NUSƆSRƆ̃NYATI 8
HADZIDZI 130 Lɔ̃ Tsɔtsɔke
Srɔ̃ Yehowa Ƒe Tsɔtsɔke
“Ale si ko Yehowa tsɔ ke mi faa la, miawo hã miwɔ nenema ke.”—KOL. 3:13.
TAÐODZINUA
Le nyati sia mea, míasrɔ̃ nu ŋutɔŋutɔ siwo míawɔ be míatsɔ ake ame siwo dze agɔ le mía dzi.
1-2. (a) Nu kae ate ŋu ana wòasesẽ na mí vevie be míatsɔ ake? (b) Aleke Denise ɖee fia be yetsɔ ke ame aɖe si do vevesese nɛ?
ÐE WÒSESẼNA na wò be nàtsɔ akea? Esesẽna na mía dometɔ geɖe, vevietɔ ne ame aɖe gblɔ nya aɖe alo wɔ nane si gbã dzi na mí vevie. Gake míate ŋu aɖu míaƒe seselelãmewo dzi eye míatsɔ ake. Le kpɔɖeŋu me, bu nɔvinyɔnu Denise a ŋu kpɔ. Eɖo tsɔtsɔke ƒe kpɔɖeŋu ɖedzesi aɖe. Le ƒe 2017 me la, Denise kple eƒe ƒomea ɖi tsa yi Yehowa Ðasefowo ƒe Dɔwɔƒegã si nu woʋu yeyee. Esi wotrɔ gbɔna aƒe me la, ʋukula bubu tra mɔ va lɔ woƒe ʋua ɖe eme. Denise yi ɖi me enumake. Esi wònyɔ la, ese be ye viwo xɔ abi vevie eye ye srɔ̃ Brian ya ku. Esi Denise bu nu si dzɔ ŋu la, egblɔ be: “Nye dzi gbã eye metɔtɔ.” Emegbe esi wòva see be menye ɖe ʋukulaa ɖoe va lɔ yewo ɖe eme o la, edo gbe ɖa na Yehowa be wòana yeƒe dzi nafa ale be yemalée ɖe dɔme o.
2 Wotsɔ nya ɖe ʋukula ma ŋu be ewu ame eye wokplɔe yi ʋɔnu. Ne eɖi fɔ la, woadee gaxɔ me. Gake ʋɔnudrɔ̃ƒea na Denise nya be eƒe nyawo dzie yewoanɔ te ɖo anya ale si gbegbe yewoahe to na ŋutsua. Denise gblɔ be: “Emae nye ɣeyiɣi sesẽtɔ kekeake le nye agbe me, eya ta esi womia asim be mava gblɔ nu si dzɔ la, ɖeko wònɔ abe ɖe wosisi abi nam vevie ene.” Le kwasiɖa ʋɛ aɖewo megbe la, Denise dzra ɖo yi ʋɔnua be yeaƒo nu tso nu si dzɔ la ŋu, eye ŋutsu si do vevesese ma gbegbe na eƒe ƒomea hã le eteƒe. Nya kae Denise gblɔ? Egblɔ na ʋɔnudrɔ̃laa be wòakpɔ nublanui na ŋutsua. b Esi Denise wu eƒe nyawo nu la, aɖatsi ge le mo na ʋɔnudrɔ̃laa wògblɔ be: “Mele ʋɔnu drɔ̃m ƒe 25 sɔŋ ye nye esia, gake nyemese nya siawo tɔgbi le ʋɔnudrɔ̃ƒea kpɔ o. Nyemesee kpɔ be ƒome si ŋu wogblẽ nu le la ɖe kuku ɖe ame si nu wotso la ta o. Nyemekpɔ eteƒe ame aɖe ɖe lɔlɔ̃ kple tsɔtsɔke sia gbegbe fia kpɔ o.”
3. Nu kae ʋã Denise wòtsɔ ke?
3 Nu kae kpe ɖe Denise ŋu wòtsɔ ke? Eyae nye be ede ŋugble le Yehowa ƒe tsɔtsɔke ŋu. (Mika 7:18) Ne míekpɔ ŋudzedze ɖe ale si Yehowa tsɔna kea mí ŋu la, aʋã mí be míawo hã míatsɔ ake amewo.
