Ne èdi be yeanya ame aɖe la, nu gbãtɔ si nàbiae nye be, “Ŋkɔwò ɖe?” Ne èbia nya ma Mawu la, aleke wòaɖo eŋui?

“Nyee nye Yehowa. Ŋkɔnyee.”—Yesaya 42:8.

Ŋkɔa le vevie na Mawu ŋutɔ hã. Menye ame aɖekee tsɔ ŋkɔa na Mawu o, eya ŋutɔe tsɔe. Yehowa gblɔ be: “Esiae nye nye ŋkɔ tegbee, eye esiae woatsɔ aɖo ŋku dzinye tso dzidzime yi dzidzime.” (2 Mose 3:15) Mawu ƒe ŋkɔ dze le Biblia me wosɔ gbɔ wu eƒe dzesideŋkɔwo abe Ŋusẽkatãtɔ, Fofo, Aƒetɔ, alo Mawu ene, eye esɔ gbɔ wu ŋkɔ bubuwo abe Abraham, Mose, David, alo Yesu ene. Azɔ hã, Yehowa di be amewo nanya yeƒe ŋkɔa. Biblia gblɔ be: “Na woadze sii be wò, ame si ŋkɔe nye Yehowa la, wò ɖeɖe koe nye Dziƒoʋĩtɔ ɖe anyigba blibo la dzi.”—Psalmo 83:18.

Ŋkɔa le vevie na Yesu. Le gbedodoɖa si woyɔna be mía Fofo Si Le Dziƒo alo Aƒetɔ Ƒe Gbedodoɖa me la, Yesu fia eyomedzelawo be woado gbe ɖa na Mawu be: “Wò ŋkɔ ŋuti nakɔ.” (Mateo 6:9) Yesu ŋutɔ do gbe ɖa na Mawu be: “Fofo, do wò ŋkɔ ɖe dzi.” (Yohanes 12:28) Mawu ƒe ŋkɔa dodo ɖe dzi nɔ vevie na Yesu le eƒe agbe me, eya ta edo gbe ɖa be: “Mena wonya wò ŋkɔ la, eye magana woanyae.”—Yohanes 17:26.

Ŋkɔa le vevie na ame siwo nya Mawu. Mawusubɔla siwo nɔ anyi le blema nya be hafi yewoakpɔ agbe eye yewoanɔ dedie la, ele be Mawu ƒe ŋkɔa nanɔ vevie na yewo. “Yehowa ƒe ŋkɔ nye mɔ́ sesẽ.  Afi mae ame dzɔdzɔe la sina yina eye wònɔa dedie.” (Lododowo 18:10) “Ame sia ame si yɔa Yehowa ƒe ŋkɔ la, woaɖee.” (Yoel 2:32) Biblia ɖee fia be Mawu ƒe ŋkɔ ana ame siwo subɔnɛ la naɖe dzesi. “Dukɔwo dometɔ ɖe sia ɖe azɔ le eƒe mawu ƒe ŋkɔ me, ke míawo ya míazɔ le Yehowa mía Mawu ƒe ŋkɔ me ɖaa tegbee.”—Mika 4:5; Dɔwɔwɔwo 15:14.

Mawu ɖeka koe tɔ ŋkɔ ma. Agbalẽnyala geɖe gblɔ be ŋkɔ Yehowa gɔmee nye “Enana Wòvaa Eme.” Yehowa Mawu ŋutɔ na gɔmesese deto si le ŋkɔa ŋu dze esime wògblɔ nya siawo tso eɖokui ŋu na Mose be: “Mava Nye Nu Si Metia Be Manye.” (2 Mose 3:14) Mawu ƒe ŋkɔa mefia be Wɔla, ame si wɔ nuwo katã koe wònye o. Eƒe ŋkɔa ɖe ŋutete si le esi be wòana eya ŋutɔ kple eƒe nuwɔwɔwo nava nye nu sia nu si hiã ale be eƒe tameɖoɖo nava eme la fia. Togbɔ be Mawu ƒe dzesideŋkɔwo ate ŋu aɖɔ eƒe ɖoƒe, ŋutete, alo ŋusẽ hãa, eƒe ŋkɔ Yehowa ɖeɖe koe na míekpɔ ame si tututu wònye kple nu si wòate ŋu ava nye.

Ŋkɔa na míekpɔ ale si Mawu tsɔ ɖe le eme na mí. Gɔmesese si le Mawu ƒe ŋkɔa ŋu ɖe ale si wòtsɔ ɖe le eme na eƒe nuwɔwɔwo, siwo dome míawo hã míele la fia. Azɔ hã, esi Mawu na míenya eƒe ŋkɔa ta la, efia be edi be míadze si ye. Eya ŋutɔe tso le eɖokui si na míenya eƒe ŋkɔa, hafi wòava va tame na mí gɔ̃ hã be míabia. Eme kɔ ƒãa be Mawu di be míanya be Ame ŋutɔŋutɔ si ŋu míate ŋu ate ɖo ye yenye ke menye abe mawu aɖe si le adzɔge ʋĩi si wosubɔna la ene o.—Psalmo 73:28.

Ne míezãa Mawu ƒe ŋkɔa la, ke efia be míedi be míadze sii. Le kpɔɖeŋu me, àdi be ame aɖe si nèdi be yeadze xɔ̃e la nanɔ wò ŋkɔ yɔm na wò. Aleke nàse le ɖokuiwò me ne amea gbe be yemayɔ wò ŋkɔa na wò o? Ne amea le ewɔm nenema la, awɔ na wò be ɖewohĩ medi be yeanye xɔ̃wò o. Nenemae wòle le Mawu hã gome. Yehowa na míenya eƒe ŋkɔa eye wòde dzi ƒo na mí be míazãe. Ne míezãe la, ana Yehowa nakpɔe be míedi be míate ɖe ye ŋu. Susuae nye be ekpɔa “ame siwo dea ŋugble le [alo “dea asixɔxɔ,” etenuŋɔŋlɔ] eƒe ŋkɔ ŋu la ŋu” gɔ̃ hã!—Malaki 3:16.

Afɔɖeɖe gbãtɔ si akpe ɖe mía ŋu be míadze si Mawue nye be míanya eƒe ŋkɔ. Gake mele be wòase ɖe afi ma o. Ele be míadze agbagba be míadze si Ame si tɔ ŋkɔa. Ele be míanya ame si tututu wònye.