1-3. Nu kae nyagblɔɖila aɖe si tso Yuda la do kpo wɔwɔ, eye nu kae do tso eme? (Kpɔ nɔnɔmetata si le nyati sia ƒe gɔmedzedze.)

ƔEAÐEƔI le Fia Yeroboam ƒe dziɖuɣi la, Yehowa dɔ nyagblɔɖila aɖe tso Yuda be wòaɖagblɔ ʋɔnudrɔ̃gbedeasi sesẽ aɖe na Israel fia si gbe xɔse la. Nyagblɔɖilaa bɔbɔ eɖokui yi ɖagblɔ Mawu ƒe gbedeasia na fia la pɛpɛpɛ eye Yehowa kpɔ eta be esi Yeroboam do dziku vevie hã la, mete ŋu wɔ vɔ̃ aɖekee o.—1 Fia. 13:1-10.

² Esi nyagblɔɖilaa le mɔ dzi yina aƒe la, edo go amegãɖeɖi aɖe si tso Betel si te ɖe afi ma ŋu la le mɔa dzi. Amegãɖeɖia gblɔ be Yehowa ƒe nyagblɔɖilae yenye. Eble nyagblɔɖila si tso Yuda la wòda le Yehowa ƒe mɔfiame si le tẽe, si nye be ‘megaɖu abolo alo ano tsi le Israel o’ eye ‘megagbugbɔ to mɔ si wòto yi o’ la dzi. Nu si nyagblɔɖila si tso Yuda wɔ la medze Yehowa ŋu o. Emegbe esi Yehowa ƒe nyagblɔɖilaa nɔ mɔ dzi yina aƒe me la, dzata aɖe va tsoe le mɔ dzi hewui.—1 Fia. 13:11-24.

³ Nu ka tae nyagblɔɖila si bɔbɔ eɖokui va yi la wɔ nu le eɖokui si ɖokuiŋudzedzetɔe hekplɔ amegãɖeɖi ameblelaa ɖo? Biblia megblɔe o. Gake anɔ eme be eŋlɔ be kura be ele be ‘yeabɔbɔ ye ɖokui ahazɔ kple Mawu.’ (Xlẽ Mika 6:8.) Le Biblia me la, zɔzɔ kple Yehowa fia be woaɖo ŋu ɖe eŋu, woade eƒe dziɖulanyenye  dzi, eye woawɔ ɖe eƒe mɔfiafia dzi. Ðokuibɔbɔla ɖoa ŋui ɣesiaɣi be yeate ŋu aƒo nu kple ye Fofo lɔ̃ame si nye ŋusẽkatãtɔ la ɣesiaɣi eye ele be yeawɔe nenema. Nyagblɔɖilaa ate ŋu abia Yehowa be wòakɔ nyaa me na ye hafi, gake Ŋɔŋlɔawo megblɔ be ewɔe nenema o. Nyametsotso sesẽwo dzea ŋgɔ míawo hã ɣeaɖewoɣi, eye míenyana afɔ nyuitɔ si wòle be míaɖe o. Ne míebɔbɔ mía ɖokui di Yehowa ƒe mɔfiafia la, akpe ɖe mía ŋu míaƒo asa na vodada siwo nye ŋkubiãnya.

4. Nu kawoe míasrɔ̃ le nyati sia me?

⁴ Le nyati si do ŋgɔ me la, míekpɔ nu si tae wòle be Kristotɔ nade dzesi afi si eƒe ŋutete se ɖo kple nu si esia wɔwɔ bia. Gake nɔnɔme kawoe ate ŋu ado mí kpɔ le go sia me? Eye aleke míate ŋu atu nɔnɔme nyui sia ɖo ale be ne míele kuxiwo me tom gɔ̃ hã la, míagaŋlɔ afi si míaƒe ŋutete se ɖo be o? Be míaɖo biabia siawo ŋu la, míadzro nɔnɔme etɔ̃ siwo ate ŋu ado míaƒe ɖokuibɔbɔ kpɔ la me, eye míakpɔ ale si míate ŋu atso nya me le nunya me le nɔnɔme vovovo mawo me.—Lod. 11:2.

