NUSƆSRƆ̃NYATI 45
Miyi Edzi Miaɖe Lɔlɔ̃ Si Nu Metsina O Fia Mia Nɔewo
‘Miɖe lɔlɔ̃ si nu metsina o fia, eye mikpɔ nublanui na mia nɔewo.’—ZAK. 7:9.
HADZIDZI 107 Lɔlɔ̃ Ƒe Kpɔɖeŋu Si Mawu Ðo
NYA VEVIAWO *
1-2. Susu nyui kawo tae wòle be míaɖe lɔlɔ̃ si nu metsina o afia mía nɔewo?
SUSU nyui geɖewo li, siwo tae míaɖe lɔlɔ̃ si nu metsina o afia mía nɔewo. Wo dometɔ aɖewo ɖe? De dzesi ale si lododo siawo ɖo nya ma ŋu: “Lɔlɔ̃ vavã kple nuteƒewɔwɔ megate ɖa le gbɔwò o. . . . Ekema amenuveve kple gɔmesese nyui asu asiwò le Mawu kple amegbetɔwo ŋkume.” “Ame si nyoa dɔme la le nyui wɔm na eya ŋutɔ ɖokui.”—Lod. 3:3, 4; 11:17; 21:21. *
2 Lododo siawo na míekpɔ susu etɔ̃ siwo tae wòle be míaɖe lɔlɔ̃ si nu metsina o afia. Gbã, ne míeɖea lɔlɔ̃ si nu metsina o fiaa, enana míaƒe nu dzea Mawu ŋu. Evelia, eɖea vi na míawo ŋutɔwo. Le kpɔɖeŋu me, enana mía kple mía nɔviwo dome nɔa kplikplikpli. Etɔ̃lia, ne míeyia edzi ɖea lɔlɔ̃ si nu metsina o fiaa, míakpɔ yayrawo le etsɔme kple agbe mavɔ. Eya ta susu nyuiwo li siwo tae wòle be míawɔ ɖe nya si Yehowa gblɔ dzi. Egblɔ be: ‘Miɖe lɔlɔ̃ si nu metsina o fia mia nɔewo, eye mikpɔ nublanui na mia nɔewo.’—Zak. 7:9.
3. Biabia kawo ŋue woaɖo le nyati sia me?
3 Le nyati sia mea, míaɖo nyabiase ene siawo ŋu. Ame kawoe wòle be míaɖe lɔlɔ̃ si nu metsina o afia? Nu kae míate ŋu asrɔ̃ tso lɔlɔ̃ sia ŋu le Rut ƒe agbalẽa me? Aleke míate ŋu aɖe lɔlɔ̃ sia afia egbea? Eye ne míeɖe lɔlɔ̃ sia fiaa, vi kawoe wòɖena na mí?
AME KAWOE WÒLE BE MÍAÐE LƆLƆ̃ SI NU METSINA O AFIA?
4. Aleke míate ŋu asrɔ̃ Yehowa aɖe lɔlɔ̃ si nu metsina o afia? (Marko 10:29, 30)
4 Abe ale si míesrɔ̃e le nyati si do ŋgɔ me enea, Yehowa ɖea lɔlɔ̃ si nu metsina o fiaa ame siwo lɔ̃e, eye wosubɔnɛ. (Dan. 9:4) Míedi be “[míazu] Mawu srɔ̃lawo abe via lɔlɔ̃awo ene.” (Ef. 5:1) Eya ta míedi vevie be míalɔ̃ mía nɔvi siwo le hamea me tso dzi me ke.—Xlẽ Marko 10:29, 30.
5-6. Aleke ame ate ŋu alɔ̃ nane wɔwɔ, evɔ matso eƒe dzi me o? Gblɔ eƒe kpɔɖeŋu?
5 Àlɔ̃ ɖe edzi be, ne míese nu si lɔlɔ̃ si nu metsina o fia gɔme nyui wua, akpe ɖe mía ŋu míagaɖee afia mía nɔviwo geɖe wu. Be míagase eme ɖe edzi wua, na míakpɔ vovototo si le lɔlɔ̃ si nu metsina o kple lɔlɔ̃ dzro ko dome. Bu kpɔɖeŋu sia ŋu kpɔ.
