1, 2. Nu kae apostolo Paulo wɔ tsɔ ɖee fia be yedaa akpe ɖe Mawu ƒe amenuveve ta?

APOSTOLO PAULO gblɔ tso dzi me be: “[Mawu ƒe] amenuveve si wòɖe fiam la mezu dzodzro o.” (Xlẽ 1 Korintotɔwo 15:9, 10.) Paulo nyae nyuie be menye ye ŋutɔ yeƒe agbagbadzedze tae Mawu ɖe nublanuikpɔkpɔ gã fia ye alo be ɖe yedze nɛ o, elabena yeti Kristotɔwo yome kutɔkutɔe tsã.

² Ɣeyiɣi kpui aɖe do ŋgɔ na Paulo ƒe ku la, eŋlɔ ɖo ɖe eƒe hadɔwɔla Timoteo be: “Medaa akpe na mía Aƒetɔ Kristo Yesu, ame si do ŋusẽm la, elabena ebum nuteƒewɔlae be wòtsɔ subɔsubɔdɔ de asi nam.” (1 Tim. 1:12-14) Subɔsubɔdɔ kae wòwɔnɛ? Paulo gblɔ nu si subɔsubɔdɔ ma nye la na Efeso hamemetsitsiwo ale: “Nye agbe mele vevie nam akpa o; nu si le vevie nam la koe nye be mawu nye duɖimekeke  kple subɔsubɔdɔ si mexɔ tso Aƒetɔ Yesu gbɔ la nu, be maɖi ɖase le Mawu ƒe amenuveve nya nyui la ŋu tsitotsito.”—Dɔw. 20:24.

3. Subɔsubɔdɔ tɔxɛ kae wode asi na Paulo? (Kpɔ foto si le nyati sia ƒe gɔmedzedze.)

³ “Nya nyui” kae Paulo ɖe gbeƒãe, eye aleke wòɖe Yehowa ƒe amenuveve fiae? Egblɔ na Efeso Kristotɔwo be: “Miese aƒedzikpɔkpɔdɔ si Mawu ve nunye tsɔ de asi nam le mia ta la ŋu nya.” (Ef. 3:1, 2) Wode dɔ asi na Paulo be wòagblɔ nya nyuia na ame siwo menye Yudatɔwo o ale be mɔnukpɔkpɔ nasu woawo hã si be woanɔ ame siwo woyɔ be woaɖu fia kple Kristo le Mesia Fiaɖuƒea me la dome. (Xlẽ Efesotɔwo 3:5-8.) Paulo ɖe gbeƒã nya nyuia veviedodotɔe eye wòɖo kpɔɖeŋu nyui ɖi na Kristotɔ siwo li egbea. Eto esia dzi ɖee fia be Mawu ƒe amenuveve si wòɖe fia ye la “mezu dzodzro o.”

4, 5. Nu ka tae míate ŋu agblɔ be “Fiaɖuƒe ŋuti nya nyui” la kee nye “Mawu ƒe amenuveve nya nyui” la?

⁴ Le nuwuɣi sia me la, Yehowa de dɔ asi na eƒe amewo be woaɖe gbeƒã “Fiaɖuƒe ŋuti nya nyui sia le anyigba blibo la katã dzi be wòanye ɖaseɖiɖi na dukɔwo katã.” (Mat. 24:14) Gbedeasi si míeɖea gbeƒãe la kee ganye “Mawu ƒe amenuveve nya nyui” la, elabena Yehowa ƒe amenuveve si wòɖe fia to Kristo dzi tae yayra siwo katã míele mɔ kpɔm be Fiaɖuƒea ahe vɛ la asu mía si ɖo. (Ef. 1:3) Ðe mía dometɔ ɖe sia ɖe srɔ̃a Paulo hedaa akpe ɖe Yehowa ƒe amenuveve ta to subɔsubɔdɔa wɔwɔ veviedodotɔe mea?—Xlẽ Romatɔwo 1:14-16.

