1. Nya ka gɔmee nyagblɔɖila Yesaya di be ye nɔvi Israel-viwo nase?

 NYAGBLƆÐILA Yesaya gblɔ be Yehowae nye “Nyateƒe Mawu la.” Nya si gɔme woɖena be “nyateƒe” ye nye “amen.” (Yes. 65:​16, etenuŋɔŋlɔ) “Amen” gɔmee nye “nenɔ alea” alo “neva eme.” Ne wole nu ƒom tso Yehowa alo Yesu ŋu le Biblia me eye wozã nya “amen” la, eɖoa kpe edzi be nyaa nye nyateƒe. Eya ta Yesaya di be Israel-viwo nase egɔme be: Ne Yehowa gblɔ nya aɖe ɖi koa, ava eme godoo. Le nyateƒe mea, Yehowa wɔ ŋugbe siwo katã wòdoa dzi.

2. Nu ka tae míate ŋu aka ɖe nu siwo ƒe ŋugbe Yehowa do be yeava wɔ na mí le etsɔmea dzi, eye biabia kawo mee míadzro?

² Ðe míawo hã míate ŋu aka ɖe ŋugbe siwo Yehowa do ku ɖe etsɔme ŋu la dzia? Anɔ abe ƒe 800 le Yesaya ƒe ɣeyiɣia megbea, apostolo Paulo na eme kɔ be míate ŋu aka ɖe edzi be Mawu ƒe ŋugbedodowo ava eme godoo. Egblɔ be: “Mawu mate ŋu aka aʋatso . . . o.” (Heb. 6:18) Ale si ko vudo ɖeka mate ŋu adzi tsi vivi kple tsi veve siaa oa, nenema kee Yehowa, Ame si gbɔ nyateƒe dzɔ tso mate ŋu aka aʋatso o. Eya ta míate ŋu aka ɖe nya sia nya si Yehowa gblɔa dzi bliboe, ɛ̃, míate ŋu aka ɖe ŋugbe siwo katã wòdo ku ɖe etsɔme ŋu hã dzi. Le nyati sia mea, míadzro nyabiase siawo me: Nu kae Yehowa do ŋugbe be yeawɔ na mí le etsɔme? Eye nu kae wòwɔ tsɔ ɖo kpe edzi na mí be yeƒe ŋugbedodowo ava eme?

3. (a) Mawu ƒe ŋugbedodo kae doa dzidzɔ na esubɔlawo? (Nyaɖeɖefia 21:​3, 4) (b) Aleke ame aɖewo wɔa nui ne míegblɔ ŋugbedodo sia ŋu nya na wo?

³ Ŋugbedodo si me míadzroa nye esi doa dzidzɔ na mawusubɔlawo le xexea me godoo. (Xlẽ Nyaɖeɖefia  21:​3, 4.) Yehowa do ŋugbe be eteƒe madidi o, “ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.” Mía dometɔ geɖe zãa Biblia me nya lédziname siawo ne míele nu fiam amewo tso Paradisoa ŋu. Aleke ame aɖewo wɔa nui ne míegblɔ ŋugbedodo nyui sia ŋu nya na wo? Ame aɖewo gblɔna be: “Enya se ya, gake nyemeka ɖe edzi be ava eme o.”

4. (a) Nu kawoe Yehowa nya, eye nu kae wòkpɔ do ŋgɔ? (b) To vovo na ŋugbe siwo Yehowa doa, nu ka hãe wògawɔ?

