VIDZĨWO dzena wɔnamanɔŋuitɔwo wu ame ɖe sia ɖe. Esi wodzi mí teti la, míaƒe dedienɔnɔ kpɔ mía dzilawo ŋkume bliboe. Emegbe esi míedze azɔli la, míekpɔa ame siwo míenya o la ame dzɔtsuwoe. Esia doa ŋɔdzi na mí, negbe ɖe mía dzilawo tsɔ mía gbɔ ko hafi. Gake ne míelé mía dada alo mía fofo ƒe asi sesĩe ko la, míekana ɖe edzi be míele dedie.

Esime míenye ɖeviwo la, mía dzilawo ƒe lɔlɔ̃ kple dzidede ƒo na mí wɔe be míetsi nyuie henɔ lãmesẽ me. Esi míekpɔe be mía dzilawo lɔ̃ mí la, esia gana míeka ɖe edzi be míele dedie. Esi woka ɖe edzi na mí be míele agbagba dzem la, dzi ɖo mía ƒo eye míegawɔ geɖe wu.

Esi míenɔ tsitsim la, mía xɔlɔ̃ kplikplikpliwo dome nɔnɔ hã nana míeɖea dzi ɖi. Ne míele wo dome la, míaƒe dzi dzea eme, eye esia wɔnɛ be dzi ɖoa mía ƒo vie le mía hati sukuviwo dome.

Aleae ame sia ame akpɔ mɔ be agbea nanɔ na ɖeviwo. Ke hã xɔlɔ̃ kplikplikpli ʋɛ aɖewo koe le ɖevi aɖewo si, eye le ɖevi geɖe gome la, wo dzilawo metsɔa ɖe le eme na wo boo o. Melissa * gblɔ be: “Ne mekpɔ foto siwo me ƒomewo le nu wɔm ɖekae le la, megblɔna na ɖokuinye be, ‘Ne ɖe míaƒe ƒomea nɔ alea esime menye ɖevi la, adzɔ dzi nam ŋutɔ.’” Ðewohĩ wò hã èsena le ɖokuiwò me nenema.

Ðewohĩ dzi menɔ ƒowò le wò ɖevime o. Anɔ eme be dziwòlawo meɖe lɔlɔ̃ fia wò alo de dzi ƒo na wò o. Ðewohĩ èɖo ŋku dzre siwo dziwòlawo wɔna atraɖii si na woƒe srɔ̃ɖeɖea me gblẽ mlɔeba la dzi, eye ànya bu fɔ ɖokuiwò vodadatɔe ɖe woƒe kaklãa ta. Alo esi gavɔ̃ɖi wue nye be, ɖewohĩ fofowò alo dawò wɔ ŋlɔmi le ŋuwò alo eƒe nyawo de abi wò seselelãme ŋu.

Aleke ɖevi siwo to nɔnɔme siawo tɔgbi me la wɔa nui? Wo dometɔ aɖewo va trɔna ɖe atike vɔ̃ɖi zazã alo aha geɖe nono ŋu le woƒe sɔhɛme. Bubuwo hã gena ɖe gbevuhawo me be yewo tɔwo nalɔ̃ yewo. Sɔhɛ siwo womelɔ̃ le ɖevime o la ƒoa wo ɖokuiwo ɖe ahiãdzedze me ɖe lɔlɔ̃ kple ɖetsɔleme si dim wole ta. Gake kadodo siawo me gblẽna kaba, eye ne edzɔ alea la, woƒe dediemanɔmanɔ ƒe seselelãmea ganyrana ɖe edzi.

Ne sɔhɛ siawo te ŋu ƒo asa na agbe maɖɔʋu mawo nɔnɔ gɔ̃ hã la, zi geɖe la, wosena le wo ɖokui me le woƒe tsitsime be asixɔxɔ mele yewo ŋu o. Nyɔnu aɖe si ŋkɔe nye Ana gblɔ be: “Esi danye nɔa egbɔgblɔ dzi  nam be viɖe aɖeke mele ŋunye o ta la, nye hã meva ka ɖe nya ma dzi mlɔeba. Nyemeɖo ŋku edzi be ekafum zi ɖeka pɛ teti kpɔ o.”

Menye ale si wowɔ nu ɖe mía ŋu le ɖevime koe nana míesena le mía ɖokui me be míele dedie o. Srɔ̃gbegbe si gbãa dzi na ame, tsitsimekuxiwo, alo dzimaɖitsitsi ɖe míaƒe dzedzeme ŋu ate ŋu ana míase le mía ɖokui me be míele dedie o. Nu ka gbɔe kuxia ɖatso o, ate ŋu awɔe be míaganɔ dzidzɔ kpɔm o, eye awɔe hã be mía kple amewo dome manɔ nyuie o. Nu kae míate ŋu awɔ be míaɖu seselelãme mawo dzi?