4. Nu kae Yehowa di tso mía si? (Efesotɔwo 4:32)
4 Yehowa di be míatsɔ ake amewo faa abe ale si ko yetsɔna kea mí ene. (Xlẽ Efesotɔwo 4:32.) Ele mɔ kpɔm be míalɔ̃ faa atsɔ ake ame siwo wɔ nu wòve mí vevie. (Ps. 86:5; Luka 17:4) Le nyati sia me la, míadzro nu etɔ̃ siwo akpe ɖe mía ŋu be míalɔ̃ tsɔtsɔke la me.
WƆ NANE TSO ALE SI NÈLE SESEM LE ÐOKUIWÒ ME LA ŊU
5. Ne ame aɖe dze agɔ le mía dzi la, aleke míate ŋu ase le mía ɖokui me? (Lododowo 12:18)
5 Amewo ƒe nuwɔnawo alo nyagbɔgblɔwo ate ŋu ate ɖe mía dzi, vevietɔ ne mía xɔlɔ̃ alo ƒometɔ kplikplikpli wonye. (Ps. 55:12-14) Míate ŋu atsɔ veve siwo míesena le ememe la asɔ kple yitɔame. (Xlẽ Lododowo 12:18.) Ðewohĩ míadze agbagba be míaɖe susu ɖa vevesesea dzi. Gake ewɔwɔ nenema anɔ ko abe yi si wotɔ mí la tsi lãme na mí eye míegbe eɖeɖe ene. Ne míewɔ naneke tso eŋu o la, vevesesea hã akpɔtɔ anɔ anyi.
6. Ne ame aɖe do dziku na mí la, aleke míewɔa nui?
6 Ne ame aɖe dze agɔ le mía dzi la, esia tea ŋu wɔnɛ be míedoa dziku. Biblia gblɔ be esia ate ŋu adzɔ. Gake exlɔ̃ nu mí hã be míagana dzikua naɖu mía dzi o. (Ps. 4:4; Ef. 4:26) Nu ka tae? Elabena míaƒe seselelãmewo kpɔa ŋusẽ ɖe míaƒe nuwɔnawo dzi. Eye zi geɖe la, dziku menana wowɔa nu dzɔdzɔe o. (Yak. 1:20) Ðo ŋku edzi be amewo ƒe nuwɔna ate ŋu aho dzi na mí, gake mía ŋutɔwoe atiae be míalé dzikua ɖi.
Amewo ƒe nuwɔna ate ŋu aho dzi na mí, gake mía ŋutɔwoe atiae be míalé dzikua ɖi
7. Ne ame aɖe wɔ nu wòve mí la, mɔ bubu kawo nue wòate ŋu aɖe fu na mí le?
7 Ne ame aɖe mewɔ nu ɖe mía ŋu nyuie o la, esia ate ŋu aɖe fu na mí le mɔ bubuwo hã nu. Le kpɔɖeŋu me, nɔvinyɔnu Ann gblɔ be: “Esi menye ɖevi la, fofonye gbe nɔnye vae ɖe vidzikpɔla si woxɔ be wòanɔ be lém nam. Mese le ɖokuinye me be fofonye gblẽm ɖi. Esi eya kple nyɔnua wodzi viwo la, ewɔ nam be ɖevi siawo va xɔ ɖe tenyeƒe eye nyemegale vevie o.” Nɔvinyɔnu Georgette si srɔ̃ mewɔ nuteƒe nɛ o la ɖe eƒe seselelãmewo gblɔ be: “Xɔlɔ̃wo míenye tso ɖevime ke. Míewɔ mɔɖeɖedɔa ɖekae. Nu si wòwɔa gbã dzi nam ŋutɔ!” Mlɔeba, woƒe srɔ̃ɖeɖea wu enu. Nɔvinyɔnu Naomi hã gblɔ be: “Nyemebui kpɔ be srɔ̃nye awɔ nu wòavem alea o. Eya ta esi wòʋu eme be yekpɔ amamaɖeɖenuwɔnawo le adzame la, mese le ɖokuinye me be mewɔ nuteƒe nam o.”
8. (a) Susu kawo tae wòle be míatsɔ ake amewo? (b) Ne míetsɔna kea amewo la, aleke wòɖea vi na mí? (Kpɔ aɖaka si nye “ Ke Ne Ame Aɖe Ƒe Nuwɔna Gblẽ Nu Le Mía Ŋu Vevie Ya Ðe?”)