⁴ Esi Yehowa ƒe gbɔgbɔ ʋã apostolo Yohanes wòŋlɔ Paradiso ŋuti ŋugbedodo siawo ɖia, Yehowa nya be mí ame siwo li egbea míaƒo nu tso mɔkpɔkpɔ sia ŋu na amewo ne míele gbeƒã ɖem Fiaɖuƒe nya nyuia. Gake Yehowa kpɔe do ŋgɔ be asẽse na ame geɖewo be woaxɔe ase be tɔtrɔ siawo ava le etsɔme. (Yes. 42:9; 60:2; 2 Kor. 4:​3, 4) Eya ta aleke míawɔ aka ɖe edzi be yayra siwo ŋu woƒo nu tsoe le Nyaɖeɖefia 21:​3, 4 ava eme? Eye aleke míawɔ akpe ɖe ame bubuwo hã ŋu be woaka ɖe edzi? Menye ɖeko Yehowa do ŋugbe nyui siawo na mí ko evɔ o, ke ena wo ŋuti kpeɖodzi sẽŋuwo hã mí si tae míate ŋu aka ɖe wo dzi bliboe. Kpeɖodzi kawoe wòna mí?

5. Mawunyakpukpui kae ka ɖe edzi na mí be ŋugbe si Mawu do ku ɖe Paradiso ŋua ava eme, eye nya kae dze le afi ma?

⁵ Susu siwo tae míate ŋu aka ɖe ŋugbe si Yehowa do ku ɖe Paradisoa ŋu dzia dze le Nyaɖeɖefia 21:​5, 6a. Afi ma xlẽ be: “Ame si bɔbɔ nɔ fiazikpuia dzi la gblɔ be: ‘Kpɔ ɖa! Mele nuwo katã wɔm yeyee.’ Eye wògagblɔ hã be: ‘Ŋlɔe, elabena nya siawo nye nyateƒenyawo kple nya vavãwo.’ Eye wògblɔ nam be: ‘Wova eme! Nyee nye Alfa kple Omega, gɔmedzedze kple nuwuwu.’”

6. Nu ka tae kpeɖodzinya siwo dze le Nyaɖeɖefia 21:​5, 6 na míeka ɖe Mawu ƒe ŋugbedodoa dzi?

⁶ Nu ka tae nya siawo nana míegakana ɖe Mawu ƒe ŋugbedodoa dzi? Nyaɖeɖefia Taƒoƒo gbalẽa gblɔ tso kpukpui siawo ŋu be: “Ðeko wòle abe ɖe Yehowa ŋutɔ le asi dem kakaɖedzinagbalẽ alo kpeɖodzigbalẽ aɖe te ku ɖe yayra siawo siwo gbɔna la ŋu ene.” b Mawu ƒe ŋugbedodoa dze le Nyaɖeɖefia 21:​3, 4. Gake egblɔ nya siwo dze le kpukpui 5 kple 6 lia ƒe akpa gbãtɔ tsɔ de asi ŋugbedodo ma te le kpɔɖeŋunyagbɔgblɔ nu, be yeatsɔ aka ɖe edzi na mí be ava eme godoo. Mina míadzro nya siwo Yehowa zã tsɔ ɖo kpe eƒe ŋugbedodoa dzi la me ayi ŋgɔe.

7. Ame ka dzie wohe susu yi le kpukpui 5 lia ƒe gɔmedzedze, eye nu ka tae esia ɖe dzesi?

⁷ Kpukpui 5 lia dze egɔme be: “Ame si bɔbɔ nɔ fiazikpuia dzi la gblɔ be.” (Nyaɖ. 21:5a) Nya siae wotsɔ he susu yi zi etɔ̃ siwo Yehowa ŋutɔ ƒo nu tẽe le Nyaɖeɖefia ƒe agbalẽa mea ƒe gbãtɔ dzi. Eya ta menye mawudɔla sẽŋu aɖee gblɔ kpeɖodzinya siawo o, eye menye Yesu si wofɔ ɖe tsitre hã ye o, ke Yehowa ŋutɔe! Esia na kakaɖedzi gale nya siwo kplɔe ɖoa ŋu geɖe wu. Nu ka tae míegblɔe alea? Elabe Yehowa “mate ŋu aka aʋatso o.” (Tito 1:2) Nyateƒenya sia na míekpɔe be míate ŋu aka ɖe Nyaɖeɖefia 21:​5, 6 me nyawo dzi bliboe.

