1-2. (a) Le Efesotɔwo 6:16 ƒe nya nu la, nu ka tae míehiã na “xɔse ƒe akpoxɔnu gã” la? (b) Biabia kawo me míadzro?

ÐE “XƆSE ƒe akpoxɔnu gã” le asiwòa? (Xlẽ Efesotɔwo 6:16.) Ðikeke mele eme o be ele asiwò. Abe ale si akpoxɔnu gã aɖe kpɔa ameti bliboa ta ene la, wò xɔse kpɔa tawò be nu gbegblẽ siwo xɔ aƒe ɖe xexe gblẽku sia me, abe gbɔdɔdɔ manɔsenu, ŋutasẽnuwɔwɔ, kple mawumavɔmavɔ̃nuwɔnawo ene, nagakpɔ ŋusẽ ɖe dziwò o.

² Ke hã, míele “ŋkeke mamlɛawo” me, eye xɔse ƒe dodokpɔwo ava mía dzi godoo. (2 Tim. 3:1) Aleke nàte ŋu alé ŋku ɖe wò xɔse ƒe akpoxɔnua ŋu be nàkpɔ egbɔ be xɔse sẽŋu le asiwò? Eye nu kawoe nàwɔ be nàte ŋu alé wò akpoxɔnua ɖe asi sesĩe? Na míadzro biabia mawo me be míakpɔ ŋuɖoɖo na wo.

3. Nu kae asrafowo wɔna na woƒe akpoxɔnuwo, eye nu ka tae?

³ Le Biblia-ŋlɔɣiwo la, zi geɖe la, akpoxɔnu siwo ŋu wofa lãgbalẽ ɖo la nɔa asrafowo si. Asrafoawo sisia ami ɖe woƒe akpoxɔnua ŋu be lãgbalẽa nagagblẽ o eye woƒe akpa siwo wotsɔ ga wɔe la nagalé ɣebia o. Ne asrafo aɖe de dzesii be nane gblẽ le yeƒe akpoxɔnua ŋu la, ekpɔa egbɔ be yedzrae ɖo ale be yeanɔ klalo na aʋawɔwɔ ɣeawokatãɣi. Aleke kpɔɖeŋu ma ku ɖe wò xɔse ŋu?

4. Nu ka tae wòle be nàlé ŋku ɖe wò xɔse ƒe akpoxɔnua ŋu, eye aleke wòle be nàwɔ esiae?

⁴ Abe blemasrafowo ene la, ele be nànɔ ŋku lém ɖe wò xɔse ƒe akpoxɔnua ŋu edziedzi ahanɔ be lém nɛ ale be nànɔ klalo na aʋawɔwɔ ɣeawokatãɣi. Esi míenye Kristotɔwo ta la, míele gbɔgbɔmeʋa wɔm eye míaƒe futɔawo dometɔ aɖewo nye gbɔgbɔ vɔ̃wo.  (Ef. 6:10-12) Ame bubu aɖeke mate ŋu alé be na wò xɔse ƒe akpoxɔnua na wò o. Aleke nàwɔ aka ɖe edzi be xɔse sẽŋu si ate ŋu ana nàɖu dodokpɔwo dzi la le asiwò? Gbãa, ele be nàdo gbe ɖa abia Mawu be wòakpe ɖe ŋuwò. Eyome, ehiã be nàzã Mawu ƒe Nyaa atsɔ adzro ɖokuiwò me be nàkpɔ ɖokuiwò abe ale si Mawu kpɔa wò ene. (Heb. 4:12) Biblia gblɔ be: “Ðo ŋu ɖe Yehowa ŋu tso dzi blibo me, eye mègaɖo ŋu ɖe wò ŋutɔ wò gɔmesese ŋu o.” (Lod. 3:5, 6) Esi nya sia le susu me na wò la, de ŋugble le nyametsotso aɖe si nèwɔ nyitsɔ laa ŋu eye nàkpɔe ɖa be esɔ loo alo mesɔ o hã. Le kpɔɖeŋu me, ɖe nèkpɔ ɖokuiwò le gakuxi sesẽ aɖe me nyitsɔ laa? Esi nènɔ agbagba dzem be yeakpɔ kuxia gbɔ la, ɖe Yehowa ƒe ŋugbedodo si dze le Hebritɔwo 13:5, si gblɔ be, “Nyemaɖe asi le ŋuwò akpɔ o, eye nyemagblẽ wò ɖi hã akpɔ o” la, va susu me na wòa? Ðe ŋugbedodo ma na nèka ɖe edzi be Yehowa akpe ɖe ŋuwòa? Ne nenemae la, ema nye dzesi be èle be lém na wò xɔse ƒe akpoxɔnua nyuie.