8 Míate ŋu akpɔ ŋusẽ ɖe nya si amewo gblɔna kple nu si wowɔna ɖe mía ŋu dzi o. Gake nu si dzi míate ŋu akpɔ ŋusẽ ɖoe nye ale si míawɔ nu le nɔnɔme siawo me. Zi geɖe la, nu nyuitɔe nye be míatsɔ ake. Nu ka tae? Elabe míelɔ̃ Yehowa, eye edi be míatsɔ ake. Ne míelé dziku ɖe dɔme eye míetsɔ ke o la, ele bɔbɔe be míawɔ nane si me nunya mele o eye ɖeko woàgblẽ nu le míaƒe lãmesẽ ŋu. (Lod. 14:17, 29, 30) Bu nu si me nɔvinyɔnu Christine to ŋu kpɔ. Egblɔ be: “Ne dzi kum la, nyemetea ŋu koa nu o. Nyemegatea ŋu ɖua nu siwo ade nye lãmesẽ dzi o. Nyemegatea ŋu dɔa alɔ̃ nyuie o, medoa dziku kabakaba eye nyemegawɔa nu ɖe srɔ̃nye kple ame bubuwo ŋu nyuie o.”
9. Nu ka tae wòle be míaɖe asi le dziku ŋu?
9 Ne ame si dze agɔ le mía dzi meva ɖe kuku na mí o gɔ̃ hã, míate ŋu aɖe vevesese si wòdo na mí la dzi akpɔtɔ. Le mɔ ka nu? Georgette si ŋu míeƒo nu tsoe gblɔ be: “Togbɔ be exɔ ɣeyiɣi hã la, meɖe asi le dziku ŋu eye metsɔ ke srɔ̃nye xoxoa. Esia na nye dzi dze eme.” Ne míeɖe asi le dziku ŋu la, mía kple ame bubuwo dome anyo. Aɖe vi na mía ŋutɔwo hã elabe míagakpɔ dzidzɔ ake eye míanɔ nu si dzɔa ŋu bum fũu akpa o. (Lod. 11:17) Ke nu kae nàwɔ ne egale sesẽm na wò kokoko be nàtsɔ ake?
NU SI AKPE ÐE ŊUWÒ NÀÐE ASI LE DZIKU ŊU
10. Nu ka tae wòle be míana ɣeyiɣi mía ɖokui be míaƒe dziku nu nafa? (Kpɔ nɔnɔmetataawo hã.)
10 Nu kae akpe ɖe ŋuwò nàɖe asi le dziku ŋu? Ðekae nye be nàgbɔ dzi ɖi ana ɣeyiɣi aɖe sinu nava yi. Ne ame aɖe xɔ abi vevie eye wokpɔ egbɔ le kɔdzi gɔ̃ hã la, agahiã ɣeyiɣi be wòahaya keŋkeŋ. Nenema kee wòate ŋu axɔ ɣeyiɣi hafi míaƒe dziku nu nafa eye míatsɔ ake tso dzi me.—Nyagb. 3:3; 1 Pet. 1:22.
Ne míedze afɔku la, ehiãna be woalé be na mí eye ɣeyiɣi aɖe sinu nava yi be míate ŋu ahaya. Nenema kee wòle ne ame aɖe dze agɔ le mía dzi (Kpɔ memama 10)
11. (a) Aleke gbedodoɖa akpe ɖe ŋuwò be nàtsɔ ake? (b) Nu kae nèsrɔ̃ tso tsɔtsɔke ŋu le video siwo ŋu woƒo nu tsoe le etenuŋɔŋlɔa me la me?
11 Do gbe ɖa nàbia Yehowa be wòakpe ɖe ŋuwò nàtsɔ ake. c Ann, si ŋu míeƒo nu tsoe gblɔ ale si gbedodoɖa kpe ɖe eŋui. Egblɔ be: “Medo gbe ɖa na Yehowa be wòatsɔ nu si ƒomea me tɔ ɖe sia ɖe wɔ si na nuwo va yi alea akee. Eyome meŋlɔ lɛta na fofonye kple srɔ̃a yeyea hegblɔ na wo be metsɔe ke wo.” Ann gblɔ be: “Esia menɔ bɔbɔe nam ya o. Gake mele mɔ kpɔm be agbagba si medze be masrɔ̃ Yehowa ƒe tsɔtsɔke la aʋã fofonye kple srɔ̃a hã be woava srɔ̃ nu geɖe tso Yehowa ŋu.”