5, 6. Aleke Barzilai ɖee fia be yenya afi si yeƒe ŋutete se ɖo?

⁵ Ne nuwo trɔ le míaƒe agbe me alo míaƒe dɔdeasiwo trɔ la, esia ate ŋu ado míaƒe ɖokuibɔbɔ kpɔ. Esi David kpe Barzilai si xɔ ƒe 80 la be wòava nɔ ye gbɔ le fiasã me la, Barzilai anya se le eɖokui me be ede bubu ye ŋu ŋutɔ. Ne elɔ̃ wɔ ɖe David ƒe amekpekpea dzi la, mɔnukpɔkpɔ asu esi be wòayi edzi ade ha kple fia la. Ke hã, Barzilai do taflatsɛ. Nu ka tae? Egblɔ na David be esi yenye amegãɖeɖi ta la, yemedi be yeava zu agba nɛ o. Eya ta Barzilai gblɔ be Kimham, si anɔ eme be enye viaŋutsuwo dometɔ ɖeka naxɔ ɖe ye teƒe.—2 Sam. 19:31-37.

⁶ Esi Barzilai nya afi si eƒe ŋutete se ɖo ta la, esia kpe ɖe eŋu wòtso nya me nyuie. Menye ɖe wòse le eɖokui me be yemedze atsɔ agbanɔamedziwo tae o, eye menye esi wòdi be yeaɖe dzi ɖi le yeƒe amegãkuku me hã tae wòdo taflatsɛ ɖo o. Ke boŋ, ede dzesii be nuwo trɔ le yeƒe agbe me eye nanewo li yemagate ŋu awɔ o. Medi be yeado agba si awu tsɔtsɔ nɛ la na eɖokui o. (Xlẽ Galatiatɔwo 6:4, 5.) Ne ɖoƒe, bubu, alo amewo ƒe kafukafu ye nɔa vevie na mí la, ɖeko esia awɔe be míanɔ bubu dzodzro dim, míanɔ ho ʋlim kple ame bubuwo, eye mlɔeba, míava ɖu ŋukpe. (Gal. 5:26) Ke hã, dzesidede afi si ame ƒe ŋutete se ɖo wɔnɛ be mí katã míekpea asi ɖe mía nɔewo ŋu be míawɔ nu si ahe ŋutikɔkɔe vɛ na Mawu eye míewɔa mía tɔ sinua kpena ɖe ame bubuwo ŋu.—1 Kor. 10:31.

7, 8. Aleke dzesidede afi si míaƒe ŋutete se ɖo ate ŋu akpe ɖe mía ŋu míaƒo asa na ŋuɖoɖo ɖe mía ɖokui ŋu?

⁷ Zi ale si agbanɔamedzi geɖe le mía si sum la, zi nenemae ŋusẽ geɖe sua mía si, eye esia ate ŋu ado míaƒe ɖokuibɔbɔ kpɔ. Esi Nehemiya se be eme menyo na yewo deviwo le Yerusalem o la, eƒo koko na Yehowa vevie. (Neh. 1:4, 11) Yehowa ɖo eƒe gbedodoɖaa ŋu nɛ esi Fia Artasasta ɖo Nehemiya nutodziɖulae. Togbɔ be ɖoƒe kɔkɔ ye Nehemiya nɔ, kesinɔnu geɖe nɔ esi, eye wona ŋusẽ geɖee hã la, Nehemiya meɖo ŋu ɖe eya ŋutɔ ƒe ŋutetewo kple nuteƒekpɔkpɔ ŋu o. Eyi edzi zɔ kple Mawu. Edi Yehowa ƒe mɔfiafia le Mawu ƒe Se la me ɣesiaɣi. (Neh. 8:1, 8, 9) Nehemiya meɖu aƒetɔ ɖe ame bubuwo dzi o; ke boŋ, etsɔ eya ŋutɔ ƒe nunɔamesiwo subɔ wo gɔ̃ hã.—Neh. 5:14-19.