5. Ne èdzro ɖokuiwò me kpɔ la, nu kae nàte ŋu ade dzesi le wò xɔse ŋu?

⁵ Ne èdzro ɖokuiwò me kpɔ nyuie la, ɖewohĩ, nu siwo nàde dzesi le wò xɔse ŋu la awɔ nuku na wò. Àte ŋu ade dzesi gbɔdzɔgbɔdzɔ aɖewo siwo le nu gblẽm le wò xɔse ŋu ɣeyiɣi aɖewoe nye esia evɔ mènya o. Le kpɔɖeŋu me, ɖewohĩ, àde dzesii be dzimaɖitsitsi atraɖii, alakpanyawo, kple dziɖeleameƒo le nu gblẽm le wò xɔse ŋu. Ne esia dzɔ ɖe dziwò la, aleke nàte ŋu akpɔ wò xɔse ta be esia nagayi edzi ahagblẽ nu geɖe le wò xɔse ŋu o?

6. Nu siwo ŋu wòsɔ be míatsi dzimaɖi le la ƒe kpɔɖeŋu aɖewo ɖe?

⁶ Esɔ be míatsi dzimaɖi le nanewo ŋu. Le kpɔɖeŋu me, esɔ be míatsi dzi be míadze Yehowa kple Yesu ŋu. (1 Kor. 7:32) Ne míewɔ nu vɔ̃ si nye ŋkubiãnya la, míetsia dzimaɖi vevie be míadzra ƒomedodo si le mía kple Mawu dome ɖo. (Ps. 38:18) Azɔ hã, míetsia dzimaɖi be míadze mía srɔ̃ ŋu, eye nenema kee míetsia dzimaɖi ɖe míaƒe ƒometɔwo kple haxɔsetɔwo ƒe nyonyo ta.—1 Kor. 7:33; 2 Kor. 11:28.

7. Le Lododowo 29:25 ƒe nya nu la, nu ka tae mehiã be míavɔ̃ amegbetɔ o?

⁷ Gake dzimaɖitsitsi atraɖii ya ate ŋu agblẽ nu le míaƒe xɔse ŋu. Le kpɔɖeŋu me, míate ŋu ava nɔ dzimaɖi tsim atraɖii be nuɖuɖu si asu na mí kpakple nudodowo nasu mía si. (Mat. 6:31, 32) Ðewohĩ, esi míele agbagba dzem be míagatsi dzimaɖi ɖe nu mawo ŋu fũu o la, míava ƒo mía ɖokui ɖe ŋutilãmenuwo yome titi me. Esia ate ŋu awɔe be míava te galɔlɔ̃ gɔ̃ hã. Ne míeɖe mɔ esia dzɔ la, ana míaƒe xɔse nagbɔdzɔ eye esia agblẽ ƒomedodo si le mía kple Yehowa dome la me. (Marko 4:19; 1 Tim. 6:10) Alo ɖewohĩ, dzimaɖitsitsi atraɖii ƒomevi bubu aɖe ate ŋu agblẽ nu le míaƒe xɔse ŋu—esiae nye didi vevie be amewo nakpɔ ŋudzedze ɖe mía ŋu. Esia awɔe be míava nɔ vɔvɔ̃m na amewo ƒe fewuɖuɖu alo yometiti tsɔ wu be míavɔ̃ be míagava dze Yehowa ŋu o. Ele be míaƒo koko na Yehowa vevie be wòana xɔse kple dzinɔameƒo si míehiã la mí ale be míakpɔ mía ɖokui ta tso afɔku ma me.—Xlẽ Lododowo 29:25; Luka 17:5.