Ehiã be míanyae be kpekpeɖeŋu li. Ame aɖe li si akpe ɖe mí katã ŋu, ele didim be yeakpe ɖe mía ŋu, eye Ame mae nye Mawu ŋutɔ.

Gbe si Mawu de eƒe nyagblɔɖila Yesaya si ye nye esi: “Mègatsi dzi o, elabena nyee nye wò Mawu. Mado ŋusẽ wò; makpe ɖe ŋuwò. Matsɔ nye dzɔdzɔenyenye ƒe nuɖusi alé wò ɖe te.” (Yesaya 41:10, 13) Aleke gbegbe wòfaa akɔ na míi ye nye esi be míanyae be Mawu di be yeatsɔ yeƒe asi alé mí ɖe te! Eya ta susu aɖeke meli si ta míatsi dzimaɖi o!

Biblia ƒo nu tso Mawu subɔla siwo dzimaɖitsitsi ɖe fu na gake woyi edzi ɖo ŋu ɖe Mawu ŋu la ŋu. Samuel dada, Hana, se le eɖokui me be yedo kpo nu, le esi medzi vi o ta. Woɖu fewu le eŋu atraɖii le eƒe kotsitsia ta. Esia wɔe be nuɖuɖu megadzroa Hana o, eye avi dzi ko wònɔna. (1 Samuel 1:6, 8) Gake esi wòɖe eƒe nuxaxawo gblɔ na Mawu vɔ la, megaléa blanui azɔ o.—1 Samuel 1:18.

Hakpala David hã se le eɖokui me ɣeaɖewoɣi be yemele dedie o. Fia Saul nɔ eyome tim ƒe geɖe be yeawui. Etee kpɔ zi geɖe be yeaɖe David ƒe agbe ɖa, gake David do le eme. Eye ɣeaɖewoɣi la, kuxiwo do agbogbo ɖe edzi abe ɖe wònyrɔ ɖe tsi me ene. (Psalmo 55:3-5; 69:1) Gake le esiawo katã me la, eŋlɔ bena: “Mamlɔ anyi adɔ alɔ̃ le ŋutifafa me, elabena Oo, Yehowa, wò koe nana menɔa dedie.”—Psalmo 4:8.

Hana kple David siaa tsɔ woƒe agbawo dro ɖe Yehowa dzi, eye wokpɔe be Yehowa lé yewo ɖe te vavã. (Psalmo 55:22) Aleke míawo hã míate ŋu awɔ nenema ke egbea?

1. Srɔ̃ ŋuɖoɖo ɖe Yehowa, mía Fofo si le dziƒo la ŋu.

Yesu de dzi ƒo na mí be míadze si ye Fofo, si nye “Mawu vavã ɖeka la.” (Yohanes 17:3) Apostolo Paulo ka ɖe edzi na mí be: “Mele adzɔge tso mía dometɔ aɖeke gbɔ hafi o.” (Dɔwɔwɔwo 17:27) Eye Yakobo hã ŋlɔ bena: “Mite ɖe Mawu ŋu, eye ate ɖe mia ŋu.”—Yakobo 4:8.

Ne míenya be Fofo si lɔ̃ mí la le mía si le dziƒo eye wòléa be na mí la, esia nye afɔɖeɖe vevi aɖe si kpena ɖe mía ŋu be míaɖu dzimaɖitsitsi dzi. Nyateƒee, exɔa ɣeyiɣi hafi ame tea ŋu va ɖoa ŋu ɖe Mawu ŋu alea, gake ame geɖe kpɔe be esia kpena ɖe yewo ŋu ale gbegbe. Caroline gblɔ be: “Esi meva se egɔme be Yehowa nye Fofonye la, meva kpɔe azɔ be ame aɖe li mate ŋu agblɔ nye dzimenyawo na. Esia na mekpɔ dzidzeme geɖe!”

Rachel gblɔ be: “Esi dzinyelawo ʋu hegblẽm ɖi metsi akogo la, Yehowae kpe ɖe ŋunye mese le ɖokuinye me be mele dedie. Megblɔa nye dzimenyawo nɛ eye mebianɛ be wòakpe ɖe ŋunye makpɔ nye kuxiwo gbɔ. Eye ekpe ɖe ŋunye hã.” *

2. Di mawusubɔla siwo anɔ na wò abe ƒome ene.

Yesu fia eƒe nusrɔ̃lawo be woabu wo nɔewo nɔviwoe. Egblɔ na wo be: “Mi katã la, nɔviwo mienye.” (Mateo 23:8) Edi be yeƒe nusrɔ̃la vavãwo nalɔ̃ wo nɔewo eye woava zu abe ƒome gã si le Mawu subɔm ene.—Mateo 12:48-50; Yohanes 13:35.

