AME miliɔn akpe geɖewo xlẽ nu alo se nu tso nya si Biblia gblɔ tso xexe gbahoo sia ƒe gɔmedzedze ŋu la ŋu. Ŋutinya sia si woŋlɔ ɖi ƒe 3,500 aɖewoe nye esia la dze egɔme kple nya nyanyɛ sia be: “Le gɔmedzedzea me Mawu wɔ dziƒo kple anyigba.”

Ke hã, ame geɖe menya be subɔsubɔhakplɔla siwo dome ame siwo gblɔna be ŋkeke ɖe sia ɖe si wotsɔ wɔ anyigbadzinuwo la nye gaƒoƒo 24 kpakple Kristotɔ blemakɔnuléɖeasilawo na Biblia me nuŋlɔɖi sia va zu gli gbogbo siwo sa ɖe aga sãa tso nya si tututu Biblia gblɔ la gbɔ. Nu siwo ŋu dzɔdzɔmeŋutinunyalawo ke ɖo la va ɖo kpe edzi be woƒe nya siawo nye alakpanyawo. Togbɔ be woƒe nyakpakpa siawo mele Biblia me o hã la, wona amewo susunɛ be gligbalẽ aɖe koe Biblia la nye.

Ame geɖe menya nya si tututu Biblia gblɔ tso nuwɔwɔwo ŋu o. Ewɔ nublanui lo! Elabena Biblia ƒo nu tso ale si xexe gbahoo sia wɔwɔ dze egɔme la ŋu eme kɔ nyuie eye kpeɖodziwo le eŋu. Tsɔ kpe ɖe eŋu la, nya siwo Biblia gblɔ tso xexea me wɔwɔ ŋu la wɔ ɖeka kple nu siwo ŋu dzɔdzɔmeŋutinunyalawo ke ɖo. Anɔ eme be ne èxlẽ nya si tututu Biblia gblɔ tso nuwɔwɔwo ŋu la, awɔ nuku na wò ŋutɔ!

Nuwɔwɔwo ƒe ŋutinya si le Biblia me ɖo kpe edzi be Mawu Ŋusẽkatãtɔ, ame si nye Nuwokatãtaƒola ye wɔ nuwo katã. Ame kae wònye, eye aleke wòle? Biblia na míenya be eto vovo sãa tso dukɔ nyanyɛwo kple subɔsubɔha siwo me ame geɖewo le la ƒe mawuwo gbɔ. Eyae nye nuwo katã Wɔla, gake ame akpa gãtɔ menya nu boo aɖeke tso eŋu o.

• Ame ŋutɔŋutɔe Mawu nye. Menye ŋusẽ si si amenyenye mele o, si le agba sam le xexe gbahoo sia me taɖodzinu aɖeke manɔmee wònye o. Ebua tame, eye seselelãme kple taɖodzinuwo le esi.

• Ŋusẽ kple nunya si seɖoƒe meli na o ye le Mawu si. Esia tae nuwɔwɔ siwo le xexea me godoo, vevietɔ nu gbagbewo ƒe wɔwɔme, gɔme sese mele bɔbɔe o.

• Mawue wɔ xexemenuwo katã. Eya ta Mawu mate ŋu anye xexemenu siwo eya ŋutɔ wɔ la o. Ke boŋ gbɔgbɔe wònye, womate ŋu akpɔe kple ŋku o.

• Gɔmedzedze kple nuwuwu meli na Mawu o. Eli tso gbe aɖe gbe ke, enu mayi akpɔ o. Eya ta menye ame aɖekee wɔe o.

• Ŋkɔ le Mawu si; eƒe ŋkɔa dze le Biblia me zi akpe geɖe. Ŋkɔ mae nye Yehowa.

• Yehowa Mawu lɔ̃ amewo eye wòtsɔ ɖe le eme na wo vevie.

Biblia gblɔ be Mawu wɔ “dziƒo kple anyigba.” Ke hã, nya sia si le gbadzaa alea megblɔ ɣeyiɣi didi si wòtsɔ wɔ xexe gbahoo la alo mɔ si dzi wòto trɔ asi le emenuwo ŋu o. Ke nya siwo subɔsubɔha aɖewo kakana be ŋkeke siwo Mawu tsɔ wɔ anyigbadzinuwo dometɔ ɖe sia ɖe nye gaƒoƒo 24 ya ɖe? Woƒe nufiafia sia, si dzi dzɔdzɔmeŋutinunyala gbogbo aɖewo meda asi ɖo o la, nye Biblia me ŋutinya sia gɔme masemase nyuie. Na míakpɔ nya si tututu Biblia gblɔ ɖa.

• Subɔsubɔha siwo gblɔna be ŋkeke siwo Mawu tsɔ wɔ anyigbadzinuwo dometɔ ɖe sia ɖe nye gaƒoƒo 24 la ƒe nufiafia mewɔ ɖeka kple Biblia me nyawo o.

• Biblia zãa nya “ŋkeke” tsɔ fiaa ɣeyiɣi ƒe didime vovovowo. Ɣeaɖewoɣi la, enyea ɣeyiɣi si ƒe didime womenya o. Nuwɔwɔwo ƒe ŋutinya si dze le Mose Ƒe Agbalẽ Gbãtɔ me nye esia ƒe kpɔɖeŋu ɖeka.

• Le Biblia ƒe nuŋlɔɖia nu la, ŋkeke ade siwo wotsɔ wɔ nuwoe la dometɔ ɖe sia ɖe anya xɔ ƒe akpe geɖe.