⁸ Míesrɔ̃ nu vevi aɖe tso Nehemiya ƒe kpɔɖeŋua me. Eyae nye be dzesidede afi si míaƒe ŋutete se ɖo ate ŋu akpe ɖe mía ŋu míaƒo asa na ŋuɖoɖo ɖe mía ɖokuiwo ŋu ne míaƒe dɔdeasiwo trɔ alo míexɔ agbanɔamedzi yeye. Hamemetsitsi aɖe ate ŋu ava nɔ  ŋu ɖom ɖe eya ŋutɔ ƒe nuteƒekpɔkpɔwo ŋu le hamea ƒe nyawo gbɔ kpɔkpɔ me, evɔ mado gbe ɖa abia Yehowa ƒe kpekpeɖeŋu o. Le ame aɖewo gome la, wotsoa nya me gbã hafi doa gbe ɖa be Yehowa nayra ɖe yewoƒe nyametsotsoa dzi. Gake ɖe ema fia be wonya afi si woƒe ŋutete se ɖoa? Ame si nya afi si eƒe ŋutete se ɖo la ɖoa ŋui be Yehowa ƒe susuwo kple eƒe mɔwo kɔ boo wu ye tɔ. Menye míaƒe ŋutetewoe nye nu vevitɔ o. Ne kuxi alo nɔnɔme aɖe si me míeto kpɔ do mo ɖa la, ɣemaɣi koŋue wòle be míaɖɔ ŋu ɖo be míagaɖo ŋu ɖe mía ɖokui ŋu o. (Xlẽ Lododowo 3:5, 6.) Esi míenye Mawu ƒe aƒemetɔwo ta la, ele be wòanye míaƒe taɖodzinu be míatsɔ míaƒe agbanɔamedziwo le ƒomea kple hamea me, ke menye be ɖoƒe alo bubunɔƒe aɖe nasu mía si o.—1 Tim. 3:15.

9, 10. Aleke dzesidede afi si míaƒe ŋutete se ɖo ate ŋu akpe ɖe mía ŋu ne wogblɔ nya manyomanyowo ɖe mía ŋu?

⁹ Ne wogblɔ nya tɔamewo ɖe mía ŋu la, ate ŋu asesẽ be míaɖu mía ɖokui dzi. Hana nɔa avi dzi zi geɖe le esi Penina, etsusia nɔ alɔme ɖem le eŋu enuenu ta. Hana tsi ko, ke hã srɔ̃a lɔ̃e vevie. Emegbe, esi Hana nɔ gbe dom ɖa le avɔgbadɔa me la, Nunɔlagã Eli tso enu vodadatɔe be emu aha. Dzivenya kae nye esi! Le esiawo katã me la, Hana ɖokuibɔbɔla la yi edzi lé eɖokui kpoo eye wòƒo nu na Eli bubutɔe. Eƒe gbedodoɖa wɔdɔɖeamedzia le Biblia me. Xɔse, Mawu kafukafu kple akpedada ɖe dzesi le eme.—1 Sam. 1:5-7, 12-16; 2:1-10.

¹⁰ Dzesidede afi si míaƒe ŋutete se ɖo ate ŋu akpe ɖe mía ŋu hã be ‘míayi edzi atsɔ nu nyui anɔ nu vɔ̃ɖi dzi ɖum.’ (Rom. 12:21) Nu madzɔmadzɔ wɔwɔ bɔ ɖe Satana ƒe xexe sia me, eye ehiã be míaɖu mía ɖokui dzi be nu tovo wɔlawo ƒe nuwɔnawo nagaku dzi na mí o. (Ps. 37:1) Ne masɔmasɔwo ɖo mía kple mía nɔvi Kristotɔwo dome la, eya gavena wu. Ðokuibɔbɔla srɔ̃a Yesu ƒe kpɔɖeŋu. Biblia gblɔ be: “Esi wodzui la, medzu ame ɖe eteƒe o . . . , ke boŋ etsɔ eɖokui de asi na Ame si drɔ̃a ʋɔnu dzɔdzɔe la.” (1 Pet. 2:23) Yesu nyae  be Yehowa tɔe nye hlɔ̃biabia. (Rom. 12:19) Nenema kee woxlɔ̃ nu Kristotɔwo be woabɔbɔ wo ɖokuiwo eye ‘woagaɖo vɔ̃ vɔ̃ teƒe o.’—1 Pet. 3:8, 9.