Le Yehowa Ðasefowo ƒe hamewo me la, wodzea agbagba vevie be yewoado vivi ɖe yewo nɔewo ŋu ahafa akɔ na yewo nɔewo, si wɔe be wonye mawusubɔlawo ƒe ƒome vavã. (Hebritɔwo 10:24, 25) Ame geɖe kpɔe be hamea ƒe kpekpewo wɔa dɔ ɖe ame dzi abe dɔmi si yɔa dɔ woƒe seselelãmebiwo ene.

Nyɔnu si ŋkɔe nye Eva gblɔ be: “Xɔlɔ̃ vevi aɖe nɔ asinye le míaƒe hamea me, si se fu siwo kpem menɔ la gɔme nam. Eɖoa to sea nye nyawo, exlẽa nu nam, eye wòdoa gbe ɖa kplim. Ekpɔa egbɔ be nyemetsi akogo o. Ekpena ɖe ŋunye megblɔa nye dzimenyawo heɖea susu ɖa le nye kuxiwo ŋu. To eƒe kpekpeɖeŋu me la, meva sesem le ɖokuinye me azɔ be mele dedie.” Rachel hã gblɔ be: “Meva kpɔ ‘dada kple fofo’ le hamea me. Mekpɔe be hamea me tɔwo lɔ̃m eye mele dedie le wo dome.”

 3. Lɔ̃ amewo eye nànyo dɔme na wo.

Lɔlɔ̃ kple dɔmenyonyo hea xɔlɔ̃wɔwɔ ƒe kadodo si nɔa anyi ɖaa la vɛ. Yesu gblɔ be: “Dzidzɔ geɖe le nunana me wu nuxɔxɔ.” (Dɔwɔwɔwo 20:35) Eye ɖikeke mele eme o be míava de dzesii be ale si míelɔ̃ amewoe la, nenema kee woawo hã woalɔ̃ míi. Yesu gblɔ na eƒe nusrɔ̃lawo be: “Minɔ nu nam amewo, eye amewo ana nu mi.”—Luka 6:38.

Ne míelɔ̃ amewo eye woawo hã wolɔ̃ mí la, míeɖea dzi ɖi geɖe wu. Eye Biblia gblɔe nyuie be, “lɔlɔ̃ nu metsina gbeɖe o.” (1 Korintotɔwo 13:8) María gblɔ be: “Menyae be susu manyomanyo siwo nɔ asinye ɖe ɖokuinye ŋu la mele eme o. Nu si kpena ɖe ŋunye meɖua susu mawo dzie nye kpekpe ɖe amewo ŋu kple susu ɖeɖe ɖa le ɖokuinye ŋu. Ɣesiaɣi si mewɔ nane na amewo la, mekpɔa dzidzɔ.”

Afɔɖoƒe siwo ŋu míeƒo nu tsoe la dzi wɔwɔ maɖe kuxia ɖa zi ɖeka nukutɔe ya o. Gake woate ŋu awɔ geɖe. Caroline gblɔ be: “Dediemanɔmanɔ ƒe seselelãmewo gaɖea fu nam ya. Gake fifia, mesena le ɖokuinye me be asixɔxɔ le ŋunye. Menyae be Mawu tsɔ ɖe le eme nam, eye xɔ̃nye vevi geɖeawo hã nana meɖea dzi ɖi.” Nenema kee Rachel hã se le eɖokui me. Egblɔ be: “Ɣeaɖewoɣi la, meléa blanui ŋutɔ. Ke hã haxɔsetɔ siwo nye nɔvinyeŋutsuwo kple nɔvinyenyɔnuwo ɖoa aɖaŋu nam, eye wokpena ɖe ŋunye nye susu dzea akɔ anyi. Ƒo wo katã ta la, megblɔa nye nyawo na Fofonye si le dziƒo la gbe sia gbe. Esia kpena ɖe ŋunye ale gbegbe.”

Nu si akpɔ kuxia gbɔ tegbee hã li. Biblia ƒo nu tso xexe yeye si ava kpuie si me mí katã míanɔ dedie le ŋu. Mawu do ŋugbe le eƒe Nya, Biblia, me be: “[Ame sia ame] abɔbɔ nɔ eƒe wainka kple eƒe gboti te bɔkɔɔ, eye ame aɖeke mado voɖi na wo o.” (Mika 4:4) Ɣemaɣi la, ame aɖeke mado ŋɔdzi na mí alo awɔ nu vevi mí o. Eye nu siwo doa dzive na mí vevie la “magava susu me na” mí o. (Yesaya 65:17, 25) Mawu kple Via, Kristo Yesu, ana “dzɔdzɔenyenye vavãtɔ” naxɔ aƒe ɖi. Eye eƒe kutsetse “anye tomefafa kple dedienɔnɔ tegbee.”—Yesaya 32:17.