ƑE 3,000 kple edzivɔe nye esia blemafofo Hiob de dzesii be dziƒoxewo ate ŋu afia nu geɖe mí tso Mawu ƒe asinudɔwo ŋu. Ale si wowɔa nui wɔe be amewo zãa wo le kpɔɖeŋuwo kple kpɔɖeŋunyagbɔgblɔwo me zi geɖe. Teƒe siwo woƒo nu tso dziƒoxewo ŋu le le Biblia me la fia nu vevi aɖewo mí tso agbe kple ale si mía kple Mawu dome le la ŋu. Na míakpɔ eƒe kpɔɖeŋu ʋɛ aɖewo ɖa.

Yerusalem nɔlawo nya sagbadre siwo wɔa woƒe atɔwo ɖe xɔgbatiwo dome la nyuie. Xevi sia ƒe ɖewo wɔ woƒe atɔwo ɖe Salomo ƒe gbedoxɔ me. Anɔ eme be sagbadre siwo wɔa atɔ ɖe gbedoxɔa me kpɔe be teƒe ma le dedie, eye yewoate ŋu anyi yewo viwo le afi ma.

Psalmo 84 lia kpala, si nye Kora vi, ame si subɔna le gbedoxɔa me kwasiɖa ɖeka le ɣleti ade ɖe sia ɖe me la kpɔa atɔ siawo le gbedoxɔa me. Esi wòdzroe be yeanɔ abe sagbadre si nɔa Yehowa ƒe aƒea me ene ɖaa ta la, egblɔ be: “Oo aʋakɔwo ƒe Yehowa, aleke gbegbe wò avɔgbadɔ gã la nyo ŋunye ye nye esi! Yehowa ƒe xɔxɔnuwo le nye ame bliboa dzrom vevie. . . . Xevi gɔ̃ hã kpɔ nɔƒe le afi ma, eye sagbadre wɔ atɔ na eɖokui, afi si wònyia viawo le le wò vɔsamlekpui gã la gbɔ, Oo aʋakɔwo ƒe Yehowa, nye Fia, kple nye Mawu!” (Psalmo 84:1-3) Ðe wòdzroa mí kple mía viwo hã be míakpɔ ŋudzedze ɖe Mawu ƒe amewo dome nɔnɔ ŋua?—Psalmo 26:8, 12.

Nyagblɔɖila Yeremiya gblɔ be: “Damixe le dziƒo gɔ̃ hã nya eƒe azã.” Anye be enya nu tso damixe siwo ʋuna vaa Ŋugbedodonyigbaa dzi la ŋu. Wode dzesii be le adame la, damixe ɣi siwo wu 300,000 la, ʋuna tso Afrika toa Yordan-balia me yia Dziehe Europa. Woƒe dzɔdzɔmenunya kpena ɖe wo ŋu wonyana be ele be yewoatrɔ agbɔ le dzomeŋɔli ava ƒo vi. Abe xe bubu siwo ʋuna ene la, wodzea si “woƒe gbɔgbɔɣi.”—Yeremiya 8:7.

Agbalẽ aɖe (Collins Atlas of Bird Migration) si ƒo nu tso xewo ƒe ʋuʋu ŋu gblɔ be: “Dzɔdzɔmenunya aɖe le xewo si si kpena ɖe wo ŋu woʋuna nukutɔe.” Yehowa Mawu na dzɔdzɔmenunya xe siwo ʋuna yia teƒe bubuwo gake ena ŋutete amegbetɔwo ya be woate ŋu ase nu si ɣeyiɣiwo kple azãgbewo fia la gɔme nyuie. (Luka 12:54-56) To vovo na damixe si nɔa te ɖe dzɔdzɔmenunya si wonae la ko dzi la, amegbetɔwo ya dze si Mawu eye esia kpena ɖe wo ŋu wonyaa nu siwo le dzɔdzɔm kple ɣeyiɣi siwo me míele la. Israel-vi siwo nɔ anyi le Yeremiya ƒe ŋkekeawo me ŋe aɖaba ƒu  dzesi siawo dzi. Mawu gblɔ nu si gbɔ kuxia tso la be: “Yehowa ƒe nyae wogbe, ekema nunya ka gɔ̃e le wo si?”—Yeremiya 8:9.

Kpeɖodziawo dze ƒãa be míele nu si Biblia yɔ be “ŋkeke mamlɛawo” la me. (2 Timoteo 3:1-5) Ðe nàsrɔ̃ damixe ahalé ŋku ɖe ‘azãwo’ ŋua?

