ÐE NÈTO kuxi aɖe me kpɔ eye wòwɔ na wò be ame aɖeke meli akpe ɖe ye ŋu oa? Míele ‘ɣeyiɣi sesẽ siwo me nɔnɔ sesẽ’ la me, eya ta ɣeaɖewoɣi la, dzi ɖena le mía ƒo eye míetsia akogo. (2 Tim. 3:1) Gake amewo li akpe ɖe mía ŋu míakpe akɔ kple kuxiawo. Biblia ɖee fia be xɔlɔ̃ vavãwo ƒe kpekpeɖeŋu ɖea vi ŋutɔ le “xaxagbe.”—Lod. 17:17.

Apostolo Paulo ƒe mɔzɔhatiwo kpe ɖe eŋu ŋutɔ le eƒe dutanyanyuigbɔgblɔ mɔzɔzɔwo me. (Kol. 4:​7-11) Esi Paulo nɔ gaxɔ me le Roma la, exɔlɔ̃wo wɔ dɔ vovovo siwo eya ŋutɔ mate ŋu awɔ o la nɛ. Le kpɔɖeŋu me, Epafrodito xɔ nu siwo nɔvi siwo le Filipi dzɔ la yi na Paulo. (Flp. 4:18) Tikiko hã tsɔ lɛta siwo Paulo ŋlɔ la yi na hame vovovoawo. (Kol. 4:7.) Paulo xɔlɔ̃wo ƒe kpekpeɖeŋu wɔe be ete ŋu wɔ eƒe subɔsubɔdɔa esi wosikae ɖe aƒe me alo lée de gaxɔ me gɔ̃ hã. Aleke wò hã nàte ŋu anye xɔlɔ̃ vavã egbea?

Egbea, nɔvi geɖe ƒe nuteƒekpɔkpɔwo ɖee fia be xɔlɔ̃ vavãwo ƒe kpekpeɖeŋu ɖea vi ŋutɔ. Le kpɔɖeŋu me, nɔvinyɔnu aɖe ɖee fia be yenye xɔlɔ̃ vavã na Elisabet si nye gbesiagbe mɔɖela le Spain. Esi wokpɔ kansa le Elisabet dada ŋua, nɔvinyɔnua ŋlɔa dzideƒonya geɖe tso Ŋɔŋlɔawo me ɖona ɖee. Elisabet gblɔ be: “Nya mawo doa ŋusẽm metea ŋu wɔa nye gbesiagbedɔwo eye nyemegatsia akogo.”—Lod. 18:24.

Ne míekpena ɖe mía nɔviwo ŋu wodea gbeadzi alo kpekpeawo la, mía kpli wo dome ava nɔ kplikplikpli. Le kpɔɖeŋu me, ɖe nàte ŋu akɔ nɔvi tsitsi aɖe ɖe wò ʋu me ayi kpekpea alo gbeadzia? Esia ate ŋu ana mɔnukpɔkpɔ mi be miade dzi ƒo na mia nɔewo. (Rom. 1:12) Ke hã la, mía nɔvi aɖewo tsi teƒe ɖeka. Aleke míate ŋu anye xɔlɔ̃ vavã na woawo hã?

Lãmegbegblẽ kple kuxi bubuwo wɔnɛ be mía nɔvi aɖewo megatea ŋu dea kpekpeawo le Fiaɖuƒe Akpata me o. Le kpɔɖeŋu me, wokpɔ kansa ƒomevi aɖe le nɔvi aɖe si ŋkɔe nye David ŋu. Wozã dɔdamɔnu sesẽ aɖe nɛ ɣleti ade kple edzivɔ. Le ɣeyiɣi mawo katã mea, David kple srɔ̃a Lidia kpɔa gome le kpekpeawo katã me to videokadodo dzi.

Aleke wo xɔlɔ̃ siwo le hamea mea kpe ɖe wo ŋui? Le kpekpe ɖe sia ɖe ƒe nuwuwu la, ame siwo le Fiaɖuƒe Akpata mea, ɖoa dze kple David kple Lidia to videokadodoa dzi. Azɔ hã ne David kple Lidia ɖo nya ŋu le kpekpea mea, nɔviawo ŋlɔa dzideƒonyawo ɖona  ɖe wo emegbe. Vi kae esia ɖe? David kple Lidia kpɔe be yewometsi akogo o.