8. Aleke wòle be míawɔ nu ɖe alakpanya siwo amewo kakana tso Yehowa ŋu la ŋu?

⁸ Satana, si nye “aʋatsokafofo” la, zãa ame siwo le eƒe ŋusẽ te la tsɔ kakaa alakpanyawo tso Yehowa kpakple mía nɔviŋutsuwo kple nɔvinyɔnuwo ŋu. (Yoh. 8:44) Le kpɔɖeŋu me, xɔsegbelawo kakaa alakpanyawo eye wotrɔa gbo nyateƒenya siwo ku ɖe Yehowa ƒe habɔbɔa ŋu la le Internet kple television kpakple nyakakamɔnu bubuwo dzi. Alakpanya mawo le Satana ƒe “aŋutrɔ bibiawo” dome. (Ef. 6:16) Aleke wòle be míawɔ nui ne ame aɖe va tu mí kple alakpanya mawo tɔgbi? Mele be míaɖo to wo kura o!  Nu ka tae? Nu si tae nye be, míexɔ Yehowa dzi se eye míeka ɖe mía nɔvi Kristotɔwo dzi. Le nyateƒe me la, míeƒoa asa na kadodo ɖe sia ɖe kple xɔsegbelawo. Míeɖea mɔ be ame aɖeke alo naneke, alo ŋkukekeɖenume gɔ̃ hã, nana míadi be míase woƒe nyawo alo ahe nya kpli wo o.

9. Aleke dziɖeleameƒo ate ŋu agblẽ nu le mía ŋu?

⁹ Dziɖeleameƒo ate ŋu ana míaƒe xɔse nagbɔdzɔ. Ɣeaɖewoɣi la, míaƒe kuxiwo ate ŋu ana dzi naɖe le mía ƒo. Ele eme be míate ŋu aŋe aɖaba aƒu kuxi mawo dzi ya o. Gake mele be míaɖe mɔ míaƒe kuxiwo nava xɔ susu me na mí ale gbegbe be míanɔ wo ŋu bum atraɖii o. Ne míeɖe mɔ esia dzɔ la, míaƒe susu adzo le nu wɔnuku siwo ƒe ŋugbe Yehowa do na mí la dzi kura. (Nyaɖ. 21:3, 4) Ne dzi ɖe le mía ƒo alea la, ate ŋu awɔe be ŋusẽ navɔ le mía ŋu eye míava dzudzɔ Yehowa subɔsubɔ mlɔeba. (Lod. 24:10) Gake mele be esia nadzɔ ɖe mía dzi hafi o.

10. Nu kae nèsrɔ̃ tso lɛta aɖe si nɔvinyɔnu aɖe ŋlɔ la me?

¹⁰ Bu ale si nɔvinyɔnu aɖe si le Amerika la le agbagba dzem le ŋusẽ dom eƒe xɔsea esime wòle be lém na srɔ̃a si dze dɔ vevie la ŋu kpɔ. Le lɛta aɖe si wòŋlɔ na míaƒe dɔwɔƒegãa me la, eŋlɔ bena: “Míaƒe nɔnɔmea tea ɖeɖi mía ŋu ale gbegbe eye dzi ɖena le mía ƒo ɣeaɖewoɣi, gake mɔkpɔkpɔ le mía si. Medaa akpe ɖe nu siwo katã Yehowa nana mí be woado ŋusẽ míaƒe xɔse ahade dzi ƒo na mí la ta. Míehiã na aɖaŋuɖoɖo kple dzideƒonya mawo ale gbegbe. Wokpena ɖe mía ŋu be míayi Yehowa subɔsubɔ dzi eye wokpena ɖe mía ŋu hã be míayi edzi ado dzi le dodokpɔ siwo Satana hena vaa mía dzi la me.” Nɔvinyɔnu sia ƒe nyawo na míekpɔe be míate ŋu aɖu dziɖeleameƒo dzi! Le mɔ kawo nu? Woawoe nye esiawo: Ðo ŋku edzi be Satana ƒe aglãdzedzea ye wɔe be fukpekpe mawo le dziwò vam. Ka ɖe edzi be Yehowae nye wò Akɔfafatsoƒe. Eye de asixɔxɔ gbɔgbɔmenuɖuɖu siwo nam wòle wò la ŋu.

11. Nya kawoe wòle be míabia mía ɖokuiwo ale be míanya nenye be xɔse sẽŋu le mía si?

¹¹ Ðe nède dzesi gbegblẽƒe aɖewo le wò xɔse ƒe akpoxɔnua ŋu siwo wòhiã be nàɖɔ ɖoa? Le ɣleti ʋɛ siwo va yi me la, ɖe nète ŋu ƒo asa na dzimaɖitsitsi atraɖiia? Ðe nète ŋu ɖu didi be yease xɔsegbelawo ƒe alakpanya siwo wokakana eye yeaʋli nya kpli wo dzia? Eye ɖe nète ŋu ɖu dziɖeleameƒo dzia? Ne ète ŋu wɔ nu siawo la,  ekema, wò xɔsea le nɔnɔme nyui me. Ke hã, ele be míakpɔtɔ anɔ ŋudzɔ, elabena aʋawɔnu bubuwo le Satana si siwo wòdina be yeatsɔ agblẽ nu le mía ŋu. Azɔ, na míalé ŋku ɖe wo dometɔ ɖeka ŋu.

