AGBAGBLAƲUI tea ŋu sea gbeɖiɖi sesẽtɔ kekeake eye wòƒo xexea me nu gbagbe siwo katã wonya la ta sãsãsã le go sia me. Gake eƒe towo ƒe wɔwɔme le bɔbɔe eye ɖe sia ɖe ƒe lolome le abe abui ƒe ta ene.

Bu nya siawo ŋu kpɔ: Ƒe geɖewoe nye esia wonɔ nu srɔ̃m tso agbagblaʋui ƒe nusese ŋu. Nyitsɔ laa la, dzɔdzɔmeŋutinunyala siwo le Strathclyde Yunivɛsiti si le Scotland (Écosse) tsɔ gbeɖiɖi sesẽ vovovowo do agbagblaʋui ƒe nusese kpɔ. Wodzidzea ale si totiawo nɔa ƒoƒom eye woléa tokawo ƒe dɔwɔwɔ ɖi. Ne woƒo gbeɖiɖi siwo de dzi bobobo kilohertz 300 ɖe to me na agbagblaʋuia hã la, eƒe towo tea ŋu senɛ. Gake agutɔ ya tea ŋu sea gbeɖiɖi si ƒe sesẽme nye kilohertz 212 ko, ƒumeha siwo sea nu tea ŋu sea gbeɖiɖi si nu sẽ kilohertz 160 eye amegbetɔwo tea ŋu sea gbeɖiɖi si ƒe sesẽme wu kilohertz 20 ko.

Numekulawo ɖoe be yewoazã ŋutete si le agbagblaʋui si wòtea ŋu sea gbeɖiɖi si nu sẽ nenema gbegbe la atsɔ awɔ aɖaŋunu yeyewo. Aleke woawɔe? Mɔ̃ɖaŋunyala James Windmill si wɔa dɔ le Strathclyde Yunivɛsiti gblɔ be: “Akpe ɖe mía ŋu míawɔ nuƒomɔ̃ siwo de ŋgɔ wu hele sue wu. Woate ŋu azã wo na aɖaŋunu geɖewo abe asitelefonwo kple nusemɔ̃ siwo ame siwo mesea nu nyuie o zãna ene.”

Nu kae nèsusu? Ðe agbagblaʋui ƒe nusese wɔnuku la dzɔ le eɖokui sia? Alo Wɔla lae wɔea?