8. Aleke Yehowa ɖo kpe edzi be yeƒe ŋugbedodowo ava eme? (Yesaya 46:10)

⁸ Azɔ na míade ŋugble le nya “Kpɔ ɖa!”  ŋu. (Nyaɖ. 21:5) Helagbe me nya si gɔme woɖe be “kpɔ ɖa!” dze zi geɖe le Nyaɖeɖefia ƒe agbalẽa me. Numekugbalẽ aɖe gblɔ be “wozã nya ma ale be nu xlẽlaa ƒe susu nanɔ nya siwo kplɔe ɖo la dzi.” Nya kae Mawu gblɔ kplɔe ɖo? Egblɔ be: “Mele nuwo katã wɔm yeyee.” Le nyateƒe mea, Yehowa nɔ nu ƒom tso nu siwo wòava wɔ le etsɔmea ŋu, gake le egbɔa, kakaɖedzi le nya siawo ŋu ale gbegbe be egblɔe abe ɖe wole eme vam xoxo ene.—Xlẽ Yesaya 46:10.

9. (a) Nu eve kawoe Yehowa awɔ esi wògblɔ be “mele nuwo katã wɔm yeyee”? (b) Nu kae adzɔ ɖe fifi “dziƒo” kple “anyigba” siaa dzi?

⁹ Na míadzro Nyaɖeɖefia 21:5 ƒe akpa si nye “Mele nuwo katã wɔm yeyee” la me. Le Biblia ƒe akpa sia la, nya ma fia nu vevi eve siwo Yehowa awɔ; woawoe nye be aɖɔli nane, eye wòaɖɔ nane ɖo. Nu kae Yehowa aɖɔli? Nyaɖeɖefia 21:1 gblɔ be: “Dziƒo tsãtɔ kple anyigba tsãtɔ nu va yi.” Dunyahedziɖuɖu siwo le Satana kple gbɔgbɔ vɔ̃wo ƒe ŋusẽ tee woyɔ le afi sia be “dziƒo tsãtɔ.” (Mat. 4:​8, 9; 1 Yoh. 5:19) Eye Biblia tea ŋu zãa nya “anyigba” wòkuna ɖe amegbetɔ siwo le anyigba dzia ŋu. (1 Mose 11:1; Ps. 96:1) Eya ta “anyigba tsãtɔ” le tsitre ɖi na ame vɔ̃ɖiwo. Menye ɖe Yehowa atrɔ asi le “dziƒo” kple “anyigba” siwo li fifia ŋu be woanyo wu o; ke boŋ aɖe wo ɖa keŋkeŋ. Aɖe fifi dziƒo ɖa eye wòana “dziƒo yeye,” si nye dziɖuɖu yeye naxɔ ɖe eteƒe. Nenema kee wòaɖe fifi anyigba ɖa eye wòana “anyigba yeye,” si fia ame dzɔdzɔewo, naxɔ ɖe eteƒe.

10. Nu kawoe Yehowa awɔ yeyee?

¹⁰ Le Nyaɖeɖefia 21:5 la, Yehowa yi edzi ƒo nu tso nu siwo wòaɖɔ ɖo alo wòawɔ yeyee ŋu. De dzesii be Yehowa megblɔ be: “Mele nu yeyewo sɔŋ wɔm” o. Ke boŋ egblɔ be: “Mele nuwo katã wɔm yeyee.” Esia fia be Yehowa ana anyigba kple amegbetɔ siwo yewɔ xoxoa nazu yeye, si fia be ana woade blibo. Abe ale si Yesaya gblɔe ɖi enea, anyigba bliboa azu abɔ dzeani abe Eden-bɔa ene. Yehowa awɔ mí amegbetɔwo hã yeyee le susua nu be, aɖɔ nu sia nu si gblẽ le mía ŋua ɖo. Ɣemaɣia, woada dɔ na bunɔwo, ŋkuagbãtɔwo, kple tokunɔwo, eye woagbɔ agbe ame siwo ku gɔ̃ hã.—Yes. 25:8; 35:​1-7.