12. Nu kae ŋutilãmenudidi vivivo ate ŋu agblẽ le mía ŋu?

¹² Ŋutilãmenudidi vivivo ate ŋu ana míaƒe xɔse nagbɔdzɔ eye míagava nɔ geɖe wɔm na Yehowa o. Apostolo Paulo gblɔ be: “Ame si le asrafodɔ wɔm la megaƒoa eɖokui ɖe asitsadɔ siwo amewo wɔna le agbe me la me o, ale be wòadze ame si xɔe ɖe asrafodɔa me la ŋu.” (2 Tim. 2:4) Le nyateƒe me la, womeɖe mɔ na Roma srafo siwo nɔ anyi le blema la be woaƒo wo ɖokuiwo ɖe asitsadɔ aɖeke me o. Ne asrafo aɖe ŋe aɖaba ƒu nudidi ma dzi la, nu kae ate ŋu adzɔ?

13. Nu ka tae asrafo aɖeke madi be yeaƒo ye ɖokui ɖe asitsadɔ me o?

¹³ Bu kpɔɖeŋu sia ŋu kpɔ. Asrafoha aɖe xɔ hehe ŋdi bliboa katã le ale si woazã woƒe yiwo le aʋawɔwɔ me ŋu, gake wo dometɔ ɖeka ya menɔ eteƒe o. Asrafo sia yi dua me ɖavu ɖe dɔ ŋu le eƒe nuɖuɖudzraƒe. Fiẽ me la, asrafo kemɛawo zã ɣeyiɣia nɔ be lém na woƒe aʋawɔnuwo henɔ woƒe yiwo nyrem. Ke hã, asrafo si ɖo nuɖuɖudzraƒe ya zã ɣeyiɣia tsɔ nɔ asi trɔm le nuɖuɖu siwo wòava dzra le ŋufɔke la ŋu. Gake, esi ŋu ke la, futɔ aɖewo va dze wo dzi le vo me. Asrafo kae nèsusu be anɔ klalo na aʋawɔwɔ, eye kae ado dzidzɔ na eƒe aʋafia? Eye ne ènye asrafoawo dometɔ ɖeka le aʋa ma wɔwɔ me la, asrafoawo dometɔ ka ƒe axadzi ye nàdi be yeanɔ—asrafo si le klalo na aʋawɔwɔ loo alo esi ƒe susu ku ɖe asitsatsa ŋu?

14. Esi míenye Kristo ƒe asrafowo ta la, nu kae nɔa vevie na mí?

¹⁴ Abe asrafo nyuiwo ene la, nu si nɔa vevie na mí ye nye be míadze Yehowa kple Kristo, siwo nye míaƒe Aʋafiawo la ŋu. Asixɔxɔ gã le esia ŋu na mí wu nu sia nu si ate ŋu asu mía si le Satana ƒe xexea me. Míekpɔa egbɔ be míekpɔ ɣeyiɣi kple ŋusẽ si míehiã be míasubɔ Yehowa eye míana míaƒe xɔse ƒe akpoxɔnua kpakple gbɔgbɔmeʋawɔnu susɔeawo nakpɔtɔ anɔ nɔnɔme nyui me.

15. Nu ka ŋue Paulo xlɔ̃ nu mí le, eye nu ka tae?

¹⁵ Mele be míaɖe ŋu ɖi gbeɖe o! Nu ka tae?  Apostolo Paulo xlɔ̃ nu mí be “ame siwo ɖoe kplikpaa be yewoazu kesinɔtɔwo la” ava ‘tra mɔ tso xɔse la gbɔ.’ (1 Tim. 6:9, 10) Nyagbɔgblɔ si nye ‘tra mɔ’ la ɖee fia be, míate ŋu ava nɔ didim vevie be nu geɖe siwo míehiã hafi o la nasu mía si. Esia ate ŋu awɔe be míaɖe mɔ míaƒe dzi nava ku ɖe “movidzɔdzɔ ƒe nudzodzro geɖe, siwo wɔa nu vevi ame” la ŋu. Le esi míaɖe mɔ míaƒe dzi nava ku ɖe nudzodzro mawo ŋu teƒe la, ele be míabu wo boŋ be wonye aʋawɔnu siwo Satana zãna be yeatsɔ agblẽ nu le míaƒe xɔse ŋu.