⁵ Le nyati si do ŋgɔ me la, míesrɔ̃ ale si Yehowa ƒe amenuveve le vi ɖem na mí nu vɔ̃ mewo le mɔ geɖe nu. Esia ƒoe ɖe mía nu be míaku kutri ana amewo nanya ale si Yehowa le eƒe lɔlɔ̃ ɖem fia mí kple nu si woawɔ be wòaɖe vi na wo. Mawu ƒe amenuvevenunana kawo tae wòle be míakpe ɖe amewo ŋu be woada akpe ɖo?

6, 7. Ne míeɖe nu si tafea nye me na amewo la, aleke esia aɖee afia be míele Mawu ƒe amenuveve ŋu nya nyuia gblɔm?

⁶ Le xexe sia me la, amewo ƒe ŋukpego gbã, wowɔa nu vɔ̃ ŋumakpemakpetɔe, eya ta ame geɖe mekpɔnɛ be amegbetɔ hiã tafevɔsa o. Gake ame gbogbo aɖewo hã kpɔe be agbe maɖɔʋu nɔnɔ mena yewole dzidzɔ kpɔm o. Hafi wo dometɔ akpa gãtɔ nado go Yehowa Ðasefowo la, womenya nu si tututu nu vɔ̃ nye, ale si wògblẽa nu le mía ŋu kpakple nu si míawɔ be míavo tso nu vɔ̃ ƒe kluvinyenye me o. Dzianukwaretɔ siawo ƒe dzi dze eme esi wova srɔ̃e be lɔlɔ̃ gã si le Yehowa si kple eƒe amenuvevee na wòdɔ Via ɖe anyigba dzi be wòaɖe mí tso nu vɔ̃ kple ku si me.—1 Yoh. 4:9, 10.

⁷ Esi Paulo nɔ nu ƒom tso Yehowa ƒe Vi malɔ̃nugbɔa ŋu la, egblɔ be: “To via [Yesu] dzi la míekpɔ ablɔɖe, esi wòto eya amea ƒe ʋu dzi xe mía tafe, ɛ̃, be woatsɔ míaƒe vodadawo ake mí le [Yehowa ƒe] amenuveve geɖe la nu.” (Ef. 1:7) Kristo ƒe tafevɔsa lae ɖe ale si gbegbe Mawu lɔ̃ míi kple ale si Eƒe amenuveve loloe la fia. Efaa akɔ na mí ŋutɔ be míanyae be, ne míexɔ Yesu ƒe ʋu si wòkɔ ɖe anyi ɖe mía ta dzi se la, woatsɔ míaƒe nu vɔ̃wo ake mí eye dzitsinya dzadzɛ nasu mía si! (Heb. 9:14) Esia nye nya  nyui aɖe si wòle be míagblɔ na amewo vavã!

8. Nu ka tae wòle be woadzra amegbetɔ madeblibowo kple Mawu dome ɖo?

⁸ Agba le mía dzi be míana amewo nanya be yewoate ŋu azu Wɔla la xɔlɔ̃wo. Hafi amewo nava xɔ Yesu dzi se la, Mawu bua wo eƒe futɔwoe. Apostolo Yohanes gblɔ be: “Ame si xɔa Vi la dzi sena la, agbe mavɔ le esi; ame si meɖoa to Vi la o la, makpɔ agbe o, ke boŋ Mawu ƒe dɔmedzoe tsia edzi.” (Yoh. 3:36) Dzidzɔtɔe la, Kristo ƒe vɔsaa dzra mía kple Mawu dome ɖo. Paulo gblɔ be: “Mi ame siwo nɔ adzɔge tsã, eye mienye futɔwo, le esi miaƒe susuwo nɔ dɔwɔwɔ vɔ̃ɖiwo ŋu ta la, Mawu to ame ma ƒe ŋutilã si wokpɔna dzi gadzra mia kplii dome ɖo to eƒe ku me.”—Kol. 1:21, 22.