11, 12. (a) Aleke ɖokuibɔbɔ ate ŋu akpe ɖe mía ŋu míawɔ nu ŋuɖɔɖotɔe ne woɖɔ kesekuku na mí alo wokafu mí wògbɔ eme? (b) Aleke míate ŋu ato míaƒe awudodo, dzadzraɖo kple míaƒe nuwɔna dzi aɖee afia be míenye ɖokuibɔbɔlawo?

¹¹ Ne woɖɔ kesekuku na mí alo kafu mí wògbɔ eme la, esia hã ate ŋu ado míaƒe ɖokuibɔbɔ kpɔ. Bu ale si Esta bɔbɔ eɖokui esi nuwo va trɔ le eƒe agbe me gbe ɖeka kple eƒe zãdodo ŋu kpɔ. Edze tugbe eteƒe mekɔ o, eye wosi ami ʋeʋĩwo nɛ hewɔ leke nɛ ƒe ɖeka blibo. Enɔ ɖetugbui gbogbo siwo tso Persia Fiaɖuƒea ƒe nuto vovovoawo me siwo katã di be yewoazu fiasrɔ̃ la dome gbe sia gbe. Ke hã, ebua ame eye wòléa eɖokui nyuie. Esi fia la tia Esta wòzu fiasrɔ̃ gɔ̃ hã la, meva zu dadala alo ɖokuiŋudzela o.—Esta 2:9, 12, 15, 17.

¹² Ðokuibɔbɔ kpena ɖe mía ŋu be míaƒe awudodo, dzadzraɖo kple ale si míewɔa nu le ame dome dzea ame ŋu ɣesiaɣi. Míekpɔe be menye adegbeƒoƒo kple amewo ƒe susu hehe va mía ɖokui dzi dzodzro ye nana míaƒe nu dzea ame ŋu o, ke boŋ míaƒe “gbɔgbɔ fatu si nɔa anyi kpoo” lae. (Xlẽ 1 Petro 3:3, 4; Yer. 9:23, 24) Ne dada le mía me la, ava dze le míaƒe nuwɔna me mlɔeba. Adze le nu suesuesuewo me; le kpɔɖeŋu me, míanɔ nu wɔm wòadze ƒãa be mɔnukpɔkpɔ tɔxɛwo su mía si, be míenya nya siwo ame bubuwo menya o, alo be míedea ha kple nɔvi siwo le agbanɔamedzinɔƒewo. Alo ale si míeƒoa nu tso nuwo ŋu la ana míawo ɖeɖe míaxɔ kafukafua ɖe nu si ŋu ame bubuwo hã kpe asi ɖo hafi wòdze edzi la ta. Le afi sia hã, Yesu ɖo kpɔɖeŋu nyui na mí. Nya siwo Yesu gblɔ ƒe akpa gãtɔ nye nya siwo wòyɔ tso Hebri Ŋɔŋlɔawo me alo wo me nya aɖe si dzi wòhe susu yi. Eƒo nu ɖokuibɔbɔtɔe alea kple susu be yeƒe nyaselawo nanyae be Yehowa gbɔe nya siwo gblɔm yele la tso, ke menye ye ŋutɔ yeƒe nunya alo aɖaŋudzedze me o.—Yoh. 8:28.

13, 14. Aleke ɖokuibɔbɔ ate ŋu akpe ɖe mía ŋu míatso nya me nyuie?