11. Nu kae Yehowa gblɔ na Yohanes be wòawɔ, eye nu ka tae?

¹¹ Nya kawoe Yehowa gagblɔ tsɔ ka ɖe ŋugbe si wòdoa dzi na mí? Egblɔ na Yohanes be: “Ŋlɔe, elabena nya siawo nye nyateƒenyawo kple nya vavãwo.” (Nyaɖ. 21:5) Menye ɖeko Yehowa gblɔ na Yohanes be ‘wòaŋlɔ’ nyawo ɖi ko o, ke egblɔ susu si tae wòaŋlɔ wo hã. Egblɔ be: “Elabena nya siawo nye nyateƒenyawo kple nya vavãwo,” si fia be kakaɖedzi le Mawu ƒe nyawo ŋu eye woava eme godoo. Míeda akpe ŋutɔ be Yohanes ɖo to eye ‘wòŋlɔ’ nyawo ɖi. Esia wɔe be egbea, míawo hã míate ŋu axlẽ nu tso ŋugbe si Mawu do ku ɖe Paradiso ŋua ŋu eye míade ŋugble le yayra wɔnuku siwo le mía lalam la ŋu.

12. Nu ka tae wòsɔ be Yehowa gblɔ be: “Wova eme!”

¹² Nya kae Mawu gagblɔ kpee? Egblɔ be: “Wova eme!” (Nyaɖ. 21:6) Yehowa ƒo nu abe ɖe nu siwo wògblɔ tso Paradisoa ŋu va eme xoxo ene. Esɔ nenema elabe naneke mate ŋu axe mɔ na eƒe tameɖoɖowo me vava o. Le ema yomea, Yehowa gagblɔ  nya bubu tsɔ ka ɖe edzi na mí bliboe be yeƒe ŋugbedodowo ava eme. Nya kae?

13. Nu ka tae Yehowa gblɔ be: “Nyee nye Alfa kple Omega”?

¹³ Abe ale si míegblɔe enea, Yehowa ŋutɔ ƒo nu tẽe na Yohanes zi etɔ̃ le ŋutegaa me. (Nyaɖ. 1:8; 21:​5, 6; 22:13) Le zi etɔ̃awo katã mea, egblɔ be: “Nyee nye Alfa kple Omega.” Le Helagbe mea, alfa ye nye woƒe ŋɔŋlɔdzesi gbãtɔ, eye omega ye nye ŋɔŋlɔdzesi mamlɛtɔ. Eya ta esi Yehowa zã nya “Alfa kple Omega” tsɔ ɖɔ eɖokuia, enɔ kpe ɖom edzi be ne yedze nane gɔmea, yeawu enu godoo.

14. (a) Gblɔ ɣeyiɣi si Yehowa gblɔ be “Alfa” kple ɣeyiɣi si wòagblɔ be “Omega” ƒe kpɔɖeŋu aɖe. (b) Kpeɖodzinya kae dze le 1 Mose 2:​1-3?