6 Míate ŋu agblɔ tso aƒetɔ aɖe si wɔa dɔ le dɔwɔƒe aɖe ƒe geɖe ŋu be elɔ̃ eƒe dɔa. Ke hã, le ƒe siwo katã wòtsɔ wɔ dɔ le dɔwɔƒea mea, ɖewohĩ menya dɔtɔawo ŋutɔwo o, eye manya lɔ̃ ɖe dɔwɔƒea ƒe se kple ɖoɖo aɖewo dzi o. Gake esi wòkpɔa nu vi aɖe tso afi ma taa, ewɔa dɔa. Ayi edzi awɔ dɔa va se ɖe esime wòxɔ dzudzɔ le dɔa me alo kpɔ dɔ bubu aɖe si nyo wu ema.
7-8. (a) Nu kae ʋãa ame wòɖea lɔlɔ̃ si nu metsina o fiana? (b) Nu ka tae míadzro Rut ƒe agbalẽa ƒe akpa aɖewo me?
7 Le memama 6 lia mea, míekpɔ kpɔɖeŋu aɖe si ku ɖe nu si tae ame aɖe lɔ̃ nane ŋu. Vovototo si le lɔlɔ̃ ma kple lɔlɔ̃ si nu metsina o domee nye be, lɔlɔ̃ si nu metsina o nye nu si ʋãa ame tso dzi me. Nu kae ʋã mawusubɔla siwo nɔ anyi va yi woɖe lɔlɔ̃ si nu metsina o fia? Esi woƒe dzi ʋã wo tae, ke menye esi wòle be woawɔe tae o. Bu David ƒe kpɔɖeŋua ŋu kpɔ. Eƒe dzi ʋãe wòɖe lɔlɔ̃ si nu metsina o fia exɔlɔ̃ Yonatan, togbɔ be Yonatan tɔ di be yeawu David hã. Eye le Yonatan ƒe ku megbea, David yi edzi ɖe lɔlɔ̃ si nu metsina o fia Yonatan vi Mefiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.
8 Míate ŋu asrɔ̃ nu geɖe tso nu si lɔlɔ̃ si nu metsina o fia ŋu le Biblia-gbalẽ si nye Rut me. Nu kawoe míate ŋu asrɔ̃ tso ame siwo ɖe lɔlɔ̃ ma fia le agbalẽ ma me gbɔ? Eye aleke míate ŋu awɔ nufiame mawo ŋu dɔ le míaƒe hamewo me? *
NU KAE MÍATE ŊU ASRƆ̃ TSO LƆLƆ̃ SI NU METSINA O ŊU LE RUT ƑE AGBALẼA ME?
9. Nu kawoe na Naomi susu be Yehowae na vɔ̃ dzɔ ɖe ye dzi?
9 Le Rut ƒe agbalẽa mea, míexlẽ nu tso Naomi, lɔ̃xoyɔvia Rut, kple mawuvɔ̃la Boaz, si nye Naomi srɔ̃ ƒe ƒometɔ ŋu. Esi dɔ to le Israel taa, Naomi, srɔ̃a, kple viaŋutsu eveawo ʋu yi Moab. Naomi srɔ̃ va ku le afi ma. Viaŋutsu eveawo va ɖe srɔ̃, gake nublanuitɔea, viaŋutsu eveawo hã va ku. (Rut 1: 3-5; 2:1) Esia na Naomi ƒe dzi gbã ale gbegbe. Veveseseawo na wòsusu be Yehowae na nu siawo nɔ dzɔdzɔm ɖe ye dzi. De dzesi ale si wòɖe eƒe seselelãmewo gblɔ tso Mawu ŋu. Egblɔ be: “Yehowa do eƒe asi ɖe gbɔnye.” “Ŋusẽkatãtɔ la na nye agbenɔnɔ zu veve sɔŋ.” Egblɔ kpee be: “Yehowa tso ɖe ŋunye, eye Ŋusẽkatãtɔ la na vɔ̃ dzɔ ɖe dzinye.”—Rut 1: 13, 20, 21.
