BIBLIA ƑE MƆFIAME: “Midzudzɔ dzimaɖitsitsi ɖe miaƒe agbewo ŋu.”—Mateo 6:25.

Nu kae esia fia? Yesu ye gblɔ nya mawo le eƒe Todzimawunyaa me. Le Biblia ƒe nyagɔmeɖegbalẽ aɖe ƒe nya nu la, Helagbe me dɔwɔnya si gɔme woɖe be “tsi dzimaɖi” ate ŋu afia ale si “amewo wɔa nui ne ahedada, dɔwuame kple agbemekuxiwo tu wo.” Zi geɖe la, dzimaɖitsitsi nyea dzitsitsi ɖe nu si ate ŋu adzɔ le etsɔme ŋu. Esɔ eye wòle dzɔdzɔme nu be míabu míaƒe agbemenuhiahiã veviwo kple míaƒe ame veviwo ƒe dedienɔnɔ ŋu. (Filipitɔwo 2:20) Gake esi Yesu gblɔ be, “migatsi dzimaɖi gbeɖe” o la, enɔ aɖaŋu ɖom na eyomedzelawo be woaƒo asa na dzitsitsi atraɖii, si nye vɔvɔ̃ na etsɔme, si ate ŋu awɔe be woaganɔ dzidzɔ kpɔm fifia o.—Mateo 6:31, 34.

Ðe wògaɖea vi egbea? Nunya le eme be míawɔ ɖe Yesu ƒe aɖaŋuɖoɖoa dzi. Nu ka tae? Numekugbalẽ aɖewo ɖee fia be ne ame tsi dzimaɖi vevie la, ekpɔa ŋusẽ ɖe lãmekawo kple ŋutinuwo ƒe dɔwɔwɔ dzi atraɖii, eye esia “tea ŋu hea lãmesẽkuxi siwo dometɔ aɖewo nye dɔmebi, dzidɔ kple gbɔxi vanɛ.”

Yesu gblɔ susu vevi si tae wòle be míaƒo asa na dzimaɖitsitsi dzodzro ɖo: Eyae nye be mehiã koŋ o. Yesu gblɔ be: “Mia dometɔ kae li, si ne ele dzimaɖi tsim la, wòate ŋu atsɔ abɔklugui ɖeka akpe ɖe eƒe agbenɔƒe ŋu?” (Mateo 6:27) Míaƒe kuxiwo ŋu bubu fũu akpa madidi míaƒe agbenɔƒe ɖe edzi sekɛnd ɖeka teti hã ʋuu keke wòahayi nana ge be agbea naka ɖe eme na mí o. Eye zi geɖe la, etsɔme meva nɔna abe ale si míesusui ene o. Agbalẽnyala aɖe gblɔe nyuie be: “Dzimaɖitsitsi ɖe etsɔme ŋu nye fuɖeɖe na ame ɖokui dzodzro, eye zi geɖe la, menye nu siwo míenɔ vɔvɔ̃m na ye va dzɔna le etsɔme o.”

Nu kae akpe ɖe ŋuwò nàdzudzɔ dzimaɖitsitsi? Gbãtɔe nye, ɖo ŋu ɖe Mawu ŋu. Ne Mawu nyia dziƒoxewo heɖoa atsyɔ̃ na seƒoƒowo la, ɖe makpɔ ame siwo ƒe nu vevitɔ le agbe mee nye be yewoasubɔe la ƒe agbemenuhiahiã veviwo gbɔ na wo oa? (Mateo 6:25, 26, 28-30) Evelia, bu ŋkeke ɖe sia ɖe ƒe hiahiãwo ko ŋu. Yesu gblɔ be: “Migatsi dzimaɖi gbeɖe le etsɔ si gbɔna ŋu o, elabena etsɔ si gbɔna la kple eya ŋutɔ ƒe dzimaɖitsitsiwoe.” Ðe màlɔ̃ ɖe edzi be “ŋkeke ɖe sia ɖe ƒe kuxiwo sɔ gbɔ nɛ” oa?—Mateo 6:34.

Ne míewɔ ɖe Yesu ƒe aɖaŋuɖoɖo si me nunya le dzi la, míate ŋu aƒo asa na kuxi siwo agblẽ nu le míaƒe lãmesẽ ŋu. Gawu la, dzidzeme si Biblia yɔ be “Mawu ƒe ŋutifafa” asu mía si.—Filipitɔwo 4:6, 7.