɔ China xɔ nɔƒe gbãtɔ le gazazã ɖe dutatsaɖiɖi ŋu ta, eye Germany kple United States kplɔe ɖo. Dukɔ eve siawo dometɔ ɖe sia ɖe ya zã Amerika dɔlar miliɔn akpe 84 ko ɖe dutatsaɖiɖi ŋu.

Le numekuku aɖe si wowɔ heta ɖe Britaintɔwo ƒe nyadzɔdzɔgbalẽ aɖe (BMJ) me nu la, wolé ŋku ɖe ame siwo ade 68,000 ŋu le Japan hena ƒe 23 le mama dedie nu. Numekulawo kpɔe be nyɔnu siwo wodzi le ƒe 1920 va ɖo ƒe 1945 me siwo te atamanono hafi xɔ ƒe 20 la kuna ƒe ewo do ŋgɔ na nyɔnu siwo menoe kpɔ o; eye woƒe ŋutsuwo kuna ƒe enyi do ŋgɔ na ŋutsu siwo menoe kpɔ o.

Wode se ɖe aŋekotokuwo alo aŋekpetewo dɔdɔ tso duta, wo wɔwɔ kple wo zazã le dukɔa me nu be woatsɔ akpɔ tɔmelã kple godzilã siwo mia wo hekuna ƒe agbe ta. Dziɖuɖua le dzi dem ƒo be woazã akpete siwo wotsɔa nu siwo nyunyɔna bɔbɔe wɔ la boŋ.

Dzɔdzɔmefɔkuwo na dɔwɔƒe siwo xea nugblẽfe la ɖua agba Amerika dɔlar miliɔn akpe 50 ƒe sia ƒe. Tso ƒe 1980 me la, nuwo ƒe asi si le dzi yim na be agbaɖuɖu sia dzina ɖe edzi wòwua teƒe eve le ƒe ewo ɖe sia ɖe me.