10. Aleke Yehowa wɔ nu ɖe Naomi ŋu le nya siwo wògblɔ ta?
10 Aleke Yehowa wɔ nu ɖe Naomi ŋu le nya siwo wògblɔa ta? Meklɔ asi le eƒe nya me o, ke boŋ ese veve ɖe enu. Yehowa se egɔme be, “ameteteɖeanyi ate ŋu ado aɖaʋa nunyala” gɔ̃ hã. (Nyagb. 7:7) Eya ta ehiã be woakpe ɖe Naomi ŋu wòakpɔe be Yehowa megblẽ ye ɖi o. Nu kae Mawu wɔ tsɔ kpe ɖe eŋu? (1 Sam. 2:8) Mawu ʋã Rut wòɖe lɔlɔ̃ si nu metsina o fia Naomi. Rut kpe ɖe lɔ̃xoa Naomi ŋu dzi gaɖo eƒo, eye wòkpe ɖe eŋu wòkpɔe be Yehowa galɔ̃e. Nu kae míesrɔ̃ tso Rut gbɔ?
11. Nu kae ʋãa nɔviwo wokpena ɖe ame siwo ƒo dzi ɖe le ŋu?
11 Lɔlɔ̃ si nu metsina o ye ʋãa mí míedina be míakpe ɖe ame siwo dzi nu te ɖo ŋu. Abe ale si Rut ku ɖe Naomi ŋu enea, nɔvi siwo li egbea hã lɔ̃na faa kpena ɖe nɔvi siwo ƒo dzi ɖe le le hamea me ŋu. Wolɔ̃ wo nɔviwo, eye wole klalo be yewoawɔ nu sia nu akpe ɖe wo ŋu. (Lod. 12:25, etenuŋɔŋlɔ; 24:10) Esia wɔ ɖeka kple nu si Paulo de dzi ƒo na mí be míawɔ. Egblɔ be: “Mifa akɔ na ame siwo lé blanui, mikpe ɖe gbɔdzɔgbɔdzɔtɔwo ŋu, migbɔ dzi ɖi na amewo katã.”—1 Tes. 5:14.
Ne míelɔ̃ ɖo to mía nɔvi aɖe si ƒo dzi ɖe le la, míate ŋu akpe ɖe eŋu (Kpɔ memama 12 lia)
12. Mɔ vevi ka dzie míato akpe ɖe ame aɖe si ƒo dzi ɖe le ŋu?
12 Nu vevitɔ si nàte ŋu awɔ atsɔ akpe ɖe nɔvi aɖe si ƒo dzi ɖe le ŋue nye be nàɖo toe, eye nàka ɖe edzi nɛ be yelɔ̃e. Ne ètsɔa ɖe le eme na Yehowa ƒe alẽ xɔasi aɖe si ƒo dzi ɖe le, eye nèɖoa toe la, Yehowa dea dzesii. (Ps. 41:1) Lododowo 19:17 gblɔ be: “Ame si vea ame dahe nu la le nu dom na Yehowa, eye aɖo nu si wòwɔ la teƒe nɛ.”
Rut ku ɖe lɔ̃xoa Naomi ŋu, gake Orpa ya trɔ yi Moab. Rut gblɔ na Naomi be: “Afi si nàyi la, afi mae mayi.” (Kpɔ memama 13 lia)
13. Aleke Rut ƒe nyametsotsoa to vovo na Orpa tɔ, eye nu ka tae míagblɔ be Rut ɖe lɔlɔ̃ si nu metsina o fia? (Kpɔ nɔnɔmetata si le akpaa dzi.)