16. Biabia kawo ŋue wòle be ŋutinya si dze le Marko 10:17-22 la naʋã mí míade ŋugble le?

¹⁶ Tsɔe be ga le mía si míate ŋu aƒle nu geɖe ale si míedi. Ne míeƒle nu siwo dzro mí evɔ míehiã wo hafi o la, nu gbegblẽ wònye míewɔa? Manye nu gbegblẽ kokoko o. Gake de ŋugble le biabia siawo ŋu kpɔ: Ne ga le mía si míate ŋu aƒle nane gɔ̃ hã la, ɖe míakpɔ ɣeyiɣi kple ŋusẽ si hiã be míazãe ahanɔ be lém nɛ ale si dzea? Azɔ hã, ɖe wòate ŋu adzɔ be míaƒe dzi nava ku ɖe míaƒe nunɔamesiwo ŋu fũu akpa? Ne míaƒe dzi va ku ɖe ŋutilãmenuwo ŋu ɖe, ɖe esia mawɔe be míava wɔ nu abe ɖekakpui si gbe esime Yesu kpee be wòava wɔ geɖe na Mawu la ene oa? (Xlẽ Marko 10:17-22.) Aleke wòanyo wu ye nye esi be míanɔ agbe tsɛ eye míazã míaƒe ɣeyiɣi xɔasiawo kple míaƒe ŋusẽ atsɔ awɔ geɖe na Mawu!

17. Nu kae mele be míaŋlɔ be gbeɖe o?

¹⁷ Mele be míaŋlɔ be gbeɖe o be aʋagbedzie míele eye ele be míanɔ klalo na aʋawɔwɔ gbe sia gbe. (Nyaɖ. 12:17) Mía nɔviŋutsuwo kple mía nɔvinyɔnuwo mate ŋu atsɔ míaƒe xɔse ƒe akpoxɔnua ɖe mía nu o. Míawo ŋutɔwoe wòle na be míalée ɖe asi sesĩe.

18. Nu ka tae blemasrafowo léa woƒe akpoxɔnuwo ɖe asi sesĩe?

¹⁸ Le blema la, ne asrafo aɖe wɔ kalẽ le aʋawɔwɔ me la, bubu gã aɖe wònyena nɛ. Gake, aɖu ŋukpe ne metsɔ eƒe akpoxɔnua gbɔ va aƒe o. Romatɔ blemaŋutinyaŋlɔla Tacitus ŋlɔ bena: “Ŋukpe gã aɖe wònye be asrafo aɖe nagblẽ eƒe akpoxɔnu ɖe aʋagbedzi.” Esia nye susu ɖeka aɖe si tae asrafowo kpɔa egbɔ be yewolé yewoƒe akpoxɔnuwo ɖe asi sesĩe.

19. Nu kawoe míawɔ be míate ŋu alé míaƒe xɔse ƒe akpoxɔnua ɖe asi sesĩe?

¹⁹ Míeléa míaƒe xɔse ƒe akpoxɔnua ɖe asi sesĩe ne míedea míaƒe Kristotɔwo ƒe kpekpewo edziedzi eye míeƒoa nu tso Yehowa ƒe ŋkɔa kple eƒe Fiaɖuƒea ŋu na amewo. (Heb. 10:23-25) Tsɔ kpe ɖe eŋu la, míedoa gbe ɖa xlẽa Mawu ƒe Nyaa gbe sia gbe eye míewɔna ɖe aɖaŋuɖoɖo kple mɔfiame siwo le eme la dzi le nu sia nu si míewɔna me. (2 Tim. 3:16, 17) Ne míeyi edzi le nu siawo wɔm la, Satana ƒe aʋawɔnu, alo lãnu, aɖeke magblẽ nu le mía ŋu ɖikaa o. (Yes. 54:17) Míaƒe “xɔse ƒe akpoxɔnu gã” la akpɔ mía ta. Ɛ̃, dzi anɔ mía ƒo, eye mía kple mía nɔvi siwo le xexea me godoo míanɔ tsitre sesĩe. Gakpe ɖe eŋu la, menye ɖeko míaɖu aʋa la dzi gbe sia gbe ko evɔ o, ke mɔnukpɔkpɔ asu mía si hã be míanɔ Yesu ƒe akpa dzi esime wòawɔ aʋa kple Satana kpakple eyomedzelawo ahaɖu wo dzi.—Nyaɖ. 17:14; 20:10.