9, 10. (a) Dɔ kae Kristo de asi na nɔvia amesiaminawo? (b) Aleke ‘alẽ bubuawo’ le kpekpem ɖe wo nɔvi amesiaminawo ŋui?

⁹ Paulo gblɔ be Kristo tsɔ “subɔsubɔdɔ si dzraa amewo kple Mawu dome ɖo la de asi na” nɔvia amesiamina siwo le anyigba dzi. Paulo ɖe eme na Kristotɔ amesiamina gbãtɔawo be: “Nuwo katã tso Mawu gbɔ, eya, ame si dzra mía kplii dome ɖo to Kristo dzi, eye wòtsɔ subɔsubɔdɔ si dzraa amewo kple Mawu dome ɖo la de asi na mí, si nye be Mawu to Kristo dzi nɔ eya kple xexea dome dzram ɖo, ale be megabu woƒe vodadawo na wo o, eye wòtsɔ nya si dzraa eya kple amewo dome ɖo la de asi na mí. Eya ta míenye amedɔdɔwo le Kristo teƒe, abe ɖe Mawu to mía dzi le kuku ɖem ene. Abe Kristo teƒenɔlawo ene la, míeɖea kuku be: ‘Mina woadzra mia kple Mawu dome ɖo.’”—2 Kor. 5:18-20.

¹⁰ Mɔnukpɔkpɔe wònye na ‘alẽ bubuawo’ be woakpe asi ɖe wo nɔvi amesiaminawo ŋu le subɔsubɔdɔ sia wɔwɔ me. (Yoh. 10:16) Abe Kristo ƒe dɔlawo ene la, wole akpa gã aɖe wɔm le nyateƒea fiam amewo hele kpekpem ɖe wo ŋu be woazu Yehowa xɔlɔ̃wo. Esia nye ɖaseɖiɖi le Mawu ƒe amenuveve nya nyuia ŋu ƒe akpa vevi aɖe.

11, 12. Nu ka tae nya nyui wònye be amewo nava nyae be yewoate ŋu ado gbe ɖa na Yehowa?

¹¹ Ame geɖewo doa gbe ɖa le esi wònana woƒe dzi dzea eme ta, gake womexɔe se ŋutɔŋutɔ be Mawu ɖoa to gbedodoɖawo o. Ehiã be woanya be Yehowa nye “Gbedodoɖasela.” Hakpala David gblɔ be: “Oo Gbedodoɖasela, gbɔwòe ame ƒomeviwo katã ava. Nye vodadawo kpe wum, gake ètsyɔ nu míaƒe dzidadawo dzi.”—Ps. 65:2, 3.

¹² Yesu gblɔ na eƒe nusrɔ̃lawo be: “Ne miebia nane le nye ŋkɔ me la, mawɔe.” (Yoh. 14:14) Edze ƒãa be “nane” si wòzã le afi sia fia nu sia nu si wɔ ɖeka kple Yehowa ƒe lɔlɔ̃nu. Yohanes gblɔe eme kɔ be: “Kakaɖedzi sia le mía si le eya amea me be, nu sia nu si míabia wòawɔ ɖeka kple eƒe lɔlɔ̃nu la, aɖo to mí.” (1 Yoh. 5:14) Ðe manyo ŋutɔ be míafia amewo be menye ɖeko gbedodoɖa nana ame ƒe dzi dzea eme ko evɔ o, ke boŋ enye mɔ nyui aɖe si dzi míato ate ɖe Yehowa ƒe “amenuvevezikpui” la ŋu oa? (Heb. 4:16) Ne míefia wo ale si woado gbe ɖa le mɔ nyuitɔ nu, ame si woado gbe ɖa na, kple nu si sɔ be woabia la, akpe ɖe wo ŋu  woate ɖe Yehowa ŋu eye woakpɔ akɔfafa le xaxaɣiwo.—Ps. 4:1; 145:18.