13 Míagase nu si lɔlɔ̃ si nu metsina o fia gɔme ɖe edzi ne míede ŋugble tso nu si dzɔ esi Naomi srɔ̃ kple via eveawo ku ŋu. Esi Naomi se be “Yehowa trɔ susu ɖe eƒe amewo ŋu hena nuɖuɖu wo” la, etso nya me be yeatrɔ ayi aƒe. (Rut 1:6) Lɔ̃xoyɔvi eveawo hã dze eyome. Le mɔa dzia, Naomi ɖe kuku na wo zi etɔ̃ be woatrɔ ayi Moab. Nu kae wowɔ? Biblia gblɔ be: “Orpa gbugbɔ nu na lɔ̃xoa hetrɔ dzo. Ke Rut ya ku ɖe eŋu.” (Rut 1:7-14) Esi Orpa tiae be yeatrɔ adzoa, enɔ wɔwɔm ɖe Naomi ƒe nya dzi. Ke hã, Rut ya metrɔ dzo o. Lɔlɔ̃ si nu metsina o ʋãe wòtiae be yeaku ɖe Naomi ŋu, eye yeakpe ɖe eŋu. (Rut 1: 16, 17) Esi Rut tiae be yeaku ɖe Naomi ŋua, menye le esi wòle be wòawɔe tae o, ke boŋ esi wòdi tae. Ale si Rut wɔ nu la ɖee fia be, eɖe lɔlɔ̃ si nu metsina o fia. Nu kae míate ŋu asrɔ̃ tso Rut gbɔ?
14. (a) Aleke mía nɔvi geɖe srɔ̃a Rut ƒe kpɔɖeŋua egbea? (b) Le Hebritɔwo 13:16 ƒe nya nua, vɔsa kawoe dzea Mawu ŋu?
14 Lɔlɔ̃ si nu metsina o ʋãa mí míewɔa nu siwo yi ŋgɔ wu. Abe mawusubɔla siwo nɔ anyi va yi enea, mía nɔvi siwo li egbea hã ɖea lɔlɔ̃ si nu metsina o fiaa wo nɔviwo, wo dometɔ siwo womenya o gɔ̃ hã. Le kpɔɖeŋu me, ne dzɔdzɔmefɔkuwo dzɔa, wotsona enumake naa kpekpeɖeŋu. Ne agbea le sesẽm na nɔvi aɖe le hamea mea, wowɔa nu ŋutɔŋutɔwo tsɔ kpena ɖe wo ŋu enumake. Mía nɔvi siawo wɔa nu siwo yi ŋgɔ wu tsɔ kpena ɖe wo nɔviwo ŋu, abe ale si Makedonia nɔvi siwo nɔ anyi le ƒe alafa gbãtɔ me wɔe ene. Wotsɔ nuwo sa vɔe eye wona nu “wògbɔ woƒe ŋutetewo ŋu gɔ̃ hã” tsɔ kpe ɖe wo nɔvi siwo hiã tu ŋu. (2 Kor. 8:3) Esia dzea Yehowa ŋu ŋutɔ!—Xlẽ Hebritɔwo 13:16.
ALEKE MÍATE ŊU AÐE LƆLƆ̃ SI NU METSINA O AFIA EGBEA?
15-16. Nu kae Rut wɔ, si ɖee fia be mena ta o?
15 Míate ŋu asrɔ̃ nu vevi geɖe ne míekpɔ ale si Rut wɔ nu ɖe Naomi ŋu. Na míakpɔ wo dometɔ aɖewo ɖa.
16 Mègana ta o. Esi Rut gblɔ be yeadze ye lɔ̃xo yome atrɔ ayi Yuda la, Naomi melɔ̃ ɖe edzi o. Gake Rut mena ta o. Nu kae va dzɔ? Biblia gblɔ be: “Esi Naomi kpɔ be Rut ɖoe kplikpaa be yeayi kpli ye la, edzudzɔ eƒoƒo ɖe enu.”—Rut 1:15-18.
17. Ne míele kpekpem ɖe nɔvi aɖe ŋua, nu kae ana be mímana ta kaba o?
17 Nufiamea: Ne míedi be míakpe ɖe nɔvi aɖe si ƒo dzi ɖe le ŋua, ele be míagbɔ dzi ɖi, eye míagana ta o. Adze abe nɔvi aɖe si le nɔnɔme sesẽ me tom madi be míakpe ɖe ye ŋu o ene. Gake lɔlɔ̃ si nu metsina o aʋã mí míawɔ mía tɔ sinua akpe ɖe eŋu. (Gal. 6:2) Ne míewɔe alea, mlɔebaa, ava lɔ̃ be míakpe ɖe ye ŋu.
