Ƒukukua le miemiem kabakaba anɔ abe meta ɖeka ene ƒe sia ƒe. Ame aɖewo le vɔvɔ̃m be kaka ƒe 2050 naɖo la, tsia amie keŋkeŋ. Dziɖuɖumegãwo le mɔnu dim atsɔ aɖɔ nɔnɔme sia ɖo. Mɔnu ɖeka si ŋu wole nu srɔ̃m tsoe nye ale si woatrɔ asi le dzetsi si le Ƒudzĩa me la ŋu wòazu tsi vivi ne amegbetɔwo nate ŋu azã eye le ema yome woatrɔ dzetsia me nu siwo susɔ la ayi ɖe Ƒukukua me. Amewo le vɔvɔ̃m be mɔnu sia agblẽ nu le nu gbagbe siwo le Ƒukukua me la ŋu.

Nugblẽfexeha aɖe ƒe numekuku ɖee fia be le Kristmas dzi la, ame siwo woxɔna ɖe kɔdzi ɖe dzidɔ ta ƒe agbɔsɔsɔ dzina ɖe edzi teƒe 33 le alafa me wu ƒea ƒe ɣeyiɣi bubuwo. Dɔwɔƒea gblɔ be nu si nana nu tena ɖe amewo dzi wue nye ne wole Kristmas nunanawo dim be yewoaƒle kpakple ale si ƒometɔwo kple xɔlɔ̃wo kpɔa mɔ na nu geɖe wu tso ame si.

Britaintɔwo ƒe numekulawo gblɔ be le nyateƒe me la, Icelandtɔwo ƒe ƒumegomelã si wogblɔ be exɔ abe ƒe 405 ene la xɔ ƒe 507 boŋ hafi ku le ƒe 2006 me. Nyatakaka sia ɖee fia be ƒumegomelã siae nye lã si nɔ agbe didi wu * lã siwo katã ŋu wonya nu tsoe. Ƒumegomelã sia ku esi numekulawo dee nufamɔ̀ me be yewoatsɔe ayi nudokpɔƒe.

Latin Amerika Dukɔwo kple Karib-duwo siwo le dukɔ 33 wɔ takpekpe aɖe le Havana le Cuba le ƒe sia ƒe gɔmedzedze lɔƒo. Le takpekpea me la, wogblɔ be yewoƒe nutoa zu ‘ŋutifafanuto’ eye woda asi ɖe edzi be yewoakpɔ yewoƒe masɔmasɔwo gbɔ aʋamawɔmawɔe. Takpekpe sia delawo dometɔ ɖekae nye Dukɔ Ƒoƒuawo ƒe Dɔdzikpɔlagã Ban Ki-moon.