12. Nu ka tae wòle be míaka ɖe Yehowa dzi ke menye ɖe mía ɖokui dzi o? (Lododowo 3:5, 6)
12 Ka ɖe Yehowa dzi, ke menye ɖokuiwò dzi o. (Xlẽ Lododowo 3:5, 6.) Yehowa nya nu si nyo na mí ɣesiaɣi. (Yes. 55:8, 9) Mabia tso mía si gbeɖe be míawɔ nu si agblẽ nu le mía ŋu o. Eya ta ne Yehowa bia tso mía si be míatsɔ ake la, míate ŋu aka ɖe edzi be aɖe vi na mí. (Ps. 40:4; Yes. 48:17, 18) Gake ne míeka ɖe mía ɖokui dzi wɔ nu si míesusu la, esia ate ŋu ana wòasesẽ na mí be míatsɔ ake. (Lod. 14:12; Yer. 17:9) Naomi si ŋu míeƒo nu tsoe va yi la gblɔ be: “Gbã mesusui be tɔnye dzɔ be nyemetsɔ ke srɔ̃nye si kpɔ amamaɖeɖenuwɔnawo o. Menɔ vɔvɔ̃m be agawɔe ake eye wòaŋlɔ ale si gbegbe eƒe nuwɔna do vevesese nam la be. Mesusui hã be Yehowa se egɔme nam. Gake meva de dzesii be togbɔ be Yehowa se egɔme nam hã la, mefia be eda asi ɖe edzi o. Enya ale si mele sesem le ɖokuinye me eye enya hã be ate ŋu axɔ ɣeyiɣi hafi nye dzi nafa, gake edi be matsɔ ake.” d
NA SUSU NYUI NANƆ ASIWÒ ÐE AMEA ŊU
13. Le Romatɔwo 12:18-21 ƒe nya nu la, nu kae wòle be míawɔ?
13 Ne ame aɖe wɔ nane ɖe mía ŋu wòte ɖe mía dzi vevie la, mele be míaɖoe be míazi kpi akpɔe ko evɔ o. Ele be míadze agbagba awɔ ŋutifafa kplii, vevietɔ ne mía nɔvi Kristotɔe wònye. (Mat. 5:23, 24) Le esi nàlé dziku ɖe dɔme teƒe la, kpɔ nublanui eye nàtsɔ ake faa. (Xlẽ Romatɔwo 12:18-21; 1 Pet. 3:9) Nu kae akpe ɖe mía ŋu míawɔ esia?
14. Nu kae wòle be míadze agbagba vevie be míawɔ, eye nu ka tae?
14 Yehowa tsɔa susu ɖoa míaƒe nɔnɔme nyuiwo ŋu. Ele be míawo hã míadze agbagba asrɔ̃ Yehowa atsɔ susu aɖo ame siwo dze agɔ le mía dzi ƒe nɔnɔme nyuiwo ŋu. (2 Kron. 16:9; Ps. 130:3) Zi geɖe la, nu si míadi le amewo ŋue míakpɔ. Ne míaƒe ŋku le woƒe nyuiƒewo ŋu la, míakpɔ wo eye ne woƒe gbagbãƒewoe hã la, míakpɔ wo. Ne míetsɔa susu ɖoa amewo ƒe nyuiƒewo ŋu la, anɔ bɔbɔe na mí be míatsɔ ake wo. Le kpɔɖeŋu me, nɔviŋutsu Jarrod gblɔ be: “Ne metsɔ nu nyui geɖe siwo dzɔa dzi nam le nɔvi aɖe ŋu sɔ kple agɔ si wòdze le dzinye la, enɔa bɔbɔe nam be matsɔ ake.”