18. Nu kae anya te ɖe Rut dzi?
18 Mègado dziku o. Esi Naomi kple Rut trɔ gbɔ va Betlehem la, Naomi va do go exɔlɔ̃wo, eye wògblɔ na wo be: “Nu nɔ asinye fũu hafi meyi, ke asi ƒuƒlue Yehowa na metrɔ gbɔe.” (Rut 1:21) Bu ale si gbegbe Naomi ƒe nya mawo anya te ɖe Rut dzi ŋu kpɔ! Rut wɔ etɔ sinua kpe ɖe Naomi ŋu. Efa avi kplii, efa akɔ nɛ, eye wòzɔ mɔ kplii ŋkeke geɖe trɔ gbɔ. Ke hã, Naomi gblɔ be: “Asi ƒuƒlue Yehowa na metrɔ gbɔe.” Togbɔ be Rut ku ɖe Naomi ŋu hã, Naomi ƒe nyawo ɖee fia be mede dzesi nu siwo katã Rut wɔ tsɔ kpe ɖe eŋu o. Esia anya te ɖe Rut dzi ŋutɔ! Ke hã, eku ɖe Naomi ŋu.
19. Nu kae akpe ɖe mía ŋu be míaku ɖe mía nɔvi aɖe si dzi nu te ɖo ŋu?
19 Nufiamea: Egbea, nu ate ŋu ate ɖe mía nɔvi aɖe dzi, eye maƒo nu na mí nyuie o, togbɔ be míanɔ agbagba dzem be míakpe ɖe eŋu hã. Ke hã, mele be míado dziku o. Ele be míaku ɖe mía nɔvia ŋu, eye míabia Yehowa be wòakpe ɖe mía ŋu be míate ŋu afa akɔ nɛ.—Lod. 17:17.
Aleke hamemetsitsiwo ate ŋu asrɔ̃ Boaz egbea? (Kpɔ memama 20-21 lia)
20. Nu kae do ŋusẽ Rut be mena ta o?
20 De dzi ƒo na amewo. Rut ɖe lɔlɔ̃ si nu metsina o fia Naomi, gake fifia eva hiã be woade dzi ƒo na Rut ŋutɔ hã. Eye Yehowa to Boaz dzi de dzi ƒo nɛ. Boaz gblɔ na Rut be: “Yehowa neɖo nu si nèwɔ teƒe na wò, eye fetu blibo natso Yehowa, Israel ƒe Mawu, ame si ƒe aʋala te nèva be ɖo la, gbɔ na wò.” Nya wɔdɔɖeamedzi mawo anya fa akɔ na Rut ŋutɔ! Egblɔ na Boaz be: “Èfa akɔ nam, eye nèƒo nu wòde dzi ƒo na wò dɔlanyɔnu.” (Rut 2:12, 13) Nya mawo, si Boaz gblɔ le ɣeyiɣi nyuitɔ dzi na Rut, do ŋusẽe be mena ta o.
21. Abe ale si Yesaya 32:1, 2 gblɔe enea, nu kae hamemetsitsi lɔ̃amewo wɔna?
21 Nufiamea: Ɣeaɖewoɣia, ehiãna be míade dzi ƒo na ame siwo ɖea lɔlɔ̃ si nu metsina o fiana amewo la hã. Abe ale si ko Boaz de dzesi ale si Rut kpena ɖe ame ŋu ene la, hamemetsitsi siwo le ŋudzɔ hã dea dzesi nɔvi siwo kpena ɖe ame bubuwo ŋu le hamea me, eye wokafua wo. Woƒe dzideƒonamenya siwo vana ɖe ɣeyiɣi nyuitɔ dzi kpena ɖe nɔvi mawo ŋu be woagana ta o.—Xlẽ Yesaya 32:1, 2.
NE MÍEÐE LƆLƆ̃ SI NU METSINA O FIA LA, VI KAE WÒÐENA NA MÍ?