¹⁴ Esi Yehowa Mawu wɔ Adam kple Xawa megbea, eɖe tame si wòɖo ɖe amegbetɔwo kple anyigba ŋua fia. Biblia gblɔ be: “Mawu yra wo, eye Mawu gblɔ na wo be: ‘Midzi ne miasɔ gbɔ, miayɔ anyigba la dzi, eye miaɖu edzi.’” (1 Mose 1:28) Esi Yehowa gblɔ nya maa, ɖeko wòle abe enɔ gbɔgblɔm be “Alfa” ene. Nu si tae nye be Yehowa na tame si wòɖoa dze ƒãa: Le ɣeyiɣi aɖe megbea, Adam kple Xawa ƒe dzidzimevi deblibo siwo nye toɖolawo ayɔ anyigba dzi eye woatrɔe wòazu paradiso. Ne tameɖoɖo ma va eme le etsɔmea, anɔ abe ɖe Yehowa gblɔ be “Omega” ene. Esi Yehowa wu “dziƒo kple anyigba kpakple wo me nuwo katã wɔwɔ” nu vɔa, egblɔ nya aɖe tsɔ ɖo kpe tame si wòɖoa dzi be ava eme. Esia dze le 1 Mose 2:​1-3. (Xlẽe.) Biblia gblɔ be Yehowa wɔ ŋkeke adrelia kɔkɔe. Nu kae esia fia? Efia be Yehowa nɔ kpe ɖom edzi be kaka ŋkeke adrelia nawu enua, tame si yeɖo ɖe amegbetɔwo kple anyigba ŋu la ava eme bliboe.

15. Nu ka tae wòate ŋu adze abe Satana gblẽ tame si Mawu ɖo ɖe amegbetɔwo ŋua me ene?

 ¹⁵ Esi Adam kple Xawa dze aglã la, wova zu nuvɔ̃mewo eye woƒe dzidzimeviwo hã nyi nu vɔ̃ kple ku dome tso wo gbɔ. (Rom. 5:12) Esia na wòdze abe ɖe Satana gblẽ tame si Mawu ɖo be amegbetɔ toɖola deblibowo nayɔ anyigba dzia me ene. Satana ƒe nuwɔna na wòdze abe manyawɔ na Yehowa gbeɖe be wòagblɔ be “Omega” o ene. Satana anya susui be Yehowa maganya nu si wòawɔ o. Eƒe susue nye be nu si Yehowa awɔ dometɔ ɖekae nye be wòawu Adam kple Xawa eye wòawɔ ame deblibo bubuwo kura ɖe anyigba dzi ale be tame si wòɖo ɖe amegbetɔwo ŋua nava eme. Gake ne ɖe Mawu wɔe nenemaa, anye ne Abosam atso enu be enye alakpatɔ. Nu ka tae? Elabe Yehowa gblɔ na Adam kple Xawa xoxo le 1 Mose 1:​28, be woƒe dzidzimeviwoe ayɔ anyigba la dzi.

16. Nu kae Satana susu be Yehowa awɔ, si ana yeatso enu be edo kpo nu?

¹⁶ Mɔnu bubu kae Satana anya susu be Mawu azã atsɔ akpɔ nyaa gbɔ? Ðewohĩ Satana susui be Yehowa atiae be yeana Adam kple Xawa nadzi vi madeblibo siwo mate ŋu ava de blibo akpɔ gbeɖe o. (Nyagb. 7:20; Rom. 3:23) Ne edzɔ alea, Abosam atsɔ nya ɖe Yehowa ŋu godoo be edo kpo nu. Nu ka tae? Elabe esia mana tame si Mawu ɖo be Adam kple Xawa ƒe dzidzimevi siwo nye toɖola deblibowo nayɔ Paradisonyigba dzi la nava eme gbeɖe o.

17. Aleke Yehowa kpɔ Satana kpakple Adam kple Xawa ƒe aglãdzedzea gbɔe, eye aleke nuwo ava wu enui? (Kpɔ nɔnɔmetataawo hã.)