• Mawu wɔ xexe gbahoo sia, si me míaƒe anyigba si dzi nu gbagbe aɖeke menɔ o la hã le, xoxoxo hafi nuwɔwɔwo ƒe ŋkeke gbãtɔ dze egɔme.

• Edze ƒãa be ŋkeke ade siwo Yehowa Mawu tsɔ wɔ anyigbadzinuwoe nye ɣeyiɣi didi aɖe si wòtsɔ dzra anyigba dzi ɖo be amegbetɔwo nate ŋu anɔ edzi.

• Nya si Biblia gblɔ tso nuwɔwɔwo ŋu la wɔ ɖeka kple nya si dzɔdzɔmeŋutinunyalawo gblɔ ku ɖe ƒe gbogbo siwo va yi tso esime Mawu wɔ xexe gbahoo sia la ŋu.

Ame siwo mexɔa Biblia dzi sena o la dometɔ geɖe xɔ nufiafia si nye be nu siwo me agbe mele o lae nɔ tɔtrɔm le wo ɖokui si vivivi va zu nu gbagbewo la dzi se. Wogblɔ be nu gbagbe nyaŋui siwo maa wo ɖokui ɖe akpa geɖe me woe trɔ ʋuu va zu nu gbagbe siwo katã li egbea. Woƒe nya sia fia be nu gbagbe nyaŋui aɖe mee amegbetɔ si ƒe wɔwɔme de ŋgɔ ŋutɔ la dzɔ tso.

Ame geɖe siwo gblɔna be yewoxɔe se be Mawu ƒe nyae Biblia nye la hã xɔ nufiafia sia dzi se. Woxɔe se be Mawue wɔ nu gbagbe gbãtɔ ɖe anyigba dzi, eye wònɔ ŋku lém ɖe eŋu wònɔ tɔtrɔm ʋuu va zu nu gbagbe siwo katã li. Gake menye nya siae Biblia ya gblɔ o.

• Biblia gblɔ be Yehowa Mawu wɔ ati kple lã vovovoawo katã. Ewɔ ŋutsu kple nyɔnu gbãtɔ wode blibo, eye wòna nɔnɔme siwo nye sidzedze ame ɖokui, lɔlɔ̃, nunya kple dzɔdzɔenyenye wo.

• Eme kɔ ƒãa be ati kple lã ƒomevi siwo Mawu wɔ la trɔ le mɔ aɖe nu hetse alo dzi wo ƒomevi siwo to vovo na wo. Le go geɖe me la, atiwo alo lãwo tsea alo dzia wo ƒomevi siwo va toa vovo na wo sãa.

• Nuwɔwɔwo ƒe ŋutinya si le Biblia me metsi tre ɖe nu siwo ŋu dzɔdzɔmeŋutinunyalawo ke ɖo be nuwɔwɔ ɖeka ƒomeviwo tea ŋu va toa vovo le wo nɔewo gbɔ la ŋu o.

Le ƒe 1800 ƒe domedome la, Britaintɔ agbeŋutinunyala Alfred Russel Wallace va lɔ̃ ɖe Charles Darwin ƒe nufiafia si nye be ɖe nuwo nɔ tɔtrɔm vivivi va zu nu gbagbewo la dzi. Gake nufiala xɔŋkɔ sia gɔ̃ hã gblɔ be: “Ame siwo si ŋku le be woakpɔ nu kple susu le be woabu tame le lãmenugbagbevi siwo le ʋu me, siwo nye nu suetɔwo kekeake le anyigba bliboa dzi kple xexe gbahoo sia me ŋu la . . . , alɔ̃ ɖe edzi be nunya kple mɔfiame aɖe koŋ ye le megbe na nuwo, míagblɔe kpuie ko be, Nunyala aɖee wɔ wo.”

Ƒe akpe eve kloe do ŋgɔ hafi aƒetɔ Wallace nagblɔ nya siawo la, Biblia ya gblɔe ɖi xoxoxo be: “Elabena [Mawu ƒe] nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena.” (Romatɔwo 1:20) Anyo be nàdi ɣeyiɣi ɣeaɖewoɣi ade ŋugble le nuwɔwɔ wɔnuku gbogbo siwo le xexea me la ŋu, tso ati ƒe aŋgba ɖeka dzi va se ɖe nu gbogbo siwo le yame la dzi. Ne èlé ŋku ɖe nuwɔwɔwo ŋu la, àkpɔe be Wɔla aɖe li.

Gake àbia be: ‘Ne Mawu lɔ̃ame si wɔ nuwo katã li ɖe, ke nu ka tae wòɖe mɔ fukpekpe li? Ðe wòɖe asi le eƒe anyigbadzinuwɔwɔwo ƒe nya mea? Aleke etsɔme anɔ?’ Nyateƒenya gbogbo aɖewo gale Biblia me siwo amegbetɔwo ƒe nyakpakpawo kple mawusubɔsubɔ ƒe ayemenuwɔnawo wɔe be wole ɣaɣla ɖe ame akpa gãtɔ. Anye dzidzɔ na Yehowa Ðasefowo, ame siwo nye magazine sia talawo, be yewoakpe ɖe ŋuwò nàdzro Biblia me nya siwo wometɔ tsii o la me ahasrɔ̃ nu geɖe tso Wɔla la kple amegbetɔwo ƒe etsɔme ŋu.