22-23. Aleke Naomi ƒe nɔnɔme va trɔe, eye nu ka tae? (Psalmo 136:23, 26)
22 Le ɣeyiɣi aɖe megbea, Boaz nyo dɔme na Rut kple Naomi, eye wòna nuɖuɖu wo. (Rut 2:14-18) Aleke Boaz ƒe dɔmenyonyoa wɔ dɔ ɖe Naomi dzi? Naomi gblɔ be: “Yehowa, ame si medzudzɔ agbagbeawo kple kukuawo nuveve o la, nayrae.” (Rut 2:20a) Naomi ƒe nɔnɔme va trɔ kura! Do ŋgɔa, etsɔ avi gblɔ be: “Yehowa tso ɖe ŋunye,” gake fifia dzidzɔ yɔ eƒe dzi me wògblɔ be: “Yehowa . . . medzudzɔ [nunye veve] o.” Nu kae na Naomi ƒe nɔnɔme va trɔ?
23 Naomi va de dzesii azɔ be Yehowa megblẽ ye ɖi o. Yehowa to Rut dzi kpe ɖe eŋu esi wozɔ mɔ gbɔna va Yuda. (Rut 1:16) Naomi de dzesii hã be, Yehowa to Boaz, ‘ame si gbugbɔ wo ƒle,’ dzi nyo dɔme na eya kple Rut lɔlɔ̃tɔe. * (Rut 2:19, 20b) Fifia, Naomi anya nɔ gbɔgblɔm na eɖokui be: ‘Oo, mese egɔme azɔ. Yehowa megblẽm ɖi le ɣeyiɣi siawo katã me o!’ (Xlẽ Psalmo 136:23, 26.) Naomi da akpe be Rut kple Boaz mena ta le ye ŋu o! Bu ale si dzi adzɔ wo ame etɔ̃a be Naomi gava le dzidzɔ kpɔm ake ŋu kpɔ.
24. Nu ka tae míedi be míayi edzi aɖe lɔlɔ̃ si nu metsina o afia mía nɔviwo?
24 Nu kae míesrɔ̃ tso lɔlɔ̃ si nu metsina o ŋu le Rut ƒe agbalẽa me? Lɔlɔ̃ ma ʋãa mí míekuna ɖe mía nɔvi siwo dzi nu te ɖo la ŋu. Lɔlɔ̃ ma ʋãa mí hã míewɔa mía tɔ sinua kpena ɖe wo ŋu. Ele be hamemetsitsiwo nade dzi ƒo na ame siwo ɖea lɔlɔ̃ si nu metsina o fiaa wo nɔviwo. Ne míekpɔe be dzo gaɖo ame siwo ƒo dzi ɖe le me wogatso ɖe Yehowa subɔsubɔ ŋua, dzi dzɔa mí glo. (Dɔw. 20:35) Gake susu vevi ka koŋ tae míeyia edzi ɖea lɔlɔ̃ si nu metsina o fiana? Elabe míedi be míasrɔ̃ Yehowa, ame si ƒe “lɔlɔ̃ si nu metsina o . . . sɔ gbɔ” la, eye míaƒe nu nadze eŋu.—2 Mose 34:6; Ps. 33:22.
HADZIDZI 130 Lɔ̃ Tsɔtsɔke
^ mm. 5 Yehowa di be míaɖe lɔlɔ̃ si nu metsina o afia mía nɔviwo le hamea me. Ne míesrɔ̃ nu tso ale si mawusubɔla siwo nɔ anyi le blema dometɔ aɖewo ɖe lɔlɔ̃ si nu metsina o fia ŋua, ana míagase egɔme ɖe edzi wu. Le nyati sia mea, míakpɔ nu siwo míate ŋu asrɔ̃ tso Rut, Naomi, kple Boaz gbɔ.
^ mm. 1 Nya siwo nye “lɔlɔ̃ vavã, “amenuveve” kple ‘dɔmenyonyo’ siwo dze le kpukpui siawo mea, fia “lɔlɔ̃ si nu metsina o” le gbe gbãtɔwo me.
^ mm. 8 Be nyati sia naɖe vi na wò bliboea, míede dzi ƒo na wò be nàxlẽ Rut ta 1 kple 2 lia.
^ mm. 23 Kpɔ nyati si nye “Srɔ̃ Woƒe Xɔse—Enye ‘Nyɔnu Zãzɛ,’” si dze le October 1, 2012 ƒe Gbetakpɔxɔ me, axa 20, si gaɖe nu me geɖe le ale si Boaz gbugbɔ Naomi kple Rut ƒlee ŋu.