¹⁷ Nu si Yehowa wɔ tsɔ kpɔ Satana kpakple Adam kple Xawa ƒe aglãdzedzea gbɔ anya wɔ nuku na Satana ŋutɔ. (Ps. 92:5) Yehowa ɖe mɔ Adam kple Xawa dzi viwo, si ɖo kpe edzi be menye alakpatɔe wònye o, ke boŋ nyateƒetɔe. Eye esia fia be nu sia nu si wòɖo be yeawɔa mado kpo nu o. Ewɔ nu si ana eƒe tameɖoɖoa nava eme esi wòtsɔ “dzidzimevi” aɖe na be wòava ɖe Adam kple Xawa ƒe vi siwo nye toɖolawo tso nu vɔ̃ me. (1 Mose 3:15; 22:18) Ðoɖo si Yehowa wɔ be dzidzimevia natsɔ eƒe agbe ana ɖe amegbetɔwo taa meva susu me na Satana gbeɖe o! Nu ka tae? Elabe enye ɖoɖo si me ɖokuitɔmadimadi ƒe lɔlɔ̃ dze le. (Mat. 20:28;  Yoh. 3:16) Lɔlɔ̃ sia mele Satana si nye ɖokuitɔdila si kura o. Ke vi kae tafevɔsa ƒe ɖoɖo sia aɖe na mí? Kaka Kristo ƒe Ƒe Akpe Ðeka Dziɖuɖua nawu enua, Adam kple Xawa ƒe vi siwo nye toɖola deblibowo ayɔ paradisonyigbaa dzi abe ale si tututu Yehowa ɖoe le gɔmedzedzea me ene. Ɣemaɣia, anɔ abe ɖe Yehowa gblɔ be “Omega” ene.

18. Nu etɔ̃ kawoe na míeka ɖe edzi be Mawu ƒe tameɖoɖoa ava eme? (Kpɔ aɖaka si nye “ Susu Etɔ̃ Siwo Tae Míaka Ðe Yehowa Ƒe Ŋugbedodowo Dzi.”)

¹⁸ Nyati sia kpe ɖe mía ŋu míekpɔ nu si tae míate ŋu aka ɖe edzi be Paradiso si ŋugbe si Mawu doa ava eme. Aleke míakpe ɖe amewo ŋu woawo hã woaka ɖe edzi be ava eme nyateƒe? Gbãa, ele be míanya be Yehowa ŋutɔe do ŋugbea. Nyaɖeɖefia ƒe agbalẽa gblɔ be: “Ame si bɔbɔ nɔ fiazikpuia dzi la gblɔ be: ‘Kpɔ ɖa! Mele nuwo katã wɔm yeyee.’” Nunya kple ŋusẽ le esi eye wòdi hã be yeana yeƒe ŋugbedodoa nava eme. Evelia, Yehowa ka ɖe eƒe ŋugbedodoa dzi ale gbegbe be le egbɔa, ɖeko wòle abe eva eme xoxo ene. Etɔ dzɔ be wòagblɔ be: “Nya siawo nye nyateƒenyawo kple nya vavãwo. . . . Wova eme!” Etɔ̃lia, ne Yehowa dze nane gɔmea, ewɔnɛ wua enu godoo. Esia tae wògblɔ be: “Nyee nye Alfa kple Omega.” Yehowa ɖee fia be Satana nye alakpatɔ eye mate ŋu axe mɔ na yeƒe tameɖoɖowo me vava o.

19. Ne amewo meka ɖe Paradiso si ŋugbe Mawu do dzi oa, nu kae nàte ŋu awɔ?

¹⁹ Ðo ŋku edzi be, ɣesiaɣi si nèɖi ɖase na amewo heƒo nu tso nu siwo ɖo kpe edzi be Mawu ƒe ŋugbedodowo ava eme ŋua, ana wò ŋutɔ hã nàgaka ɖe wo dzi geɖe wu. Eya ta ne èxlẽ Mawu ƒe ŋugbedodo lédziname siwo ku ɖe Paradisoa ŋu, si dze le Nyaɖeɖefia 21:4 na ame aɖe eye wògblɔ be, “Nya siawo nya se ya, gake nyemeka ɖe edzi be woava eme oa,” nu kae nàwɔ? Ðe manyo ŋutɔ be nàxlẽ kpukpui 5 kple 6 lia ahaɖe eme nɛ oa? Na wòakpɔ ale si Yehowa ɖo kpe eƒe ŋugbedodoa dzi abe ɖe wòde asi ete ene.—Yes. 65:16.