Woƒo nu tso hɔ̃ ŋu zi geɖe le Biblia me, eye xe siawo bɔ ɖe Ŋugbedodonyigbaa dzi. Togbɔ be hɔ̃ wɔa atɔ ɖe agakpe kɔkɔwo dzi hã la, ‘edia nuɖuɖu, eƒe ŋkuwo kpɔa nu le didiƒe ʋĩi ke.’ (Hiob 39:27-29) Wogblɔ be hɔ̃ kpɔa nu ale gbegbe be ne ele dzi abe kilometa 1 ene hã ate ŋu akpɔ fɔmizi le anyigba.

Abe ale si hɔ̃ “kpɔa nu le didiƒe ʋĩi ke” ene la, Yehowa ate ŋu akpɔ etsɔme ʋĩi ke. Eya ta Yehowa gblɔ be: “[Megblɔa] nu si ava dzɔ la tso gɔmedzedzea me ke, kple nu siwo womewɔ haɖe o la fiana tso gbe aɖe gbe ke.” (Yesaya 46:10) Ne míeɖoa to Yehowa la, ke ana eƒe nunya si ɖeke mesɔ kpli o la mí eye míanya nu siwo ava dzɔ le etsɔme.—Yesaya 48:17, 18.

Biblia tsɔ ame siwo ɖoa ŋu ɖe Mawu ŋu sɔ kple hɔ̃ esi wògblɔ be: “Ŋusẽ yeye aɖo ame siwo kpɔa mɔ na Yehowa ya ŋu. Woadzo ayi dzi abe hɔ̃ ene.” (Yesaya 40:31) Ne hɔ̃ le dzodzom la, ezãna ya xɔdzo si ƒona yia dzi tẽ. Ne xevi sia nya dzo ɖo ya xɔdzoa me ko la ekea eƒe aʋalawo me nɔa xlã ƒom le ya la me, si wɔnɛ be yaa kɔnɛ yia dzi ʋĩi. Hɔ̃ mezãa eya ŋutɔ ƒe ŋusẽ fũu ne ele dzodzom yi didiƒe alo le agba sam le yame o. Nenema kee Yehowa do ŋugbe be yeana “ŋusẽ si gbɔ dzɔdzɔmetɔ ŋu” ame siwo ɖoa ŋu ɖe ye ŋu.—2 Korintotɔwo 4:7, 8.

Esi wòsusɔ vie Yesu naku la, elé ŋku ɖe Yudatɔwo ƒe dugã la ŋu. Exa nu gblɔ be: “Yerusalem, Yerusalem, si wu nyagblɔɖilawo, eye wòƒu kpe ame siwo wodɔ ɖo ɖe egbɔ—zi nenie nyemehedi be maƒo viwòwo nu ƒu abe ale si koklonɔ ƒoa viawo nu ƒu ɖe eƒe aʋalawo te ene o! Ke mielɔ̃ o.”—Mateo 23:37.

Le dzɔdzɔme nu la, xewo dina vevie be yewoakpɔ yewo vi fɛ̃wo ta. Ele be xe siwo medzona o, abe koklowo ene la nanɔ ŋudzɔ vevie ɖe afɔkuwo ŋu. Ne koklonɔ kpɔ aʋako wòle agba sam le yame la, exlɔ̃na sesĩe, eye viawo wɔna kaba va bena ɖe eƒe aʋalawo te be woanɔ dedie. Ne via fɛ̃wo le eƒe aʋalawo te la, akpɔ wo ta tso ŋdɔkutsu kple tsidzadza si me. Nenemae Yesu di be yeakpɔ Yerusalem nɔlawo ta le gbɔgbɔ me hafi. Egbea hã Yesu le mía kpem be míava ye gbɔ ne yeana gbɔdzɔe mí ahakpɔ mía ta tso kuxi siwo míedoa goe le agbe me la me.—Mateo 11:28, 29.

Nyateƒee, míate ŋu asrɔ̃ nu geɖe tso xe siawo gbɔ. Ne èle ŋku lém ɖe woƒe nuwɔnawo ŋu la, ɖo ŋku ale si Ŋɔŋlɔawo ƒo nu tso wo ŋu le kpɔɖeŋumɔwo nu ŋu la dzi. Na sagbadrewo nakpe ɖe ŋuwò nàkpɔ ŋudzedze ɖe Yehowa ƒe tadeaguƒea ŋu. Kpɔ Mawu sinu be wòana mɔkpɔkpɔ wò be nàte ŋu awɔ nu abe hɔ̃ ene. Va Yesu gbɔ be wòafia Biblia me nyateƒe si akpɔ tawò abe ale si koklonɔ kpɔa viawo ta ene. Eye na damixe naɖo ŋku edzi na wò be ele be nànɔ ŋudzɔ be nàte ŋu ade dzesi nu siwo le dzɔdzɔm le míaƒe ɣeyiɣiawo me.