13, 14. (a) Mɔnukpɔkpɔ gã kae asu amesiaminawo si le etsɔme? (b) Dɔ vevi kae amesiaminawo awɔ na amegbetɔwo?

¹³ Yehowa ayi edzi ave mía nu geɖe le nuɖoanyi si gbɔna me. Paulo ŋlɔ tso mɔnukpɔkpɔ tɔxɛ si Mawu na ame 144,000 siwo wòyɔ be woaɖu fia kple Kristo le dziƒo Fiaɖuƒea me ŋu be: “Mawu ƒe nublanuikpɔkpɔ sɔ gbɔ, eye le lɔlɔ̃ gã si le esi na mí ta la, togbɔ be míeku le dzidadawo me hã la, egbɔ agbe mí kpe ɖe Kristo ŋu—amenuvevee wotsɔ ɖe mi. Gawu la, efɔ mí ɖe tsitre kpakplii eye wòna míebɔbɔ nɔ dziƒonutowo me kpakple Kristo Yesu, ale be le nuɖoanyi siwo gbɔna me la, wòaɖe eƒe amenuveve geɖe si ƒo nu sia nu ta sãsãsã la afia le eƒe dɔmekɔkɔ ɖe mía ŋu me, mí ame siwo wɔ ɖeka kple Kristo Yesu.”—Ef. 2:4-7.

¹⁴ Manya wɔ be míakpɔ yayra wɔnuku siwo Yehowa ana Kristotɔ amesiaminawo ne wobɔbɔ nɔ fiazikpuiwo dzi be woaɖu fia kple Kristo le dziƒo la le susu me o. (Luka 22:28-30; Flp. 3:20, 21; 1 Yoh. 3:2) Yehowa aɖe “eƒe amenuveve geɖe si ƒo nu sia nu ta sãsãsã la afia” wo etɔxɛe. Woawoe anye “Yerusalem Yeye” si nye Kristo ƒe ŋugbetɔ la. (Nyaɖ. 3:12; 17:14; 21:2, 9, 10) Woawɔ ɖeka kple Yesu ‘ayɔ dɔ dukɔwo,’ woakpe ɖe amegbetɔ toɖolawo ŋu be woavo tso nu vɔ̃ kple ku si me, eye woade blibo mlɔeba.—Xlẽ Nyaɖeɖefia 22:1, 2, 17.

15, 16. Aleke Yehowa ave ‘alẽ bubuawo’ nu le etsɔme?

¹⁵ Míekpɔe le Efesotɔwo 2:7 be Mawu aɖe eƒe amenuveve afia geɖe “le nuɖoanyi siwo gbɔna me.” Ðikeke mele eme o be ame siwo katã anɔ anyigba dzi ɣemaɣi la akpɔ Yehowa ƒe “amenuveve geɖe si ƒo nu sia nu ta sãsãsã.” (Luka 18:29, 30) Yehowa aɖe dɔmenyonyo si mele gbɔgblɔ me o afia anyigbadzinɔlawo ne efɔ kukuawo ɖe tsitre tso “Tsiẽƒe.” (Hiob 14:13-15; Yoh. 5:28, 29) Woagbɔ agbe ŋutsu kple nyɔnu nuteƒewɔla siwo katã ku hafi Kristo va sa vɔ ɖe mía ta kpakple ‘alẽ bubu’ siwo katã wɔ nuteƒe va se ɖe ku me le ŋkeke mamlɛ siawo me la be woagayi Yehowa subɔsubɔ dzi.