15. Nu ka tae wònyo be míagblɔ na ame si dze agɔ le mía dzi be míetsɔe kee?
15 Nu vevi bubu si wòanyo be míawɔ ye nye be míagblɔ na amea be míetsɔe kee. Nu ka tae? Naomi si ŋu míeƒo nu tsoe va yi la gblɔ be: “Srɔ̃nye biam be, ‘Ètsɔe kema?’ Esi meke nu be magblɔ be ‘ɛ̃, metsɔe ke wò’ la, ɖeko nyaa tsi veme nam. Esia na mede dzesii be nyemetsɔe kee tso dzi me ŋutɔŋutɔ o. Le ɣeyiɣi aɖe megbe la, mete ŋu gblɔ nɛ be, ‘Metsɔe ke wò.’ Esi megblɔ nya siawo nɛ la, aɖatsi koe lólo ɖe ŋku dzi nɛ. Ale si wòkpɔ gbɔdzɔe eye nye hã nye dzi dze eme la wɔ nuku nam ŋutɔ. Tso ɣemaɣi la, megava ka ɖe edzi eye míegazu xɔlɔ̃ siwo dome tsi metona o.”
16. Nu kae nèsrɔ̃ tso tsɔtsɔke ŋu?
16 Yehowa di be míalɔ̃ faa atsɔ ake. (Kol. 3:13) Ke hã, ate ŋu asesẽ na mí be míatsɔ ake. Gake míate ŋui ne míewɔ nane tso míaƒe seselelãmewo ŋu, eye míedze agbagba ɖe asi le dziku ŋu. Ne èwɔe alea la, susu nyui anɔ asiwò ɖe amea ŋu.—Kpɔ aɖaka si nye “ Nu Etɔ̃ Siwo Akpe Ðe Ŋuwò Be Nàtsɔ Ake.”
BU ALE SI TSƆTSƆKE ÐEA VII ŊU
17. Ne míetsɔna kea amewo la, aleke wòɖea vi na mí?
17 Susu geɖe li siwo tae wòle be míalɔ̃ faa atsɔ ake. Ðewoe nye esiawo. Gbã, míeɖenɛ fiana be míele mía Fofo Yehowa si kpɔa nublanui la srɔ̃m eye esia wɔnɛ be míaƒe nu dzea eŋu. (Luka 6:36) Evelia, míeɖenɛ fiana be míekpɔ ŋudzedze ɖe ale si Yehowa tsɔ ke míawo hã ŋu. (Mat. 6:12) Eye etɔ̃lia, edea míaƒe lãmesẽ dzi eye mía kple mía xɔlɔ̃wo dome nɔa kplikplikpli.
18-19. Ne míelɔ̃na tsɔna kena faa la, nu nyui kawoe ate ŋu ado tso eme?
18 Ne míetsɔ ke amewo la, nu nyui siwo míele mɔ kpɔm na o tea ŋu dona tsoa eme. Aleae wònɔ na Denise si ŋu míeƒo nu tsoe. Le eƒe manyamanya me la, ŋutsu si na afɔkua dzɔ la ɖoe be yeawu ye ɖokui ne wodrɔ̃ nyaa vɔ. Gake Denise ƒe tsɔtsɔkea wɔ dɔ ɖe edzi ale gbegbe be eva lɔ̃ be Yehowa Ðasefowo nasrɔ̃ Biblia kpli ye.
19 Míate ŋu asusui be manyawɔ be míatsɔ ake o, gake ne míedze agbagba tsɔ ke la, aɖe vi na mí ale gbegbe. (Mat. 5:7) Eya ta, mina mí katã míawɔ míaƒe ŋutete ɖe sia ɖe be míasrɔ̃ Yehowa ƒe tsɔtsɔke.
HADZIDZI 125 “Dzidzɔtɔwoe Nye Nublanuikpɔlawo!”
a Míetrɔ ŋkɔ aɖewo.
b Le nɔnɔme sia tɔgbi me la, Kristotɔ ɖe sia ɖe ŋutɔe atso nya me le nu si wòawɔ ŋu.
c Ʋu jw.org be nàkpɔ hakpakpa ƒe video siwo nye “Míatsɔ Ake Mía Nɔewo,” “Tsɔ Ke Faa,” kple “Míagazu Xɔlɔ̃wo Ake.”
d Togbɔ be amamaɖeɖe kple gbɔdɔnuwɔnawo kpɔkpɔ nye nu vɔ̃ eye wògblẽa nu hã la, le Ŋɔŋlɔawo nu la, srɔ̃tɔ maɖifɔa mate ŋu anɔ te ɖe edzi agbe srɔ̃a o.