¹³ Nu bubu si ate ŋu ado míaƒe ɖokuibɔbɔ kpɔe nye ne wotso nya me le nya aɖe ŋu. Esime apostolo Paulo nɔ Kaisarea la, nyagblɔɖila Agabo gblɔ nɛ be ne eyi eƒe mɔzɔzɔa dzi yi Yerusalem la, woalée godoo. Woate ŋu awui gɔ̃ hã. Esi nɔviawo vɔ̃ ɖe Paulo ƒe agbe ta ta la, woɖe kuku nɛ be megayi o. Ke hã, Paulo melɔ̃ be woaƒo nya ɖe ye nu o. Meka ɖe eɖokui dzi fũu akpa o eye meɖe mɔ vɔvɔ̃ ɖu edzi hã o. Eɖo ŋu ɖe Yehowa ŋu tso dzi blibo me eye wòɖoe kplikpaa be yeawɔ yeƒe subɔsubɔdɔa ade goe, afi ka kee Yehowa aɖe mɔ be dɔa nakplɔ ye ayi o. Esi nɔviawo se nya sia la, ɖokuibɔbɔtɔe la, womegaƒoe ɖe enu be wòagayi Yerusalem o.—Dɔw. 21:10-14.

¹⁴ Ðokuibɔbɔ ate ŋu akpe ɖe mía ŋu hã be míatso nya me nyuie ne míenya ale si tututu nuwo ava nɔ le etsɔme o. Le kpɔɖeŋu me, ne míeƒo mía ɖokui ɖe ɣeyiɣiawo katã ƒe subɔsubɔdɔa me la, nu kae adzɔ ne míeva dze dɔ? Ke ne mía dzila tsitsiwo hiã kpekpeɖeŋu ɖe? Aleke míawɔ akpɔ mía ɖokuiwo dzi ne míawo ŋutɔwo míeva tsi? Aleke kee míeɖado gbe ɖa alo ku nu me le nyaa ŋui o, míate ŋu akpɔ ŋuɖoɖo na nya siawo bliboe o. (Nyagb. 8:16, 17) Ne míeɖoa ŋu ɖe Yehowa ŋu la, menye ɖeko míade dzesi afi si míaƒe ŋutete se ɖo o, ke míalɔ̃ ɖe edzi hã be nu boo aɖeke meli míate ŋu awɔ tso nɔnɔmea ŋu o. Ne míeku nu me le nyaa ŋu, míebia ame bubuwo ƒe susu, eye míedo gbe ɖa bia Yehowa ƒe mɔfiafia vɔ la, ele be míaɖe mɔ Mawu ƒe gbɔgbɔa nafia mɔ mí. (Xlẽ Nyagblɔla 11: 4-6.) Ema awɔe be Yehowa nayra ɖe míaƒe nyametsotsowo dzi, alo afia mɔ bubu si dzi míato la mí.—Lod. 16:3, 9.

15. Aleke ŋugbledede le ame si Yehowa nye ŋu ate ŋu akpe ɖe mía ŋu míabɔbɔ mía ɖokui?

¹⁵ Esi wònye be ɖokuibɔbɔ ɖea vi le mɔ geɖe nu ta la, aleke míawɔ atu nɔnɔme nyui sia ɖo geɖe wu? Na míadzro mɔ ene aɖewo me kpɔ. Gbãtɔe nye be, ŋugbledede le Yehowa ƒe nɔnɔme nyoameŋuawo kple eƒe ɖoƒe si kɔ boo wu mía tɔ ŋu ate ŋu akpe ɖe mía ŋu míabɔbɔ mía ɖokui ahavɔ̃ Yehowa geɖe wu. (Yes. 8:13) Ðo ŋku edzi be Mawu Ŋusẽkatãtɔ lae míele zɔzɔm kple, ke menye mawudɔla alo amegbetɔ o. Esia nyanya aʋã mí be ‘míabɔbɔ mía ɖokui ɖe Mawu ƒe asi sesẽ la te.’—1 Pet. 5:6.

16. Aleke ŋugbledede le Mawu ƒe lɔlɔ̃ ŋu ate ŋu aʋã mí míabɔbɔ mía ɖokui?

¹⁶ Evelia, ŋugbledede le Yehowa ƒe lɔlɔ̃ ŋu akpe ɖe mía ŋu míatu ɖokuibɔbɔ ɖo. Apostolo Paulo gblɔ be Yehowa na “bubu” le ametia ƒe akpa siwo ŋu míesusuna be bubu boo aɖeke mele o la boŋ ŋu wu. (1 Kor. 12:23, 24) Nenema kee Yehowa léa be na mía dometɔ ɖe sia ɖe togbɔ be gbɔdzɔgbɔdzɔwo le mía ŋu hã. Metsɔa mí sɔna kple ame bubuwo o, eye eyia edzi lɔ̃a mí ne míeda vo gɔ̃ hã. Esi Yehowa lɔ̃ mí ta la, míanɔ dedie, afi ka kee míeɖale subɔsubɔm le le eƒe habɔbɔa me o.