¹⁶ Woafɔ ame miliɔn geɖe siwo menya Mawu hafi ku o hã ɖe tsitre. Woana mɔnukpɔkpɔ wo be woasrɔ̃ nu tso Yehowa ŋu ahabɔbɔ ɖe eƒe dziɖuɖu te. Yohanes gblɔ be: “Mekpɔ ame kukuwo, ame tsɛwo kple ame ŋkutawo siaa, le tsitre ɖe fiazikpui la ŋgɔ, eye woʋu agbalẽwo. Eye woʋu agbalẽ bubu aɖe; eyae nye agbegbalẽ la. Eye wodrɔ̃ ʋɔnu ame kukuawo ɖe nu siwo woŋlɔ ɖe agbalẽawo me le woƒe dɔwɔwɔwo ŋuti la nu. Eye atsiaƒu ɖe ame kuku siwo le eme la na, eye ku kple Tsiẽƒe ɖe ame kuku siwo le wo me la na, eye wodrɔ̃ ʋɔnu wo dometɔ ɖe sia ɖe ɖe eƒe dɔwɔwɔwo nu.” (Nyaɖ. 20:12, 13) Nyateƒeae nye be woabia tso ame siwo woafɔ ɖe tsitre la si be woawɔ ɖe Mawu ƒe mɔfiame siwo le Biblia me dzi. Tsɔ kpe ɖe eŋu la, ahiã be woawɔ ɖe mɔfiame yeye siwo anɔ ‘agbalẽ’ siwo woaʋu ɣemaɣi me la dzi. Nu siwo Yehowa di tso nuɖoanyi yeyea me nɔlawo si lae anɔ agbalẽ mawo me. Eye mɔfiame yeye mawo hã anye Yehowa ƒe amenuveve ɖeɖe fia.

17. Nu kae wòle be wòanɔ susu me na mí ne míele gbeƒã ɖem?

¹⁷ ‘Zazãe wɔa nu,’ eya ta esi nuwuwua le ɖoɖom la, fifia ye nye ɣeyiɣi si wòle be míazã ɖe Fiaɖuƒe ŋuti nya nyuia gbɔgblɔ ŋu! (Marko 13:10) Enye nyateƒe matrɔmatrɔ be, nya nyuia nye Yehowa ƒe amenuvevenunana. Ele be nyateƒenya sia nanɔ susu me na mí ne míele gbeƒã ɖem. Taɖodzinu si tae míeɖea gbeƒãe nye be míakafu Yehowa. Míate ŋu awɔ esia ne míena amewo nya be, Yehowa ƒe amenuveve tae xexe yeyea kple eme yayra siwo katã ŋugbe wòdo asu mía si ɖo.

18, 19. Aleke míedoa Yehowa ɖe dzi ɖe eƒe amenuveve geɖe la ta?

¹⁸ Ne míele ɖase ɖim na amewo la, ele be míaɖe eme na wo be tafevɔsa la aɖe vi na amegbetɔwo bliboe eye woava de blibo mlɔeba le Kristo ƒe Fiaɖuƒea ƒe dziɖuɖu te. Biblia gblɔ be: “Woaɖe nuwɔwɔ la ŋutɔ hã tso gbegblẽ ƒe kluvinyenye la me, eye wòakpɔ Mawu ƒe viwo ƒe ŋutikɔkɔe ƒe ablɔɖe la.” (Rom. 8:21) Yehowa ƒe amenuveve koe ana esia nava eme.

¹⁹ Mɔnukpɔkpɔ su mía si be míagblɔ ŋugbedodo dodzidzɔname si le Nyaɖeɖefia 21:4, 5 na ame siwo katã lɔ̃ be yewoaɖo to mí. Afi ma gblɔ be: “[Mawu] atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o. Nu siwo nɔ anyi tsã la nu va yi.” Eye Yehowa, ame si nɔ anyi ɖe fiazikpuia dzi la, gblɔ be: “Kpɔ ɖa! Mele nuwo katã wɔm yeyee.” Egagblɔ hã be: “Ŋlɔe, elabena nya siawo nye nyateƒenyawo kple nya vavãwo.” Ɛ̃, ne míeɖe gbeƒã nya nyui sia na amewo veviedodotɔe la, ke míele Yehowa dom ɖe dzi ɖe eƒe amenuveve geɖe la ta!