Ðe nàte ŋu awɔ ɖoɖo be nɔvi siwo mate ŋu ado ayi gbeadzi o la nakpɔ gome le subɔsubɔdɔa me kpli wòa? Esia ate ŋu abia be míawɔ asitɔtrɔ vivivi aɖewo, ke hã ana nɔvi siawo nakpɔe be míeŋlɔ yewo be o. (Lod. 3:27) Ðe nàte ŋu awɔ ɖoɖo kpli wo be miaɖi ɖase to lɛta ŋɔŋlɔ alo telefon dzia? Hamemetsitsiawo ate ŋu awɔ ɖoɖo be nɔvi siwo tsi teƒe ɖeka la nakpɔ gome le kpekpewo hena gbeadziyiyi me to video alo telefon kadodo dzi. Ðoɖo ma ɖe vi na David kple Lidia ŋutɔ. David gblɔ be, “Ne míewɔ ɖeka kple míaƒe gbeadziƒuƒoƒoa hese numedzodzroa kple gbedodoɖa la, ema teti gɔ̃ hã doa ŋusẽ mí ŋutɔ.” Azɔ hã ne nɔnɔmeawo sɔ eye magblẽ naneke oa, ɖe nàte ŋu akplɔ wò Biblia nusrɔ̃vi ɣeaɖewoɣi miayi nɔvi si tsi teƒe ɖeka gbɔ be miasrɔ̃ nua?

Ne míewɔa dɔ aduadu kple mía nɔvi siwo tsi teƒe ɖeka la, míava de dzesi woƒe nɔnɔme nyuiwo eye mía kpli wo dome ava nɔ kplikplikpli. Le kpɔɖeŋu me, ne èwɔ dɔ kpli wo le gbeadzi ɖekae eye nède dzesi ale si wozãa Mawu ƒe Nyaa aɖaŋutɔe tsɔ ɖoa amewo ƒe dzi gbɔ la, woƒe nu aganyo ŋuwò ɖe edzi. Ne èwɔa dɔ kple nɔviwo ɖekae le subɔsubɔdɔa mea, esia ate ŋu ana nàdze xɔlɔ̃ yeyewo.—2 Kor. 6:13.

Paulo kpɔ akɔfafa esi exɔlɔ̃a Tito va srãe kpɔ. (2 Kor. 7:​5-7) Enyo eye wòsɔ be míagblɔ nyawo atsɔ ade dzi ƒo na mía nɔviwo. Gake kpɔɖeŋu si Tito ɖo la na míekpɔe be eɖea vi ŋutɔ ne míeyi wo gbɔ hewɔ nu si míate ŋui tsɔ kpe ɖe wo ŋu.—1 Yoh. 3:18.

Ale si mía nɔvi siwo le Russia le kpekpem ɖe wo nɔewo ŋu le yometiti mea, nye kpɔɖeŋu nyui aɖe ŋutɔ. Bu nu si me Sergey kple srɔ̃a Tatyana to ŋu kpɔ. Esi poliswo va woƒe aƒe me heka woƒe nuwo me vɔa, wokplɔ wo dzoe be woabia gbe wo. Woɖe asi le Tatyana ŋu gbã wòtrɔ ayi aƒe me. Sergey gblɔ be: “Esi [Tatyana] nya ɖo aƒe me teti koa, nɔvinyɔnu dzinɔameƒotɔ aɖe va kpɔe ɖa. Mía xɔlɔ̃ bubuwo hã va kpe ɖe mía ŋu míedzra aƒea me ɖo heɖo nuwo ɖe ɖoɖo nu.”

Sergey gblɔ kpee be: “Lododowo 17:17 me nyawo dzɔa dzi nam ŋutɔ, afi ma gblɔ be: ‘Xɔlɔ̃ vavã lɔ̃a ame ɣeawokatãɣi eye ame nɔvi wònye wodzi ɖe xaxagbe ŋu.’ Megava se nya sia gɔme ɖe edzi le yometiti ƒe ɣeyiɣia me, elabe woƒe kpekpeɖeŋu manɔmee la, anye ne nu aglo mí. Yehowa na xɔlɔ̃ siwo kpena ɖe ŋunye vɔvɔ̃manɔmee lam.”

Esi nɔnɔmeawo anɔ sesẽm ɖe edzi ta la, míehiã xɔlɔ̃ siwo anɔ kpekpem ɖe mía ŋu. Míagahiã woƒe kpekpeɖeŋu geɖe wu le xaxa gã la me. Eya ta mina míaɖoe kplikpaa be míanye xɔlɔ̃ vavãwo fifia!—1 Pet. 4:​7, 8.