17. Ne míaƒe ŋku nɔa amewo ƒe nɔnɔme nyuiwo ŋu la, aleke esia ate ŋu aɖe vi na mí?

¹⁷ Etɔ̃lia, ne míesrɔ̃a mía Mawu la eye míenana míaƒe susu nɔa amewo ƒe nɔnɔme nyuiwo ŋu la, akpa si wɔm míele le Yehowa ƒe subɔsubɔdɔa me adze mía ŋu geɖe wu. Le esi míanɔ agbagba dzem be míaɖe dzesi le amewo dome alo anɔ nu ɖom na amewo teƒe la, ɖokuibɔbɔ akpe ɖe mía ŋu be míadi be amewo naɖo aɖaŋu na mí eye míalɔ̃ faa axɔ amewo ƒe susuwo. (Lod. 13:10) Míakpɔ dzidzɔ kpli wo ne woxɔ agbanɔamedziwo. Eye míatsɔ kafukafua ana Yehowa ne míekpɔ ale si wòle “nɔviwo ƒe habɔbɔ blibo si le xexea me” yram.—1 Pet. 5:9.

18. Aleke hehenana míaƒe dzitsinya akpe ɖe mía ŋu míabɔbɔ mía ɖokui geɖe wu?

¹⁸ Enelia, ne míezãa Biblia ƒe mɔfiamewo tsɔ naa hehe míaƒe dzitsinya la, esia awɔe be míabɔbɔ mía ɖokui geɖe wu. Mɔfiame mawo akpe ɖe mía ŋu míanya Yehowa ƒe susu le nuwo ŋu. Ne míesrɔ̃a Biblia hedoa gbe ɖa edziedzi, eye míenɔa agbe ɖe nu siwo míesrɔ̃ nu la, esia awɔe be vivivi la, míaƒe dzitsinya ava nɔ dɔ wɔm nyuie wu. (1 Tim. 1:5) Awɔe hã be míanye ame siwo dia ame bubuwo ƒe nyonyo gbã. Ne míewɔa míaƒe akpa dzi la, Yehowa do ŋugbe be ‘yeawu míaƒe hehexɔxɔa nu,’ eya ta akpe ɖe mía ŋu míasrɔ̃ ɖokuibɔbɔ ahatu nɔnɔme nyui bubuwo hã ɖo.—1 Pet. 5:10.

19. Nu kae akpe ɖe mía ŋu míayi edzi abɔbɔ mía ɖokui tso fifia yi ɖe mavɔ me?

¹⁹ Ðokuisinuwɔwɔ ɖeka pɛ wɔe be Mawu megakpɔ ŋudzedze ɖe nyagblɔɖila si tso Yuda la ŋu o, eye wòbu eƒe agbe hã. Gake anya wɔ be míayi edzi abɔbɔ mía ɖokui le dodokpɔwo me. Mawu subɔla wɔnuteƒe siwo nɔ anyi le blema kple esubɔla ɖokuibɔbɔla siwo li egbea siaa ƒe kpɔɖeŋuwo ɖee fia be esia anya wɔ. Esime míele zɔzɔm kple Yehowa la, ele be míaƒe ɖokuibɔbɔ nagaɖe dzesi wu ne ƒeawo va le yiyim. (Lod. 8:13) Nu ka kee ɖanye míaƒe wɔƒe fifia o, zɔzɔ kple Yehowa ɖeɖe dzaa gɔ̃ hã nye mɔnukpɔkpɔ gã si ɖeke mesɔ kpli o. De asixɔxɔ mɔnukpɔkpɔ ma ŋu, eye nàyi edzi awɔ nu sia nu si nàte ŋui be nàzɔ kple Yehowa tegbee.