AMEGBETƆWO

Nya Si Biblia Gblɔ: Mawu ‘mewɔ anyigba la dzodzro o, ke boŋ ɖe wòmèe be woanɔ edzi.’—YESAYA 45:18.

ANYIGBAA

Nya Si Biblia Gblɔ: “Dzidzime nu yina, eye dzidzime vana, ke anyigba ya li tegbee.”—NYAGBLƆLA 1:4.

NU SI WÒFIA: Le Biblia ƒe nya nua, womatsrɔ̃ anyigbaa gbeɖe o, amewo anɔ edzi ɣesiaɣi. Ke nu kae wòfia be xexea awu enu?

BU EŊU KPƆ: Biblia tsɔ ale si xexe sia awu enua sɔ kple nu si dzɔ le Noa ƒe ŋkekea me. Ɣemaɣia, “ŋutasesẽ yɔ anyigba la dzi fũu.” (1 Mose 6:13) Gake Noa ya nye ame dzɔdzɔe. Eya ta Mawu kpɔ eya kple eƒe ƒomea ta gake etsrɔ̃ ame vɔ̃ɖiwo le tsiɖɔɖɔa me. Biblia gblɔ tso nu si dzɔ ɣemaɣia ŋu be: ‘wotsrɔ̃ xexe si nɔ anyi ɣemaɣi esime tsi ɖee.’ (2 Petro 3:6) Nenemae xexea wu enu ɣemaɣi. Gake nu kae wotsrɔ̃? Menye anyigbaa o, ke boŋ ame vɔ̃ɖi siwo nɔ edzi ye. Eya ta ne Biblia gblɔ be xexea awu enua, mefia be woatsrɔ̃ anyigbaa o. Ke boŋ efia be woatsrɔ̃ ame vɔ̃ɖi siwo le anyigbaa dzi kple woƒe habɔbɔwo.

KUXIWO KPLE NU VƆ̃ÐI WƆWƆ

Nya Si Biblia Gblɔ: “Esusɔ vie ko ame vɔ̃ɖiwo maganɔ anyi o; àdi wo le wo nɔƒe, ke womaganɔ afi ma o. Ke ame fafawo anyi anyigba la dome, eye dzi adzɔ wo geɖe ɖe ŋutifafa gbogbo la ŋuti.”—PSALMO 37:10, 11.

NU SI WÒFIA: Le Noa ƒe ŋkekea mea, Tsiɖɔɖɔa meɖe nu vɔ̃ɖi wɔwɔ ɖa keŋkeŋ o. Le Tsiɖɔɖɔa megbea, ame vɔ̃ɖiwo gana agbea sesẽ na ame sia ame. Gake eteƒe madidi o, Mawu aɖe nu vɔ̃ɖi wɔwɔ ɖa keŋkeŋ. Abe ale si hakpalaa gblɔe enea: “Ame vɔ̃ɖiwo maganɔ anyi o.” Mawu ato eƒe Fiaɖuƒea dzi aɖe nu vɔ̃ɖi wɔwɔ ɖe sia ɖe ɖa—Fiaɖuƒe sia nye dziɖuɖu si le dziƒo eye aɖu ame siwo katã ɖoa to Mawu dzi.

BU EŊU KPƆ: Ðe ame siwo le dzi ɖum le anyigba dzi egbea alɔ̃ abɔbɔ ɖe Mawu Fiaɖuƒea tea? Biblia ɖee fia be womalɔ̃ o. Ke boŋ woatsi tre ɖe Mawu Fiaɖuƒea ŋu bometsitsitɔe. (Psalmo 2:2) Nu kae ado tso eme? Mawu Fiaɖuƒea aɖe amegbetɔwo ƒe dziɖuɖuwo katã ɖa, eye “eya ɖeɖe anɔ anyi tegbee.” (Daniel 2:44) Gake nu ka tae wòahiã be amegbetɔwo ƒe dziɖuɖuwo nu nayi?

Nya Si Biblia Gblɔ: “Ŋusẽ mele amegbetɔ si be eya ŋutɔ nafia mɔ eƒe zɔzɔme o.”—YEREMIYA 10:23.

NU SI WÒFIA: Womewɔ amegbetɔwo be woaɖu wo ɖokuiwo dzi o. Womete ŋu le wo nɔvi amegbetɔwo dzi ɖum nyuie o, eye womete ŋu le woƒe kuxiwo hã gbɔ kpɔm o.

BU EŊU KPƆ: Agbalẽ si nye Britannica Academic gblɔ be: “Edze be dziɖuɖuwo mete ŋu le xexea ƒe kuxiwo gbɔ kpɔm o; eƒe ɖewoe nye ahedada, dɔwuame, dɔléle, dzɔdzɔmefɔkuwo, aʋawɔwɔ alo ŋutasẽnuwɔna bubuawo.” Eyi edzi be: “Ame aɖewo . . . xɔe se be ne dziɖuɖu ɖeka le xexe bliboa dzi ɖum ko hafi woate ŋu akpɔ ta na kuxi mawo.” Ke hã, ne amegbetɔwo ƒe dziɖuɖuwo katã wɔ ɖeka be yewoaɖu xexea dzi gɔ̃ hã, amegbetɔ madeblibowo koe wokpɔtɔ nye, eye womate ŋu aɖe kuxi siwo míeyɔ va yia ɖa gbeɖe o. Mawu Fiaɖuƒea koe nye dziɖuɖu si ate ŋu akpɔ amegbetɔwo ƒe kuxiwo katã gbɔ keŋkeŋ.

Eya ta le Biblia ƒe nya nua, xexea ƒe nuwuwu fia ale si woava ɖe nu vɔ̃ɖi ɖe sia ɖe si li egbea ɖa; esia menye nu si wòle be ame nyuiwo navɔ̃ na o. Enye nu si wòle be woanɔ mɔ kpɔm na boŋ, elabe Mawu ƒe xexe yeyea, si nya kpɔ ŋutɔa ava xɔ ɖe xexe xoxo dzeakaɖa sia teƒe!

Ɣekaɣie nu siawo katã adzɔ? Nyati si kplɔe ɖo ana míakpɔ ale si Biblia ɖo nya sia ŋu.